Bejn Jannar u Ġunju kien hemm sitt persuni jorqdu barra

Forsi moħbijin minn għajn in-nies. Mhux faċli tkun taf bihom. Imma ħaddiema soċjali u aġenziji li jaħdmu qrib persuni li ma jkollhomx saqaf fuq rashom, jgħidulek kif din hi problema li qiegħda tiżdied. Ir-raġuni huma varji.

Fil-Parlament ingħatat statistika li fiha ntwera kif bejn Jannar u Ġunju kien hemm sitt persuni jgħixu barra f'pajjiżna u li dawn kienu rrappurtati lill-Pulizija.

Fi tweġiba Parlamentari mill-Ministru Carmelo Abela għal mistoqsija tad-Deputat Nazzjonalista Ċensu Galea, intqal li, "Matul dawn l-aħħar sitt xhur kien hemm erba' każijiet ta’ rapporti mal-Pulizija, ta’ sitt persuni li kienu reqdin barra. Dawn ir-rapporti kienu l-Belt Valletta, l-Isla u Kemmuna, u kien hemm każ ta’ tliet persuni ġewwa l-Qawra. Erbgħa minn dawn il-persuni eventwalment sabu akkomodazzjoni altenattiva, wieħed ġie rriferut u assistit mir-rapprezentanza diplomatika tieghu f’Malta u f’każ ieħor il-persuna konċernata kienet qed tagħmel ir-rappreżentazzjonijiet tagħha ma’ entitajiet li jistgħu jassistuha."
minn inewsmalta.com