'Tiħdux ir-riskju li tivvjaġġaw lejn l-Ewropa' - Saleh Ahmed, Etjopjan li jgħix f'Malta

Fl-aħħar jiem erġajna rajna aktar traġedji ta' immigranti fir-rotta taċ-ċentru tal-Mediterran. Quddiem dawn it-traġedji, Saleh Ahmed, Etjopjan li ukoll daħal f'pajjiżna bi vjaġġ mil-Libja, ma joqgħodx lura milli jirrakkomanda li l-vjaġġ tant hu perikoluż li l-parir tiegħu lil immigranti li hemm il-Libja hu dak li ma jagħmlux il-vjaġġ lejn l-Ewropa.

Saleh jistaqsi li "hu mistħoqq li tirriskja ħajtek biex tidħol fl-Ewropa, minkejja dak li tkun għaddejt minnu?  It-tweġiba tiegħi hi li le. Dan ilni ngħidu sa mis-sena 2003. Il-ħolma tiegħi dejjem kienet li nkun xjentist.  Meta nħares lura naraw li jien sofrejt diskriminazzjoni sistematika. Nħoss li ħlejt żmien u enerġija, meta stajt użajthom biex nagħmel xi ħaġa aħjar. Illum m'iniex f'pożizzjoni li niffoka fuq il-karriera tiegħi."

Imma lil Saleh tista' tistaqsih imma inti kif qed tgħid dan meta anki inti vvjaġġajt bid-dgħajsa mil-Libja. Kif qed tgħid lil Afrikani oħra ma jivvjaġġawx għal ħajja aħjar?

Għal dan Saleh iwieġeb li "waħda mill-ħolmiet tiegħi kienet li niġġieled l-inġustizzji. Ridt inmut mewta ta' dinjità fl-Etjopja, anki jekk f'dak iż-żmien kont għadni żgħir wisq biex naħseb fuq dan. Ħlomt li ningħaqad mal-ġellieda tal-libertà bħal ħafna studenti oħra. Dawn huma nies li l-ħajja u l-mewt tagħhom ikunu ċelebrati mill-kommunità li hi oppressata. Ma kontx infurmat fuq il-vjaġġ li rrid nagħmel u fuq il-ħajja fl-Ewropa. Spiċċajt tlaqt lejn l-Ewropea flok iffukajt fuq il-ġlieda. Nemmen  li llum hemm ħafna aktar informazzjoni biex tagħmel għażliet aħjar flok tispiċċa f'nassa.  In-nassa hi l-gideb tat-traffikanti li l-għan tagħhom hu li jagħmlu l-flus minn fuq il-miżerja ta' ħaddieħor."

Saleh jappella li "lil dawk li qed jinkoraġixxu lil xi qraba tagħhom biex imorru lejn l-Ewropa u jibagħtu l-flus meta jkunu hemm, ngħidilhom ma jagħmlux dan. Ir-riskji marbutin ma' dan il-vjaġġ huma kbar wisq".

  minn inewsmalta.com