Il-proġett ta' parkeġġ u bandli fuq is-saqaf f'Tas-Sliema kif propost mhux aċċessibbli
Waqt li l-proposta tal-Kunsill Lokali ta' Tas-Sliema biex fi ġnien u bandli li hemm fi Triq it-Torri jagħmel parkeġġ ta' diversi sulari taħt l-art, qed tkun kritikata minn għadd kbir ta' residenti, issa qed isir magħruf li l-proġett kif propost weħel mill-Kummissjoni Nazzjonali Persuni b'Diżabilità (KNPD). Dan minħabba għadd ta' nuqqasijiet fejn tidħol l-aċċessibilità. Il-bandli li llum jista' jgawdihom kulħadd u li bil-proġett il-ġdid se jkunu fuq is-saqaf tal-parkeġġ, kif proposti mhumiex aċċessibbli.
Fost il-kritika li qed iqajjem dan il-proġett, hemm
dak minn diversi studenti li kienu qed jaħdmu fuq proġetti biex joħorġu
b'soluzzjonijiet dwar kif għandhom jonqsu l-karozzi. "Jien li ma nistax
nifhem hu kif aħna qed naħdmu biex insibu soluzzjonijiet biex jonqsu
l-karozzi mit-toroq Maltin u l-kunsill lokali ta' Tas-Sliema joħroġ bi
proġett ta' parkeġġ ta' diversi sulari taħt l-art".
Għadd ta' residenti ukoll qed jilmentaw bil-kbir, fejn
dawn fakkru kif ftit snin ilu kienu saru oġġezzjonijiet għal parkeġġ li
kien se jsir fi Qui-si-Sana. Ir-residenti li qed jilmentaw qed isostnu
li huma aktar spazji pubbliċi għandhom bżonn u mhux binjiet, parkeġġi u
karozzi. Huma esprimew id-diżapprovazzjoni tagħhom li dan l-ispazju
pubbliku se jispiċċa jittieħed.
inewsmalta.com hu infurmat li
l-proġett propost ma sabx l-approvazzjoni minħabba li l-bandli u
l-apparat li kien se jintuża ma kinux aċċessibbli, waqt li anke l-kabina
tal-lift ma kinitx skont l-ispeċifikazzjonijiet tal-Kummissjoni
Nazzjonali Persuni b'Diżabilità (KNPD). Kelliem għall-KNPD ikkonferma li
l-proġett weħel mill-KNPD.
Ta' min jgħid li l-kunsill kien qal li ssottometta
applikazzjoni mal-MEPA għal permess sabiex kun jista’ jibni parkeġġ taħt
l-art li se jakkomoda madwar 180 karozza u fuq dan il-parkeġġ ser
jerġa’ jinbena bandli bl-aktar faċilitajiet moderni, sabiex jitgawda
mill-familji tal-lokalità.
Kien qal li dan il-parkeġġ, se jservi ukoll, biex
matul ix-xhur tas-Sajf, titnaqqas ferm il-konġestjoni li tinħoloq
fil-parkeġġ miftuħ li hemm bħalissa fiż-żona tal-Exiles, fejn saħansitra
numru ta’ vetturi qed jiġu pparkjati fuq il-blat tal-bajja li tinsab
taħt it-Torri.
minn inewsmalta.com
0 Comments:
Post a Comment
Subscribe to Post Comments [Atom]
<< Home