'Għajjejt…mijiet mejtin u jgħidulek għaliex telqu min pajjiżhom?" 
       - Sab Farachi, immigranta

 

 

 

L-aħħar għarqa ta' immigranti, fejn hemm rapporti konfliġġenti ta' kemm kien hemm persuni abbord b'xi wħud jgħidu 700 u oħrajn jgħidu li kien hemm mad-950 persuna, ma naqsux li jqajmu diskussjoni fost l-immigranti u refuġjati f'pajjiżna. Din l-akbar traġedja fil-Mediterran kienet segwita bi traġedja oħra f'Rodi ta' dgħajsa li nkaljat u każ iehor ta' dgħajsa b'diffikultà. Imma l-immigranti Afrikani f'pajjiżna kif qed iħarsu lejn dawn it-traġedji?  Staqsejna lil Sab Farachi dwar dan.  Tgħidilna bla tlaqlieq li "għajjejt. Ikun hemm sitwazzjonijiet ta' mijiet ta' persuni mejtin, irġiel, nisa u tfal u jkun hemm min jgħidlek 'għaliex telqu minn pajjiżhom? Għax ma baqgħux hemm?".

Farachi tgħid li "inħossni ma niflaħx. Għajjejt ngħix f'pajjiż fejn qisu r-razzisti jaġixxu qisu xejn mhu xejn. Qabel tlaqt minn pajjiżi jien qatt ma kont naħseb li l-kulur tal-ġilda kien se jkun problema.  Għandna sitwazzjoni fejn 700 persuna tilfu ħajjithom. Qed insib nies li jgħiduli 'għax ma baqgħux f'pajjiżhom?  Xi kultant inkun nixtieq li nqum lil hinn minn dawn il-ħmir il-lejl tar-razziżmu u ninsa li xi darba kont hawn".  Farachi, tgħidilna li "jien nitkellem ħafna fuq l-immigrazzjoni. Qajjimt diversi kwistjonijiet. Hi ta' niket li tara traġedji bħal din li kellna fejn 700 jitilfu ħajjithom.  Tweġgħak li tisma' nies li jitkellmu b'mod li juru indifferenza lejn dawn it-traġedji u l-karbiet tal-immigranti. Hi ħasra li llum hawn min jaħseb hekk. Il-mistoqsijiet li jridu jsiru huma għaliex qed jirriskjaw ħajjithom u jagħmlu l-vjaġġ u jaqsmu l-baħar".

Tkompli tgħidilna li "hemm pajjiżi Ewropej li ma jridux jgħinu fis-salvataġġi, għax jaħsbu li b'hekk se jinkoraġixxu aktar immigranti jaqsmu lejn l-Ewropa.  Imma r-realtà hi li l-vjaġġi baqgħu isiru. Li jmutu 700 persunu mgħarrqin hi xi ħaġa inaċċettabbli".

"Għandi ħafna ħbieb Maltin.  Il-Maltin huma persuni li jħennu għall-proxxmu tagħhom. Nifhem li Malta hi pajjiż żgħir u ma tistax taċċetta lill-immigranti kollha.  Inħossni frustrata meta jiġu fuqi nies u quddiem traġedja bħal din jibdew jgħiduli 'imma għalfejn irriskjaw ħajjithom bil-vjaġġ bil-baħar?".

Intant f'Lulju li ġej, Sab Farachi, se terġa' tkun fil-kwartieri ġenerali tal-Ġnus Magħquda fejn se tattendi għal laqgħa  annwali tal-Ġnus Magħquda. Ma jonqosx li hemmhekk tqajjem il-kwistjoni tal-immigrazzjoni.

Minn L-ORIZZONT