"Sena ta' tkarrib" biex bankina fil-Qawra titranġa ... lanqas persuna diżabbli ma tista' tgħaddi minn fuqha

Regolarment turisti u Maltin jilmentaw minn bankina li hi fi stat ħażin ħafna u perikoluża fi Triq il-Qawra fil-Qawra. Din hi triq li għadd kbir ta' persuni jużawha għall-mixjiet tagħhom. Bankina imma li minħabba l-ħofor u konkos li fiha, qed tkun deskritta bħala perikoluża. L-istess residenti qed jilmentaw li ilhom xhur jilmentaw bil-mistoqsija tkun għaliex il-kunsill lokali qed jibqa' ma jagħmilx ix-xogħlijiet neċessarji.
Minn informazioni li għandna l-kunsillier Laburista Alfred Grima kważi sena ilu, kien talab lill-kunsill biex jirranġa din it-triq. Fix-xhur li għaddew hu fakkar diversi drabi lill-kunsill biex jagħmel l-arranġamenti meħtieġa biex titranġa l-bankina. Minkejja dan, il-bankina u l-periklu kkawżat mill-istat li tinsab fih, għadhom hemm.