'Li tiġġieled it-traffikanti ma jfissirx li qed tindirizza d-disperazzjoni'

Fl-aħħar jiem u anke fl-aħħar sigħat, bdiet il-ħidma Ewropea permezz ta' operazzjoni militari fuq il-baħar konnessa ma' sorveljar u assessjar tat-traffikar ta' immigranti mill-Afrika ta' Fuq lejn l-Ewropa. Quddiem dan, iżda, il-mistoqsijiet li qed joħorġu b'mod partikolari minn aġenziji li jaħdmu b'risq id-drittijiet tal-bniedem u l-immigranti, kif ukoll akkademiċi li jirriċerkaw fuq l-immigrazzjoni, huma diversi.
Fi kliem rappreżenanti ta' għaqdiet u akkademiċi, ġlieda jew gwerra kontra t-traffikanti bl-ebda mod ma tfisser li tkun qed tiġġieled id-disperazzjoni li jkunu jinsabu fiha l-immigranti. Il-mistoqsijiet li qed jitqajmu huma dawk ta' 'fejn hi l-politika ta' immigrazzjoni fl-Unjoni Ewropea?".
Rappreżentant ta' għaqda mhux governattiva, meta kkuntattjat minn inewsmalta.com dwar din l-operazzjoni navali kontra t-traffikanti, qalilna li "m'iniex kontra din it-tip ta' operazzjoni. Imma hemm prijoritajiet. Nara li l-prijorità hi dik li s-sofferenzi tal-immigranti, l-isfruttament u r-riskji jibdew jiġu indirizzati. Billi tagħmel sorveljanza għat-traffikanti, is-sofferenzi tal-immigranti hemm se jibqgħu".
L-akkademiku Thomas Spijkerboer, li anki wettaq riċerka f'Malta fuq l-immigrazzjoni, ma jonqosx li jiddikjara li "l-Unjoni Ewropea  qed tgħid li t-traffikanti jisfruttaw id-disperazzjoni tar-refuġjati.  Imma li tiġġieled it-traffikanti ma jfissirx li qed tindirizza d-disprament li jinsabu fih fl-immigranti.  Fejn hi l-politika ta' immigrazzjoni Ewropea?"
Rappreżentant iehor li tkellem magħna qalilna li "ma nistax nifhem kif għal operazzjoni kontra t-traffikanti jkun hemm qbil fost il-pajjiżi Ewropej, iżda mbagħad għar-rilokazzjoni ta' immigranti hemm nuqqas ta' qbil. Din turik fejn waslet l-umanità tal-Unjoni Ewropea".
Intant il-Ministri tal-Affarijiet Barranin tal-Unjoni Ewropea, fosthom il-Ministru George Vella, iltaqgħu fil-Lussemburgu għal laqgħa tal-Kunsill tal-Ministri fejn ġiet diskussa l-implimentazzjoni tal-pjan li kien tressaq f'nofs Mejju mill-Kummissjoni Ewropea. Dak il-pjan kien fih miżuri intiżi biex jinqerdu d-dgħajjes li jintużaw mit-traffikanti  biex iġorru l-immigranti. Din l-operazzjoni ssejħet Eunavformed. Din tnediet ilbieraħ mill-Kunsill Ewropew.
Din l-operazzjoni se jkollha l-bażi tagħha f'Ruma, fejn għaliha kienu allokati kważi €12-il miljun.
L-operazzjoni hi komposta minn tliet fażijiet. L-ewwel fażi se tkun  sorveljanza u assessjar taċ-ċrieki tat-traffikar, waqt li fit-tieni fażi se jinqerdu d-dgħajjes suspettużi. It-tielet fażi se tkun komposta fi tfittxija u l-qbid ta' traffikanti.
minn inewsmalta.com