Jinbeda r-restawr tal-Casino...anzjani jirrakkontaw dak li jafu

Wara snin ta' telqa fejn l-elementi naturali kkawżawlu ħsarat kbar, il-Casino Notabile fir-Rabat fl-aħħar sigħat beda jiġi restawrat mill-ġdid. Id-dehra ta' ħaddiema u makkinarju fuq il-post ħoloq kurżità fost għadd ta' persuni anzjani li jgħixu fil-viċinanzi. Ma naqsux stejjer interessanti li rrakkuntaw.
Anzjana rrakkontat li "meta kien għadu jintuża ħafna snin ilu, f'dan il-post kien hemm mejda kbira fuq ġewwa u kienu jiffrenkwentaw dan il-post diversi qassisin fejn kienu jqattgħu siegħat żmien flimkien jilgħabu l-karti tal-logħob". L-anzjana tgħid li "faċċata kien hemm ħanut tat-te u kellu qanpiena għandu li mill-Casino kienu jagħfsuha biex waqt li jkunu jilgħabu dawn il- qassisin, tal-ħanut kien iġibilhom it-te u xi pastizzi biex jitrejqu". Hu ttamat li lejn l-aħħar tas-sena għandu jitlesta ir-restawr, fejn imbagħad dan se jkun jista' jitgawda mill-pubbliku.
Il-Casino Notabile, li kien iddisinjat mill-Perit Webster Paul­son, inbena fis-sena 1887 u l-għan tiegħu kien speċifikament għal dawk meqjusin bħala “tal-klassi għolja” li kienu jgħixu fir-Rabat u l-Imdina. Il-Casino Notabile kien mibni fuq għajn tal-ħasselin, li għadha hemm sal-lum, għalkemm l-ilma nixef. L-istorja tal-Casino Notabile tibda fi żmien l-Imperu Ingliż (1800), meta dak iż-żmien bdiet ukoll bidla fl-arkitettura. Kien iż-żmien li beda dieħel l-istil neoklassiku u strutturi Gotiċi. L-Imperu Ingliż ried li juri l-preżenza tiegħu f’Malta u dan anke billi jinbena bini f’dan l-istil. Wieħed minn dawn il-binjiet hu l-Casino Notabile fit-telgħa tas-Saqqajja, iddisinjat mill-Perit Webster Paulson.