Klinika mobbli tkun Malta f'Ġunju…se tintuża għal wasliet ta' immigranti

Kemm il-darba kien hemm min innota ċerti nuqqasijiet fil-post fejn ġieli iddaħħlu immigranti li jkunu għadhom kif ġew salvati. Dan l-aktar meta wieħed iqabbel il-mod ta' kif jintlaqgħu immigranti li ddaħħlu fi Sqallija, fejn ħafna drabi fuq il-post ikun hemm kliniċi u tobba. Issa wara xhur ta' stennija f'Malta ukoll se jkun hawn klinika mobbli, li se tkun tista' tintuża biex tagħti servizz lill-immigranti li jkunu għadhom kif waslu Malta. Jidher li din il-klinika mobbli se tasal f'pajjiżna f'Ġunju li ġej.

Ta' min jgħid li f'April tas-sena 2015 kien tħabbar li se tingħata din il-klinika mobbli. Dan kien tħabbar mill-Gran Mastru tal-Ordni, Fra Matthew Festing waqt żjara f'Malta.

Il-Ministru għall-Affarijiet Barranin, George Vella, fi tweġiba Parlamentari għal mistoqsija tad-Deputat Laburista Silvio Schembri,  qal li fiż-żjara tal-Gran Mastru kien tħabbar il-fatt li jista' jkun hemm kooperazzjoni bejn Malta u l-Ordni fil-qasam umanitarju b'mod speċjali fejn jidħlu l-immigranti. 

Fi tweġiba Parlamentari intqal li "għaldaqstant ġew meqjusa diversi possibilitajiet ta’ proġetti li jistgħu jaħdmu fuqhom iż-żewg naħat. Fil-fatt, wara iż-żjara issukktaw it-taħdidiet mal-Ordni li wasslu għall-ftehim biex Malta tiġi mogħtija klinika mobbli u vettura oħra biex tkun tista’ tingħata l-ewwel għajnuna b’mod dinjituż u professjonali f’każijiet umanitarji urġenti bħal fil-każ ta’ wasla ta’ immigranti, fuq il-post tal-wasla. Il-klinika mobbli hi mistennija li tasal f’Malta fl-ewwel nofs tas-sena 2016."

Allarmanti l-ammont ta' immigranti fil-Libja…nippreparaw biex ngħinu l-Italja u l-Malta

Intant il-President tal-Kunsill Ewropew, Donald Dust waqt li indirizza l-Parlament Ewropew qal li "irridu niftakru li r-rotta li l-immigranti qed jużaw fil-Balkani biex jidħlu fl-Ewropa mhix l-unika waħda.  Pajjiżi oħra, mhux il-Greċja u l-Bulgarija biss,  se jkunu qed jistennew il-koperazzjoni u s-solidarjetà. Qed nitkellem fuq ir-rotta li l-immigranti jużaw fiċ-ċentru tal-Mediterran, mil-Libja lejn l-Ewropa.  L-ammont ta' persuni li jistgħu jkunu immigranti fil-Libja hu allarmanti.  Dan ifisser li rridu nkunu ppreparati biex ngħinu u nuru solidarjetà ma' Malta u l-Italja, jekk dawn jitolbu dan.  Mhux se jkun possibbli li sempliċiment nikkuppjaw is-soluzzjonijiet  li ġew applikati għall-Balkani.  Dan għax il-Libja mhix it-Turkija.  Fuq ir-rotta fil-Balkani ħadna azzjoni tard ħafna u din waslet għal għeluq tal-fruntier. Hu għalhekk li l-koperazzjoni ma' Malta u l-Italja llum hi kundizzjonijiet biex nevitaw dan ix-xenarju fil-futur".

Hu spjega li l-Unjoni Ewropea hi maqsuma fuq dawk li jridu li tiżdied is-sigurtà dawk li jridu li jkun hemm aċċess u tolleranza.  Jispega li l-Unjoni Ewropea qed tibni sintesi ta' dawn iż-żewġ fatturi. Hu ddeskriva dak li qed isir bħala l-akbar suċċess fl-aħħar xhur.  Qal li din is-sintesi se tkun waħda mill-battalji tal-futur fl-Unjoni Ewropea.

'Ejja ma nibżgħux mit-tensjoni. L-Ewropej għandhom bżonn jibqgħu tolleranti imma fl-istess ħin iridu jkun iebsa u effettivi.  It-tensjonijiet huma xi ħaġa naturali. Il-fenomenu Ewropej hu l-abbiltà li jittrasfroma dan f'enerġija pożittiva. Dan il-fenomenu għandu jkun priservat" sostna Tusk.

minn inewsmalta.com