Siġar protetti maqtugħin u mirdumin

F'Malta għandna xejn inqas minn 34 sit li huma parti minn Natura 2000. Siti li b'kollox ilaħħqu għal kważi 14 fil-mija tat-territorju ta' Malta, u li l-iskop li għalih ġew dikjarati bħala siti ta' Natura 2000 hu biex jiġi protett l-ambjent naturali u  l-flora u l-fawna li tgħix fihom. Għalhekk azzjonijiet li permezz tagħhom ikun hemm tneħħija jew tqaċċit ta' flora u fawna f'dawn is-siti joħolqu kuntrast kbir. Għalhekk  li siġar protetti taż-Żnuber u tal-Għargħar - li hi s-siġra nazzjonali, f'żona ta' Natura 2000 jispiċċaw maħsudin minn wiċċ l-art, iqajjem ħafna mistoqsijiet anki dwar x'monitoraġġ qed isir fuq min qed imexxi dawn is-siti. Dawn is-siġar inħasdu minn wiċċ l-art f'żona li miftuħa għal pubbliku f'ħinijiet partikolari biss, liema żona tinsab f'Għajn Tuffieħa. Investigazzjoni ta' L-ORIZZONT, wasslet biex fis-sit f'Għajn Tuffieħa li jservi biex fih jitkabbru pjanti endemiċi Maltin - proġett li bla dubju ta' xejn hu wieħed importanti u ta' benefiċċju kbir għal ambjent naturali, sibna li kien hemm xejn minn erba' siġar li spiċċaw tqaċċtu minn wiċċ l-art.  Tnejn minn dawn is-siġar, tqaċċtu minn wiċċ l-art ftit tax-xhur ilu biss.  Dawn kienu siġar taż-Żnuber.  Mill-investigazzjoni tagħna, rajna li kien hemm ukoll żewġ siġriet tal-Għargħar - li hi s-siġra nazzjonali li tqaċċtu.
Sorsi li tkellmu ma' L-ORIZZONT, qalulna li "ninsabu diżgustati għall-aħħar kif minn dan is-sit tqaċċtu dawn l-erba' siġriet. Tnejn minnhom tqaċċtu fl-aħħar xhur, u ma jirriżultax li kien hemm sinjali ta' mard fuq l-istess siġar. Dawn kienu siġar taż-Żnuber li bħalhom għandhom diversi fit-toroq Maltin.  Dan hu sit li fih dawn it-tip ta' siġar m'għandhomx għalfejn jinqatgħu minn wiċċ l-art. Ma kienx il-każ li dawn kienu qrib siġar oħra, għax hemm id-distanza bejniethom. L-għeruq tagħhom għadhom ħajjin. Li tara li dawn is-siġar tqaċċtu f'sit li fih jitkabbru s-siġar endemiċi, iġġiblek għafsa ta' qalb.  Il-mistoqsija tiegħi hi jekk l-awtoritajiet qattx kienu infurmati li dawn is-siġar kienu se jinħasdu u jinqatgħu minn wiċċ l-art u jekk  sarux rapporti dwarhom u għaliex kienet se tittieħed dik l-azzjoni?".
L-istess sors qalilna ukoll li "jiddispjaċini ngħid li rajt ukoll siġra tal-ħarrub li kienet ġiet miżbura. Il-ħarrub tista' tiżbru, u biex dan tagħmel dan titlob permess.  Imma f'dan il-każ intalab permess?. Naħseb li wasal iż-żmien li l-awtoritajiet jaraw li jkun hemm aktar sorveljanza ta' xi jkun qed jiġri f'dawn is-siti".
Nistaqsu fuq l-erba' siġriet imqaċċtin… "jgħidulna ma nxandrux allegazzjonijiet"
Is-sit inkwistjoni li fihom tqaċċtu dawn l-erba' siġriet li L-ORIZZONT ra bgħajnejh stess il-mod kif baqa' biċċiet miż-żkuk tagħhom fl-art u għandna anki ritratti tagħhom kollha, hu mmexxi mill-Fondazzjoni GAIA. L-ORIZZONT għamel kuntatt mal-GAIA u staqsejnihom fuq il-qtugħ ta' dawn is-siġar. Minkejja li staqsejnihom b'mod speċifiku fuq dawn l-erba' siġriet u jekk iħossux li qed jagħtu messaġġ ħażin, huma qalulna ma nxandrux allegazzjonijiet foloz.
Il-mistoqsijiet tagħna kienu dawn:  "waslulna diversi ilmenti dwar qtugħ ta' siġar minn wiċċ l-art mill-Fondazzjoni Gaia f'Għajn Tuffieħa. L-ilmenti jgħidu li tqaċċtu żewġ siġriet tal-Għargħar li hi s-siġra nazzjonali u żewg siġriet taż-Żnuber.
