'L-immigranti għandhom jitħarrġu fil-biedja peress li qed inħossu tnaqqis fil-bdiewa'

It-tnaqqis fl-ammont ta' bdiewa b'mod partikolari f'Għawdex, flimkien mal-fatt li f'pajjiżna jista' jitwaqqaf ċentru vokazzjonali li fih jibdew jitħarrġu immigranti Afrikani li hawn f'pajjiżna biex jidħlu fis-settur tal-biedja, kienu fost it-temi li tqajmu f'laqgħa li saret bejn l-imsieħba fis-settur agrikolu u l-Kummissarju Ewropew responsabbli mill-Agrikoltura u l-Iżvilupp Rurali, Phil Hogan. Il-messaġġ kien biex l-immigranti flok jingħataw il-ħuta jingħataw il-qasba. inewsmalta.com hu infurmat li ħa interess b'mod partikolari dwar il-proposta li saret dwar taħriġ għall-immigranti Afrikani fl-agrikoltura, u dan peress li hemm minnhom li diġa jafu s-settur sew u jafu jaħdmu f'kundizzjonijiet ta' nixfiet kbar. inewsmalta.com hu nfurmat ukoll li l-Kummissarju Hogan fl-istess laqgħa qal li tkellem diġa drabi oħra ma' sħabu dwar dan u ma naqasx li jirrimarka li se jaħdem dwar dan u se jkompli isegwiha. Il-Kummissarju Hogan għamel żjara fuq stedina tas-Segretarju Parlamentari Roderick Galdes, biex hu stess jara b'għajnejh id-diffikultajiet u l-karatteristiċi uniċi ta' dan is-settur f'Malta.
Fil-laqgħa mal-imsieħba fl-agrikoltura ssemma' kif f'Għawdex qed jinħass sew in-nuqqas ta' bdiewa minħabba dawk li hemm huma anzjani u ftit li xejn hemm bdiewa żgħażagħ. Fl-istess laqgħa ssemma' kemm hu importanti li jittieħdu inizjattivi bl-għan li aktar żgħażagħ jagħżlu li jaqbdu karriera fl-agrikoltura.
inewsmalta.com hu nfurmat li fl-istess laqgħa il-Produtturi tal-Ħalib, permezz ta' Gejtu Buttiġieġ tkellmu dwar il-problemi li huma jiffaċċjaw meta mqabblin ma' sħabhom fl-Ewropa. Huma qajmu l-punt ta' żieda fl-ispejjeż minħabba l-importazzjoni tal-ġwież u spjegaw li ma jagħmilx sens li jkollhom cold stores għall-ġwież.
Minn naħa tagħhom l-Produtturi tal-Majjal ukoll ilmentaw mill-ispejjeż li huma għandhom biex jimpurtaw il-ġwież.
Fil-laqgħa l-Kummissarju Hogan deher jagħmel rimarka fis-sens li huma jistgħu jibbenefikaw mit-turiżmu billi jbiegħu prodotti lil din l-industrija, fejn hawnhekk ġie spjegat lilu li f'din l-industrija se jagħżlu prodotti li jkunu irħas minn tagħhom.  Huma spjegawlu li l-bejgħ tagħhom imur għand ħwienet tal-laħam f'Malta u għand nisa tad-dar li jippreferu l-prodott Malti.
Loui Naudi f'isem il-bdiewa f'intervent li għamel spjega li kien żball mill-Gvern ta' qabel li ma talabx deroga għal 'ispecial market scheme' kif għamlu pajjiżi tal-lvant u qal li din qed taffettwa ħażin lis-settur f'Malta.
Il-Kummissarju Hogan,  wara żar il-Meridiana Wine Estate f'Ta' Qali fejn hemmhekk spjega li n-nuqqas ta' ilma u l-effetti tal-tibdil fil-klima huma fost l-aktar fatturi li qed jinkwetaw lill-bdiewa. Hu spjega li hemm il-Junker Plan li fih €315 biljun li jistgħu jintużaw għal proġetti ta' investiment fosthom fis-settur agrikolu.
Meta żar il-Meridiana Wine Estate f'Ta' Qali hu kien akkumpanjat mill-Kummissarju Malti Karmenu Vella, kif ukoll il-Ministru għall-Ambjent Leo Brincat u s-Segretarju Parlamentari Roderick Galdes.