'Bil-ħitan li qed jinbnew fl-Ewropa għall-immigranti qed jinħoloq apartheid ġdid' - L-Arċisqof

L-Arċisqof, Charles J. Scicluna waqt li indirizza simpożju lbieraħ saħaq li bil-ħitan li qed jittellgħu fl-Ewropa qed jinħoloq stil ġdid ta’ apartheid. L-Arċisqof qal li wieħed għandu jerġa' lura mill-idea li wieħed għandu jibni l-ħitan biex pajjiż jew stat iħossu iktar sigur.

L-Arċisqof irrefera għall-Eżortazzjoni Apostolika tal-Papa Franġisku, Evangelii Gaudium (Il-Ferħ tal-Evanġelju), u għad-diskors tal-Papa fiż-żjara li għamel fuq il-gżira Griega ta’ Lesbos. L-Arċisqof għamel enfasi fuq il-ħtieġa li l-pajjiżi Ewropej jaffrontaw sitwazzjonijiet ta’ persuni vulnerabbli, inkluż immigranti, anke meta dawn ma jirrendux benefiċċji immedjati jew tanġibbli għall-pajjiż.
L-Arċisqof fakkar fil-ġrajja ta’ meta Publiju u l-Maltin laqgħu lil Pawlu u l-membri kollha tal-ġifen. L-Arċisqof qal li dan hu rakkont li għandu jispira lil poplu Malti, biex tgħinu wkoll jibni ‘teoloġija ta’ ospitalità’.