Malta impenjata li tirriloka immigranti mill-Italja u Greċja fi żmien stipulat

Minkejja l-impenn tal-pajjiżi tal-Unjoni Ewropea li sa Settembru tas-sena 2017 ikunu irrilokat xejn inqas minn 160,000 immigrant li bħalissa jinsabu fil-Greċja u l-Italja, qed jirriżulta li sa issa ġew rilokati biss 1,568 persuna. Dan ifisser li 97 fil-mija tal-impenn li kien sar għadu  ma twettaqx. Il-Gvern Malti permezz tal-Ministeru għall-Intern f'kummenti lil inewsmalta.com qalilna li sa issa ġew rilokati 32 persuna mill-Italja u l-Greċja.  Il-proċess jinvolvi riferimenti minn dawn l-Istati membri u diversi passi loġistiċi oħra li ġieli jsarrfu f’dewmien fir-rilokazzjonijiet. Madanakollu Malta hija mpenjata biex twettaq ir-rilokazzjoni tal-persuni kollha li għandhom jiġu rilokati mill-Italja u l-Greċja." Ta' min jgħid li Malta impenjat ruħha li tieħu 189 immigrant u dawn huma 71 persuna minn rilokazzjoni ta' 66,000 immigrant, 58 rilokati lejn Malta minn rilokazzjoni ta' 58,000 immigrant u 60 oħra min rilokazzjoni ta' 40,000 immigrant.
Il-Ministeru qalilna ukoll li "hemm pjan imfassal, li jadatta skont diversi fatturi li jkunu qed iseħħu. Malta hi impenjata biex tirriloka l-persuni kollha fiż-żmien maqbul bejn l-Istati Membri tal-Unjoni Ewopea. Malta qegħda tavvanza fuq il-pjan maqbul."
Lill-Ministeru staqsejnieh dwar konferenza li kienet organizzata mill-
mill-UNHCR u li fiha saru appelli biex aktar pajjiżi jieħdu immigranti Sirjani u jirrilokawhom.
Għal dan il-Ministeru, waqt li żamm lura milli jgħid jekk jaqbilx li jiżdied l-ammont ta' immigranti rilokati, qal li "f'dan l-ambitu, kif inhu magħruf, sar qbil riċentament bejn l-Unjoni Ewropea u t-Turkija. Il-proċedura ta’ kif ser jitħaddem il-proċess ġie ffinalizzat f’dawn l-aħħar jiem. Fil-ġimgħat li ġejjin huwa mistenni li jitnieda l-proċess biex jiġu ri-sistemati Sirjani mit-Turkija. Dan isir ukoll bi sħab mal-UNHCR."
Intant minn informazzjoni li nħarġet mill-Kummissjoni Ewropea sar magħruf li minn impenn li jkunu rilokati 160,000 immigrant sa Settembru 2017, sa issa kienu biss 1,568 persuna li spiċċaw rilokati.
Il-Kummissarju għall-Immigrazzoni, Dimitris Avramouplos quddiem din is-sitwazzjoni qal li "ma nistgħux inkunu sodisfatti bir-riżultati li kellna sa issa.  Hemm bżonn isir ħafna aktar u b'pass aktar mgħaġġel.. Hemm bżonn li ta' malajr nirrispondu għas-sitwazzjoni umanitarja urġenti li hemm fil-Greċja u naraw li s-sitwazzjoni fl-Italja ma tmurx għall-agħar. Nappellaw lill-Istati membri kollha biex jiċċaqilqu.  Hemm bżonn li nżidu r-rilokazzjonijiet, b'mod partikolari mit-Turkija imma anki minn pajjiżi oħra bħal Libanu u l-Ġordan. In-negozju tat-traffikanti jitkisser biss jekk noħolqu aċċess legali għall-immigranti lejn l-Ewropa".
minn l-orizzont

Il-prezzijiet għall-elettriku fl-Ewropa x'se jiġri fis-snin li ġejjin...

Malta bir-raba' l-irħas
….bl-inqas taxxi


Wara it-traħħis li kien hemm fil-kontijiet għall-elettriku f'Malta, liema traħħis qed jitgawda kemm mill-familji kif ukoll minn negozji, issa qed jirriżulta li Malta għandha ir-raba' l-inqas prezzijiet għall-elettriku fl-Unjoni Ewropea. Huma biss il-Bulgarija, l-Ungerija u l-Litwanja li għandhom prezzijiet irħas. Apparti dan, Malta flimkien mar-Renju Unit għandha l-inqas rata ta' taxxa fuq l-elettriku.  Din tammonta għal 5 fil-mija. Dan jikkuntrasta bil-kbir mat-taxxi fuq l-elettriku fid-Danimarka li jammontaw għal 69 fil-mija, segwiti mill-Ġermanja u  mill-Portugal b'52 fil-mija u 50 fil-mija rispettivament. Jirriżulta li l-prezz f'Malta hu 40 fil-mija irħas mill-medja tal-prezz għall-elettriku fil-pajjiżi kollha tal-Unjoni Ewropea.
Intant quddiem ix-xejriet fil-prezzijiet tal-enerġija fl-aħħar xhur, kien hemm diversi spekulazzjonijiet madwar l-Ewropa dwar jekk il-prezzijiet tal-enerġija humiex se jibqgħu stabbli jew inkella humiex se jogħlew.
Filfatt tefgħet dawl fuq dan il-Kap Eżekuttiv ġdid tal-kumpanija Engie, li hi waħda mill-akbar kumpaniji privati tal-produzzjoni tal-elettriku fid-dinja.
Isabelle Kocher ddikjarat mal-Financial Times, li prezzijiet tal-elettriku irħas fl-Ewropa jidher li se jibqgħu. "Ma naħsibx li dan hu ċiklu.  Naħseb li m'hemm ebda raġuni għaliex il-prezz tal-elettriku għandu jiżdied. Mhux se jerġa' jitla' fil-livelli li kien qabel". Il-previżjonijiet ta' Kocher, ma jaqblux ma' dak li qed ibassru ċerti kumpaniji, fejn dawn qed isostnu li l-prezzijiet għandhom jibdew jogħlew.
Jean Bernard Levy, Kap Eżekuttiv tal-kumpanija Franċiża EDF qal li "qed niffaċċjaw prezzijiet li huma baxxi ħafna". Hu bassar li l-prezzijiet għandhom jerġgħu jibdew jiżdiedu.
Intant mill-istatistika tal-Eurostat joħroġ li waqt li f'nofs is-sena li għaddiet il-prezz medju f'Malta għal kull 100kWh kien ta' €12.7 , mentri tal-Bulgarija kien ta' €9.6, l-Ungerija €11.5 u tal-Litwanja €12.4.
Id-Danimarka hu l-pajjiż li l-aktar li għandhom prezzijiet għoljin fejn il-medja għal 100kWh kien ta' €30.4. Warajha jiġu l-Ġermanja b'€29.4 u l-Irlanda b'€24.5.
L-istatistika tgħid li bejn nofs is-sena 2014 u s-sena 2015 il-prezzijiet tal-elettriku  telgħu b'medja ta' 2.4 fil-mija. Dan ifisser li l-prezz medju tal-elettriku  għal kull 100kwh hu ta' €21.1. Jekk wieħed jara x-xejra tal-prezzijiet tal-elettriku fl-Unjoni Ewropea sa mis-sena 2008 isib li dawn żdiedu b'xejn inqas minn 33 fil-mija.
Mill-istatistika pubblikata joħroġ li l-għola żieda fil-prezzijiet tal-elettriku bejn nofs is-sena 2014 u nofs is-sena 2015 kienu reġistrati fil-Latvja b'żieda ta' 26.8 fil-mija, fil-Belġju bi 15.1 fil-mija, il-Bulgarija b'6.9 fil-mija, ir-Rumanija b'6.1 fil-mija, l-Olanda b'5.8 fil-mija, l-Italja bi 3.8 fil-mija, Franza bi 3.4 fil-mija u l-Portugal bi 2.4 fil-mija.
Kien hemm xi pajjiżi li kellhom tnaqqis fil-prezzijiet għall-enerġija u dawn kienu Ċipru bi tnaqqis ta' 22 fil-mija, il-Litwanja b'5.8 fil-mija, l-Irlanda bi 3.2 fil-mija, l-Estonja b'2.6 fil-mija il-Kroazja b'1.5 fil-mija u r-Renju Unit b'1.4 fil-mija.
minn l-orizzont

