Il-ġlieda kontra l-ISIS: Tliet bażijiet qrib Malta indikati bħala ċentru ta' tmexxija

Bil-Libja tibqa' ma tiffurmax Gvern ta' unità u għalhekk il-pjani biex ikun hemm intervent militari fil-Libja qed jinżammu lura, kollox qed jindika li tlett bażijiet qrib ta' Malta qed ikunu indikati bħala li se jkunu ċentru ta' tmexxija ta' dan l-intervent. Il-bażi ta' Sigonella, il-bażi ta' Trapani Birgi u Pantellerija se jkunu użati biex minnhom jiġi kkordinat dan l-intervent. Fl-aħħar jiem kienu diversi dawk ir-rapporti li indikaw li ta' kuljum minn żoni fi Sqallija qed jittajru ajruplani ta' spjunaġġ li qed jaraw u janalizzaw żoni fil-Libja.

Rapporti mill-Italja qed jgħidu li Sigonella se tkun qed isservi bħala bażi għall-ajruplani ta' spjunaġġ u ta' trasport, dak ta' Trapani se jservi lill-ajruplani militari Taljani u dawk ta' pajjiżi oħra, waqt li f'Pantellerija se jkun hemm il-helikopters imponenti Ch46.

Fi Trapani apparti ajruplani militari, ftit jiem ilu ġew stazzjonati erba' ajruplani tat-tip Amx.

Ta' min jgħid li fl-aħħar sigħat, il-Prim Ministru Matteo Renzi ċaħad dak li kien suġġerit mill-Ambaxxatur tal-Istati Uniti f'Ruma li l-Italja tista' tibgħat sa 5,000 suldat fil-Libja. Fi kliem Renzi, il-kundizzjonijiet fil-Libja għadhom mhumiex adatti biex isir intervent militari. Renzi kien qed iwieġeb il-kummenti li għamel l-ambaxxatur John Philips mal-ġurnal Corriere della Sera.  L-ambaxxatur Philips iddikjara li, "Irrid li Tripli tkun sigura u niżguraw li l-ISIS ma tkunx tista' tattakka".

L-Italja qed taħdem flimkien ma' pajjiżi oħra tal-Punent u n-Nazzjonijiet Uniti biex tikkonvinċi liż-żewġ gvernijiet Libjani  biex joħolqu gvern ta' unità u b'hekk jibdew jiffukaw kif se jikkumbattu l-Istat Iżlamiku. 

Bi Franza tagħmel titjiriet ta' sorveljanza, qed ikun rappurtat li fil-Libja hemm forzi speċjali tal-Istati Uniti, Franza u anke tar-Renju Unit.  Uffiċjali Taljani kienu rrappurtati jgħidu li l-Italja bagħtet xejn inqas minn 40 aġent sigriet fil-ġimgħat li għaddew u magħhom hemm 50 suldat speċjali. 

Biss, l-Italja qed tirreżisti l-pressoni biex tħalli ajruplani u drones armati fuq it-territorju tagħha biex dawn jattakkaw l-Istat Iżlamiku fil-Libja. Qed ikun rappurtat minn diversi mezzi tal-midja li l-Italja qed tipprova tikkonvinċi lil dawn il-pajjiżi biex jillimitaw l-azzjoni tagħhom sakemm ikun hemm gvern ta' unità fil-Libja.

Irid jingħad li Sabratha hi waħda mill-ibliet Libjani li nħakmet mill-militanti tal-Istat Iżlamiku.

Ritratti Ian Noel Pace