Nuqqas ta' aċċessibilità fil-grawnd tas-Sirens

Kien 15-il sena ilu meta ddaħħlet f'pajjiżna l-liġi dwar l-aċċessibilità għall-persuni b'diżabilità.   Kienet liġi li għaddiet b'vot unanimu fil-Parlament. Minkejja dan, għadhom isiru lmenti dwar postijiet li mhumiex aċċessibbli għall-persuni b'diżabilità, anki f'postijiet li huma frekwentati regolarment minn persuni b'diżabilità. Każ simili qed iseħħ regolarment fil-grawnd tal-futbol tas-Sirens f'San Pawl il-Baħar. Persuna f'siġġu tar-roti qed tgħaddi minn martirju sħiħ kull meta jmur jara xi logħba futbol f'dan il-grawnd. Fil-fatt saret xi ħaġa kontinwa u donnha aċċettabbli li din il-persuna tintrefa' bis-siġġu tar-roti b'kollox minn diversi persuni biex tara logħba futbol.
Mhux magħruf sa issa jekk sarux ilmenti mal-Kummissjoni Nazzjonali Persuni b'Diżabilità, li fil-passat kienet ħadet diversi inizjattivi biex postijiet li ma kinux aċċessibbli, fosthom knejjes, ikunu aċċessibbli.  Minn L-ORIZZONT