Baraxx ta' insulti lill-Imġarrin għax temgħu lir-refuġjati

Kull min attenda l-ikla li ġiet organizzata fl-Imġarr għal persuni li jgħixu waħidhom u għal grupp ta' refuġjati li jgħixu f'pajjiżna, jgħidlek bl-atmosfera pożittiva li kien hemm. Hi x-xewqa ta' għadd kbir ta' Mġarrin li din l-inizjattiva tibqa' ssir kull sena fl-okkażjoni tal-festa.

Din l-ikla saret fuq inizjattiva tal-Kummissjoni Djakonija bl-appoġġ kollu tal-Kappillan ħabrieki Dun Kalċidon Vassallo. Imma l-ikel mogħti lir-refuġjati ma niżilx tajjeb ma' kulħadd. Minkejja li ġew mitmugħa persuni bi status ta' ażil wara li ħarbu gwerer u persekuzzjoni f'pajjiżhom, fuq is-siti soċjali kien hemm baraxx ta' insulti, b'ħafna minnhom ikunu diretti lejn l-Imġarrin.

Fost dawk li kkummentaw kien hemm Jo Meli li ddeskriva lil dawk li organizzaw l-ikla bħala 'ċwieċ'. Hu kiteb saħansitra li, “Daqshekk mort l-Imġarr.”

Mona Borg kitbet li, "Lir-refuġjati jagħtu. Ara veru l-Maltin lagħqin.” Clive Grech kiteb li, "Il-Malti dejjem lagħqi tal-barrani. Mur pajjiżhom ħa jitimgħuk." Christ Colombo kien tal-fehma li, "Aħna nsara rridu nidhru hux mal-barranin. Ara mal-Malti le. Kiluna u ma nafux.”

Gino Cutajar Forte kkummenta li, "Il-Malti ħanin mal-barrani. Qatt ma jitgħallem”, filwaqt li Malcolm Seychell iddeskriva lil dawk li offrew l-ikla bħala 'ħmir'.

Trudy Vella qalet, “X'ma jiġux bi ħġarhom”, filwaqt li Diana Meli staqsiet, “Għax ma marrux jagħtu l-ħwejjeġ lit-tfal fl-istituti jew jibagħtu ikel fid-djar fejn hemm nisa msawta?”