Telfa għal Malta u telfa għall-istorja 

    - Joe Camilleri, eks Segretarju Privat tal-Perit Mintoff

Il-każ dwar twaqqiegħ tal-binja storika tal-Perit Mintoff f'Delimara, wasslet għal diversi reazzjonijiet b'mod partikolari minn persuni anzjani.  Mitlub jikkummenta dwar dak li qed iseħħ f'din il-binja li nbiegħet fl-aħħar xhur, Joe Camilleri l-eks Segretarju Privat tal-Perit Mintoff qalilna li "dik hi binja storika. Li jitwaqqgħu partijiet minnha hi telfa għal Malta u telfa għall-istorja". 

Joe Camilleri, li kien is-Segretarju tal-Prim Ministru Dom Mintoff bejn l-1971 u l-1979, qalilna li "l-Għarix kien ir-residenza privata tal-Perit Mintoff. Jien inqis li dan hu post storiku. Kif nafu jien, Mintoff kien jgħix il-ħajja privata tiegħu f'dak il-post. Fih kien iltaqa' ma' għadd kbir ta' kapijiet ta' Stati u ambaxxaturi.  Hemmhekk kien isir ħafna xogħol fl-interess ta' Malta.  L-Għarix għandu storja twila ħafna. Hi ħasra li dan il-post twaqqgħu partijiet minnu".

Hu enfasizza li "Gaddafi mar kemm il-darba hemm. L-ambaxxaturi tista' tgħid kollha. Anki l-Arċisqof Gonzi kien mar hemmhekk u kellu diskussjonijiet fil-privat mal-Perit Mintoff. Kienu jkunu diskussjonijiet bogħod minn għajnejn il-gazzetti u ħadd ma kien ikun jaf bihom". 

Intant fost il-kummenti li waslu għand L-ORIZZONT wara li xandarna l-aħbar li partijiet mill-Għarix bdew jitwaqqgħu, kien hemm għadd kbir minnhom li kien jgħidu li kien jagħmel sens li dik il-binja ssir mużew fuq il-Perit Mintoff.

"Għadna fiċ-ċans li forsi nsalvawha din id-dar. Kif ħadd ma ġiet f'rasu, inkluż l-awtoritajiet li dik id-dar tinżamm. B'monumenti biss fi pjazza mhux se turi verament min kien il-Perit Mintoff. Tinsab f'post li hu ftit bogħod minn park naturali. Ftit bogħod hemm fanal u fortizzi militari mitluqin. La darba jiġu rranġati dawn, flimkien ma' mużew għall-Perit, żgur li kienet tkun esperjenza unika għal min iżur il-post", qalilna resident minn Marsaxlokk.

L-Għarix kien inbiegħ għas-somma ta’ €250,000.  Ta' min jgħid li din id-dar kienet ukoll l-kawża ta’ proċeduri legali li l-familja Mintoff għamlet kontra l-Gvern Malti għall-kumpens talli inbena l-impjant tal-enerġija f'Delimara eżatt faċċata tagħha. Fl-2006 il-Qorti Kostituzzjonali kienet ikkonfermat sentenza tal-ewwel Qorti għall-kumpens ta’ €838,5074.