Iċ-Ċikonji telqu ...dawk li ġew f'nofs Settembru telqu minn Fagnana fl-Italja

Nhar it-Tlieta filgħodu, is-sitt Ċikonji li qattgħu lejl f'pajjiżna fejn għal ħafna ħin dehru fuq arbli għoljin f'Bengħajsa, taru fuq il-baħar fid-direzzjoni tal-Lbiċ ta' Malta. Huma kienu mgħassa minn diversi volontieri tal-Federazzjoni Kaċċaturi, Nassaba u Konservazzjonisti (FKNK). Intant l-ornitoloġista Natalino Fenech ta informazzjoni fuq iċ-Ċikonji li kienu ġew f'nofs Settembru u li għamlu ħin sostanzjali itiru f'żoni f'Ħal Kirkop.
Hu qal li dawn iċ-Ċikonji, kienu jgħixu f'Fagnana u kienu parti minn programm ta' rintroduzzjoni. Din ma kinitx l-ewwel darba li Ċikonji minn din iż-żona ġew f'Malta. Huma tara minn ta' l-inqas 1,122 kilometru qabel waslu f'pajjiżna. Intant dwar iċ-Ċikonji li ġew f'pajjiżna nhar it-Tnejn, l-FKNK qalet li "membri tal-KRPE fi ħdan il-Federazzjoni Kaccaturi Nassaba Konservazzjonisti (FKNK) qattgħu l-lejl maċ-Cikonji f'Bengħajsa. Malli sebaħ, kienu numerużi l-membri tal-FKNK li marru hemm biex jiġbdu r-ritratti. Aktar tard matul il-ġurnata, iċ-Ċikonji ttajru l-barra u baqgħu sejrin bil-kwiet. Il-FKNK irringrazzjat lill-volontiera li ghamlu l-lejl f’Bengħajsa, u tispera li oħrajn ikunu lesti jagħmlu l-istess meta tinqala' l-ħtieġa.
Ritratt: JAMES AQUILINA

Is-summit tan-Nazzjonijiet Uniti dwar ir-refuġjati "ħela ta' ħin u retorika"

Ftit jiem ilu sar is-summit tal-Assemblea Ġenerali tan-Nazzjonijiet Uniti dwar ir-refuġjati. Summit li sar għall-ewwel darba u li minnu ħarġet dikjarazzjoni fejn għal darba oħra ġie dikjarat li għandhom ikunu protetti id-drittijiet umani tar-refuġjati u l-immigranti, lil hinn mill-istatus tagħhom. Ġie dikjarat ukoll li għandu jkun hemm appoġġ għal dawk il-pajjiżi l-aktar milqutin u li jkun żgurat li t-tfal ikollhom aċċess għall-edukazzjoni. L-istess dikjarazzjoni tgħid li għandhom jitjiebu l-operazzjonijiet ta' salvataġġ u li jkun hemm titjib f'rilokazzjoni ta' refuġjati. In-Nazzjonijiet Uniti iddeskriviet id-dikjarazzjoni bħala 'opportunità storika', waqt li l-Organizazzjoni Internazzjonali għall-Migrazzjoni, issa saret parti minn Nazzjonijiet Uniti. 
Biss dak li ħareġ mid-dikjarazzjoni għalkemm qed jitqies minn diversi entitajiet bħala l-ewwel pass 'l quddiem, qed ikun kritikat b'mod qawwi minn diversi għaqdiet non governattivi u organizazzjonijiet umanitarj. Huma iddeskrivew id-dikjarazzjoni bħala 'ħela ta' ħin', 'retorika' u li "tonqos milli toffri soluzzjonijiet".

"Opportunità mitlufa" – World Vision

L-għaqda Kristjana World Vision kienet fost dawk li esprimiet id-diżappunt tagħha, b'Helen Keogħ Kap Eżekuttiv ta' World Vision fl-Irlanda qalet li "kellna  tamiet kbar għat-tfal minn dan is-summit. Biss dawn baqgħu mjassrin bl-istess attitudni ta' qabel bi ftit li xejn tama".
Tenniet li "hi xi ħaġa li tweġgħa li l-mexxejja dinjin qablu li jħallu ċertu pajjiżi jiksru d-drittijiet tat-tfal f'ċerti ċirkostanzi. Li tjassar it-tfal waqt li tistabbilixxi id-dritt tagħhom li jitolbu għall-ażil, qatt mhu fl-interess ta' dawk it-tfal".

"Dikjarazzjoni astratta" 
– Alexander Betts, Direttur Refugee Studies Centre

Jikkummenta ukoll Alexander Betts, Direttur tar-Refugees Studies Centre fl-Università ta' Oxford, iddikjara li "d-dikjarazzjoni tas-summit ġiet dikjarata mill-UNHCR bħala miraklu. B'xi mod tista' tgħid li hi hekk, għax 193 Stat qablu b'kunsens, fi żmien meta għadd ta' gvernijiet qed ifallu. Imma l-kontenut tad-dikjarazzjoni hu astratt għall-aħħar. Hemm ideat importanti fosthom li kampijiet tar-refuġjati jkunu eċċezzjoni, u li t-tfal ta' refuġjati jkollhom aċċess għall-edukazzjoni. Hemm ukoll il-punt li r-refuġjati għandhom ikunu responsabbilità globali. Kieku l-Istati kienu se jinżammu kontabbli għal dawn, din kienet se tagħmel id-differenza. Id-diffikultà hi li l-mekkaniżmu biex jintlaħqu dawn il-miri huma vagi."

Jgħid li "s-summit  talab impenn fi tlett oqsma fosthom dak ta' aktar assistenza umanitarja, aktar postijiet ta' rilokazzjoni u aktar iffukar fuq impjiegi u edukazzjoni. Biss il-gvernijiet jidher li ma jridux jikkommettu ruħhom għal talbiet ġodda. Aktarx li se naraw talbiet ġodda bħal dawk li saru fi Frar li għadda f'konferenza f'Londra dwar refuġjati Sirjani, talbiet li finalment ma jimmaterjalizzawx. B'mod effettiv hemm gvernijiet li qed ifallu mar-refuġjati. Għaliex għandna nafdaw Stati biex jimplimentaw dikjarazzjoni vaga, meta dawn huma stess mhux konformi mal-impenn tagħhom".
Alexander Betts jgħid li "l-idea bażika tal-Konvenzjoni għar-Refuġjati tas-sena 1951, li r-refuġjati m'għandhomx jintbagħtu lura, baqgħet relevanti llum ukoll. Biss l-iffukar fuq ir-refuġjati bħala persuni li qed jaħarbu minn persekuzzjoni, issa saret antikwata. Illum ħafna persuni qed jaħarbu minn stati fraġili li huma kkaratterizzati minn vjolenza tal-massa. Per eżempju fis-sena 2014 ir-rata ta' rikonoxximent għall-ażil għal persuni Eritrean tvarja minn 26 fil-mija fi Franza għal 100 fil-mija fl-Isvezja. Il-UNHCR tagħmel xogħlha tajjeb - għajnuna umanitarja, immaniġġjar tal-kampijiet u pariri legali lill-Istati. Imma dawn m'għadhomx l-affarijiet primarji li Aġenzija għar-Refuġjati għan-Nazzjonijiet Uniti għandha tagħmel. L-għodda li hemm bżonn illum hi dik politika, l-iżvilupp, l-ekonomija u l-abbiltà li taħdem f'ambjent urban. B'mod kollettiv, hemm bżonn viżjoni akbar kemm fil-qasam legali, organizattiv u anke dak operattir. Irridu nistaqsu x'tip ta' reġim globali għar-refuġjati rridu għas-sena 2025? Imma dan ma kienx fuq l-aġenda tas-summit.  Biss hemm tama li ħarġet minn dan is-summit - dik ta' proċess ta' sentejn li joffri opportunitajiet biex tinbena viżjoni akbar".

