'Ma' dawn ma nagħmlux negozju!'

Forsi min mhux midħla tal-fjuri, l-ewwel li ma jiġih f'moħħu meta jisma' bil-kelma fjura huma l-kuluri vivaċi. Bħalissa jkollna diversi wirjiet ta' fjuri hekk kif ninsabu fl-aqwa staġun tal-produzzjoni tal-fjuri - ir-rebbiegħa. Biss lil hinn minn kuluri vivaċi u fwejjaħ, il-fjuri huma assoċjati ma' diversi simboliżmi.

Ngħidu aħna l-Margerit (Chrysanthemum) huma assoċjati ma' diversi tifsiriet jiddependi mill-kulur fosthom 'eċċitament', 'verità' - għal dawk b'kulur ajbad,  'paċi', 'mħabba' u 'naqsmu ma' ħaddieħor".  Fil-Ġappun ta' kull sena jkun hemm festival b'ċelebrazzjoni lejn din il-fjura u dan jissejjaħ il-'Festival tal-Kuntentizza'.  Dan biex ma nsemmux il-Ward, fejn għal Griegi u r-Rumani din hi assoċjata mal-allat tal-imħabba.

Quddiem dan, ma tistax ma tinħasadx meta f'atmosfera bħal din, fi trankwillità assoluta, issib quddiem wiċċek każ ta' rażżiżmu. Dan seħħ quddiem għajnejna stess fil-wirja tal-fjuri fl-Iklin. Wirja li fiha kien hemm stand mimli fjuri li miegħu kien hemm żewġ Afrikani. Kienu hemm biex jagħtu servizz lil min irid jixtri. Imma żewġ nisa anzjani, meta waslu ftit biss bogħod minn dan l-istess stand, ma ddejqu xejn jiddikjaraw li, "Ma' dawn ma nagħmlux negozju!" Ma naqsux wara riferenzi għax Afrikani.

Ironikament marru fuq stand faċċata, ftit bogħod. Minn hemm xtraw il-ward, simbolu tal-imħabba.

Ritratt: Roger Azzopardi

minn inewsmalta.com