Fl-Armier bil-pixxina!

Fil-ġurnal L-ORIZZONT ġie rrappurtat li kienet kamra fl-Armier bħal oħrajn sa ftit ġimgħat ilu. Imma f'daqqa waħda mil-lejl għan-nhar din il-kamra bdiet tinbidel. F'temp qasir saret tispikka fuq l-oħrajn. Permessi ta' żvilupp ma kien hemm imwaħħlin imkien. Tfittex mal-MEPA u ssib li permessi ma nħarġu imkien.

Ix-xogħol kompla għaddej. Ma kienx jinvolvi biss l-irranġar imma fuq din l-art pubblika saret grada u saħansitra anke pixxina - allavolja hemm il-baħar ftit passi bogħod. Mal-kamra saret estensjoni tal-aluminju u anke ingħata l-konkos.  Ma naqsux ukoll il-bankijiet.

Dan kollu sar f'żona fl-Armier fejn hemm grupp ta' kmamar ħdejn il-baħar. L-ORIZZONT fl-aħħar jiem kien qed isegwi u jinvestiga l-iżvilupp li kien għaddej fuq din l-art pubblika. Minn tagħrif li għandna jidher li s-sidien li hemm llum f'din il-kamra mhumiex dawk oriġinali, u din tqajjem mistoqsijiet ta' kif din il-kamra bidlet l-idejn. HJu fatt magħruf li mhux suppost isir bejgħ jew ħlasijiet oħra marbutin ma' dawn il-kmamar ħdejn il-baħar. Għalkemm mhux konfermat b'mod uffiċjali, qed jingħad li din il-kamra bidlet l-idejn għal għexieren ta' eluf ta' Ewro. L-ORIZZONT mar diversi drabi fuq il-post, fejn stajna naraw l-iżvilupp għaddej b'ritmu mgħaġġel ħafna.

Tipprova tistaqsi lil sidien ta' kmamar oħra u ħadd ma jgħidlek xejn. "Aħna mill-kamra tagħna jimpurtana mhux minn ta' ħaddieħor", kien il-kumment li għaddielna wieħed li għandu kamra fil-qrib.

L-ORIZZONT, wara li għamel il-verifiki biex naraw kienx hemm il-permessi neċessarji, infurmajna lill-MEPA b'dan l-iżvilupp illegali. Dan sar wara li jidher li kien hemm min anke ressaq xi lmenti quddiem l-awtoritajiet responsabbli mill-artijiet.

Wara l-informazzjoni li ngħatat minn L-ORIZZONT, il-MEPA investigat u ħadet azzjoni mill-ewwel. F'risposta li tawna bil-miktub huma qalulna li "nirreferi għall-mistoqsijiet li bagħtilna. Wara li nvestigajna l-każ, id-Direttorat tal-Infurzar ħareġ avviż tal-infurzar ECF380/16 li għandha marbuta magħha penali ta’ kuljum. L-avviż tal-infurzar inħareġ fuq l-installazzjoni ta’ grada, struttura li tilqa' ix-xemx,  pixxina ’l fuq mill-art, estenzjoni tal-aluminju mal-kamra u wiċċ tal-konkos".

minn inewsmalta.com