Kritika għall-fatt li ma ġietx aċċettata proposta ta' rilokazzjoni ta' 10 fil-mija tar-refuġjati
Human Rights Watch iddeskriviet din id-dikjarazzjoni li ħarġet mis-summit bħala 'opportunità mitlufa'. Hi kkritikat il-fatt li l-Istati membri irrifjutaw proposta ambizzjuża biex ikunu rilokati 10 fil-mija tar-refuġjati fid-dinja. Ma naqsux li jgħidu li hemm punti pożittivi ukoll fosthom dik li kienu affermati id-drittijiet umani tar-refuġjati.
"Stati sinjuri għandhom joffru assistenza lil pajjiżi li qed jiffaċċjaw l-kriżi" – Mais Balkhi, Syrian Relief
Mais Balkhi, li hi manager ta' Syrian Relief and Development qalet li "ma riedux iħalltu l-aspett uman ma' dak politiku. Il-kwistjoni mhix biss ta' numri imma hi dik ta' għajnuna lil persuni fosthom rilokazzjoni".
Hi qalet li Stati membri b'esperjenza mar-refuġjati għadhom joffru appoġġ u l-esperjenza tagħhom lil pajjiżi li qed jiffaċċjaw din il-kriżi għall-ewwel darba. 
"
Din id-dikjarazzjoni hi ftit ħafna" – Oxfam International
Oxfam International ukoll iddikjarat li "d-dikjarazzjoni approvata hi ftit ħafna ħdejn dak li hemm bżonn." Josephine Liebl minn Oxfam tgħid li "din id-dikjarazzjoni kif mistenni ma' tagħtix l-impenn biex tinbidel is-sitwazzjoni kif inhi llum. Id-dinja kellha l-opportunità biex toffri aktar umanità, imma l-gvernijiet taw biss soluzzjonijiet b'nofs qalb. Dan mhux aċċettabbli. Pajjiżi sinjuri għandhom jilqgħu, jipproteġu u jappoġġjaw lir-refuġjati. Ir-riċerka tagħna turi li l-aktar sitt pajjiżi sinjuri fid-dinja, li jiffurmaw aktar minn nofs l-ekonomija tad-dinja, għandhom inqas minn 9 fil-mija tal-popolazzjoni dinjija tar-refuġjati.
Malala Yousafzai, rebbieħa tal-premju nobel, ukoll ikkritikat id-dikjarazzjoni u qalet li "d-dikjarazzjoni ma tinkludix impenn ġdid u sostanzjali għar-refuġjati"Ta' min jgħid li hu stmat li fid-dinja hawn xejn inqas minn 65 miljun refuġjat, persuni li għal xi raġuni jew oħra kellhom jaħarbu minn pajjiżhom. Minn dawn hemm 12 fil-mija li jinsab fil-kontinent Amerikan, 6 fil-mija fl-Ewropa, 39 fil-mija fil-Lvant Nofsani u fl-Afrika ta' Fuq, 14 fil-mija fl-Asja u fil-Paċifiku, u 29 fil-mija fl-Afrika stess.

''Min jinqabad m'hemmx ħniena'' ... skart mormi illegalment fiż-Żurrieq

Pellets tal-injam. Bramel taż-żebgħa. Landi. Biċċiet tal-katusi u oġġetti tal-plastik.
Dawn huma ftit mill-iskart li qed ikerraħ żona fil-kampanja sabiħa taż-Żurrieq. Ikun hemm min jargumenta li għandhom isiru l-kameras jew spezzjonijiet, iżda d-diffikultà tkun li dawn ma jistgħux isiru kullimkien. Dan ir-rimi ta' skart illegalment, ma setax jonqos li jġib ir-rabja tas-Sindku taż-Żurrieq, Natius Farrugia. Iddikjara li "impossibbli li tagħmel il-kameras kullimkien. Min jinqabad m'hemmx ħniena. Inkunu responsabbli".

Gallozz Aħmar f'kontroversja ... ornitoloġist, kaċċaturi u Birdlife jgħidu tagħhom

Appell imqanqal minn mara biex jinġabar għasfur ferut wara li aktarx ħabat ma' x'imkien, wassal għal kontroversja sħiħa f'siti soċjali. L-għasfur kien Gallozz Aħmar, li mhux daqstant komuni u li l-popolazzjoni tiegħu qed tonqos. Il-mara allegat li meta ċemplet lil Birdlife qalulha li ma jistgħu jagħmlu xejn għalkemm huma ma kinux jafu x'tip ta' għasfur hu.
Humu talbuha ċċempel lid-Direttorat tal-Animal Welfare. Wara li l-mara tefgħet appell ta' għajnuna fuq sit soċjali u qalet dak li għaddiet minnu fosthom dak li qalulha l-Birdlife qamet kontroversja sħiħa b'għadd ta' kaċċaturi jagħmlu allegazzjoni li dan ma nġabarx għax ma kienx vittma ta' kaċċa illegali. Biss ftit ħin wara li deher dan l-appell, Birdlife ġabru l-għasfur.
L-ornitoloġist Natalino Fenech ukoll ikkriktika lil Birdlife ġabru l-għasfur tliet sigħat wara l-ewwel telefonata u meta minn ritratt li ntefa' f'siti soċjali deher li dak hu għasfur mhux daqstant komuni.
L-appell tal-mara kien jgħid hekk: "Tistgħu tgħinuni? Sibt dan l-għasfur f'Ħal Lija u jidher li hu mweġgħa. Ċempilt lill-Birdlife u qaluli li ma jistgħux jgħinu u talbuni nikkuntattja lil Animal Welfare. Meta ċempilt lil Animal Welfare qaluli biex inċempel lill-Birdlife jew it-Taqsima tal-Infurzar tal-Pulizija (ALE). Jien ġbartu imma ma naf xejn fuq l-għasafar ma nistax inżommu".
Dan il-messaġġ inkiteb minn Katherine Borg Harwood fis-sit soċjali ''Rubs Puppy Love''. Immedjatament kienu diversi dawk li bdew jikkummentaw dwar dak allegat li Birdlife li mhux l-ewwel darba li esponew għasfar li jkunu vittmi ta' kaċċa illegali, iżda f''dan il-każ ma sarx hekk mill-ewwel għax l-għasfur kien jidher li mhux vittma ta' kaċċa illegali.
Immedjatament inbdiet diskussjoni dwar dan u x'kien se jiġri mill-għasfur fejn il-persuna konċernata anki tellgħet ritratti tiegħu.
 L-ornitoloġista Natalino Fenech ikkummenta f'sit soċjali u qal li "xi ħadd ikkuntattja lil Birdlife u bagħtilhom ritratt ta' Gallozz Aħmar. Din hi speċi li l-popolazzjoni tagħha qed tonqos minn madwar id-dinja. Birdlife qalulha li ma jistgħu jagħmlu xejn. Wara li l-persuna poġġiet ir-ritratti u l-għasfur kien identifikat xi speċi hu, il-Birdlife kienu infurmati u huma marru jiġbruh. Dan inġabar tliet sigħat wara li sar l-ewwel kuntatt. Dawn huma l-istess nies li regolarment jitkellmu fuq l-irregolaritajiet. Bla kliem".
Hekk kif ittella' l-avviż ta' għajnuna u ntqal li Birdlife qalu li ma jistgħu jagħmlu xejn, ma naqsux għadd ta' kummenti ta' kaċċaturi li bdew jallegaw kif Birdlife jmorru jiġbru l-għasfar li jkunu vittmi ta' kaċċa illegali, iżda f'dan il-każ ma intwerietx l-istess ħeġġa bl-allegazzjoni tkun li dan sar għax ma kienx hemm kaċċa illegali involuta.
inewsmalta.com għamel kuntatt ma' Birdlife fejn tlabnihom jispjegaw dak li seħħ b'mod partikolari rigward dak allegat mill-persuna li tellgħet l-avviż, jiġifieri li Birdlife qalu li ma jistgħu jagħmlu xejn. Fir-risposta tagħha Birdlife qalet biss li l-għasfur inġabar u ddikjarat li dan sar mal-ewwel ċans li kellha.
Birdlife fir-risposta tagħhom qalulna li "f’dan il-każ, l-għasfur konċernat (Gallozz Aħmar, Corn Crake) inġabar minn BirdLife Malta li ħadet azzjoni kif tieħu f’kull każ simili mal-ewwel ċans li kellha dakinhar wara li daħal dan ir-rapport. Fl-istess ġurnata t-tim tar-Raptor Camp ta’ BirdLife Malta kien imsejjaħ fuq numru ta’ każi oħra fosthom rapport li daħal minn Tas-Sliema dwar Buqrajq u rapport dwar Arpa li kienet osservata fl-inħawi tal-Buskett.
Dan minbarra l-ħidma normali ta’ sorveljanza li tkun għaddejja bħal dan iż-żmien tal-passa tal-għasafar. Il-każi kollha ġew segwiti minn BirdLife Malta."
Qalet ukoll li "BirdLife Malta tfakkar li każi ta’ ksur tal-liġi u ta’ għasafar feruti għandhom jiġu rrappurtati l-ewwel lill-Pulizija fuq in-numru 119 imbagħad lilha fuq 2134 7645/6 fil-ħinijiet tal-uffiċċju jew fuq il-hotline 7925 5697 (numru strettament riservat għal każi ta’ reati kriminali u emerġenzi) filgħaxijiet u tul tmiem il-ġimgħa. Rapporti oħra jistgħu jintbagħtu permezz ta’ email fuq info@birdlifemalta.org inkella permezz ta’ messaġġ fuq il-Facebook tagħna fl-indirizz www.facebook.com/birdlifemalta. F’kull każ li jidħlilha BirdLife Malta taħdem mill-qrib mal-Pulizija u mad-Dipartiment tal-Animal Welfare."