X'inhuma l-kummenti taghkom dwar dan?  Għaliex tqaċċtu dawn is-siġar? Ma jidhrilkomx li dan hu messaġġ ħażin li organizazzjoni li suppost taħdem favur l-ambjent, hi stess tneħħi s-siġar protetti mill-post tagħha? Tlabtu permess għal qtugħ ta' dawn is-siġar protetti?".
Il-Kap Eżekuttiv tal-Fondazzjoni GAIA, Rudolf Ragonesi wieġeb għal dan id-domandi u qalilna li "l-allegazzjonijiet li inti aċċennajt għalihom huma foloz u libellużi, u parti minn strateġija insidjuża sabiex titfarrak ir-reputazzjoni tajba tal-Fondazzjoni li tiffoka tant fuq is-siġar fil-gżejjer Maltin, u dan kollu għax ħadna pożizzjoni kontra l-kaċċa fir-rebbiegħa. Din ir-reputazzjoni tajba ilha tikber minn mindu il-proġett ta' Għajn Tuffieħa ġie imniedi mill-Ministru tal-Ambjent George Vella fl-1996. F'20 sena din ir-reputazzjoni qatt ma ġiet sfidata qabel, minn ebda amministrazzjoni jew sezzjoni tal-pubbliku".
Hu sostna li "bħala parti mill-pjan tal-immaniġġjar ta' Għajn Tuffieħa, il-Fondazzjoni tieħu ħsieb li tiżbor is-siġar, kif jagħmlu l-entitajjiet kollha li jieħdu ħsieb is-siġar. Mingħajr żabra, is-siġar stess ibatu, aktar u aktar jekk ikunu viċin xulxin, u ħafna drabi siġra waħda li tkun aktar b'saħħitha u matura tkun qed toqtol jew taffetwa b'mod negattiv, is-siġar ta' madwarha. Il-Fondazzjoni tiżbor is-siġar bil-permess li jinħareġ mill-Mepa. In-nuqqas ta' żabra jista' anke jwassal sabiex jimirdu s-siġar, speċjalment meta ikunu f'xulxin u jbatu minn nuqqas ta' arja friska u dawl suffiċjenti. F'każ ta' mard, li huwa prevalenti ħafna fil-gżejjer tagħna, bħal ngħidu aħna fil-każ tas-siġar tat-tin, tat-tut, tal-palm u tal-ħarrub, irid ikun hemm attenzjoni speċjali biex ma jkomplix jixxerred il-mard".
Rudolf Ragones enfasizza li "ta' min iżid illi s-siġar kollha ħlief wahda, u ħlief il-qasab, li jinsabu fiċ-ċentru tal-Gaia, Għajn Tuffieħa, tħawlu kollha mill-Fondazzjoni stess bejn 10 u 15 il-sena ilu. Jekk taraw ir-ritratti ta' 20 sena ilu, taraw illi il-post kien miżbla mingħajr siġar, u kien impjant tad-drenaġġ imwarrab. Għalhekk ma nistgħux nifhmu kif wieħed jista' jasal għall-konklużjoni illi m'aħniex qegħdin nieħdu ħsieb dawn is-siġar li ħawwilna aħna stess, u li jinżabru bil-permess meħtieġ, kif ingħad. Il-post illum inbidel minn impjant tad-drenaġġ għal ġawhra ta' ġnien. Nispera illi ċċarajna il-pożizzjoni tagħna, kif diga' kellna okkażjoni niċċaraw fi stqarrija tagħna 3 ġimgħat ilu, u li ma jixxandru ebda allegazzjonijiet foloz u libellużi fil-konfront tal-Fondazzjoni Gaia, li qed tagħmel sagrifiċċji kbar sabiex l-ambjent ta' dan il-pajjiż, jiġi protett. Għandna kull fiduċja illi intkom qed tapprezzaw ix-xogħol siewi fuq manteniment ta' siġar li qegħdin nagħmlu, kif japprezzaw in-nies kollha ta' rieda tajba li jżuru l-art ta' Għajn Tuffieħa".
"Is-siġra mietet snin ilu"
Wara li rċevejna dik ir-risposta L-ORIZZONT bagħat wieħed mill-erba' ritratt li juru l-erba' siġriet imqaċċtin, lil Fondazzjoni GAIA u tlabniehom jikkummentaw dwaru.
Għal dan ir-ritratt, Rudolf Ragonesi qalilna li "z-zokk li jidher fir-ritratt mehmuż fl-email tieghek huwa ta' siġra li kienet mietet ħafna snin ilu u għalhekk kienet tneħħiet. Jidhirli li kienet siġra taż-Żnuber, iżda qed noqgħod fuq il-memorja, peresss illi dan seħħ ħafna snin ilu. Nixtieq nistieden il-gazzetta tiegħek sabiex tibghat reporter li jista' jiltaqa' miegħi u jara sew iċ-ċentru tagħna, u l-marki taż-żabar tas-siġar, kif ukoll taz-zokk indikat fir-ritratt, sabiex jieħu stampa ċara tal-pożizzjoni kollha".  Minn L-ORIZZONT