Bejn is-sena 2012 u s-sena 2013…..

Dawk f'riskju ta' faqar u esklużjoni
żdiedu b'aktar minn 5,000 persuna


Hekk kif fil-15 ta' Mejju il-Ġnus Magħquda tfakkar il-Jum Internazzjonali tal-Familji, qed jirriżulta skont statistika maħruġa mill-Uffiċċju Nazzjonali tal-Istatistika (NSO) li  l-ammont ta' persuni f'riskju ta' faqar u esklużjoni soċjali  f'pajjizna żdiedu b' 5,237 persuna.  Minn total ta' 93,783 familja f'riskju ta' faqar u esklużjoni soċjali fis-sena 2012, dawn telgħu għal 99,020 persuna fis-sena 2013.  Dan ifisser li minn 22.9 fil-mija, il-persentaġġ ta' dawk f'riskju ta' faqar u esklużjoni soċjali tela' għal 24 fil-mija.
Mill-istatistika maħruġa mill-Uffiċċju Nazzjonali tal-Istatistika (NSO) jirriżulta li dawk il-persuni f'riskju ta' faqar telgħu minn 61,689 jew 15.1 fil-mija fis-sena 2012 għal 64,966 persuna jew 15.7 fil-mija fis-sena 2013.  Dan ifisser żieda ta' 3,177 persuna.
Mill-istatistika naraw li r-rata ta' persuni li qegħdin f'impjieg telgħu minn 60.4 fil-mija fis-sena 2013 għal 62.2 fil-mija għal persuni waħidhom u minn 62 fil-mija għal 63.3 fil-mija għal persuni miżżewġin.
Fatt interessanti li joħroġ mill-istatistika hu dak fejn jirrigwarda persuni f'riskju ta' faqar f'familji li m'għandhomx tfal dipendenti fuqhom, fejn naraw li dan naqas minn 24,387 persuna għal 22,072 persuna.
Dawk f'riskju ta' faqar  u li qed jgħixu waħidhom naraw li fil-każ tal-irġiel   kien hemm 3,917 f'riskju ta' faqar fis-sena 2013, żieda ta' aktar minn 600 persuna meta mqabbel mas-sena 2012 meta dakinhar kien hemm 3,300.
Fil-każ ta' nisa li jgħixu waħidhom naraw li dawk f'riskju ta' faqar fis-sena 2013 kienu ta' 3,544, meta fis-sena ta' qabel kienu jlaħħqu għal 3,600.
Meta wieħed jieħu persuna li għandha inqas minn 65 sena u li tgħix waħidha u persuna li għandha aktar minn 65 sena u tgħix waħidha, naraw li hemm riżultati differenti. Għal dawk inqas minn 65 sena u li jgħixu waħidhom telgħu minn 3,879 persuna fis-sena 2012 għal 4,628 persuna f'riskju ta' faqar fis-sena 2013, waqt li dawk b'aktar minn 65 sena u li jgħixu waħidhom naqsu għal 2,832 persuna fis-sena 2013 minn 3,050 persuna.
Fejn jirrigwarda żewġ adulti li għandhom inqas minn 65 sena, naraw li fis-sena 2012 kien hemm 5,183 f'riskju ta' faqar, waqt li fis-sena 2013 niżlu għal 4,168 persuna.  F'familji fejn hemm żewġ persuni ta' aktar minn 65 sena, waqt li fis-sena 2012 kien hemm 7,829 persuna f'riskju ta' faqar, fis-sena 2013 dawn niżlu għal 7,644 persuna.  F'familji oħra fejn m'hemmx tfal dipendenti, dawk f'riskju ta' faqar naqsu minn 4,445 fis-sena 2012 għal 2,800 fis-sena 2013.
Mill-istatistika joħroġ li fejn jirrigwarda 'single parents' b'wild wieħed jew aktar naraw li dawk f'riskju ta' faqar żdiedu minn 5,652 fis-sena 2012 għal 6,378 fis-sena 2013.  Naraw li f'familji fejn hemm żewġ ġenituri u wild wieħed, f'familji b'żewġ penituri u żewġ uliedu dipendenti u f'familji b'żewġ ġenituri u tlieta jew aktar tfal dipendenti, dawk f'riskju ta' faqar żdiedu.  Dawn żdiedu minn 2,220 persuna għal 6,321 persuna fis-sena 2013, minn 13,895 persuna għal 16,246 persuna, u  minn 5,444 persuna għal 6,132 persuna rispettivament.
Fatt interessanti hu dak li fejn jirrigwarda familji oħra fejn hemm tfal dipendenti, dawn naqsu minn 10,092 fis-sena 2012 għal 7,818 persuna fis-sena 2013.
Fir-rigward ta' dawk f'riskju ta' faqar u esklużjoni soċjali naraw li dawn telgħu minn 93,783 persuna fis-sena 2012 għal 99,020 persuna fis-sena 2013.
F'familji fejn m'hemmx tfal dipendenti, dawk f'riskju ta' faqar u esklużjoni soċjali naqsu minn 42,053 persuna fis-sena 2012 għal 38,547 persuna fis-sena 2013.  Fejn jirrigwarda familji bi tfal dipendenti, naraw li dawk f'riskju ta' faqar u esklużjoni soċjali żdiedu minn 51,730 persuna għal 60,473 persuna.
Mill-istatistika joħroġ ukoll li għas-sena 2014 f'pajjiżna kien hemm żieda fl-ammont ta' twelid.  Fil-fatt fis-sena 2014 kellna it-tieni l-ogħla rata ta' twelid fl-aħħar għaxar snin.  Fis-sena 2014 kien hemm 4,277 wild u dan meta fis-sentejn ta' qabel kien hemm 4,127 u 4,231 rispettivament.
Dwar l-ammont ta' persuni li juzaw l-internet naraw li f'kull kategoriji ta' nies fis-sena 2014 kien hemm żieda f'dawk li jaġħmlu użu mill-internet meta mqabbel mas-sena 2013.  Filfatt dawn żdiedu minn 222,705 persuna għal 239,225 persuna.
Minn L-ORIZZONT