Kreattività minn żgħażagħ Żwieten u appoġġ minn
 residenti iwasslu għal rekord nazzjonali


Min jaf kemm hawn min jikkritika l-enerġija taż-żgħażagħ, jew jikkummenta b'mod xejn sabiħ fuq il-komportament taż-żgħażagħ illum. Imma dak li ġara fiż-Żejtun, jurik li r-realtà tkun ferm differenti jekk liż-żgħażagħ tiggwidahom u tinvolvihom biex l-enerġija jużawha biex tinħoloq xi ħaġa pożittiva. Xi ħaġa li tqajjem kuxjenza fost il-komunità. U fuq kollox toħloq xi ħaġa li titpaxxa tħares lejha.

Dan hu dak li ġara fiż-Żejtun permezz tal-ħidma tal-kunsilliera Stephanie Fenech.  Bl-għajnuna ta' ħafna żgħażagħ sar disinn fuq ħajt b'tappijiet tal-plastik ikkuluriti. Mhux biss inħoloq disinn il-ġmiel tiegħu, imma l-inizjattiva iddaħħlet fil-Malta Rekords bħala l-akbar disinn li uża tappijiet tal-plastik. 


Stephanie Fenech f'kummenti lil inewsmalta.com qaltilna li "kienet inizjattiva fi ħdan il-Kunsill Lokali taż-Żejtun. Jien għandi r-responsabbiltà tal-ambjent u l-isport. Għandna grupp ta' żgħażagħ attivi ħafna fi ħdan dan il-qasam u ridna nlaqqgħu il-krejattività taż-żgħażagħ, l-involviment tal-komunità u nqajjmu kuxjenza ta' riċiklaġġ."

Tenniet li "wara li ġiet diskussa miż-żgħażagħ stess ġiet l-ideja tal-mural magħmul mit-tappijiet tal-fliexken ġewwa Ġnien iż-Żgħożija. Post rikrejattiv fil-lokal li jilqa' fih tfal żgħażagħ u familji għax barra li fih bandli, hemm 2 grawnds u anke skate ramp professjonali."


Kompliet tgħid li "bdejna tlett xhur ilu niġbru t-tappijiet mingħand in-nies tal-lokal. Kellna rispons tremend. Fridna l-kuluri, bdiet titfassal bil-lapes u b'żebgha fuq sitt bords. U dawn l-ahhar ħmistax twaħħlu t-tappijiet wieħed wieħed b'vit kull tap. Inħoloq disinn sabiħ immens qisu mużajk. Aħna stess bqajna sorpriżi kif minn affarijiet li kienu se jintremew stajna nagħmlu dan kollu", qaltilna Stefanie Fenech.