Mixja biex tfakkar l-akbar għarqa ta' immigranti…plakka li tfakkar 850 persuna li tilfu ħajjithom u l-identità

Dik li hi meqjusa bħala l-akbar traġedja ta'  għarqa ta' immigranti fil-Mediterran, liema traġedja kienet seħħet f'April tas-sena li għaddiet, issa se tiġi mfakkra permezz ta' mixja. L-immigranti mgħarrqin li ħafna minnhom għadhom maqbuda fid-dgħajsa u l-24 immigrant mejtin li ddaħħlu u ndifnu f'Malta se jkunu mfakkrin bi plakka kommemorattiva. Il-mixja se tibda mill-Belt Valletta u se tispiċċa fiċ-ċimiterju tal-Addolorata.  Il-mixja se ssir il-Ħadd 17 ta' April. 

Sa issa ma kien hemm ebda inizjattiva f'Malta biex fil-post fejn hemm midfuna dawn l-24 persuna mhux identifikati, ikun hemm xi tip ta' plakka li tfakkar dak li ġara. Minħabba f'hekk se ssir din il-mixja u titwaħħal il-plakka.

Ta' min jgħid li dakinhar li seħħ il-funeral, inewsmalta.com kien irrapporta dwar messaġġi li ntbagħtu minn ċittadini Maltin.  Fost dawk li spikkaw kien hemm il-messaġġ li kien jgħid:  'Għażiż ħija - oħti.  Jiddispjaċini li ma wasaltx Malta. Niskuża ruħi li xi wħud min ħuti Maltin donnhomn ħadu pjaċir li ma wasaltx. Niskuża ruħi aktar għax xi wħud ma apprezzawx ħajtek għax int iswed jew sewda. Żgur li mhux i-kaz fejn qiegħed jew qiegħda issa għax il-Mulej iħobbok kif int. Nitolbok iddur lejn il-Ħallieq li issa int qed tara u tgħidlu jgħinna biex inżommu lil ħutek milli jegħrqu".  

Ritratt: Ian Noel Pace