Tnejn kuljum ... daqshekk qed imutu tfal mgħarrqin fil-Mediterran

Kien ftit aktar minn sena ilu meta fil-ġurnal madwar id-dinja rajna r-ritratt taċ-ċkejken Aylan mejjet fuq xtajta Torka fi vjaġġ ta' tama lejn l-Ewropa.
Ritratt li kien qajjem kuxjenza kbira dwar dak li jgħaddu minnu l-immigranti, it-tfal tagħhom u tfal mhux akkumpanjati fi vjaġġi lejn l-Ewropa.
Għaddew ix-xhur u t-tfal u adulti baqgħu imutu mgħarrqin. Riċerka li għadha kif saret minn Save the Children turi li bejn Jannar u s-26 ta' Settembru ta' din is-sena għerqu minn ta' l-inqas 600 tifel u tifla fil-baħar Mediterran.
Kevin Watkins, Kap Eżekuttiv ta' Save the Children fakkar kif fil-bidu ta' Ottubru ta' tliet snin ilu meta seħħet traġedja qrib Lampedusa, kienet dwiet l-għajta fost politiċi u esponenti oħra li dawk l-għarqiet mhux se jseħħu aktar. Hu iżda jgħid li r-realtà hi li minn dakinhar sa llum 10,400 persuna sabu qabarhom fil-baħar Mediterran. Jispjega kif din is-sena diġà xejn inqas minn 600 tifel u tifla, jiġifieri żewġt itfal kuljum.