Li titgħallem sengħa f'dan il-pajjiż saret tabu……

Emoraġija immorali fost
studenti tal-ħames sena
         -  il-Ministru Evarist Bartolo
Minn Victor Vella

"Emoraġija immorali. Din trid tkun trattata b'mod urġenti".  Dan iddikjarah il-Ministru għall-Edukazzjoni Evarist Bartolo b'riferenza għall-fatt li xejn inqas minn 25 fil-mija tal-istudenti tal-ħames sena tas-sekondarja meta jispiċċaw dik s-sena la jidħlu fid-dinja tax-xogħol u lanqas ikomplu jistudjaw.  Hu ddeskriva dan bħala "telf ta' studenti" u semma' l-bżonn ta' aktar edukazzjoni vokazzjonali.  Minn naħa tiegħu, l-Prim Ministru, Joseph Muscat iddikjara li t-tagħlim tas-snajja f'Malta sar tabu.
Il-Prim Ministru Joseph Muscat u l-Ministru Bartolo qalu dan waqt li indirizzaw konferenza li fiha ġie mniedi  rapport intitolat bħala l-Indiċi tal-Impjegabilità. Dan hu l-ewwel rapport tax-xorta tiegħu li sar f'pajjiżna. Dan ir-rapport janalizza s-suq tax-xogħol b'mod partikolari fejn jidħlu l-impjiegi li jkunu fihom dawk li jkunu għadhom kif iggradwaw.
Mir-rapport joħroġ li jekk wieħed jieħu dawk li ggradwaw mill-Università ta' Malta fis-sena 2012 isib li 74.1 fil-mija sabu impjieg fl-istess linja li studjaw fiha. Minn dawn kien hemm 65.2 fil-mija li kienu qed jaħdmu f'xogħol li jaqbel mal-linja tagħhom u li kienu kwalifikati għalih.  Kien hemm 8.9 fil-mija  li kienu qed jaħdmu f'xogħol li kien fl-istess linja li huma studjaw imma li huma jkollhom livell ta' edukazzjoni akbar minn dak rikjest għal dak ix-xogħol partikolari.
Kien hemm imbagħad 25.9 fil-mija tal-gradwat li kienu qed jaħdmu f'xogħol li mhux fl-istess linja li studjaw fiha.
Jekk imbagħad wieħed jieħu s-sena 2013 u jara x'ġara minn dawk il-gradwati li ggradwaw fis-sena 2012 u fejn kienu qed jaħdmu isib li dawk li kienu qed jaħdmu f'xogħol fil-linja li studjaw fiha żdiedu minn 74.1 fil-mija għal 79.4 fil-mija. Dawk li kienu qed jaħdmu f'xogħol li mhux relatat mal-linja tagħhom naraw li dan naqas minn 25.9 fil-mija għal 20.6 fil-mija.
Fost il-fakultajiet universitarji li kellhom l-akbar ammont ta' gradwati li kienu qed jaħdmu f'xogħol mhux relatat ma' dak li studjaw, hemm il-Fakultà tal-Arti li kellha 67.9 fil-mija ta' dawk li gradwaw fis-sena 2012 li kienu f'impjieg li mhux fil-linja ta' dak li studjaw fiha.  Il-Fakultà tal-Liġi u l-Fakultà tal-Kommunkazzjoni kellhom 66.1 fil-mija u 53.3 fil-mija tal-gradwati f'xogħol li mhux relatat ma' dak li studjaw għalih.
Fejn jidħlu l-istudenti li jiggradwaw mill-MCAST naraw li minn dawk li ggradwaw fis-sena 2012 kien hemm 53.5 fil-mija li kienu qed jaħdmu f'xogħol li kien fil-linja ta' dak li studjaw. Minn dawn kien hemm 41.5 fil-mija li kienu kwalifikati għal dan ix-xogħol u 12 fil-mija li kellhom kwalifiċi għola għax-xogħol li kienu qed jagħmlu. Kien hemm imbagħad 46.5 fil-mija li kienu qed jaħdmu f'xogħol li mhux fil-linja ta' dak li studjaw.  Sena wara dan il-persentaġġ niżel għal 44.6 fil-mija.
