Salvati 5,600 immigrant ... sitt persuni għebu fil-baħar fosthom tfal

F'seba' sigħat ġew salvati 1,954 immigrant mill-bastiment Argos u Dignity 1 ta' Medecins Sans Frontieres (MSF). B'kollox matul il-ġurnata tal-lum l-għaqdiet umanitarji u l-Gwardji tal-Kosta Taljani salvaw 5,600 immigrant.
Xi wħud mis-salvataġġi kienu drammatiċi għall-aħħar fejn kien hemm minn tal-inqas sitt persuni li għebu fil-baħar jew mietu mgħarrqin. Fost dawn mara ta' 23 sena u t-tarbija tagħha li kienet għadha mhux imwielda. Spikkat omm oħra li bdiet tfittex il binha ta' ħames snin fuq id-dgħajsa tas-salvataġġ, iżda dan ma kienx hemm.
F'wieħed mis-salvataġġi kien hemm dgħajsa tas-sajd li fuqha kien hemm 700 persuna. Madwar 170 minnhom kienu tfal mhux akkumpanjati.