Familja Taljana se trabbi lil Favour - għexieren ta' talbiet biex jaddottawha

Favour, tifla ta' disa' xhur li salvat mill-għarqa din il-ġimgħa se tiġi adottata minn familja Taljana. Omm Favour, li kienet tqila bit-tieni wild tagħha, tilfet ħajjitha wara li sofriet ħruq minn fjuwil fuq dgħajsa mimlija immigranti li eventwalment għerqet fil-Mediterran. Magħha tilfu ħajjithom erba' persuni oħra. It-Tabib Pietro Bartolo ta l-ewwel għajnuna lit-tarbija fuq il-ġżira ta' Lampedusa. Ritratt tiegħu ma' Favour malajr ġera ma kull rokna fl-Italja.
Favour u għexieren oħra li salvaw se jiġu rilokati minn Lampedusa lejn Sqallija. Hija se ttitieħed f'ċentru għall-kura tat-tfal qabel ma tingħata lill-familja li se trabbiha.
Dr Bartolo kien l-ewwel persuna li talbet biex taddotta lil Favour imma hu stess jaf li minħabba l-età li għandu u peress li għandu tliet it-tfal oħra, ma tantx huwa possibbli li jingħata l-kustodja tagħha. "Nixtieq inżommha miegħi għal dejjem", qal Bartolo.
Huwa stqarr lit-telefon tal-klinika tiegħu f'Lampedusa ma waqafx idoqq wara li x-xandret l-aħbar ta' Favour.
minn inewsmalta.com

'B'mod onest nammettu li għadna m'għamilniex biżżejjed ma' dawk fl-akbar periklu ta' faqar' -  



      -   Joseph Muscat


"Ix-xogħol hu l-aqwa politika kontra l-faqar. Iżda nifhmu li hawn nies li ma jistgħux joħorġu jaħdmu minħabba diversi ċirkostanzi. Dawn huma l-aktar nies li llum qegħdin fil-periklu tal-faqar. B'mod onest irridu nammettu li ma dawn in-nies għadna m'għamilniex biżżejjed. Min ma jistax jaħdem għadu fil-periklu tal-faqar u din hi l-isfida kbira ta' dan il-Gvern."
Dan sostnieh il-Prim Ministru Joseph Muscat  fid-diskors tal-għeluq tal-Kungress Reġjonali f'Għawdex dalgħodu. Hu saħaq li hemm persuni b'diżabilità li tagħmel x'tagħmel hu impossibbli li joħorġu jaħdmu. Qal li dawk il-persuni li ma jistgħux jaħdmu rridu li l-benefiċċju tagħhom ngħolluh daqs il-paga minima.
"Qed nuru l-importanza li nattribwixxu lejn din il-gżira. Bħala pajjiż għandna sitwazzjoni li jixhdu dan l-aġenziji internazzjonali, fejn jgħiduli bħala pajjiż mexjin 'l quddiem. Forsi hawn min jistaqsini imma lili kif se jolqotni dan? Dawn l-aġenziji jagħmlu xogħol għal min irid jinvesti f'pajjiż. Ħadd mhu se jinvesti flusu f'pajjiż li dawn l-aġenziji jgħidulu li  għandu ekonomija li qed tiċkien. Dawn qed jgħidu lill-investituri kollha madwar id-dinja li l-ekonomija qed tikber u li qed nittrattaw il-kwistjoni tal-enerġija. Ladarba ġej l-investiment, għandek aktar xogħol u allura aktar nies jaħdmu u aktar nies iħallsu t-taxxi. La għandek dan, imbagħad ma jkollokx għalfejn iżżid it-taxxi," qal il-Prim Ministru.
Kompla jgħid li, "Jien nenfasizza li dawn ir-rapporti ta' aġenziji barranin għandhom jingħataw importanza. Tliet snin ilu l-akbar problema li kellu l-pajjiż kienu l-kontijiet tad-dawl u l-ilma. Illum dawn l-aġenziji qed jgħidu li dan il-Gvern irriforma l-qasam tal-enerġija."
Il-Prim Ministru semma wkoll li, "Il-kumpanija Methode se tinvesti €6 miljuni u issa dawn se jġibu linja ġdid tar-Renault, fejn issa s-switches tagħhom se jsiru f'Malta. Dawn jużaw ammont ta' barra minn hawn ta' elettriku. Issa fl-Ewropa ġejna bir-raba' l-irħas kontijiet fl-Unjoni Ewropea. L-Enemalta se tinvesti €6 miljuni f'substation fl-Imrieħel biex il-fabbriki hemm ma jkollhomx il-problema li għandhom Tas-Sliema, fejn għax ma sarx investiment qed ikun hemm qtugħ ta' dawl fis-sajf."
Semma li l-prezz taż-żejt reġa' għola għal €50 l-barmil u qal li kieku l-Gvern ma kellux pjan, lill-Methode flok iserrħilhom rashom kien jgħidilhom li se jkollna ngħollu l-prezzijiet għall-elettriku.
Qal li nhar it-Tlieta li ġej se nkunu qed inħarsu u se jkollna preżentazzjoni mill-Caritas dwar ir-rapport li għamlu. "Ix-xogħol hu l-aqwa politika kontra l-faqar. Iżda nifhmu li hawn nies li ma jistgħux joħorġu jaħdmu minħabba diversi ċirkostanzi. Dawn huma l-aktar nies li llum qegħdin fil-periklu tal-faqar. B'mod onest irridu nammettu li ma dawn in-nies għadna m'għamilniex biżżejjed. Min ma jistax jaħdem għadu fil-periklu tal-faqar u din hi l-isfida kbira ta' dan il-Gvern. Irridu li l-benefiċċji intuhom lil min ġenwinament ma jistax jaħdem," qal il-Prim Ministru.
Hu spjega li hemm bżonn dibattitu fil-pajjiż dwar il-kompetittività u dwar kemm hu l-inqas ammont ta' flus li persuna tista' tgħix bihom.
Kompla jgħid li, "Bdew it-testijiet fuq il-pedamenti tal-isptar f'Għawdex u x-xogħol mistenni jibda lejn l-aħħar ta' din is-sena. Sal-lum il-ġurnata, il-livell tas-saħħa kien inqas u qisu kulħadd kien jaċċettaha. L-isptar li se jinbena f'Għawdex se jkun aqwa minn dak ta' Malta fejn minn 260 sodda se jitla' għal 450 sodda. Mal-isptar se jkollna l-iskola medika u din se ġġib lejn Għawdex għal disa' xhur fis-sena mijiet ta' studenti li se jgħixu f'Għawdex u se joħolqu suq ġdid. Qed inħarsu ukoll lejn turiżmu mediku, billi nġibu barranin jiġu għall-kura hawn."
minn inewsmalta.com

Il-Patrijotti jkomplu jiġbru l-firem... ġurnalist tal-Union Print mgħajjar pulċinell

