Is-Sallur...skopert li mhumiex 'maqbudin' fil-Mediterran

Kienet meqjusa bħala xi ħaġa fattwali fost esperti marittimi li s-Sallur fil-Mediterran hu maqbud f'dan il-baħar. B'maqbud xi esperti kienu qed jifhmu li dan ma kellux il-kapaċita li joħroġ barra mill-Istrett ta' Ġibilta biex imur ibejjet.  Imma stħarriġ li sar minn xjenzati internazzjonali temmew għal kollox dan id-dibattitu dwar jekk  is-Sallur hux maqbud fil-Mediterran. Minn din ir-riċerka ħareġ li filfatt is-Sallur qed jirnexxielu joħroġ mill-Mediterran u jasal saż-żona magħrufa bħala 'Sargasso'.

Ir-riċerka estensiva saret minn Elsa Amilhat u tim mill-Universita ta' Perpignan flimkien ma' sajjieda fil-Mediterran u riċerkaturi minn  Cefas tar-Renju Unit, DTU Aqua tad-Danimarka u mill-Universita tax-Xjenzi Agrikoli  ta' l-iSvezja. Din ir-riċerka ġiet pubblikata f'għadd ta' siti xjentifiċi.

Dan it-tim waħħal 'satellite trackers' ma tmien salluriet li inqabdu f'Salses Leucate u Gruissan fin-nofsinhar ta' Franza. Xhur wara li dan intelqu lura fil-baħar, dawn it-'trackers' ikkomunikaw il-pożizzjoni tagħhom. Permezz ta' din l-informazzjoni setgħu jaraw l-immigrazzjoni li għamlu dawn is-Sallur.

Instab li s-Sallur fil-Mediterran kien qed imur fis-Sargasso li jinsab f'Oċean Atlantiku  biex ibejtu. Dan ifisser vjaġġ ta' xejn inqas minn 8,000 kilometru.

Is-sallura minn dejjem kienet imfittxija fil-gastronomija Ewropea, mill-Baħar l-Abjad sal-Baħar l-Iswed. Għalhekk ilha għal żmien twil soġġetta għal trobbija tradizzjonali estensiva li tikkonsisti fiż-żamma ta’ salluri maqbudin ġo għadajjar. Il-vallikultura Taljana ilha għal żmien twil iċ-ċentru tal-produzzjoni tas-Sallura fl-Ewropa. Iżda l-ispeċi qiegħda tonqos. Hija mniżżla bħala mhedda serjament fuq il-lista l-Ħamra tal-Unjoni Internazzjonali għall-Konservazzjoni tan-Natura (IUCN) u mis-sena 2007, tinsab fi pjan Ewropew ta’ rkupru. Minħabba li fil-preżent is-Sallura ma tirripproduċix meta tkun maqbuda, il-produzzjoni tal-akkwakultura tiddependi fuq il-qbid taż-żgħar li jkomplu jikbru fi trobbija intensiva, f’sistemi ta’ riċirkolazzjoni, l-aktar fl-Olanda, fid-Danimarka u fl-Italja.