Jitlesta r-restawr tal-Loġġa tal-Palju fir-Rabat

Binja storika magħrufa bħala l-Loġġa tal-Palju, u li kienet ilha snin mitluqa, issa tinsab lesta mir-restawr.  

Din il-loġġa, li tinsab taħt it-telgħa tas-Saqqajja, hi marbuta mill-qrib mal-festa tal-Imnarja. Fil-fatt din il-festa tibda bil-qari tal-bandu mis-Saqqajja u barra l-wirja agrikola ifil-Buskett ikun hemm it-tiġrijiet tal-bhejjem taħt is-Saqqajja.
Dawn it-tiġrijiet huma parti importanti mill-festa tal-Imnarja u sekli ilu kien imur il-Gran Mastru biex isegwihom. Fil-fatt kien għall-kumdità tal-Gran Mastru li kienet inbniet din il-loġġa.
Il-loġġa kienet saritilha ħsara minħabba l-umdità li tiġi mill-art kif ukoll mit-triq.  Kien hemm problemi fis-saqaf minħabba l-ilma tax-xita.  Snin ta' abbandun kienu wasslu għal ħsara konsiderevoli ta' natura strutturali.
Ix-xogħol kollu sar minn ħaddiema tad-Direttorat tar-Restawr fi żmien tmien xhur.  In-nefqa fuq il-materjal laħħqet is-somma ta' €12,600.