16:33: Fil-laqgħa pubblika li kellhom l-Għaqda Patrijotta Maltin f'Buġibba dalgħodu, spikka d-diskors ta' wieħed mill-membri, Norman Scicluna, fejn semma l-ġurnalista tal-Union Print Victor Vella u xi kliem fil-konfront tiegħu li huwa pulċinell. Meta staqsejna lil Scicluna dwar x'inhuma l-allegazzjonijiet fuq il-ġurnalist Vella, u għalfejn intqal li huwa pulċinell, min-naħa tiegħu wieġeb li mhux hu kien li qal il-kelma pulċinell fil-konfront ta' Vella, iżda n-nies li kien hemm preżenti, iżda hu qalilhom "għandkom raġun issejħulu hekk".
Scicluna qal li l-Għaqda Patrijotta semmiet lill-ġurnalist b'ismu fil-pubbliku għax Vella qed jattakka lill-President tal-għaqda u anke ħareġ jattakka l-għaqda u saħansitra, skontu, qabeż għal-Libjani li qatlu lill-istudent Kolumbjan f'Paceville.
Mill-banda l-oħra Norman Scicluna sostna li hu m'għandu xejn kontra Victor Vella għax kulħadd għandu opinjoni. Però saħaq li jekk Vella ffissat fuq l-immigranti u joqgħod jiċċekja l-passi kollha ta' x'qiegħda tagħmel l-għaqda, allura Vella stess għandu aġenda kontra l-għaqda.
Scicluna saħaq li jirrispetta l-Victor Vella bħala ġurnalist, iżda jekk ġurnalist ikun qed jagħmel xi ħaġa konta l-għaqda, allura ma jistgħux jirringrazzjawh.
L-għaqda mhux ħa tieqaf qabel l-aħħar immigrant illegali jħalli xtutna
Il-kelliem tal-Għaqda Patrijotti Maltin Simon Borg qal li l-għaqda mhux ħa tieqaf qabel l-aħħar emigrant illegali jħalli xtutna, għax Malta tibqa tiġi l-ewwel u qabel kollox.
Simon Borg qal li sakemm jibqgħu mingħajr tweġiba, l-uniku valur miżjud li qed iġibu dawn in-nies fl-oqsma tat-turiżmu u l-oqsma l-oħra tax-xogħol f'pajjiżna huma biss il-pagi baxxi u l-kundizzjonijiet miżeri tal-ħaddiem Malti.
Semma li l-Maltin għandhom 45% inqas f'pagi mill-Ewropej u saħaq li dan l-influss ta' ħaddiema li qed iġibulna f'pajjiżna qed iżomm lil min iħaddem li jtejjeb il-kundizzjonijiet u l-pagi tal-ħaddiema Maltin. Kompla jgħid li l-influss ta' ħaddiema barranin qed jolqot bis-serjetà lill-ħaddiema Maltin kollha.
F'pajjiżna għandna 100,000 elf ruħ fil-faqar u n-nies fil-faqar qed ikomplu jiżdiedu għax in-nies fil-faqar qed ikollhom jikkompetu mal-barrani speċjalment fil-prezz għoli tal-kirja tal-postijiet fejn tgħix. Qal li min jaħdem bil-paga minima ma jistax jikri post fejn joqgħod għax il-kera għoliet għall-Maltin, għax min qed jikri qed iħossu komdu jikri bi prezz għoli għall-barranin għax dawn qed jikru l-postijiet fi gruppi.
Simon Borg staqsa jekk it-talb li qed isir mill-Musulmani hux qed isir bil-permess, u jekk le, għalfejn ħadd ma jwaqqafhom. Staqsa jekk il-binja tal-Furjana li ngħatat lill-Komunità Musulmana hux qiegħda tagħti kontribuzzjoni lill-Gvern u min qieħed iħallas għall-binja bħad-dawl u l-ilma u l-manutenzjoni tagħha. Borg staqsa kemm qiegħda tiswa l-binja tal-Furjana lil Gvern.
Simon Borg staqsa wkoll jekk il-binja ngħatatx għal perjodu qasir jew hux għal dejjem. Saħaq li dik hija binja tal-poplu Mali u ħadd ma jista' jqassam binjiet tal-poplu mingħajr konsultazzjoni. Qal li dawn il-mistoqsijiet qed jagħmilhom f'isem 30,000 elf firma u għalhekk qed jistenna risposta xierqa mill-awtoritajiet.
L-immigranti illegali m'għandomx ikollhom id-dritt tal-vot u tal-housing
Sadanittant is-Segretarju Ġenerali tal-Għaqda Patrijotti Maltin, Henry Battistino qal li l-Patrijotti qegħdin jiġbru l-firem kontra l-intregrazzjoni sfurzata li qed issir u qed jgħidu li dawk kollha li daħlu illegalment fil-pajjiż m'għandomx isiru ċittadini Maltin li jkollhom dritt għall-housing, dritt għall-vot u jġibu lil familja kollha tiegħu jgħixu hawn.
Qal li bħala pajjiż ma nifilħux għal dan l-influss ta' nies li ġew minn barra minn Malta ul-problema qed tinħass kemm fl-isptarijiet u anke fit-trasport pubbliku.
Mistoqsi jekk humiex kontra l-immigranti illegali biss jew kontra wkoll il-barranin kollha li hawn Malta bħal Serbi, Rumeni, Bulgari u Russi, Battistino wieġeb li l-għaqda hija kontra kull tip ta' barranin u mhux kontra xi kulur jew reliġjon.
Hu qal li ma rridux li dawn il-barranin jibqgħu hawn biex iżommu l-pagi baxxi tal-Maltin. Semma li l-Malti mhux vera li ma jridx jaħdem, għax il-Malti anke fid-deżert ħadem, iżda trid togħla l-paga għall-Maltin.
Semma l-problemi ta' kriminalità bħall-inċidenti li kien hawn dan l-aħħar, speċjalment il-qtil tal-istudent Kolombjan.
Qal li għalkemm mhux deħlin bid-dgħajjes, dawn xorta diħlin bil-baħar u bl-ajru.
Aktar qabel: Il-Patrijotti Maltin dalgħodu f'Buġibba komplew jiġbru l-firem fil-petizzjoni kontra dik li qed isejħu “integrazzjoni sfurzata”.
Il-ġbir tal-firem sar waqt attività msejħa “corner meeting” li għaliha attendew ftit għexieren ta' nies u li matulha l-ġurnalist tal-Union Print, Victor Vella, ġie mgħajjar pulċinell minn uħud minn dawk preżenti meta saret referenza għalih minn wieħed mill-kelliema li indirizzaw lill-miġemgħa.
Rapport b'aktar dettalji nxandruh fil-ħin li ġej.
minn inewsmalta.com

'L-awtoritajiet qed jistħarrġu…aħna m'aħniex Neo Nażisti' - Suldati ta' Odin

Waqt li komplew l-investigazzjonijiet tal-awtoritajiet dwar il-grupp sigriet bl-isem ta' 'Suldati ta' Odin Malta', liema grupp kellu l-għan li jagħmel rondi fit-toroq u anke kien qed jirrekluta n-nies biex jagħmlu dan, l-istess grupp ħareġ dikjarazzjoni ġdida fejn din id-darba għamilha ċara li huma m'humiex Neo Nażisti. Iddikjaraw li lesti jiltaqgħu ma' kull min irid ikellimhom anke mezzi tal-midja.  Tennew li l-għan tagħhom hu li jaraw li ma jsirux atti kriminali.

Intant inewsmalta.com wara li investiga dan il-grupp għamel kuntatt kemm mal-Ministeru tal-Intern u anke mal-Ministeru għad-Djalogu Soċjali biex nieħdu r-reazzjoni tagħhom għat-twaqqif ta' dan il-grupp u l-attivitià tagħhom fl-Ewropa. Il-Ministeru tal-Intern qalulna biss li l-Pulizija kienu qed jinvestigaw u li ma jistgħux isiru rondi għax dan hu ksur ta' liġi. Huma ma wieġbu xejn dwar x'inhu l-ħsieb tagħhom dwar gruppi bħal dawn.

Minn naħa tiegħu l-Ministeru għad-Djalogu Soċjali, wara li ntlabna nibagħtu l-mistoqsijiet bil-miktub qalulna li "l-Ministeru infurmat li l-awtoritajiet kompetenti qed jitħarrġu l-kontenut tal-istorja. F'dan l-istadju m'għandniex aktar xi nżidu".

Wara li inewsmalta.com ħareġ dettalji ġodda nhar is-Sibt dwar dan il-grupp u dan wara investigazzjoni li għamilna, l-istess grupp ħareġ dikjarazzjoni ġdida.  Din id-darba huma iddikjaraw li "irridu nagħmlu l-affarijiet ċari ħafna. Aħna mhux razzisti. Lanqas aħna xi grupp tal-muturi jew Neo Nażi.  Aħna sempliċiment grupp internazzjonali li nħobbu ngħinu l-ġirien. Inħobbu u rridu nipproteġu l-kultura tagħna waqt li nippruvaw nżommu milli jsiru atti ta' kriminalità, bħalma suppost jagħmel kull ċittadin."

Ikomplu jgħidu li "aħna nilqgħu kull mistoqsijiet li jistgħu jsiru lilna u din tinkludi anki ġurnalisti u organizazzjonijiet tal-medja. Ma narawx il-punt għaliex qed jintlagħbu logħbiet stupidi. M'għandna xejn x'naħbu u m'għandkomx għax tibżgħu minna, sakemm m'intomx kontra l-valuri tagħna". 

minn l-orizzont

'Ħafna kienu jammiraw l-onestà ta' Dj Lito…kienu jdejquh l-inġustizzji'

"Ħafna kienu jammiraw l-onestà ta' Dj Lito. Kien bniedem li kienu jdejquh l-inġustizzji". Hekk jikkummenta Jeremy Camilleri, ħabib tal-qalb ta' DJ Lito li lbieraħ miet traġikament f'inċident tat-traffiku f'Bormla. Diversi bands Maltin fosthom The Creepers, Forsaken u Forty Days of Rain fost oħrajn esprimew id-dispjaċir tagħhom għal dini t-telfa. 