Il-kariga ta' sindku f'għajnejn in-nies ...

Kevin Barun, eks-Sindku ta' Birżebbuġa: Titqies li qiegħda biex tħaxxen butek ... jew elett biex tkun biċċa tal-art
L-aħħar attività uffiċjali ta' Kevin Barun bħala Sindku ta' Birżebbuġa kienet f'Jum Birżebbuġa.
Ma naqasx li fi tmien din l-avventura tiegħu ta' ħidma b'risq Birżebbuġa jesprimi l-ħsibijiet tiegħu dwar kif in-nies iħarsu lejn il-kariga ta' sindku. Fi kliemu stess f'għajnejn in-nies il-kariga jarawha bħala li biex tħaxxen butek jew inkella li kont elett biex issir biċċa tal-art. Kevin Barun jikteb li "kienet avventura li fiha tgħallimt naqdi u nkun ta' servizz. Tgħallimt nisma'. Tgħallimt li hu aktar ta' sodisfazzjon meta tagħti mingħajr ma tistenna. Il-politika sabiħa. Ħasra li f'għajnejn in-nies aktar titqies bħala kariga li qiegħda hemm biex tħaxxen butek. Jew li il-persuna eletta qiegħda hemm biex tkun biċċa tal-art, inkella noqogħdu nheddu bil-vot."

Tenna li "wisq nibża' li jekk mhux se nibdew naraw il-kunsilli lokali bħala servizz u li aħna r-residenti rridu ngħinu lil dawk eletti jkunu effiċjenti, u mhux naraw kif se naħlulhom ħinhom, dawn se jmutu mewta naturali. Jekk għandek problema ċempel lil Customer Care u mhux lis-sindku jew xi kunsillier. Kontra kif jaħsbu ħafna nies, sindku mhuwiex xogħol fulltajm il-kunsill, iżda speċi ta' partajmer. Xogħol min hu elett hu li jagħmel il-politika. Jiddispjaċini ngħid li minħabba l-ammont ta' telefonati u xogħol żejjed li wettaqt, għax wara li nirċevihom, jien stess inċempel customer care, ma kellix ħin inwettaq dak li xtaqt. Nipprova nwettaq dawn ix-xewqat meta nirtira jekk ikunu għadhom jeżistu il-kunsilli."

''Attivitajiet illegali bħal dawn għandhom jitwaqqfu b'mod partikolari f'żoni turistiċi,'' 

-is-Sindku ta' San Pawl il-Baħar, Graziella Galea

It-talb minn Musulmani f'post f'Buġibba ...
Is-Sindku ta' San Pawl il-Baħar, Graziella Galea għadha kif iddikjarat - b'riferenza għal attivitajiet ta' talb minn Musulmani f'Buġibba - li "attivitajiet illegali bħal dawn għandhom jitwaqqfu b'mod partikolari f'żoni turistiċi".


Waqt li kkummentat fuq il-laqgħa tal-Kunsill li saret nhar l-Erbgħa dwar talb minn Musulmani f'Buġibba u applikazzjoni li hemm mal-MEPA dwar dan, qalet li "l-Kunsill Lokali San Pawl il-Baħar qabel b’mod unanimu li l-Kunsill għandu joġġezzjona għall-applikazzjoni għall-bdil ta’ użu u sanzjonar ta’ post tat-talb f’Buġibba. Billi kien hemm diversi persuni preżenti għall-laqgħa, il-maġġoranza tagħhom kontra din l-applikazzjoni, wara li ppreżentajt l-informazzjoni relatata ma’ din l-applikazzjoni, bħala Sindku tlabt li tiġi sospiża l-laqgħa biex dawk preżenti setgħu jitkellmu dwar din l-applikazzjoni. 

Wara din id-diskussjoni, b’mod unanimu, il-Kunsill qabel li għandu joġġezzjona għal din l-applikazzjoni.
''Nemmen li l-post magħżul: Hu inadekwat għall-attività li hu maħsub għalih għax hu żgħir żgħira, jinsab taħt l-art u mhux aċċessibli għal kulħadd. Dan ixekkel u jnaqqas l-ordni pubblika u kawża ta' inkonvenjent – fil-fatt kien hemm diversi lmenti mir-residenti li persuni qegħdin jitolbu fit-triq, kif ukoll li dawn jikkawżaw periklu għal kull min irid jgħaddi miż-żona minħabba li l-bankini ma jibqawx aċċessibli għal kulħadd. Dan ikompli jżid il-problema ta’ nuqqas ta’ parkeġġ fiż-żona. Kif issemma' wkoll waqt il-laqgħa tal-Kunsill, fil-fatt dan il-post ilu jopera illegalment, b’effett fuq ir-residenti taż-żona u kull min jgħaddi minn hawn hekk. Attivitajiet illegali bħal dan il-każ għandhom jiġu mwaqqfa b’mod partikulari f’żoni turistiċi għal diversi raġunijiet ovvji li ġa semmejt kif ukoll għax attività bħal din tnaqqas il-valur tal-proprjetà fiż-żona."

Ċans kbir li l-fkieren jerġgħu jbejtu

Wara li fil-bidu ta' Awwissu fekruna kienet daħlet fuq ix-xatt fil-Bajja ta' Għajn Tuffieħa għall-ħabta tal-10.00 ta' bil-lejl u biedet ftit qabel nofs il-lejl, ilbieraħ kien hemm l-ewwel tifqis. Din hi l-ewwel darba sa mis-sena 1915 li Fekruna biedet fuq ix-xtajta Maltija. Sa qabel dan it-tifqis, Malta ma kinitx imniżżla fuq il-mappa ta' fejn ibidu l-fkieren fil-Mediterran. B'dak li seħħ lbieraħ, Malta issa tinsab fuq il-mappa.
Kollox qed jindika li l-prospetti li jkun hemm aktar bejtiet mill-fkieren fuq bajjiet Maltin huma inkoraġġanti. Kienu il fuq minn 60 fekruna li faqqsu lbieraħ fejn dak il-ħin stess rħewlha lejn il-baħar. Iż-żona fejn biedet il-fekruna kienet osservata minn diversi rappreżentanti u volontieri minn Nature Trust Malta.Inewsmalta tkellem ma' bioloġista dwar dan il-fatt storiku, fejn waqt li esprimew is-sodisfazzjon tagħhom għat-tifqis saħqu fuq il-bżonn li l-baħar jitnaddaf mill-plastik wieħed mill-akbar għedewwa tal-fkieren.

