'Ebda Filippin ma tkeċċa…m'aħniex insibu ħaddiema biżżejjed' - kelliem għal Mr Clean

Hekk kif dalgħoduirċevejna għadd ta' telefonati minn persuni Filippini li kienu qed jaħdmu mal-kumpanija Mr Clean u li lmentaw li jidher li se jitwaqqfu mix-xogħol, rappreżentant tal-kumpanija meta kkuntattjat minn inewsmalta.com qalilna li "m'għandna ebda ħaddiem Filippin li tilef l-impjieg. Kellna xi kuntratti li skadew imma min kien jaħdem fejn skada l-kuntratt se jintbagħat jaħdem f'post ieħor".

L-istess rappreżentant qalilna li "tant hu minnu dan, li aħna irridu nimpjegaw in-nies. Irrid min jaħdem bħala ħassiel jew li jnaddaf.  Il-problema li qed insibu aħna hi dik li m'aħniex isibu nies biex jaħdmu dan ix-xogħol. Qed nippruvaw insibu ħaddiema kemm nistgħu biex inlaħħqu mad-domanda.Jekk tafu lil xi ħadd, għidulu jiġi għandna, għax għandna ħafna xogħol u għandna bżonn il-ħaddiema biex inlaħħqu".

Dwar l-ilmenti qalilna li "jista' jkun li l-messaġġ għand dawn il-ħaddiema ma wasalx tajjeb. Se jkollhom xogħol ġdid għax ma waqqafna lil ħadd. Anzi jekk tafu lil xi ħadd li lest jaħdem f'xogħol ta' tindif, għidulu jiġi għax għandna xogħol xi ntuh", qalilna dan ir-rappreżentant.

"Jiddispjaċini li hemm min qed jipprova jitfa' dell ikrah fuq din il-kumpanija, li ilha taħdem 45 sena. Jien ilni naħdem hawn u qatt ma kelli problemi", qalilna l-istess rappreżentant b'riferenza  għal azzjoni li ttieħdet mill-Pulizija kontra diretturi ta' Mr Clean dwar kif kienu qed jiġu ngaġġati ħaddiema Filippini. 

Ritratt: Arkivji - Ian Noel Pace

minn inewsmalta.com