Perżut fuq il-Koran fil-kamra tat-talb fl-isptar Mater Dei

Kienet xena tal-mistħija dik li seħħet fil-kamra tat-talb fl-Isptar Mater Dei, fejn persuna jew persuni mhux magħrufa poġġew perżut ġol-Koran. Ħdejn il-Koran kien hemm ukoll karta b'ritratt ta' Fr Jacques Hamel, li nqatel f'attakk fi Franza. Mar-ritratt kien hemm miktub 'Vittma tal-Iżlam'.
Tkellmet dwar dan il-każ Sara Ezabe, li ddeskriviet dan l-att bħala li, "Min għamel dan l-att irrisponda għall-mibegħda billi uża l-mibegħda. Fr Jacques ma kienx vittma tal-Iżlam imma kien vittma tal-istupidità. L-istess stupidità li esperjenzajna lum. Hu pprietka r-rispett, l-għaqda u l-imħabba. Nistgħu biss nonorawh billi naġixxu b'dan il-mod,” qalet Sara Ezabe.

Fi stqarrija dalgħodu, il-Ministeru għas-Saħħa qal li filwaqt li juri d-dispjaċir u jesprimi solidarjetà mal-komunità Mussulmana, jikkundana bil-qawwa kollha dawn it-tip ta’ atti irresponsabbli magħmula minn nies kodardi. L-awtoritajiet fl-Isptar Mater Dei rraportaw dan il-każ lill-Pulizija.