Il-Prim Ministru Joseph Muscat, waqt li ndirizza l-konferenza qal li r-riżultati pożittivi fl-istudju tal-Indiċi tal-Impjegabilità 2015 huma sinjal qawwi li s-sistema edukattiva u l-ekonomija tal-pajjiż qegħdin jaħdmu.
Saħaq li hi propju rabta intrinsika bejn il-prestazzjoni ekonomika tal-pajjiż u l-abbiltà ta’ persuna li ssib ix-xogħol li wasslet għal riżultati pożittivi fl-Indiċi tal-Impjegabilità (Employability Index 2015) imħejji mill-Korporazzjoni għat-Taħriġ u x-Xogħol. Tenna li d-dokument għandu jitqies bħala biċċa għodda li se tippermetti ppjanar aħjar għall-ġejjieni tal-pajjiż.
Huwa saħaq li l-iskop tal-istudju mhuwiex li jirrestrinġi s-sistema, iżda li jintuża bħala mezz li bih l-istituzzjonijiet edukattivi jimxu ‘l quddiem. Permezz ta’ dan l-eżerċizzju, iż-żgħażagħ se jkollhom l-opportunità jagħmlu għażla infurmata meta jiġu biex jiddeċiedu dwar il-futur tagħhom.
Il-Prim Minisru qal li l-istudju juri li s-sistema qiegħda taħdem iżda dan ma jfissirx li għandna nistrieħu fuq is-suċċessi li saru. Tenna li issa mhux biss qed naraw li student isib xogħol, iżda hu possibbli naraw li x-xogħol jilħaq l-aspirazzjonijiet u l-aspettativi tiegħu.
Il-Prim Ministru saħaq li mhemmx triq waħda biss għas-suċċess akkademiku u edukattiv. Huwa dover morali tal-pajjiż li joffri lil dawk l-istudenti b’abbiltajiet differenti, toroq oħra, bħalma huma s-snajja’ u edukazzjoni vokazzjonali oħra, sabiex huma wkoll ikunu suċċess f’ħajjithom. Bħalma jsir f’pajjiżi Ewropej oħra, jeħtieġ inwessgħu l-opportunitajiet għall-istudenti biex jimxu ‘l quddiem u ma joħorġux mis-sistema.
Mill-istudju ħareġ li l-investiment fl-edukazzjoni jwassal biex ikun hemm iktar opportunitajiet ta’ xogħol għall-istudenti, li dawn isibu xogħol fi żmien relattivament qasir u li jsibu xogħol li jixtiequ u li tħarrġu għalih. Huwa propju dan il-messaġġ li għandu jitwassal għand iż-żgħażagħ.
Flimkien mal-edukazzjoni, hemm il-ħtieġa għal iktar esperjenza f’xogħlijiet oħra. Is-sistema edukattiva għandha tibda tħares lejn iktar opportunitajiet biex tesponi l-istudenti għal xogħlijiet differenti. Għaldaqstant ta’ min iqis l-importanza tal-mobilità fil-qasam tax-xogħol.
Il-Prim Ministru kkonkluda billi qal li "l-ekonomija fl-aħħar mill-aħħar hija l-għerq ta’ dan is-suċċess -  L-edukazzjoni sservi biex ssaħħaħ is-sistema iżda l-ekonomija trid tibqa’ tikber u għaldaqstant il-Gvern se jkompli bl-impenn li mexa bih s’issa sabiex jissokta t-tkabbir ekonomiku" tenna l-Prim Ministru.
L-Assoċjazzjoni ta' Min Iħaddem (MEA)  qalet li mill-istudju joħroġ  li waqt li dawk li jkunu f'edukazzjoni terzjarja fl-Unjoni Ewropea jammontaw għal 37 fil-mija, ir-rata f'Malta hi ferm inqas u hi ta' 27 fil-mija. Mir-rapport joħroġ li waqt li r-rata tal-qgħad fl-Unjoni Ewropea hi ta' 10.7 fil-mija f'Malta hi ta' 3 fil-mija biss.
Minn L-ORIZZONT