Jeremy Camilleri, ħabib tal-qalb ta' DJ Lito kkummenta li "kelma kont tgħidha.  Għamilt ħafna għedewwa fuq hekk. Imma ħafna kienu jammiraw l-onestà tiegħek. Meta inti kont żbaljat ħafna ħarġu biex isallbu. Minkejja li ma qbiltx miegħek, ippruvajt ngħinek toħroġ minn sqaq mudlam. Għad għandi l-messaġġi li bgħattli f'dawk iż-żminijiet.  Nafek bħala bniedem li kienu jdejquk ħafna l-inġustizzji. U forsi din ukoll kienet iddejjaq lil min hu komdu iħalli dawn l-affarijiet għaddejjin. Iżda inti ma qtajt qalbek qatt. Iffissat fuq il-mużika. Ir-Rock kien l-ewwel u qabel kollox.  M'initx se tarahom lil Uriah Heep iżda ċert li se ssellilna għal Dio."

Minn naħa tiegħu, John Bundy iddeskriva lil DJ Lito bħala 'persuna ġenwina, sinċiera u onestà". 

Il-band Forsaken, iddikjaraw li l-kondoljanzi tagħhom u ddeskrivew l-mewt tiegħu bħala 'xokk'. Jgħidu li "l-band tagħna kie iħobbha u kien jappoġġjaha". 

Il-band 'Forty Days of Rain' tgħid li "ninsabu mkissrin bil-mewt tiegħu. Kien ħabib ta' kull mużikant f'Malta. Kien pilastru tal-mużika rock f'Malta".  Anki l-band Fire Malta iddeskrivew  bħala 'rocker ta' veru. Dan kien ir-Rockopedia ta' Malta. Ħabib tal-band tagħna. Nirringrazzjawk tal-appoġġ li tajtna tul is-snin".

minn inewsmalta.com

https://youtu.be/VHLRxM4SZjM

In-nies qalu li Victor Vella pulċinell u jien
għedtilghom għandkom raġun
     - 

 Intervista tal-ġurnalist Charlo Lautier

Barbaġanni f'erba' postijiet… il-kaċċaturi jaħdmu fuq proġett biex din it-tajra tiżdied

Ix-xnigħat li kien hawn fost għadd ta' dilettanti tal-għasafar dwar il-preżenza ta' barbaġanni f'pajjiżna, issa qed ikunu kkonfermati. Kien l-ornitologu Natalino Fenech li kkonferma li rċieva diversi rapporti li dehru barbaġanni f'Malta u minn investigazzjoni li saret ġie kkonfermat li hawn tliet postijiet f'Malta li fihom hemm il-barbaġann kif ukoll wieħed f'Għawdex.
Fenech spjega li sa issa mhux magħruf jekk dawn humiex f'pari jew waħdiet, iżda hemm probabbilità li dawn qed ibejtu jew se jbejtu. Spjega wkoll kif il-barbaġann ma jpassix bħal tajr ieħor u ta' kull sena jiġu waħdiet. Jekk jingħataw ċans, dawn jitrawmu.
Intant jidher li l-Federazzjoni Kaċċaturi Nassaba u Konservazzjoni (FKNK) qed taħdem fuq proġett biex binja li għandha fil-Buskett tibda tintuża biex fiha jitrawmu u jitrabbew barbaġanni li mbagħad jintelqu fis-selvaġġ.
minn inewsmalta.com

Ta' disa' xhur orfni u maħruqa… appell biex tkun adottata

Spiċċat orfni. Maħruqa minħabba fjuwil abbord id-dingi. Ommha kienet qed iżżommha f'idejha fl-ilma. Spiċċat għerqet, imma t-tifla ta' disa' xhur ġiet salvata. Voluntiera f''Lampedusa meta kuntattjata qaltilna li, "Il-każ tagħha xxukkjana. Kulħadd idur magħha. Kulħadd irid jaraha. Ovvjament trid tittieħed f'istituzzjoni. Naħseb li se tittieħed f'Agrigento. It-tama tagħna hi li tiġi adottata."
Staqsejnieha x'kienu l-ewwel interventi li sarulha hekk kif ġiet salvata, bir-risposta tkun ħalib u ikel u anke ndilket b'ingwent minħabba ħruq. It-tifla ssemmiet 'Favour' u hi mill-Mali. Hi ġiet salvata nhar l-Erbgħa li għadda. It-tifla u ommha spiċċaw inħarqu sew minħaba fjuwil li nħareġ mid-dingi li fuqu kienu qed jivvjaġġaw.
Meta ġiet salvata, hi kienet f'idejn immigranta aktarx Niġerjana, li wkoll kienet b'diversi ħruq f'partijiet f'ġisimha. Hi spjegat mill-ewwel li t-tarbija kienet ġiet salvata meta l-omm għerqet matul il-vjaġġ. It-tarbija ttieħdet Lampedusa fejn bdiet tingħata kura mit-tabib Pietro Bartolo, magħruf għall-assistenza lill-immigranti.
Pietro Bartolo fl-ewwel kummenti tiegħu qal li, "Meta għaddewhieli, jien ħadtha f'idejja. Għamlet l-awrina fuqi. Kien sinjal tajjeb għax turi li kienet għadha ħajja." Hu appella biex it-tarbija tkun adottata. Favour u ommha kienu qed jivvjaġġaw flimkien ma' 120 persuna fuq dingi u ġew salvati minn bastiment Norveġiż.
minn inewsmalta.com

Kunsillier jiddikjara li m’għadux fil-PN u sar indipendenti

Fil-laqgħa tal-Kunsill Lokali ta’ Ħal Balzan li saret illejla, il-Kunsillier Joseph Mary Galea, li kien qed jirrappreżenta lill-Partit Nazzjonalista għarraf li hu ma kiex se jibqa’ kunsillier f’isem il-Partit Nazzjonalista imma se jkun kunsillier indipendenti. Dan ifisser li għall-ewwel darba mindu bdew il-kunsilli, il-Partit Nazzjonalista mhux se jkollu erba’ kunsillieri f’dan il-kunsill imma tlieta.
minn inewsmalta.com

Traġedja oħra… 30 immigrant jispiċċaw mgħarrqin

Ftit sigħat biss wara li dgħajsa nqalbet bi kważi 570 immigrant abbord, li ħamsa minnhom spiċċaw mejtin, kien hemm traġedja oħra. F'din l-aħħar traġedja jidher li mietu mgħarrqin 30 persuna. Fuq il-post ta' din it-traġedja jidher li hemm għadd ta' bastimenti tal-operazzjoni Sophia tal-Unjoni Ewropea u anke bastimenti navali Taljani.
Id-dgħajsa għerqet 35 mil 'il barra mill-port ta' Zuwara. In-numru ta' dawk mgħarrqin jista' jkunu akbar.
minn inewsmalta.com

'La tridu Malta ġungla, se jkun hawn min jibda jimxi bil-liġi tal-ġungla'
     - is-Segretarju tal-Patrijotti

Quddiem il-fatt li l-Pulizija arrestat tnejn minn tliet persuni li kienu involuti fi ġlieda f'Paceville bi xwabel tas-Samurai, is-Segretarju Ġenerali tal-Għaqda Patrijotti Maltin iddikjara fis-sit tal-istess għaqda li, "La tridu Malta ġungla, se jkun hawn min jibda jimxi bil-liġijiet tal-ġungla."
Battistino kiteb li, "Jien kont staqsejt kinux ukoll żewġ Libjani. Issa nista' nistaqsi min ħarġilhom il-permess lil dawn iż-żewġ bestji slavaġ. Jekk se jmissu lil uliedna, f'ras il-għajn ħa mmorru. Xi ħadd se jkollu jġorr ir-responsabbiltà. La tridu Malta ġungla, se ikun hawn min jibda jimxi bil-liġijiet tal-ġungla."
L-ispettur Sandro Camilleri tal-Police Officers Union tal-GWU fuq is-sit soċjali tiegħu kien ħabbar li tnejn minn tliet persuni mfittxijin fuq dan il-każ kienu arrestati wara ħidma tal-pulizija ta’ San Ġiljan u dawk tar-Rapid Intervention Unit.
minn inewsmalta.com

