It-Torri l-Abjad…tidħol fih kif trid

It-Torri l-Abjad hu wieħed mit-torrijiet mibnijin mill-Gran Mastru De Redin. Post storiku li xhur ilu kien issemma' li se jkun restawrat.  Illum dan it-torri qiegħed fi stat li min irid jista' jidħol fih faċilment.  Huma diversi dawk il-persuni li għandhom għal qalbhom il-wirt storiku li qed jappellaw biex din il-binja tiġi restawrata u li sakemm isir dan, għandha tkun bl-aċċess magħluq.

Persuna li tkellmet magħna qalilna li "meta tħalli torri bħal dan b'aċċess miftuħ tkun qed iżżid ir-riskju li jsir vandaliżmu fih.  Mhux l-uniku torri jew batterija li jinsab f'dan l-istat.  Naħseb li l-awtoritajiet responsabbli għandhom jaraw li jingħalaq l-aċċess".

Ta' min jgħid li dwar  dan it-torri kienet saret applikazzjoni għal restawr u l-kunsill lokali tal-Mellieħa kellu laqgħat ma' Heritage Malta dwar dan l-istess proġett.

Ir-restawr fuq it-torri, li mistenni jsir mill-fondi tal-Kunsill Lokali tal-Mellieħa, jista' jsir wara li kien devolut mill-Gvern madwar ħames snin ilu. 

minn l-orizzont