'Jiċħduli l-identità Maltija kuljum'
      -   Sara Ezabe, tfajla Maltija b'reliġjon differenti

"Tfakkira lil dawk li  huma imitaturi tal-Maltin. Sara inti u oħrajn bħalek, qatt ma kontu Maltin u qatt mhu se tkunu Maltin. Imbilli  għandek ċittadinanza Maltija ma jfissirx li inti Maltija u mhux se tkun Maltija. L-isħarriġ fost il-poplu Malti qed juri li l-attitudni tal-Maltin lejn il-barranin qed tmur dejjem għall-agħar. Ittina xi tort?"
Dan il-kumment xxandar fl-aħħar sigħat fuq is-siti soċjali b'ritratt ta' Sara Ezabe, tfajla Maltija,imma li għandha reliġjon differenti u bħal ħafna oħrajn ġenituri ta' nazzjonalità differenti. Sfortunatament fl-aħħar snin, Maltin b'reliġjon differenti qed jispiċċaw fil-mira ta' kummenti b'mibegħda, fosthom dawk li 'intom m'intomx Maltin'. Apparti l-kummenti, ma tonqosx l-emarġinazzjoni li qed issir f'ħafna każi ta' Maltin b'reliġjon differenti.
"Hawn razziżmu kontra persuni li bħali huma Maltin"
Sara Ezabe, studenta Universitarja b'reliġjon differenti hi Maltija daqs kull wieħed u waħda minnha. Imma fil-ħajja ta' kuljum tagħha, issib b'mod regolari min ma jaċċettahiex b'dan il-mod. Kummenti dispreġġjattivi u li jweġgħu ma jonqsux.  Sara, quddiem dan kollu iżda kienet pro attiva u għamlet kampanja fl-Università biex titqajjem kuxjenza dwar dan.
Meta kkuntattjajnieha, Sara Ezabe qaltilna li, "Jien Maltija. Riċentament għamilt kampanja fl-Università biex titqajjem kuxjenza  fuq persuni Maltin li għandhom reliġjon differenti imma li m'humiex aċċettati bħala Maltin. Jien naħseb u din hi l-opinjoni tiegħi, li minn dak li nesperjenza jien ħafna mir-razziżmu qed isir lejn persuni li huma Maltin bħali."
L-aħħar minn sensiela ta' kummenti ebsin saru fis-sit 'Stop the invasion'.  F'dan is-sit ġie ddikjarat minn Joe Galea mis-Swieqi li, "Kuntrarju għall-opinjoni żbaljata ta' xi wħud, li takkwista ċittadinanza Maltija jew li titwieled Malta, ma jagħmilx lilek u lit-tfal tiegħek Maltin.  Dak ikun ifisser li inti tista' tibqa' hawn u tisforza lilek innifsek fuqna. Din turi li intii tkun qed tistħi mill-għeruq veru tiegħek."
Kummen iehor li nkiteb  kien jgħid li, "M'għandha l-ebda dritt issejjaħ lilha nfisha Maltija."
"Mibegħda li kultant inħossni nistħi"
Sara Ezabe stqarret magħna li ma felħitx tara dak li nkiteb fuqha.  Min-naħa tagħha, wieġbet b'nota qasira, fuq kollox pożittiva u li se tħares 'l quddiem.  Hi tgħid li, "B'diżappunt kbir,ngħid li jien niltaqa' ma' nies li ta' kuljum jgħidu kliem ta' mibegħda kontrija. Iċaħħduni mill-identità tiegħi. Ironikament din il-mibegħda ġġagħlni nħossni nistħi li jien ċittadina Maltija. Imma dan ifakkarni li hemm bżonn urġenti għal aktar kuxjenza u edukazzjoni.  Jien nitkellem f'isem dawk il-vittmi ta' razziżmu. Hi xi ħaġa li tweġġgħek meta taqra messaġġi bħal dak li nkiteb. Imma dan jintgħeleb b'sensazzjoni ta' kuraġġ biex jitkomplu l-vjaġġ biex tintrebaħ din il-ġlieda. Nirringrazzja lil dawk li jgħinuni u li jiċċelebraw id-diversità."
Naomi Bugre, li wkoll hi persuna Maltija, tiddikjara li, "Jien, Sara u ħafna oħrajn bħalna - aħna Maltin. Jgħid x'jgħid ħaddiehor, aħna nħobbu lil pajjiżna u se nitkellmu kontra dan it-tip ta' razziżmu." Minn inewsmalta.com