Infiorata b'varjetà ta' fjuri fil-festa ta' Corpus fir-Rabat

Il-festa ta' Corpus fir-Rabat hi magħrufa mhux biss għall-mod uniku kif tiġi ċċelebrata imma anki għal armar rikk u uniku li jintrema' fil-Knisja Kolleġġjata ta' San Pawl.
Din is-sena għal darba oħra, il-festa ta' Corpus se jkollha infiorata magħmula minn fjuri friski. L-infiorata se tkun twila tmien metri u b'wisa ta' metru u nofs. Din l-infiorata diġa bdiet tinħadem. Biss il-parti l-kbira tal-ħidma se ssir nhar il-Ġimgħa u matul il-ġurnata tas-Sibt.
L-infiorata hi sponsorjata u organizzata minn Fresh Flowers Daily flimkein ma' għadd ta' voluntieri Rabtin. Il-fjuri li se jintużaw huma kollha fjuri friski u dawn ivarjat skont id-disinn. Għall-burduri nużaw materjal bħal kafe u tat-te niexef. L-infiorata ssir quddiem il-Kolleġġjata, fejn il-Ħadd tilħaq il-qofol tagħha l-festa b'żewġ purċissjonijiet.
minn inewsmalta.com

'Ħalluha tinħaraq…l-aħjar aħbar li smajt f'ħajti"
      - Paul Salomone 

It-titlu ta' l-aħbar kien jgħid li "L-akbar moskea fl-Ewropa tinħaraq'. Artiklu li kien pubblikat f'Settembru tas-sena li għaddiet imma li xi ħadd tellgħu ftit jiem ilu fis-sit tal-Għaqda Patrijotti Maltin, li issa se tikkontesta l-elezzjoni ġenerali.
Mal-kummenti li nkitbu għal din l-aħbar f'dan is-sit, jispikka dak ta' Paul Salomone, il-persuna li għaxar snin ilu ttella' l-Qorti akkużat b'inċitament razzjali f'meeting quddiem il-Qorti. Salomone ma' din l-aħbar tal-ħruq tal-Moskea, ddikjara li "din hi l-aħjar aħbar li smajt sa mill-bidu ta' ħajti. Ħalluha tinħaraq".
L-aħbar kienet dwar ħruq tal-moskea Baitul Futuh f'Morden fin-nofsinhar ta' Londra. Fis-sena 2006, Paul Salomone li dak iż-żmien kien membru fl-Alleanza Nazzjonali Repubblikana kien ittella' l-Qorti akkużat b'inċitament razzjali.
Ftit ġimgħat ilu fuq l-istess sit hu kien iddikjara li "'jien kont arrestat u umiljat u dan sempliċiment għax għidt il-verita. Imma lili ma rnexxilhomx ikissruni. Jien b'saħħti u hekk irrid nibqa' u dan għas-sigurtà tal-familja tiegħi. Jien qatt mhu se nħalli l-familja tiegħi ssir Musulmana mill-politiċi tagħna. Qatt. Malta Qum."
Ikompli jikteb li "jgħidu li jien razzist. Mhix problema. Għamluli branding ta' razzist 10 snin ilu. Wara ftit żmien tidraha. Iva jien ġejt branded bħala razzist għax għidt il-verità u xejn inqas mill-verità. Qatt imma ma jien se nitradixxi lil pajjiżi jew lill-familja".
Ta' min jgħid li fl-aħħar jiem fil-Qorti ngħatat sentenza lil Gwardjan tal-ħabs, fejn dan ma nstabx ħati li għadda kumment razzista fuq Facebook għax id-diskors tiegħu kien indirizzat lejn persuni li qegħdin barra minn pajjiżna u mhux jgħixu fostna. Vincent Debono, ta’ 46 sena, kien ġie mixli li fit-22 ta’ Ottubru 2015 u fix-xhur ta’ qabel għamel użu mhux xieraq ta’ apparat ta’ komunikazzjoni kif ukoll li uża kliem ta’ theddid, abbużiv jew insolenti biex iqajjm mibegħda razzjali.
Il-każ kellu l-bidu tiegħu meta ċerta Laura Kalderauska, fuq il-profil tagħha ta’ Facebook, tellgħet artiklu dwar kif f’temp ta’ sitt ijiem fl-Iżvezja ngħataw in-nar tliet kampijiet tar-refuġjati. Debono kkummenta billi kiteb il-frażi “I hope it's burning with them inside” u minħabba din il-frażi spiċċa mressaq mill-Pulizija quddiem il-Maġistrat Aaron Bugeja.
Huwa ammetta l-akkuża li għamel użu ħażin minn apparat elettroniku u kien ikkundannat €5,000. Madankollu ma nstabx ħati li inċita mibegħda jew razziżmu għax il-liġi tgħid li biex dan isir, ir-referenza trid tkun għal persuni li jkunu f’Malta mentri l-akkużat kien qed jirreferi għal nies li kienu barra.
Fl-istess waqt li ħelsu minn din l-akkuża, il-Maġistrat Bugeja għamilha ċara li l-liġi għandha tinbidel biex it-tifsira ta’ vjolenza jew mibegħda razzjali tkun tinkludi wkoll nies li ma jkunux qed jgħixu Malta anke jekk il-kumment ikun sar f’pajjiżna.
minn l-orizzont

'Il-villa Rumana li tinsab għall-bejgħ tista' tkun protetta bil-Liġi tad-Demanju Pubbliku' - il-Ministeru għall-Ambjent

Wara r-rapport pubblikat minn inewsmalta.com u t-tħassib minn diversi esperti tal-wirt storiku dwar il-fatt li fdalijiet Rumani spiċċaw għal bejgħ fuq sit ta' aġenzija li tbiegħ il-proprjetà, il-Ministeru għall-Ambjent f'kummenti li tana enfasizza li issa li daħlet il-liġi tad-Demanju Pubbliku siti bħal dawn jistgħu ikunu protetti.

Il-Ministeru qal lil inewsmalta li "Indubbjament bil-Liġi tad-Demanju Pubbliku, siti bħal dawn jistgħu ta’ bilħaqq jiġu protetti. Li jrid jsir hu li ssir talba formali lill-Kunsill Eżekuttiv tal-Awtorità tal-Ippjanar. Din l-Awtorità tagħmel l-istħarriġ tagħha, jekk is-sit għandux ikun  klassifikat bħala demanju pubbliku. Jekk fl-affermattiv din tiġi inkluża f’rapport relattiv li jiġi ppreżentat lill-Parlament f’Settembru."

Il-Ministeru qal ukoll li "s-siti kollha li jiġu kklassifikati bħala tali, imbagħad ma jkunux jistgħu jiġu mittiefsa jew snaturati. Id-drittijiet privati tal-individwi jibqgħu hemm, pero bl-obbligu li dawn bl-ebda mod ma jikkontaminaw l-istess sit, kemm mill-aspett patrimonjali kif ukoll dak ambjentali. Fil-mument pero jekk min hu interessat jidhirlu li hemm bżonn protezzjoni immedjata, ta’ min jikteb b’mod immedjat lis-Sovrantendenza tal-Patrimonju Kulturali". 

Dawn il-fdalijiet storiċi - li huma patrimonju nazzjonali - jinsabu reklamati bħala 'għall-bejgħ'. Persuni li għandhom għal qalbhom il-wirt storiku meta tkellmu ma' inewsmalta spjegaw li fis-sena 2006, kienet saret dikjarazzjoni ministerjali li fiha intqal ċar u tond li dawn il-fdalijiet storiċi għandhom ikunu aċċessibbli għall-pubbliku. Issa fir-reklamar li qed isir qed jingħad ċar u tond li hemm ħames itmiem art għall-bejgħ inkluż il-fdalijiet Rumani. Dan għall-prezz ta' €93,000. 

Espert tal-wirt storiku meta kien tkellem ma' inewsmalta qalilna li, "Nifhem li l-art madwar is-sit hi privata. Imma ma nistax nifhem kif fdalijiet storiċi jispiċċaw jinbiegħu. Hi tal-mistħija kif patrimonju nazzjonali jispiċċa reklamat għall-bejgħ. Jekk m'iniex sejjer żbaljat kienet saret esproprijazzjoni fuq dawn il-fdalijiet fis-sebgħijnijiet. Naħseb li wasal iż-żmien issa li ddaħħlet il-liġi dwar demanju pubbliku, l-awtoritajiet konċernati jaraw li dawn il-fdalijiet storiċi verament ikunu tal-pubbliku." L-istess espert qalilna li kienet saret dikjarazzjoni ministerjali minn Tonio Borg u f'laqgħa li kienu saru mal-Assoċjazzjoni tar-Ramblers kien issemma' li dan is-sit għandu jkun aċċessibbli għall-pubbliku.

