'Kull każ ta' mibegħda għandu jkun investigat u mtella' l-Qorti' - FRA

Hekk kif il-Pulizija kienu kkonfermaw ma' inewsmalta.com li bejn Jannar u Ottubru tas-sena 2015 ma ressqu ebda każ il-Qorti b'rabta ma' razziżmu, l-Aġenzija Ewropea għad-Drittijiet Fundamentali (FRA) f'rapport li ppublikat saħqet li biex ikun indirizzat il-fenomenu tar-razziżmu u x-xenofobija, kull Stat membru għandu jiżgura li jinvestiga kull allegat każ ta' kriminalità ta' mibgħeda jew kliem ta' mibgħeda. Dan ikun segwit b'passi l-qorti skont il-proċeduri nazzjonali u fejn hu relevanti b'konformità mal-proviżjonijiet Ewropew dwar razziżmu u xenofobija. 

Ir-rapport tal-FRA jenfasizza l-bżonn ta' kampanji  li jinkoraġixxu lill-persuni jirrappurtaw allegati atti ta' mibgħeda, fejn xi stati membri anke tejbu is-sistema ta' ġbir ta' informazzjoni fuq reati simili.  Ir-rapport isemmi kif fi Franza u l-Finlandja kien hemm kampanja simili, waqt li l-Pulizija Skoċċiża u l-l-Ministru tal-Intern Spanjol ukoll għamlu kampanji simili.

Mir-rapport joħroġ li Malta hi assenti minn programm ta' prattika tajba dwar kif għandhom ikunu trattati allegati atti ta' kriminalità marbutin ma' razziżmu. Dan il-programm jara li jsaħħaħ il-kapaċità ta' uffiċjali ta' infurzar tal-liġi, prosekuturi u uffiċjali  involuti f'servizzi ta' appoġġ għall-vittmi. Il-programm joħloq ukoll kampanji li joħolqu kuxjenza u li jkun hem aċċess għal ġustizzja lill-vittmi ta' razziżmu u kliem ta' mibgħeda. F'dan il-programm qed isir bejn il-Kunsill tal-Minoritajiet Etniċi fl-Irlanda ta' Fuq u l-Finlandja. Hemm seba' pajjiżi Ewropej  f'dan il-proġett li huma l-Belġju, ir-Repubblika Ċeka, l-Estonja, l-Greċja, l-Irlanda, l-Italja u l-Olanda. Dan il-proġett hu kofinanzjat mill-Kummissjoni Ewropea.

Ir-rapport tal-FRA jgħid li "fl-2015 aktar minn miljun persuna fittxew kenn fl-Unjoni  Ewropea, żieda ta' ħames darbiet iktar mis-sena ta' qabel. Fir-Rapport tagħha dwar id-Drittijiet Fundamentali tal- 2016, l-Aġenzija tal-UE għad-Drittijiet Fundamentali (FRA) teżamina l-iskala u n-natura tal-isfida u tipproponi miżuri biex jiġi żgurat li d-drittijiet fundamentali jiġu rispettati fl-Unjoni Ewropea kollha. "Is-sena l-oħra, id-deċiżjoni favur id-drittijiet fundamentali tal-Unjoni Ewropea kienet ittestjata bil-kbir, b'attakki fuq ħafna mil-libertajiet, id-drittijiet u l-valuri li fuqhom hija bbażata l-Ewropa," jgħid id-Direttur tal-FRA Michael O’Flaherty. "L-Unjoni Ewropea u l-Istati Membri tagħha għandhom iżommu sodi sabiex jiddefendu d-drittijiet li għalihom kulħadd huwa intitolat, kemm jekk ilhom jgħixu fl-Unjoni Ewropea għal ħafna ġenerazzjonijiet kif ukoll jekk għadhom kif waslu fuq ix-xtut tal-Ewropa.” 

Dan ir-Rapport dwar id-Drittijiet Fundamentali annwali jenfasizza l-isfidi u l-kisbiet fuq firxa wiesgħa ta' kwistjonijiet dwar id-drittijiet fundamentali fl-Unjoni Ewropea kollha. Ħafna mill-kwistjonijiet koperti mir-rapport ta' din is-sena se jiġu diskussi f'aktar dettal waqt il-Forum dwar id-Drittijiet Fundamentali tal-2016, li se jiġi organizzat fl-20-23 ta' Ġunju fi Vjenna. 

Intqal li b'60 miljun persuna spostata bil-forza fid-dinja kollha, is-sitwazzjoni tal-migrazzjoni hija mistennija li tibqa' fil-quċċata tal-aġenda tal-UE. Il-maġġoranza tar-refuġjati li ġejjin fl-Ewropa, li ħafna minnhom huma tfal, qed jirriskjaw ħajjithom billi jħallsu lill-kuntrabandisti biex jaqsmu l-baħar fuq dgħajjes iffullati wisq u li ma jifilħux għall-baħar. 

Ġiet innutata żieda f'daqqa ta' inċidenti razzisti u xenofobiċi f'ħafna Stati Membri, kawża ta' biża' minħabba s-sitwazzjoni tal-migrazzjoni u għadd ta' attakki terroristiċi. Ir-rapport tal-FRA isib li l-komunitajiet Musulmani u Lhud kienu partikolarment affettwati. 

L-attakki terroristiċi għal darb'oħra enfasizzaw id-diffikultà biex jinstab il-bilanċ tajjeb bejn il-protezzjoni tad-data personali u l-privatezza u ż-żamma tas-sigurtà interna. Numru ta' Stati Membri tal-Unjoni Ewropea huma fil-proċess li jirriformaw il-qafas tal-intelligence legali tagħhom, li jista' potenzjalment iżid is-setgħat intrużivi tas-servizzi.

minn inewsmalta.com