Ma naqsux li jirrimarkaw kif ħafna minn dawn il-fkieren żgħar se jispiċċaw vittmi tal-predaturi fil-baħar. Biss fi kliemu stess, studju dwar il-fkieren fil-Mediterran b'mod partikolari il-Punent tal-Mediterran qed juru li hemm xejra ta' żieda f'dawk li huma bejtiet. L-istess bioloġista qalilna li "jekk wieħed jieħu l-kosta tal-Campana fil-Lbiċ tal-Italja jara li l-ewwel bejta kienet reġistata fis-sena 2002. Minn dakinhar 'l hawn kull sentejn jew erba' snin baqgħu jinstabu l-bejtiet. Biss sa mis-sena 2012, kien qed ikun hemm sa seba' bejtiet kull sena." L-istess biologista qalilna li l-istudji dwar il-fkieren fil-Mediterran juru li qed ikun hemm xejra ta' żieda ta' bejtiet fejn l-istess studji jgħidu li dan jidher li qed isir minħabba żieda fit-temperatura ta' wiċċ il-baħar fil-Punent tal-Mediterran.
L-aktar postijiet li fihom ibejtu l-fkieren huma fil-Greċja, Turkija, Ċipru u l-Libja. Ta' min jgħid li din is-sena ix-xtajtiet ta' Kyparissia fil-Greċja kellhom xejn inqas minn 2,500 każ ta' fkieren li bejtu. Dan ifisser li għall-ewwel darba mindu kienu qed ikunu reġistrati l-bejtiet, inkiser kull rekord. Inkitbet l-istorja fuq il-konservazzjoni ambjentali
Il-bioloġista marittimu Alan Deidun ikkummenta li "inkitbet paġna ġdida f'dik li hi konservazzjoni ambjentali. Dan hu l-ewwel każ ta' suċċess ta' tifqis ta' bajd ta' fekruna sa mis-sena 1915, wara tentattivi fis-sena 1960 u fis-sena 2012. Dawn il-fkieren se jiġu lura lejn il-Bajja ta' Għajn Tuffieħa meta jkunu kibru biex ibejtu. Biss biex jiġri irridu nkunu aktar prudenti fuq ix-xtajtiet tagħna f'dawk li jirrigwarda żvilupp u attivitajiet oħra".
In-Nature Trust Malta min-naħa tagħha ma naqsitx milli tirringrazzja lil dawk kollha li b’xi mod kienu ta’ għajnuna billi offrew ftit mill-ħin tagħhom biex josservaw u jieħdu ħsieb lil dawn il-fkieren.
F’messaġġ fuq il-paġna fuq is-sit soċjali tagħha, Nature Trust qalet kif dan kollu ma kienx ikun possibbli kieku l-istess individwi ma għamlux sagrifiċji billi jqattgħu ħinijiet fix-xemx u anke fix-xita biex jipprevjenu lill-ġrieden u predaturi oħrajn milli jkunu ta’ periklu għall-bejta tal-fkieren.
Il-fekruna li bejtet fil-Bajja ta' Għajn Tuffieħa hija loggerhead, bil-Malti magħrufa bħala l-fekruna komuni. Min jaqbad, joqtol, jieħu jew ibigħ dawn il-fkieren ikun qed jikser il-liġi u jistgħu jittieħdu passi kontra tiegħu. Fil-fatt, hemm multa ta' bejn il-€500 u l-€2,400 għal kull bajda li tinqered jew tittieħed mis-salvaġġ. Faqqsu 66 fekruna wara 56 jum L-Awtorità għall-Ambjent u Riżorsi (ERA) qalet li faqqsu b'kollox 66 fekruna wara 56 jum ta' inkubazzjoni. Hi spjegat li l-ERA ħadet il-passi meħtieġa biex ikun hemm disturb mill-inqas taż-żona fosthom mid-dawl. L-ERA spjegat li l-lejl ta' bejn it-Tnejn u t-Tlieta kien wieħed bla dawl ta' qamar u dan għamel l-ħidma mill-voluntieri u uffiċjali aktr diffiċli. Qalet li hu ttamat li dawn il-fkieren jirritornaw lejn pajjiżna bejn 25 u 30 sena oħra biex ibejtu.

Qamar iswed

L-aħħar jum ta' Settembru se jġib miegħu fenomenu mhux daqstant komuni u dan hu l-Qamar Iswed. L-aħħar darba li seħħ dan il-fenomenu kien f'Marzu tas-sena 2014. It-terminu Qamar Iswed għandu diversi tifsiriet. L-aktar waħda komuni hi dik li dan ikun it-tieni qamar ġdid f'xahar. Peress li hu qamar ġdid dan mhux se jkun viżibbli u dan minħabba li l-parti illuminata tal-Qamar se tkun qed tħares lejn id-dinja iżda lejn in-naħa l-oħra.
Dan il-fenomenu se jkun jista' jitgawda fl-Istati Uniti u fil-Punent tal-Ewropa. U quddiem avvenimenti bħal dawn ma jonqsux it-teoriji. Hemm min jargumenta li dawn huma avvenimenti li jistgħu jwasslu għal traġedji kbar jew saħansitra l-apokalissi.

Malti kien tilef qraba fit-traġedja tal-Boeing li twaqqa' fuq l-Ukrajna

Irid jingħad li f'dik it-traġedja Stephen Serracino Inglott kienet tilef tlett iqraba li kienu ħu l-mara tiegħu, Paul, martu Shuba u binthom li kienet għadha se tagħlaq sentejn. Paul kien Olandiż u kellu 33 sena. Hu kien jaħdem ma’ kumpanija li tesporta materjali elettroniċi fil-Malażja. Shuba kellha 38 sena u kienet attriċi fil-Malażja

"Xejjirli u reġa' għodos u eżatt wara dinghi għadda minn fuqu"

"Kien biss ftit metri bogħod mill-art. Żewġi għolla rasu mill-ilma u xejjirli. Ftit wara reġa' għodos. Eżatt wara jgħaddi dinghy minn fuqu". Dan irrakkontatu quddiem l-inkjesta li għaddejja fir-Renju Unit b'rabta mat-traġedja ta' żewġha Allan Stanley. Hu kien miet traġikament f'Ħondoq ir-Rummien f'Ġunju li għadda bi ġrieħi f'rasu wara li għadda dinghy minn fuqu. Allan Stanley, li kellu 76 sena, kien midħla sew ta' Għawdex u kien jiġi spiss flimkien ma' martu biex jogħdos. Allan kien jgħix qrib Pwllheli u kellu ħanut bl-isem 'Period Pine Shop'.
Quddiem l-inkjesta li għaddejja dwar dan il-każ, in-neputija tiegħu Hannah iddeskrivietu bħala 'persuna dejjem bi tbissima'.
Martu Diane irrakkontat kif nhar id-19 ta' Ġunju filgħodu kienu marru f'Ħondoq ir-Rummien fejn Allan kien niżel jogħdos. F'ħin minnhom meta kien ftit metri biss bogħod mill-art hu xejrilha u reġa' niżel. Eżatt wara għadda dinghy minn fuqu. Hi ddikjarat li "kollox seħħ f'temp ta' ftit sekondi". Tenniet li dak li kien qed isuq id-dinghy waqqfu u flimkien ma' ħuħ niżlu jagħtu l-ewwel għajnuna lil Allan. Martu enfasizzat li "ma naħsibx li dak li kien qed isuq id-dinghy ra lil Allan quddiemu fil-baħar. Dan għax x'ħin għadda id-dinghy, Allan kien diġa niżel taħt l-ilma.Il-ħaġa ġrat malajr wisq".