Is-sit inkwistjoni għandu żewġ ħaġriet kbar u dwarhom hemm nuqqas ta’ qbil. L-arkeologu David Trump ma jaqbilx li is-sit huwa wieħed neolitiku għax il-biċċiet ta’ fuħħar misjuba fil-viċinanzi tas-sit kellhom karatteristiċi Puniċi u Rumani. Is-sit, skont Trump, huwa wieħed Puniku.  Mill-banda l-oħra, Evans fl-1971 inkluda dawn il-ħaġriet bħala parti minn struttura li aktarx hija tempju ta’ żmien il-bronż. Pavimentar tal-villa Rumana kien jikkonsisti f’madum maqtugħ forom ta’ djamant. Il-pavimentar ftit li xejn għadu viżibbli, jew minħabba li nġabar waqt xi studji, jew ittiekel bl-elementi. Jidher li ħafna ġebel minn din l-istruttura aktar tard inħatt u bih inbniet Villa Rumana. Partijiet mill-pedamenti ta’ din il-Villa jinsabu mikxufin, filwaqt li oħrajn għadhom mirdumin taħt il-ħamrija. Dan kien isostnih Temi Zammit fl-istudju li għamel fuq is-sit. Fis-sit hemm ukoll bir antik.

minn l-orizzont

'Alex'...twieled ftit wara li ommu kienet salvata u ssemma għall-kaptan

Kienu f'xifer il-mewt. Ma jafux jekk hux se jaslu. Abbord dinghi mimli immigranti. Kienet l-aħħar tama li kien fadalilhom wara dak kollu li għaddew minnu fil-Libja. Fuq id-dinghi kien hemm koppja Afrikana. Telqet minn sitwazzjoni diffiċli fil-Libja bl-għan li tasal l-Italja. Prattikament ma kellhom xejn fuqhom. Lanqas ħwejjeġ għat-tarbija li kienet se titwieled fi żmien qasir.
Telqu mil-Libja f'nofs ta' lejl iżda d-dinghi beda jiffaċċja diffikultajiet u dan meta fjuwil biżżejjed ma kienx hemm.
B'dinghi jitbandal mal-kurrent, din il-koppja ftit li xejn kien fadlilha tama. Biss huma intlemħu permezz ta' tromba u mmedjatament bastiment ta' Medecins Sans Frontieres salvahom. Kien il-bastiment Aquarius li wettaq is-salvataġġ.
Ftit ħin wara, meta immigranti oħra bdew jiċċelebraw is-salvataġġ, l-omm welldet it-tarbija. Ma setax jonqos li dawk abbord bdew jistaqsu għall-isem.
Din il-koppja ħalliet lil kulħadd bla kliem meta infurmaw li dik it-tarbija kienu se jtuha l-isem ta' 'Alex'. Issemma għal kaptan tal-Aquarius li salvahom.
minn inewsmalta.com

Kienet tpinġiet f'Malta…pittura ta' Caravaggio tintgħażel bħala simbolu ta' immigranti mgħarrqin fil-Mediterran

Pittura ta' Michelangelo Merisi magħruf bħala 'Caravaggio', pittur li għamel żmien jgħix f'Malta, intgħażlet biex tkun simbolu li jfakkar l-immigranti li mietu mgħarrqin fil-Mediterran. L-għażla tal-pittura kienet ispirata mill-għarqa ta' tfajjel Aylan s-sena li għaddiet. Filfatt kienet il-Gallerija tal-Arti Uffiżi li biex tfakkar il-mewt taċ-ċkejken Aylan, għażlet pittura ta' Caravaggio li fiha l-Kupidu rieqed. Din il-pittura se tkun esebita fl-ewwel esebizjoni li se ssir fil-Muzew ta' Lampedua dwar id-djalogu fil-Mediterran.
L-esebizzjoni se tiftah fit-3 ta' Ġunju u dan se jsir fil-preżenza tal-President Taljana Sergio Mattarella. Il-pittura mhux biss se sservi biex tfakkar it-traġedja ta' Aylan, imma għandha tfakkar lil dawk it-tfal kollha li mietu mgħarrqin fil-vjaġġ ta' tama fil-Mediterran u anke lil dawk li ġew salvati.
Din il-pittura ta' Kupidu rieqed kienet kummissjonata għal Fra Franceso dell'Antella, Segretarju tal-Gran Mastru Alof de Wignacourt. Minn skrizzjoni fuq wara tal-pittura jingħad li din tpinġiet waqt li Caravaggio kien f'Malta fis-sena 1608. Il-pittura tfisser l-abbandun tal-pjaċiri tad-dinja. Il-pittura llum tinsab f'Gallarija Palatina f'Firenze.
minn inewsmalta.com

Jappella biex tonqos il-kera fuq appartamenti tal-Gvern għax 'hawn min mhux qed jiekol'

Id-Deputat Nazzjonalista Toni Abela llejla fil-Parlament appella biex il-Gvern jikkonsidra li jraħħas il-kera fuq appartamenti tal-Gvern. Qal li din kienet għoliet xi xhur ilu u llum hawn min mhux ilaħħaq, tant li biex il-flus iservu hemm min qed joqgħod lura mill-ikel. Id-Deputat Nazzjonalista qal li fejn jirrigwarda self fuq djar f'Malta m'hemmx is-sitwazzjoni li teżisti fl-Ewropa u enfasizza li huma ftit dawk li jissellfu u ma jaslux biex iħallsu d-dejn fuq id-dar tagħhom. Spjega kif hemm ammont ta' nies li jispiċċaw iħallsu d-dejn fuq id-dar qabel iż-żmien stipulat.
minn inewsmalta.com

Ċensu Galea taqbiżlu

Waqt seduta li fiha kontinwament kien qed isikket lill-membri Parlamentari minħabba storbju waqt li kienu qed isiru interventi minn Deputati oħra, id-Deputat Speaker Ċensu Galea lejn l-aħħar tad-dibattitu fil-Parlament qabżitlu sew u nstema' jirrimarka li, "Il-monti għadu ma nfetaħx!” Dak il-ħin kienet qed titkellem il-Ministru Helena Dalli, li b'ċajta rrimarkatlu li, "Semmejt il-monti għax qed niddiskutu l-affarijiet tal-konsumatur.” Din ir-rimarka xejn m'għoġbot lil Ċensu Galea, li weġibha lura u qalilha, "Mela issa waqqafhom int.” Il-Ministru rrimarkat li dak li qalet qalitu biċ-ċajt, u Ċensu Galea qalilha li, "Meta jinqalgħu l-problemi hawn ma jkunux taċ-ċajt.”
  minn inewsmalta.com

'Sa issa m'iniex konvint li l-MFSA se tipproteġi lill-konsumaturi' - il-Ministru Evarist Bartolo

Hekk kif il-Parlament beda jiddiskuti l-abbozz ta' liġi li jemenda l-att dwar l-affarijiet ta-konsumatur, spikkat għal darba oħra dikjarazzjoni iebsa mill-Ministru għall-Edukazzjoni Evarist Bartolo, li qal li sa issa għadu mhux konvint li l-MFSA se tipproteġi l-konsumaturi. Hu semma diversi każijiet fejn konsumaturi, fosthom dawk vulnerabbli, spiċċaw ingidmu. Dan l-att hu dwar self fuq djar. Evarist Bartolo tenna li, "Hemm bżonn direzzjoni ġdida fl-Awtorità Maltija għas-Servizzi Finanzjarji (MFSA) għax kien hemm diversi każi fejn din ma Pproteġietx lill-konsumaturi. Sa issa m'iniex konvint u persważ li l-konsumatur se jkun protett mill-MFSA. Qal li l-aktar li għandhom bżonn protezzjoni huma dawk l-aktar vulnerabbli fosthom dawk li jkunu ħadu somma flus għax irtiraw kmieni u dawn jibdew jiġbru warajhom ċerti kumpaniji biex jinvestu flushom magħhom. Dawn imbagħad isibu li dak kollu li faddlu jew li investew, spiċċaw tilfu ħafna flus. Dawn ma jkunu sabu lir-regolatur, li hu l-MFSA, jipproteġihom. Fl-aħħar snin kellna każ wara l-ieħor fejn l-MFSA ma pproteġietx lill-konsumaturi."
Il-Ministru Evarist Bartolo qal li, "L-aħjar forma ta' protezzjoni lill-konsumatur hi l-prevenzjoni. Għalhekk hu importanti li l-MFSA tifhem ir-responsabbilitajiet ġodda li qed jitpoġġew fuqha. Hemm bżonn tibda paġna ġdida fejn bla ma tħares lejn uċuħ jew ħbieb, tieħu passi biex tipproteġi l-konsumaturi. Meta l-konsumaturi jħossuhom misruqin, iċ-ċittadini ma jkollhomx fiduċja fl-istituzzjonijiet finanzjarji."
L-għanijiet u r-raġunijiet ta’ dan l-Abbozz ta’ Liġi huma biex jemenda l-Att dwar l-Affarijiet tal-Konsumatur biex jikkumplimenta l-proċess ta’ traspożizzjoni relattiv għad-Direttiva 2014/17/UE tal- Parlament Ewropew u tal-Kunsill tal-4 ta’ Frar 2014 dwar kuntratti ta’ kreditu għall-konsumaturi marbutin ma’ proprjetà immobbli residenzjali u li temenda d-Direttivi 2008/48/KE u 2013/36/UE u r- Regolament (UE) Nru. 1093/2010.
minn l-orizzont

