Reazzjonijiet għal kritika lejn Malta dwar l-għomor il-ħabs

Wara li l-Kumitat tal-Kunsill tal-Ewropa għall-Prevenzjoni tat-Tortura sejjaħ lil għadd ta' Stati fosthom lil Malta biex jirrevedu l-proċeduri tagħhom dwar sentenzi ta' għomor il-ħabs u l-opportunità biex dawn l-istess priġunieri f'xi żmien jew ieħor jinħarġu mill-ħabs, diversi organizazzjonijiet li jaħdmu mal-priġunieri esprimew il-qbil tagħhom ma' dak li ntqal u sejħu biex Malta tibdil il-liġi.

inewsmalta.com, tkellem ma' Prison Fellowship Malta, ma' l-Għaqda Mid-Dlam għad-Dawl u anke ma' Charles Miceli, dawn urew li jaqblu li għandu jkun hemm tibdil fil-proċeduri f'Malta, biex dawk b'għomor il-ħabs ikunu jistgħu jikkwalifikaw għall-parowl. Jirriżulta li saru għadd ta' talbiet biex priġunier b'għomor il-ħabs jinħareġ għal siegħa, iżda għal dan qatt ma kien hemm rispons.

'Ridna li Walid Ben Ali jinħareġ għal siegħa imma bqajna bla risposta"

Mark F Vella Ċermen ta Prison Fellowship Malta meta kuntattjat minn inewsmalta.com qalilna li "nemmen li fil-każ ta' persuni li jkunu qed jiskontaw sentenza ta' għomor il-ħabs ħaqqhom li wara li jkunu skontaw numru ta' snin il-ħabs bħal 20 jew 25 sena ikunu jistgħu japplikaw għall-prison leave. Dejjem jekk ikollhom rekord ta' imġieba tajba fil-ħabs. Prison Fellowship Malta diversi drabi talab lill-Faċilità Korrettiva ta' Kordin biex il-priġunier Wahid Ben Ali li diġa skonta 28 sena l-ħabs joħroġ mill-ħabs skortat għal siegħa u jmur ma' familja ta' voluntiera ta Prison Fellowship Malta. Dejjem bqajna bla risposta. Aħna ilna snin ngħinu fil-bżonnijiet materjali ta' Wahid li ma jkollux flus biex jixtri l-bżonnijiet tiegħu inkluż mediċini", sostna Mark Vella.

"F'Mejju suppost tingħata sentenza…lesti nmorru fil-Qorti Ewropea"

Minn naħa tagħha l-Fondazzjoni Mid-Dlam għad-Dawl laqgħet b’sodisfazzjon dak li fih ir-rapport maħruġ mill-Kumitat Ewropew għall-Prevenzjoni tat-Tortura. Intqal li "f’dan ir-rapport dan il-kumitat qiegħed jitlob lil xi stati membri li għad għandhom fuq il-kotba tagħhom sentenzi ta’ għomor il-ħabs mingħajr ma’ jkun hemm l-ebda tama li xi darba dak li jkun joħroġ mill-ħabs. Dan il-kumitat qiegħed jgħid li hu inuman li titfa' persuna l-ħabs għal ħajjitha mingħajr ma din għandha prospetti li terġa' toħroġ. Dan ma jfissirx li kull priġunier għandu jinħareġ f'xi stadju jew ieħor, imma pjani individwali huma essenzjali biex jevalvaw fuq il-bażi ta' kas b'kas, dwar jekk u meta dak il-priġunier jista' jirritorna lura fis-soċjetà". F’parti oħra r-rapport jgħid li, “nafu mill-esperjenza li priġunieri b'sentenza ta' għomor il-ħabs mhux neċessarjament aktar perikolużi minn priġunieri oħra." Dan jaqbel ukoll ma’ diversi sentenzi tal-Qorti Ewropea tad-Drittijiet tal-Bniedem li jgħidu li tali sentenzi jmorru kontra Artiklu 3 tal-Konvenzjoni tad-Drittijiet tal-Bniedem. Din kienet minn dejjem ukoll l-opinjoni tal-Fondazzjoni Mid-Dlam ghad-Dawl li matul iż-żmien tkellmet dwar dan f'ħafna okkażjonijiet u ma' ħafna persuni. Bħhalissa fil-qorti hemm kawża li, bl-għajnuna ta' Mid-Dlam ghad-Dawl, qiegħed jagħmel priġunier li għandu sentenza ta' għomor il-ħabs. Wara stennija ta’ kważi sena nittamaw li tingħata fis-seduta li jmiss fil-bidu ta' Mejju. Madankollu il-gvern jista' jieħu l-parir ta' dan il-kumitat u jagħmel il-bidliet meħtieġa fil-liġi. Fl-opinjoni ta’ Mid-Dlam għad-Dawl dan jista’ jsir billi dawk li qegħdin il-ħabs b’sentenza ta’ għomor ikunu nklużi mal-priġunieri l-oħrajn u jkunu eliġibbli għall-Parowl".

L-istess għaqda qaltilna li qed jistennew is-sentenza li mistennija tingħata f'Mejju fejn intqal lilna li jekk tintilef l-istess għaqda lesta tmur quddiem il-Qorti Ewropea. 

L-attivist soċjali, Charles Miceli, meta kuntattjat minn inewsmalta.com qalilna li "meta suppost qed ngħixu f’pajjiż iċċivilizzat, meta suppost aħna Kattoliċi u qed ngħixu fis-Sena tal-Hniena, niskanta kemm hawn nies għadhom jgħixu fit-Testment l-Antik. U għalihom l-unika mezz ta’ ġustizzja huwa ta’ għajn għal għajn u s-sinna għal sinna. Inħoss dehxa f’ġismi kull darba li xi ħadd jintbagħat għomru l-ħabs. Għax għalija dik hija agħar minn sentenza tal-mewt. L-aktar meta nsir naf li mal-għomor qed norbtu wkoll perjodi fejn persuna tagħmel perjodu maqfulha waħedha. Tortura mill-aktar kiefra. Hemm bżonn li l-Gvern li jemmen mhux biss fil-ġustizzja soċjali imma wkoll fil-ġustizzja, ma jibqax iħares lejn il-voti u lejn l-opinjoni pubblika. Irridu nuru lid-dinja li aħna iċċivilizzati bis-serjetà. Jekk ħa nżommu s-sentenza ta’ għomor il-ħabs għal n-nies li jagħmlu żbalji kbar nagħtuhom iċ-ċans ta’ parowl, ngħidu aħna wara 20 sena. Hekk ma nkunux qed noqtlu t-tama. Hekk ma nkunux qed nidfnuhom ħajjin."

“Irridu naraw il-Qorti x’se tgħid” - Il-Ministru Owen Bonnici 

inewsmalta.com talab ir-reazzjoni tal-Ministru għall-Ġustizzja, Kultura u Gvern Lokali Owen Bonnici dwar dan. Waqt li sostna li ma kinitx l-ewwel darba li ħarġu dikjarazzjonijiet ta’ din ix-xorta, huwa qal li jinsab infurmat li hemm każi kostituzzjonali pendenti fil-Qorti dwar dan il-każ. Għaldaqstant, il-Ministru Bonnici qal li wieħed irid jistenna u jara l-Qorti x’se tgħid. 

minn inewsmalta.com