Il-persuna li qed imexxi din l-inkesta li għandha tikkonferma l-mewt ta' dan l-Ingliż, Dewi Pritchard innota li l-awtoritajiet Maltin ma kkoperawx mat-talbiet tiegħu għal aktar informazzjoni. L-unika dettalji li għandu huma rapport ta' xhieda li rat l-inċident u r-rapport tal-awtopsja. Minn awtopsja li saret fir-Renju Unit minn Dr. Mark Lord ġie stabbilit li ftit li xejn kien daħal ilma fil-pulmun. Hu qal li l-mewt ġiet kaġunata minħabba feriti severi f'rasu mill-iskrun tal-mutur tad-dinghi. Dewi Pritchard iddikjara li "ma nafux jekk is-sewwieq tad-dinghy rax jekk hemmx nies quddiemu fil-baħar. Li nafu fi żgur hu li d-dinghy għadda minn fuqu. M'hemm ebda evidenza li Allan għereq imma li sofra ġrieħi f'rasu minn dan id-dinghy".

Il-kunsill ta' San Pawl il-Baħar unanimu kontra moskea

Il-kwistjoni ta' proposta quddiem l-Awtorità tal-Ippjanar biex binja f'Buġibba issir post ta' talb għall-musulmani kienet diskussa mill-Kunsill Lokali ta' San Pawl il-Baħar u dan minkejja li ma kinitx imniżżla fuq l-aġenda. Il-Kunsill b'mod unanimu wara d-diskussjoni li kien hemm qabel li jopponi li dan il-post klassi 4 jinbidel għal post ta' talb. Is-suġġett tela' bħala korrispondenza wara li kien il-Kunsillier Laburista Ray Tabone li ġibed l-attenzjoni.
Il-Kunsillier Laburista Alfred Grima talab li jkun suġġett fuq l-aġenda imma tħalla bħala korrispondenza. Jidher li fil-laqgħa saru ilmenti li suġġett bħal dan la kien hemm talba missu tniżżel fuq l-aġenda.
Tqajmu diversi problemi li jista' jikkaġuna bħal li l-post żgħir, problema ta parkeġġ, żvalutar tal-prezz ta' proprjetá fuqu u fil-madwar, storbju, u li l-użu tiegħu isir f'diversi ħinijiet anke fl-4.00 ta' filgħodu u tard bil-lejl. Ġie deċiż li għandhom jikkunsidraw li talba bħal din issir f'sit akbar u li ma jkunx ta' nkonvenjent għar-residenti. Għal xi ħin twaqqfet il- laqgħa biex saru ilmenti ta' residenti. Membru tal-Malta Muslim Council tkellem favur l-applikazzjoni fejn hu ammetta li operaw bla permess u waqfu xi tlett ġimgħat ilu.
Qal li kienu ilhom mal-15-il sena jippruvaw isibu post u dejjem kien hemm reżistenza.
Qal li talbu lill-MEPA tindikalhom xi tip ta politika kif irid ikun post ta' talb iżda qal li din ma teżistiex. Hu qal li bħalhom hemm mal-20 għaqda differenti li qed ifittxu postijiet simili f'Malta. Residenti anke barranin lmentaw dwar il-valur turistiku li jintilef għax Buġibbahi sit turistiku u residenzjali. Staqsew x'benefiċċji hemm għat-turiżmu? Ilmentaw li jitolbu barra u jimblukkaw it-triq u li sfidaw il- liġi kemm il darba għax komplew bl-attivita ta' talb kull darba li twaqqfu!.

Għaddew tmien snin ... it-tifla li twieldet fuq il-baħar tibqa' mhux irreġistrata

Kien xejn inqas minn tmien snin ilu meta Chama Hatri u Abdi Ali Sahra, żewġ nisa mis-Somalja - it-tnejn tqal, flimkien ma' 66 immigranti oħrajn ħallew il-Libja fuq dgħajsa lejn l-Ewropa.
L-għada Chama welldet lil tifla li semmietha Muna. Inqabdu f'maltempata u ttellgħu fuq bastiment Russu bl-isem ta' Yelena Shaltrova. Kienu ddaħħlu Malta u Chama u bintha ngħataw kenn fiċ-ċentru miftuħ.
Minkejja li għadda dan iż-żmien kollu, it-twelid ta' Muna baqa' ma ġiex irreġistrat minkejja diversi tentattivi min-naħa tal-Kummissjoni Emigranti mar-Reġistru Pubbliku.

Jidher li l-problema li nqalgħet hi dik li l-bastiment li fuqu twieldet Muna spiċċa għereq u ma setax ikollu l-gżira ta' Malta bħala l-ewwel port ta' żbark. Il-Kummissjoni Emigranti qalet li fil-pubblikazzjoni tal-emenda ta' Artiklu 285A tal-Kodiċi Ċivili kienet ġiet trattata mill-Uffiċċju ta' Ombudsman maż-żewġ ministeri kkonċernati u kien hemm qbil li l-artiklu jiġi rivedut.
L-emenda fil-liġi llimitat ruħha għal tarbija mwielda fuq il-baħar u mdaħħla Malta fuq id-dgħajsa li fuqha twieldet.
Ma tikkonsidrax il-fatt li d-dgħajsa li fuqha kienu l-immigranti għerqet u li t-tarbija, flimkien ma' ommha u l-immigranti l-oħra twasslu Malta fuq vapur li salvahom u fuq ordni tal-AFM daħal Malta ggwidat minnhom.
Tgħid li d-Direttur Marta Santo Pais, issejjaħ dan in-nuqqas ta' reġistrazzjoni ta' twelid bħala faqar. Intqal li r-reġistrazzjoni tat-twelid tat-tarbija li titwieled tant hu importanti li jitqies bħala dritt uman li wħud isejħulu ''juys soli'' - dritt daqs dak li tpoġġi saqajk fuq l-art u ''jus sanguinis'' - dritt li qiegħed fid-demm tal-bniedem.

It-traġedja MH17: Il-missila kienet sparata minn territorju kkontrollat mir-ribelli

 'Erġajt għixt il-ġurnata tat-traġedja bl-uġiegħ
u n-niket kollu….importanti li nafu min wettaq dan"



"Erġajt għixt il-ġurnata tat-traġedja bl-uġiegħ u n-niket kollu.  Imma importanti li nafu min wettaq dan. Issa nistennew l-ismijiet". Dan iddikjaratu omm ta' passiġġier vittma fuq it-titjira MH17 ftit ħin wara li l-investigaturi ppubblikaw ir-rapport tagħhom.



Prosekuturi internazionali li kienu qegħdin jinvestigaw it-traġedja tat-titjira tal-ajruplan ta’ Malaysia Airlines, MH17, li ġġarrfet fil-Lvant tal-Ukrajna fl-2014 qalu li l-missila tal-għamla “Buk” li ntużat biex jitwaqqa’ l-ajruplan kienet ġejja mir-Russja.
Il-298 persuna li kienu abbord l-ajruplan tat-tip Boeing 777 mietu hekk kif dan inqasam f’diversi biċċiet matul it-titjira li minn Amsterdam kellha tieħdu Kuala Lumpur.
Robby Oehler, li n-neputija tiegħu kienet fost dawk abbord l-ajruplan, f’kummenti lil aġenzija tal-aħbarijiet qal li l-prosekuturi saħqu mal-qraba tal-vittmi li kienu se jinvestigaw madwar 100 persuna b’rabta ma’ dan l-inċident.
Huwa kompla jgħid li l-prosekuturi kienu tal-fehma li l-missila kienet ġiet sparata minn territorju li kien ikkontrollat minn ribelli li kienu favur ir-Russja.
It-tim ta’ prosekuturi huwa magħmul minn prosekuturi ġejin mill-Olanda, l-Awstralja, il-Belġju, il-Malażja u l-Ukrajna.

Twaħħlet tliet ġimgħat ilu ... faqgħawha b'daqqa ta' ġebla

Sforz mill-Kunsill Lokali taż-Żurrieq biex joffri aktar sigurtà f'kantuniera partikolari sfuma fix-xejn tlett ġimgħat biss wara li sar.
Dan hekk kif mera li twaħħlet biex tgħin lis-sewwieqa u tnaqqas il-periklu, tkissret b'att vandalu.
Kollox jidher li sar matul il-lejl wara li ntefgħet ġebla fid-direzzjoni tal-mera. Is-Sindku taż-Żurrieq Natius Farrugia ma naqasx li jikkummenta u jesprimi id-diżappunt tiegħu. Sostna li "nħossni diżappuntat immens b'dan l-aġir. Każ irresponsabbli li ma jagħmilx ġid".

