Li titfa' immigranti f'detenzjoni fuq saħħa hi kontra d-drittijiet tal-bniedem - Neil Falzon, Aditus

L-istrateġija l-ġdida dwar il-wasliet ta' immigranti qed tintlaqa' b'mod pożittiv minn għadd ta' għaqdiet nongovernattivi li qed iqisuha bħala pożittiva li "spiċċat id-detenzjoni amministrattiva b'mod awtomatiku" u issa se tiddaħħal sistema ta' detenzjoni bbażata fuq każijiet individwali. Biss fl-istrateġija hemm punt li qed jitqies bħala 'stamb' ħafna u dan hu dak li immigranti jistgħu jkunu detenuti fuq każijiet marbutin ma' saħħa, anke jekk ikun għad m'hemmx fatti ċari fuq l-istess kundizzjonijiet, jew suspetti raġjonevoli.

inewsmalta.com għamel kuntatt ma' Neil Falzon mill-Fondazzjoni Aditus u staqsejnieh b'mod speċifiku dwar jekk il-parti dwar saħħa u detenzjoni hix qed tikser id-drittijiet umani, b'mod partikolari l-Konvenzjoni Ewropea għad-Drittijiet tal-Bniedem li waqt li tgħid li persuni jistgħu jkunu detenuti minħabba li jkollhom mard infettiv, tgħid li dan għandu jsir skont proċeduri stabbiliti.

Neil Falzon qal lil inewsmalta.com li "biex immigrant jitpoġġa f'detenzjoni minħabba mard infettiv, hemm proċeduri ristretti ta' kif u meta dan għandu jsir. Ma tistax taqbad dgħajsa sħiħa u titfagħhom f'detenzjoni minħabba suspett ta' xi każ partikolari bħat-tuberkolożi.  Meta immigrant tpoġġieh f'detenzjoni fuq każ ta' saħħa irid ikun hemm suspetti raġonevoli. Qisna qed nibqgħu taħt l-impressjoni li l-immigranti qed iġorru mard infettiv.  Dan narawh li hu f'kunflitt ċar mal-Konvenzjoni għad-Drittijiet tal-Bniedem tal-Unjoni Ewropea, fejn artiklu 5 isemmi dan il-punt."  

Ta'  min jgħid li l-Konvenzjoni għad-Drittijiet tal-Bniedem tal-Unjoni Ewropea  tgħid li "kull persuna għandha d-dritt għal-libertà u s-sigurtà. Ħadd m'għandu jkun imċaħħad mil-libertà tiegħu ħlief meta persuna tingħata sentenza mill-Qorti. L-arrest jew detenzjoni ta' persuna tista' ssir għal nuqqas ta' konformità ma' ordni tal-Q'orti, jew biex persuni tittieħed quddiem l-awtoritajiet legali kompetenti fuq suspetti raġonevoli li tkun wettqet offiza.  Detenzjoni tista' ssir biex tippreveni t-tixri ta' mard infettiv".