Kolonji ta' naħal meqrudin fit-tramuntana ta' Malta

Kolonji sħaħ ta' naħal, b'mod partikolari fit-tramuntana ta' Malta, kellhom jinqerdu matul is-sena li għaddiet u dan minħabba li kienu morda bil-marda tal-European Foulbrood. Dan ħareġ minn tweġiba Parlamentari li ta l-Ministru għall-Iżvilupp Sostenibbli, Ambjent u Tibdil fil-Klima, Josè Herrera, għal mistoqsija tad-Deputat Nazzjonalista Ċensu Galea.
Il-Ministru Herrera meta mistoqsi dwar mard fin-naħal qal li, "Matul l-aħħar tnax-il xahar instabu diversi każijiet ta’ European Foulbrood fil-kolonji tan-naħal f’Malta. Il-lokalitajiet fejn instabu l-kolonji infettati huma: il-Mellieħa, l-Imġarr, ir-Rabat, Ħaż-Żebbug, il-Baħrija u l-Wardija. Peress li l-European Foulbrood hija mniżżla bħala waħda mill-mard notifikabbli u biex titnaqqas milli tkompli tinxtered, ix-xehed ta’ kolonji infettati ġew meqruda fuq il-post. Din il-marda ġiet l-ewwel darba rrappurtata f’Malta fl-2005. Rigward il-produzzjoni tal-għasel, ta’ min jirrimarka li l-mard notifikabbli kollha jaffettwaw il-produzzjoni tal-ikel prodott mill-annimali. Id-Direttorat għar-Regolazzjoni Veterinarja m’ għandux il-figuri tal-produzzjoni tal-għasel ta’ snin preċedenti peress li l-imġiebaħ bdew jiġu spezzjonati minn dan id-Direttorat f’Diċembru tal-2014."
minn inewsmalta.com

Se nibqgħu bil-kurżità dwar l-infiq tal-PBS fuq il-Eurovision

Il-parteċipazzjoni ta' Malta fil-Eurovision dejjem toħloq diskussjoni f'pajjiżna. Din is-sena ma kinitx eċċezzjoni, fejn wara l-parteċipazzjoni ta' Ira Losco qamet diskussjoni dwar kemm kien l-infiq marbut mal-parteċipazzjoni Maltija. Ma setax jonqos li wara allegazzjonijiet li żdiedet in-nefqa, il-kwistjoni titqajjem fil-Parlmaent. Kien id-Deputat Nazzjonalista Clyde Puli li qajjem il-każ, fejn staqsa kemm kienet l-ispiża fuq dan il-festival fl-aħħar għaxar snin.
Min-naħa tiegħu, il-Ministru Owen Bonnici wieġeb biss li, "Il-PBS topera b'mod kummerċjali u għalhekk dik l-informazzjoni mitluba hi ta' natura kummerċjali."
Clyde Puli staqsa dwar il-persuni barranin li kienu involuti fil-parteċipazzjoni Maltija fil-Eurovision fi Stokkolma, bil-Ministru jgħid li l-barranin kienu Alex Zabotto, Stephane Boko, Skorpion, Maolly Pettersson Hammar u Lars Safsund.
Clyde Puli staqsa wkoll min kienu l-membri li ffurmaw id-delegazzjoni Maltija għall-Eurovision fl-Iżvezja, bil-Ministru jgħid li dawn kienu Tonio Portughese bħala Ċermen, Anton Attard bħala Kap tad-Delegazzjoni, Doreen Cortis bħala Assistent Kap tad-Delegazzjoni, Gordon Bonello Producer u Howard Debono bħala Artist Manager. L-istage team kien kompost minn Ira Losco, Anna Aela, Pamela Bezzina, Skorpion, Molly Pettersson Hammar u Lars Safsund. Kien hemm imbagħad bħala 'stage styling', Stephane Boko, Alex Zabott, Diane Nikolic, Marielle Calleja waqt li Mark Vassallo, Jeremy Dalli u Charles Ahar kienu bħala produzzjoni televiżiva. Bħala PR u reklamar ,id-delegazzjoni kellha lil Daniel D'Anastasi, David Debono, Leslie Skipper u Luke Fisher.
Dwar kemm ġie jiswa l-festival tal-kanzunetta Maltija għall-Eurovision, il-Ministru Bonnici qal li, "Il-PBS din is-sena kellu żieda ta’ 120% fuq is-snin ta’ qabel fid-dħul mir-reklamar u sponsors u għaldaqstant dan id-dħul addizzjoniali wassal biex il-PBS setgħet tesegwixxi l-politika tagħha ta’ awtofinanzjanment u awtosostenibilità".
minn l-orizzont 

'Hemm policy li b'tattoo ma tidħolx Pulizija?'... l-informazzjoni għadha qed tinġabar

Għal mistoqsija dwar jekk hemmx regolamenti biex persuni li jkunu applikaw biex jidħlu fil-Korp tal-Pulizija, u li jkollhom tattoo, ma jiġux aċċettati u jekk din tgħoddx ukoll għall-persuni li jerġgħu jidħlu fil-Korp, il-Ministu għall-Intern, Carmelo Abela, qal biss li "l-informazzjoni għadha qed tinġabar u din tingħata f'seduta oħra". Kien id-Deputat Nazzjonalista Beppe Fenech Adami li staqsa dan, b'enfasi fuq persuni li jkunu reġgħu ddaħħlu fil-Korp tal-Pulizija wara li jkunu ntlaqgħu l-ilmenti mill-Grievance Board.
minn inewsmalta.com

'Suldati ta' Odin' jibdew jirreklutaw f'Malta... iqisu lill-immigranti 'għedewwa'


Isejħu lilhom infushom 'Suldati ta' Odin'. 'Odin' mhu xejn għajr alla tal-gwerra u tal-mewt fil-mitoloġija Nordika. F'Malta twaqqfet ukoll ċellola ta' dan il-grupp, li fl-aħħar ftit ġimgħat bdew jirreklutaw in-nies. Organizazzjoni sigrieta li qed tgħid li xogħlha se jkun li tgħasses u tħares il-Maltin mill-immigranti. Tgħid li se ġġib is-sigurtà fit-toroq. Lesti jiddefendu b'kull mezz lill-Maltin li jsibu ruħhom f'diffikultà ma' barranin. 

Mhux faċli tidħol membru. L-ewwel jiltaqgħu miegħek f'post kwiet, ironikament bandli tat-tfal.  Il-post hu f'Ħal Luqa. Telefon fejn taqbadhom ma jagħtux. Dejjem jiltaqgħu miegħek personalment. Il-laqgħat isiru kull nhar ta' Tnejn u minn hemm jibdew il-mistoqsijiet fuq dawk li juru x-xewqa li jkun membri. Iridu preżenza qawwija f'żoni fejn hemm migranti Afrikani. Il-Marsa, Birżebbuġa, Ħamrun, Buġibba u l-Imsida huma l-postijiet l-aktar li qed jagħfsu fuqhom.