Mill-Finlandja għal Għawdex u l-Afrika ...
... il-vjaġġ ta' Arpa




F'nofs Lulju li għadda twaħħlilha transmitter u kienet fil-Finlandja. Ftit jiem ilu biss eżattament fit-18 ta' Settembru kienet fuq Għawdex u issa tinsab fl-Afrika. Dan hu l-vjaġġ ta' Arpa, li ġie rreġistrat bis-saħħa tat-transmitter.
Dan tħabbar mill-ornitoloġista Natalino Fenech ftit ħin ilu. Hu qal li "Arpa mill-Finlandja, li ilha bit-transmitter minn nofs Lulju li għadda f’temp ta' kwarta kienet qasmet Għawdex. Bħalissa tinsab l-Afrika. Fi żminijiet oħra kieku qiegħda f’xi freezer.
Ejja naħdmu ħalli naraw aktar bħal din. Min hu interessat jara dwar il-moviment ta dawn l-arpi jista' jidhol f'dan is-sit minn Finland: http://www.luomus.fi/en/satellite-osprey-families-2014

L-applikazzjoni għal talb minn Musulmani f'Buġibba ...
....il-Kunsill ma jpoġġihiex fuq l-aġenda


Il-kwistjoni dwar l-applikazzjoni għal talb minn musulmani f'Buġibba, li ftit jiem ilu saret talba biex tkun inkluża fl-aġenda tal-Kunsill għal laqgħa li se ssir għada l-Erbgħa, għal raġunijiet li għadhom mhux magħrufin ma tpoġġietx fl-aġenda.
inewsmalta.com għandu kopja tal-aġenda tal-Kunsill fejn jidher biċ-ċar li fiha mhix imniżżla din l-applikazzjoni biex tkun diskussa. Kien il-Kunsillier Laburista Alfred Grima li talab li l-kwistjoni titpoġġa fuq l-aġenda.

L-eks-Sindku Laburista Ray Tabone kien bagħat korrispondenza lill-Kunsill fuq din l-applikazzjoni.
It-tama issa hi li l-Kunsill jiddiskuti din il-kwistjoni meta tinqara' l-korrispondenza.
inewsmalta.com hi infurmata li l-Kunsill Lokali waslulu rapporti li f'dan l-istess post f'Buġibba kien qed isir it-talb, fejn jidher li anki kienu infurmati l-Pulizija.

Kienet inewsmalta.com li rrapportat li f'Buġibba hemm post li jinsab taħt il-livell tat-triq li fih kien qed isir talb mill-Musulmani u li kienet intefgħet applikazzjoni quddiem l-Awtorità tal-Ippjanar biex dan il-post jingħata permess li fih ikun jista' jsir it-talb.

Il-Patrijotti: Ma ħallejnihomx fl-Imsida u determinati li ma nħalluhomx f'Buġibba

B'mixja ta' protesta minn ħdejn il-Knisja tal-Qawra sa Triq il-Mazzola, hu l-mod kif l-għaqda Patrijotti Maltin se turi li ma taqbilx li grupp ta' persuni Musulmani jużaw appartament biex fih jitolbu. Il-protesta se ssir il-Ħadd, 9 ta' Ottubru, waranofsinhar. Fl-avviż li nħareġ intqal li "ma ħallejnihomx l-Imsida u determinati li ma nħalluhomx f'Buġibba".

Ir-referendum tat-Torri tal-Arloġġ għadu se jsir

Il-proposta biex fil-pjazza ewlenija tal-Birgu jerġa' jinbena it-Torri tal-Arloġġ, kienet diskussa sew fost il-Ġirbin. Min jaqbel b'ruħu u b'ġismu u min xettiku. Kien hemm min ħaseb li dan il-proġett ħa id-daqqa tal-mewt meta rappreżentanti tal-kumpanija li kienet se tiffinanzja parti mill-proġett irtiraw minħabba insulti li kien hemm fil-konfront tagħhom u ta' dan il-proġett.  Xejn  minn dan. Il-proġett għadu f'moħħ il-kunsill lokali, tant  li s-Sindku John Boxall meta fl-aħħar jiem tkellem fid-dettal ma' Inewsmalta dwar dan il-proġett qalilna li "r-referendum dwar dan il-proġett se jsir xorta waħda. Nemmnu li dan hu proġett importanti għar-riġenerazzjoni tal-Birgu. Nittamaw biss li l-għajnuna li kien wegħdna l-Gvern għadha hemm. Mhux neskludu li nġibu fondi Ewropej għal dan il-proġett".
Is-Sindku tal-Birgu, John Boxall meta tkellem ma' Inewsmalta qalilna li "r-referendum b'konnessjoni mat-Torri tal-Arloġġ fil-Birgu irid isir. Allavolja min kien se jagħtina somma konsiderevoli biex dan il-proġett isir, irtira għax ħassu imweġġa' b'kummenti li intqalu..

Irridu nsibu żmien li ma jkunx hawn festi jew attivitajiet fil-Birgu

Ir-referendum mhux se jiġi jiswa ħafna flus u dan għax il-Kummissjoni Elettorali offriet l-għajnuna tagħha.  B'kolox hawn ftit aktar minn 2,000 resident li huma eleġibbli jivvutaw. Se jivvutaw dawk li għandhom minn 18-il sena 'l fuq u dawk li huma reġistrati fuq ir-reġistru elettorali li joqogħdu fil-Birgu".
Mhu veru xejn li se jieħdu flus mill-kafeterija
Mistoqsi dwar il-kwistjoni tal-kafeterija fit-Torri li dwarha kien hemm diversi kummenti, is-Sindku John Boxall qalilna li "mhu veru xejn  li min kien se jagħmel il-proġett kien se jieħu l-qliegħ mill-kafeterija. Il-kummenti li saru f'dan is-sens kienu intiżi biss biex jagħmlu l-ħsara. Sfortunatament saret ħsara lill-kumpanija li kienet se tagħti fondi biex isiri il-proġett u saret ħsara lil dan il-proġett stess.  Irrid ngħid hawn li l-kumpanija kienet ġiet minn jeddha biex isir dan il-proġett u offriet somma għalih. Fil-bidu kienu tawna €60,000. Minn naħa tagħna konna tlabna stima ta' kemm jiġi jiswa dan il-proġett u ġejna infurmati li hemm bżonn €300,000. Ktibnilielhom mill-ġdid u minn jeddhom Alf Mizzi & Sons resqu lejna u kienu offrew €130,000. Issa kellna nofs il-proġett kważi finanzjat. Kien tqabbad il-perit Cintorino li hu espert fil-bini medjevali u l-ministeru kien offra l-għajnuna tiegħu fosthom ħaddiema u anke l-ġebel. Bdejna infittxu arloġġar u sibna wieħed li kien lest iħaddem il-magna li kellu dan l-arloġġ. Qalilna li anke l-arloġġ seta' jagħmlu jdoqq minkejja li kien hemm xi partijiet neqsin. Fil-modifiki li kellhom isiru, l-arloġġ seta' jitwaqqaf milli jdoqq f'ċertu ħinijiet fosthom bil-lejl.

