‘Taħseb li jien nieħu gost naqra?’

....kontroversja ġdida fil-Parlament

Tweġibiet Parlamentari pjuttost twal mogħtija mill-Ministru tal-Affarijiet Barranin George Vella, ħolqu kontroversja ġdida fil-Parlament bejn l-Oppożizzjoni u membri tal-Gvern, liema kwistjoni finalment ġiet riżolta wara intervent tal-Prim Ministru Joseph Muscat. Il-kwistjoni bdiet meta l-Whip tal-Partit Nazzjonalista David Agius talab li t-tweġbiet ma jinqrawx u minflok jittieħdu bħala moqrijin u b’hekk jinqraw it-tweġibiet li jsegwu wara dawn il-mistoqsijiet. Il-Ministru Joe Mizzi, li kien qed  jaqra it-tweġibiet f’isem il-Ministru George Vella peress li dan jinsab imsiefer Londra, qal li l-proċedura hi li dawn jinqraw. L-Ispeaker Anġlu Farrugia ikkonferma dan u qal li kull tweġiba trid tinqara’.

Kien f’dan il-mument li intervjena  l-Kap tal-Oppożizzjoni Simon Busuttil u qal li la tweġibiet huma twal u l-Ministru konċernat mhux preżenti, dawn jistgħu jittieħdu bħala moqrija.  Minn naħa tiegħu l-Ministru Joe Mizzi wieġbu li ‘taħseb li jien nieħu gost naqra?’. Hu rrimarka imma li dik hi l-proċedura. Il-Kap tal-Oppożizzjoni wieġeb lura u qal li ‘l-Ministru għat-Trasport lanqas fuq it-trasport ma jwieġeb aħseb u ara kemm se jwieġeb fuq l-affarijiet barranin’.  Hawn intervjena l-Ministru Mizzi u qal li ‘din gidba għax jien dejjem inwieġeb il-mistoqsijiet’.

Il-Kap tal-Oppożizzjoni, Simon Busuttil qal li dak li qed tipproponi l-Oppożizzjoni hu li l-ħin allokat għall-mistoqsijiet jintuża kif suppost. F’dan il-mument qam il-Prim Ministru Joseph Muscat u qal li hu qed jifhem is-sens li bih qed jitkellem il-Kap tal-Oppożizzjoni u dak li qed jgħid il-Ministru Mizzi. Qal li hu m’għandux problema li l-mistoqsijiet jittieħdu bħala moqrija imma dak li ma jridx hu li jinħoloq preċedent u f’seduta oħra fil-futur iqum xi ħadd u jgħid li għandhom jinqabżu l-ewwel erba’ jew ħames tweġibiet Parlamentari. Finalment it-tweġibiet li nqalgħet kwistjoni dwarhom ittieħdu bħala moqrija.

minn inewsmalta.com