Studenti bit-tielet għalliem f'erba? snin skolastiċi ... ġenituri jiktbu lill-Ministru

"Din hi t-tielet darba li f'erba’ snin skolastiċi tinbidlilhom l-għalliema". 'Diżappuntati u ixxukkjati li għalliema ma tixtieqx tgħallem ir-raba' sena tal-Primarja'. "Uliedna diżappuntati u inċerti".
Dawn il-kummenti inkitbu f'ittra li ġenituri bagħtu lill-Ministru għall-Edukazzjoni Evarist Bartolo, dwar sitwazzjoni mhux tas-soltu li inħolqot fir-raba' sena tal-iskola Primarja fil-Baħrija. Il-ġenituri fl-ittra tagħhom qalu li "wara l-ewwel laqgħa mal-Kap tal-Iskola, li saret nhar il-Ħamis 29 ta' Settembru, konna infurmati li l-għalliema l-ġdida tal-klassi tar-raba' sena kienet qed tistenna li tkun trasferita lejn skola oħra. Ir-raġuni li ngħatat lilna kienet li din l-għalliema ma tixtieqx tgħallem ir-raba' sena tal-Primarja.
Din kienet aħbar xokkanti għalina l-ġenituri tat-tfal. Għaliex uliedna qed jgħaddu minn dawn il-battikati kollha proprju fil-bidu ta' sena skolastika, meta dawn il-materji setgħu ġew indirizzati fil-vaganzi tas-sajf?" Il-ġenituri, fl-ittra tagħhom qalu ukoll li "irridu nenfasizzaw li din hi t-tielet darba li din il-klassi sfortunata se jkollhom bidla fl-għalliema f'sena waħda skolastika. Nemmnu li dan qed iwassal għal diżappunt u inċerezza fit-tfal."
Fl-ittra tagħhom il-ġenituri rrimarkaw li "minn nhar l-4 ta' Ottubru, l-għalliema kienet assenti u qed nassumu li mhix se tirritorna. Dan hu fi żmien li uliedna suppost li diġa bdew it-tagħlim tas-syllabus.
Din il-klassi issa hi bla għalliema bit-tfal ikollhom joqogħdu joħorġu u jidħlu mill-klassi. Dan hu inkwetanti għalina bħala ġenituri għax ir-raba' sena tal-primarja hi importanti peress li dawn l-istess tfal se jibdew fi żmien qasir jagħmlu l-eżamijiet tal-iskola." Huma talbu lill-Ministru jitratta l-każ b'urġenza.