"
Sinonimu mal-Birgu….jiġri x'jiġri l-parkeġġ fil-pjazza se jispiċċa


John Boxall, qalilna li "dan it-torri hu sinonimu mal-Birgu. Bħala kunsill narawh li hu parti importanti fir-riġenerazzjoni tal-Birgu. B'dan l-arloġġ il-pjazza se tieħu ħajja oħra. Se noħolqu turiżmu ġdid. Se tiżdied l-attività ekonomika u minn din se jgawdi kulħadd. Jiġri x'jiġri, il-parkeġġ f'din il-pjazza se jispiċċa. Meta l-pjazza tiġi pavimentata mhux se jkun jista' jsir ipparkjar fin-nofs kif qed isir bħalissa. Il-parkeġġi f'din il-pjazza se jkunu limitati.  Il-proġett mhux biss kien se jsostni lilu nnifsu. It-torri kien se jbiegħ lilu nnifsu. Ħanut tas-souvenirs li jbiegħ repliki tat-torri, kif ukoll esebizzjoni marbuta mat-torri fih stess. Kull ma riedu Alf Mizzi & Sons kienet biss ħaġa, li jkun hemm plakka li fiha jingħad li parti mill-proġett ġie finanzjat minnhom. 
Irtiraw għax ma felħux għall-insulti
Kompla jgħidilna li Alf Mizzi & Sons irtiraw mhux għax ma ridux isir imma għax ma felħux għall-insulti fuq mezzi elettroniċi moderni.

Insulti indirizzati lejhom u lejn dan il-proġett.

Minkejja din il-ħsara li saret, jien bl-appoġġ tal-kunsillieri tlabt lill-istess kumpanija biex tgħinna finanzjarjament biex nirranġaw l-uniku bandli li hawn fil-Birgu. Tawna €10,000 għald dan il-proġett. Irrid ngħidu li dawn in-nies huma imweġgħin ħafna b'li inkiteb. Nemmen li kulħadd għandu jesprimi l-pożizzjoni tiegħu fuq il-proġett tat-torri, imma ħadd m'għandu dritt jinsulenta."
Nittamaw li wegħda ta' għajnuna mill-Gvern għadha hemm
Dwar x'se jiġri minn issa 'l hemm, is-Sindku Boxall qalilna li "nittama li l-għajnuna li kien wegħdna l-Gvern permezz tal-Ministeru għall-Infrastruttura għadha hemm.  Hemm diversi modi minn fejn jinġabu fondi.  Ma neskludux li nippruvaw inġibu fondi mill-programm ta' ERDF tal-Unjoni Ewropea. L-applikazzjoni mal-MEPA għadha ma saritx.  Nittama li xi darba dan il-proġett jitwettaq.  Dan hu proġett li jekk jitwettaq se jkun ta' ġid kbir għal-lokalità u għal uliedna.  Għalhekk ir-referendum irid isir".

Malta l-aqwa destinazzjoni ''sigrieta'' ta' Lonely Planet Magazine

L-''istorja'', u l-''baħar kristall'' kienu fost il-fatturi li wasslu biex Malta ġiet ikklassifiakta bħala l-aqwa destinazzjoni sigriet tal-Lonely Planet Magazine.
Malta għelbet l-isfida ta' 24 pajjiż ieħor u ġiet ikklassifikata fl-ewwel post.
Wara Malta, ġiet Seoul fil-Korea t'Isfel u Vojvodina fis-Serbja. Fir-raba' post ġiet Stock Island fi Florida, u wara segwew Southern Islands fil-Kambodja, Ilhabela fil-Brażil, Lombok fl-Indoneżja, Lost Sierra f'Kalifornja, Weerribbgen Wieden National Park fl-Olanda, Silent Green f'Berlin il-Ġermanja, Kaieteur Falls f'Guyana, Kjerringoy fin-Norveġja, Pittsburgh f'Pennsylavania u Mallorca fi Spanja fost oħrajn.

"Meta noħorġu aħna mill-UE...tgħid Malta se timxi fuq il-passi tagħna?"
        - Robert Kimbell

Il-konsulent finanzjarju Robert Kimbell, wieħed minn dawk li fix-xhur li għaddew kien wieħed minn dawk li ġġieled qatiegħ biex ir-Renju Unit joħroġ mill-Unjoni Ewropea, fl-aħħar sigħat ikkummenta dwar pajjiżna. Hu semma' kif pajjiżna hu wieħed mill-inqas li jesporta lejn membri tal-Unjoni Ewropea u staqsa jekk meta toħroġ ir-Renju Unit, Malta hix se ssegwi dan il-pass.

F'dikjarazzjoni li għamel fuq twitter hu qal li 46.4 fi-mija tal-Maltin ivvutaw kontra sħubija sħiħa fl-Unjoni Ewropea f'referendum li sar fis-sena 2003. Dakinhar ivvutaw 90.9 fil-mija. Jikkummenta ukoll fuq l-esportazzjoni ta' Malta u qal li din hi fost l-inqas lejn pajjiżi tal-Unjoni Ewropea u staqsa jekk Malta hux se ssegwi lir-Renju Unit fit-tluq tagħha mill-Unjoni Ewropea. 

Robert Kimbell hu konsulent fis-settur tas-servizzi finanzjarji.

Gidi u qattus mejtin mormijin fi triq f'Ħal Tarxien

Fi Triq il-Knisja f'Ħal Tarxien, xi ħadd irresponsabbli tefa' gidi u qattus mejtin. Dawn tħallew fit-triq.
Din id-dehra qajmet ilmenti minn għadd ta' residenti, fejn f'sit soċjali dwar Ħal Tarxien intefa' ukoll dan ir-ritratt. Meta s-sit kien kuntattjat minn inewsmalta.com, dan ikkonferma li l-annimali mejtin kienu gidi u qattus.

Aktar fjamingi u ċikonji ... dehra mill-isbaħ fis-sema Maltija

Fl-aħħar sigħat pajjiżna baqa’ jkollu viżitaturi mill-aktar grazzjużi hekk kif qatgħa oħra fjamingi dehret tpassi minn fuq pajjiżna. Iżda d-dilettanti komplew jitpaxxew hekk kif kienu rrapportati wkoll sitt ċikonji.

L-iżgħar kaptan fid-dinja tingħta titjira lejn Malta

Kien madwar 10 snin ilu li Kate McWilliams kien bdiet taħdem bħala air cadet. Qatt ma ħarset lura u ftit snin wara bdiet tistudja biex tilħaq pilota. Fl-età ta' 26 sena, Kate ingħatat promozzjoni mil-linja tal-ajru easyJet, biex minn first officer saret kaptan. Ftit jiem ilu hi tajret l-ewwel titjira tagħha bħala kaptan min Gatwick lejn Malta. Biex tkompli tagħmel din it-titjira aktar specjali magħha kellha lil Luke Elsworth li aktar kmieni din is-sena, dan sar l-iżgħar pilota fir-Renju Unit fl-età ta' 19-il sena.
Kelliem għall-kumpanija qal lil ġurnal Ingliż Daily Mail, li huma jemmnu li Kate McWilliams hu l-iżgħar kaptan ma' linja tal-ajru kummerċjali fid-dinja.
Kate McWilliams qabdet il-karriera ta' air cadet fl-età ta' 13-il sena u ta' 19-il sena bdiet l-istudji tagħha għal pilota. Hi tgħid li "ma naħsibx li l-età tagħmel differenza. Jien għamilt l-istess taħriġ bħal ħaddieħor. Illum jistaqsuni kemm għandi żmien, xi ħaġa li ma kinitx issir meta kont first officer. Ħafna drabi huma l-cabin crew li jistaqsu imma ġieli anki l-passiġġieri jagħmlu l-mistoqsijiet."
Huma bis 5 fil-mija tal-piloti ma' linji tal-ajru kummerċjali li huma nisa. Is-senas li għaddiet easyJet kienet ħabbret inizjattiva biex l-ammont ta' piloti nisa jiżdied għal 12 fil-mija. Hi ingħaqdet mal-easyJet f'Mejju tas-sena 2011. Oriġinarjament hi minn Carlisle, u taħdem mill-ajruport ta' Gatwick. Hi ttajjar Airbus A319 u A320 u tajret ajruplani f'madwar 100 destinazzjoni.

Kliem oxxen bil-Malti fil-ktieb tal-viżitataturi fil-fabbrika ta' Schindler fi Krakow!

