In-Nazzjonalisti kontra li jonqos il-ħin tad-dibattitu... illum

Il-kwistjoni tat-tnaqqis ta' għaxar minuti mill-ħin allokat lill-Membri Parlamentari għad-diskors fil-Parlament, fejn issa hu propost mill-Gvern li minn 40 minuta jonqos għal 30 minuta, hi waħda mill-punti li dwarhom mhumiex jaqblu l-Gvern u l-Oppożizzjoni. Biss waqt li llum l-Oppożizzjoni hija kontra, fil-passat mhux daqstant 'l bogħod kien hemm deputati Nazzjonalista li lmentaw dwar li l-ħin hu twil u għandu jitnaqqas u dan biex ikun hemm aktar sustanza fid-diskorsi.

David Agius u Carm Mifsud Bonnici kienu fost dawk li tkellmu f'dan is-sens fis-sena 2013 u 2008 rispettivament.

Il-Ministru Joe Mizzi, fl-intervent tiegħu dwar il-mozzjoni li qiegħda tiġi diskussa, iddeskriva l-Oppożizzjoni bħala "distruttiva". Tenna li "żbalji nagħmlu imma l-korruzzjoni ħarġet bil-provi taħt il-Gvern Nazzjonalista".

"Dwar id-diskors qegħdin nipproponu li dawn għandhom ikunu iqsar f'dak li huwa ħin. F'Mejju tas-sena 2008, id-deputat Nazzjonalista Carm Mifsud Bonnici kien tkellem f'sens li għandu jonqos il-ħin." Il-Ministru Mizzi enfasizza li fis-sena 2013, David Agius ukoll kien qal li d-diskorsi għandhom jonqsu f'dak li huwa ħin.