Miljun firma biex l-UE ddaħħal liġi li tistabbilixxi definizzjoni naturali ta' 'familja' u 'żwieġ'

Koalizzjoni ta' gruppi Kristjani u favur il-familja f'seba' pajjiżi Ewropew  ingħaqdu u qed jagħmlu kampanja biex jiġbru miljun firma minn pajjiżi Ewropej u dan biex tkun kunsidrata leġislazzjoni  li tistabbilixxi  id-definizzjoni naturali ta' 'familja' u 'żwieġ'. Il-kampanja hi intitolata 'Mum, Dad & Kids'.  Sa issa għadu mhux magħruf jekk f'Malta hawnx għaqdiet li se jkunu qed jagħtu appoġġ dirett lil din l-inizjattiva.

Il-gruppi ġejjin mill-Ungerija, Franza, il-Kroazja, l-Polonja, l-Isvezja, il-Portugal, is-Slovakkja u l-Ġermanja.  Il-gruppi għandhom ċans sal-11 ta' Diċembru biex jiġbru l-firem biex tkun proposta leġislazzjoni li tiddefinixxi x'inhi familja naturali u żwieġ.

Il-proposta ta' down il-gruppi tgħid li din il-liġi Ewropea hemm bżonnha minħabba li l-istituzzjoni tal-familja qiegħda dejjem tiddgħajjef minn forzi soċjali, fi żmien fejn liġijiet Ewropej qed jinkludu koppji tal-istess sess u anke persuni mhux miżżewwġin.

L-organizzaturi qed isostnu li jridu li żwieġ ikun ifisser għaqda permanenti bejn raġel wieħed u mara waħda u li familja tkun tfisser biss din il koppja mizzewwġa. Il-koalizzjoni qed targumenta li ż-żwieġ kien protett minħabba li dan għandu benefiċċji għall-ġid komuni u anke għat-tfal.

Il-liġi li qed tkun proposta ma tisfurzax pajjiżi individwali biex jaċċettaw din id-definizzjoni ta' żwieġ, imma li jkun hemm definizzjoni waħda għal-leġislazzjoni Ewropea u li din tħassar sforzi biex jiddaħħlu definizzjonijiet li jimplikaw koppji tal-istess sess.

minn inewsmalta.com
Ritratt: Arkivji Ian Noel Pace