'Annimal politiku' meta ħolqu l-assistenti Parlamentari biex isalvaw il-Gvern - Edward Zammit Lewis

Il-Ministru għat-Turiżmu, Edward Zammit Lewis, meta llejla tkellem dwar l-abbozz ta' liġi dwar is-Servizz Parlamentari, qal li l-Oppożizzjoni Nazzjonalista m'għandha ebda kredenzjali biex titkellem fuq aktar trasparenza. Qal li Gvern Nazzjonalista biex isalva l-Gvern kien ħoloq 'annimal politiku bl-assistenti Parlamentari'.

Zammit Lewis qal li, "Matul dawn it-tliet snin kellna membri li għamlu kritika lill-Gvern. Il-membri Parlamentari mhumiex robots imma nies. Kellna sitwazzjoni fattwali fejn membri kkritikaw. Kien hemm nies li anke pubblikament tkellmu mhux mal-linja tal-Gvern u din ma fiha xejn ħażin."

Iddikjara li, "Il-Gvern preċedenti kien ħoloq annimal politiku fl-assistenti Parlamentari fejn dawn kellhom sieq fil-Parlament u sieq fil-ministeru. Dan sar biex isalvaw il-gvern. Kieku din kienet sistema tajba kontu tagħmluha mill-bidu.”

Saħaq li l-Oppożizzjoni ma tantx għandha kredenzjali biex titkellem fuq aktar trasparenza Parlamentari. Enfasizza li dan l-abbozz ta' liġi hu żvilupp bla preċedent u pożittiv. “Ejja naraw kif se ntejbu din il-liġi u biex din ma tibqax biss fuq il-karta,” sostna Zammit Lewis.