L-istorja ta' dawk li kienu jaħdmu fil-fabbrika ta' Schindler u ħelsu mill-mewt fil-kampijiet ta' konċentrament immexxijin minn Nażisti messet ħafna qlub. Dan sar l-aktar wara li nħareġ film fuq din il-ġrajja. Illum din il-fabbrika fi Krakow hi mużew impressjonanti. Kull min iżurha jibqa' impressjonat. Ġralhom l-istess għadd ta' Maltin li żaruha, hekk kif Krakow u l-Polonja saru popolari sew mal-Maltin fl-aħħar xhur.
Biss, għal persuna li żaret din il-fabbrika fl-aħħar sigħat, baqgħet mistgħaġba b'dak li qrat fil-ktieb tal-viżitaturi, ktieb li fih dawk li jżuru l-fabbrika jiktbu l-ħsibijiet tagħhom. Xi ħadd kiteb messaġġ ta' għadab għal dak li ġara, imma għamel dan peress ta' kiem baxx u mill-aktar oxxen. Min ra dak li nkiteb iddeskriva dan bħala 'tal-mistħija".

Hawn ma saritx it-tindifa ġenerali ... viżibilju ta' fliexken

"Jiddispjaċina ngħidu li hawn ma waslitx it-tindifa ġenerali li saret ftit jiem ilu f'Buġibba. Din hi żona ffrekwentata minn ħafna nies u fiha tara kull tip ta' skart fosthom viżibiju ta' fliexken. Qed nitkellmu fuq iż-żona ta' fejn hemm l-‘Incognito’”.Dan kien il-kumment li għaddielna resident f'Buġibba dwar kif din iż-żona li jgħixu fiha hu hi karatterizzata minn għadd kbir ta' skart mormi hemm u li jidher li ftit li xejn sar biex din iż-żona titnaddaf.

Qatgħa kbira ta' Fjamingi tpaxxi l-għajn tad-dilettanti

Qatgħa mdaqqsa ta' Fjamingi li fiha kien hemm aktar minn 60 tajra, kienet l-attrazzjoni prinċipali għal għadd ta' dilettanti tat-tjur li kienu fin-naħa t'isfel ta' Malta.  Wieħed minn dawk li rnexxielu jiġbed ritratt ta' din il-qatgħa Fjamingi kien il-kaċċatur Roderick Grech. Roderick hu wieħed minn għadd kbir ta' kaċċaturi li f'dan iż-żmien tas-sena isegwi l-passa tat-tjur bil-fotografija.Ritratt: RODERICK GRECH

Id-dar tal-bebbux fi stat tal-biki

 

Dar unika f’Malta għandha l-faċċata u l-ġenb tagħha b’disinji elaborati li saru bl-użu tal-bebbux u qxur oħrajn tal-baħar. Faċċata li tispikka mill-ewwel fiċ-ċentru ta’ Ħal Għaxaq. Minkejja dan,  meta tifliha sew tinduna li ż-żmien u l-elementi naturali affettwaw sew is-sbuħija tad-disinji b’xi wħud anke ttieklu jew waqgħu. 

Din il-binja, li mhix skedata, qed tqajjem l-interess lokali biex tiġi indokrata u ppriservata. Ħafna qed jistaqsu x’qed jistennew l-awtoritajiet kompetenti biex jaraw li din il-proprjetà tiġi skedata. Minkejja l-insistenza fl-aħħar snin biex din id-dar tiġi rrestawrata, anke bl-użu ta’ fondi apposta għal bini ta’ importanza, din id-dar magħrufa bħala “d-Dar tal-Bebbux” dejjem spiċċat twarrbet.
It-TORĊA infurmata li dan qed isir minħabba li skema ta’ restawr inkwistjoni tesiġi li dan isir fi żmien sitt xhur, xi ħaġa li titqies impossibbli f’dan il-każ, minħabba l-preċiżjoni li titlob aktar żmien. Jirriżulta li l-bebbux u l-qxur tal-baħar, li jieħdu post dawk li huma neqsin, iridu jinġiebu minn barra.
“Regolament, burokrazija, għidlu li trid li qed iwassal biex din id-dar unika tibqa’ tinqabeż. Spiċċajna biex bini li kien fi stat ħafna aħjar minn din id-dar, ġie rrestawrat. Din id-dar minħabba l-kwistjoni marbuta maż-żmien tar-restawr qed tibqa’ titwarrab,” qalilna resident li joqgħod fl-istess triq.
“Titkellem ma’ min trid f’Ħal Għaxaq, jgħidlek kif qed taqa’ din il-faċċata unika. Waqt li qed isir dan, l-awtoritajiet li joħorġu dawn l-iskemi, qed ifettqu fuq il-kwistjoni ta’ kemm se jdum ir-restawr. Wasal iż-żmien li min hu inkarigat jara li l-fondi jingħataw. Nafu li reġgħet saret applikazzjoni biex din tikkwalifika għall-fondi ta’ restawr. Nittamaw li did-darba, ‘id-Dar tal-Bebbux’ ma tinqabiżx”.
Ix-xogħol bil-bebbux fuq din id-dar kien sar minn sid id-dar fil-bidu tas-Seklu 19 meta d-dar kienet għadha tintuża bħala ħanut tax-xorb. Id-disinji fil-faċċata tal-binja jifformaw ħafna simboli konnessi mal-Passjoni ta’ Sidna Ġesu Kristu, fosthom l-14-il stazzjon tal-Via Crucis.
Il-persuni li hemm joqogħdu f’din id-dar qablu u aċċettaw li jsiru interventi ta’ restawr biex il-faċċati jiġu rranġati. Il-Kunsill Lokali ilu wkoll jagħmel pressjoni għal dan il-għan, iżda s’issa il-fondi għar-restawr baqgħu ma waslux.

Tgħid ħarġu biex jinxfu jew qed jistrieħu mill-vjaġġ tal-passa?

Wara l-ammont ta' xita li għamlet llum waranofsinhar, f'San Ġwann ġibdu l-għajn dawn l-għasafar miġburin flimkien fuq għadd ta' wajers tal-elettriku.

Fosthom hemm għadd ta' Ħuttaf tal-passa. Ix-xita kienet għadha kif waqfet hekk kif l-għasfar bdew jinġħabru fuqu.
Tgħid intefgħu hemm biex jinxfu mill-ilma jew biex jistrieħu mill-vjaġġ iebes tal-passa mill-Ewropa lejn l-Afrika?

It-telqa f'Manoel Island........!!!
ritratti minn Ruben Overend

Pulzier u nofs xita fix-Xagħra f'24 siegħa


Fix-Xagħra Għawdex fl-aħħar 24 siegħa niżlu xejn inqas minn pulzier u nofs ta' xita.  Lokalitajiet oħra li fihom kien hemm ħalbiet qawwija tax-xita kienu in-Nadur u l-Qala. Previsti ħalbiet oħra tax-xita fis-sigħat li ġejjin,.

Battal terrapien minn daru fi
triq f'Bormla

Kultant lanqas temmen dak li tara u li jirriżulta wara.  Persuna f'Bormla battlet terrapien minn ġo darha għal ġo triq u ħallietu hemm. Ittieħdet azzjoni immedjata mill-kunsill u mid-Direttorat għat-Tindif biex it-triq reġgħet inġabet għall-istat li kienet.  Jidher li hemm suspetti serji dwar min allegatament wettaq dan l-att, fejn skont dak li nkiteb mis-Sindku Alison Zerafa Civelli din l-allegata persuna siefret.  Jidher li l-Pulziija qed jinvestigaw biex tinstab din il-persuna.

Budapest rocked by explosion

Central Budapest has been rocked by an explosion. According to reports this was caused by a gas leak. The explosion was some some 250 meters away from the Corinthia Hotel in Budapest. A lot of streets in the nearby area were closed.

Confirmed by police that it was a gas explosion.

Budapest rocked by explosion

Central Budapest has been rocked by an explosion. According to reports this was caused by a gas leak. The explosion was some some 250 meters away from the Corinthia Hotel in Budapest. A lot of streets in the nearby area were closed.

Confirmed by police that it was a gas explosion.