Wara li jinġabru dettalji dwarek, ikun jonqos l-approvazzjoni uffiċjali li ssir f'diskussjoni bejn it-tmexxija tal-grupp. Is-sħubija tkun segwita b'patt ta' ubbidjenza. Jgħidulek mill-ewwel li jekk tissieħeb f'dan il-grupp, trid terfa' r-riskju li dan iġib fosthom l-azzjonijiet li se jittieħdu fit-toroq. Dan il-grupp li sa issa infirex f'14-il pajjiż Ewropew, kellu l-bidu tiegħu fil-Finlandja u beda jinfirex sew wara Jannar ta' din is-sena.

Fl-aħħar jiem inewsmalta.com investiga dan il-grupp u l-ħidma li dan beda jwettaq lejn l-aħħar ta' April. Il-ħidma tiegħu sa issa hi kkonċentrata f'reklutaġġ ta' membri.  Grupp sigriet li qed jgħid li hu għaqda non governattiva.  Għal min ħa l-impressjoni li dan hu xi grupp reġistrat, inewsmalta hu mgħarraf li dan il-grupp mhux reġistrat. Minkejja li qed jingħad li dawn se jagħmlu rondi u se jkunu qed jaraw x'qed jiġri fit-toroq Maltin mill-barranin b'mod partikolari immigranti Afrikani, ġejna infurmati b'mod mhux uffiċjali minn sorsi qrib il-Puliżija, li f'Malta l-ordni pubblika tagħmilha biss il-Pulizija. 

"Għas-sigurtà, in-nisa mhux se jwettqu rondi fit-toroq"

inewsmalta ma naqasx li jagħmel kuntatt ma' din l-organizazzjoni sigrieta. Tipprova tagħmel kuntatt bit-telefon imma tinduna mill-ewwel li ma jagħtux numri tat-telefon jew indirizzi. Tibagħtilhom messaġġ u jitwieġeb wara ftit ħin. Jgħidulek li "għandna ħafna talbiet. Se nikkuntattjawk aktar tard".

Iwieġbu ftit jiem wara u jgħidulek kif fis-sit soċjali m'hemmx dettalji personali. Jgħidulek li l-ewwel pass irid ikun li niltaqgħu wiċċ imb wiċċ biex isiru jafuk.

L-appuntament jingħata għal nhar ta' Tnejn f'żona kwieta f'Ħal Luqa.  Il-ħin ikun wara s-7.00 ta' filgħaxija.  Il-proċess isegwi billi jistaqsu għadd ta' dettalji personali. Jgħidulek min huma dawn is-'Suldati a' Odin'. Jistaqsuk kemm int lest li tkun leali u ubbidjenti lejn il-grupp.  Jgħidulek li l-grupp għandu tliet  oqsma li fihom se jifrex il-ħidma.

L-ewwel għan hu dak li jkun hemm rondi fit-toroq Maltin b'mod partikolari f'żoni fejn hemm jgħixu għadd ta' immigranti. Fuq dan iżda jgħidulek ċar u tond li minħabba raġunijiet ta' sigurtà, nisa u tfajliet huma esklużi milli jipparteċipaw fihom u dan minħabba minħabba riskji li jista' jkun hemm. Jidher li dawn ir-rondi se jsiru tard filgħaxija, minn gruppi ta' nies u li se jkunu lebsin ilbies li jidentifikahom. 

Ir-riskju qed jingħad li hu fl-interventi, minħabba li qed jingħad lill-membri li jekk jaraw Malti qed jiġi mhedded  minn barranin, membri ta' dan il-grupp għandhom jintervjenu. Jisħqu li għalhekk  il-lealtà bejn membri hi bla kundizzjoni. Jagħmluha ċara li kull azzjoni li tittieħed trid tkun ta' difiża personali. Dawk inqas minn tmintax-il sena ma jistgħux jissieħbu.

Għan ieħor li jissemma' meta wieħed jagħmel l-ewwel laqgħa biex jidħol membru fil-grupp, hu dak ta' jekk humhiex lesti li  jattendu manifestazzjonijiet fit-toroq fil-qalba ta' fejn jgħixu l-immigranti jew inkella li tkun il-widna u l-għajn tagħhom fit-toroq Maltin b'mod partikolari jekk tgħix f'żona fejn hemm il-barranin. Ma jonqosx ukoll li jgħidulek li l-pjani huma li dan il-grupp sigriet ikollu ukoll is-sit soċjali tiegħu, fejn membri b'għarfien tat-teknoloġija tal-informazzjoni qed jintalbu jassistu.

Wara din l-ewwel laqgħa ma tingħata ebda garanzija li se tidħol membru.  Jgħidulek li issa l-pass li jmiss se jkun dak li ssir laqgħa bejn it-tmexxija tal-grupp għall-approvazzjoni. Mal-approvazzjoni irid isir ukoll patt ta' ubbidjenza u lealtà lejn il-grupp u l-għanijiet tiegħu. Il-membri jingħataw Karta bl-Obbligi li għandhom.

Mhix reġistrata mal-Kummissarju tal-Għaqdiet Volontarji

Hekk kif beda jiġi enfasizzat ma' membri prospettivi li din hi għaqda non governattiva, inewsmalta kien nfurmat b'mod uffiċjali mill-Kunsill Malti għall-Għaqdiet Volontarji li  "skond ir-rekordji tagħna Soldier of Odin Malta m’hijiex irregistrata mal-Kummissarju ta’ l-Għaqdiet Volontarji."  Tennew li 'qegħdin  nikkopjaw lill-Kummissarju ta’ l-Għaqdiet Volontarji, il-Professur Kenneth Wain biex jekk taħseb li huwa lok li l-istess Kummissarju għandu jagħmel xi tip ta’ investigazzjoni tkun tista’ tgħaddilu l-informazzjoni meħtiega."

Jirreferu għall-immigranti bħala 'għedewwa'

Mhix sorpriża li fost dak li jiffurmaw dan il-grupp, hemm persuni bi twemmin tal-lemin estrem u dawk kontra immigranti Afrikani jew Sirjani. Fost il-materjal li jitqassam bejn xi wħud li resqu l-quddiem biex ikunu membri, jispikka l-fatt li dawn jirreferu għall-immigranti bħala 'għedewwa'.  Jgħidulek 'iffaċċja lill-għadu f'wiċċu'.  Materjal ieħor li qed jitqassam jgħid li "għin lil dawk bla forza anke jekk dan iwassal għall-mewt tiegħek. Din hi l-ħalfa tiegħek".  Messaġġi oħra jgħidu li  'dawk li huma korrotti jibżgħu minna. Dawk onesti jappoġġjawna. L-eroj jingħaqdu magħna".

Il-membri se jkollok ġgieget b'S.O.O

Lil dawk interessati li jkunu membri qed jgħidulhom ċar u tond li l-fergħa ta' Malta taqa' taħt il-grupp ta' Kemi fil-Finlandja, fejn kien hemm li ffurmat l-ewwel din l-organizazzjoni. Il-membri ġew infurmati li se jkollhom ġgieget li fuqhom ikollhom stampat il-kliem 'Suldati ta' Odin Malta'. Il-mexxejja tal-grupp se jkollhom sinjali li jidentifikawhom mill-membri l-oħra. Jgħidu li huma kritiċi tal-immigrazzjoni u jridu jinżlu fit-toroq biex iserrħu ras in-nies. Jiddikjarawlekli mhumiex grupp razzist, lanqas klabb tal-muturi jew xi organizazzjoni kriminali.  Jisħqu li għandhom missjoni dik li 'jħarsu l-kultura Maltija, isaħħu l-valuri tal-familja u r-rispett, u li jħarsu l-ġirien u 'l dawk fil-bżonn.

Sa issa jindika li l-grupp se jkun maqsum f'żoni differenti ta' Malta, fejn għal kull żona se jkun hemm mexxej u dan dejjem jirrapporta lill-President tal-grupp. 

Intant wieħed mill-fundaturi ta' Suldati ta' Odin fil-Finlandja, Mika Ranta ta' 29 sena li l-grupp Malti qed jgħid li hu affiljat miegħu, ingħata sentenza sospiża ta tmintax-il xahar ħabs sospiżi, multa u servizz fil-komunità. Dan wara li nstab ħati li kien attakka raġel u mara.

Ranta kien membru tal-Moviment Reżistenza Finlandiża, li hu moviment li jħaddan twemmin neo nażista.

Kien hemm rapporti ukoll ta' inkwiet li fih kienu nvoluti membri ta' Suldati ta' Odin fl-Isvezja.  Fin-Norveġja, il-Prim Ministru Erna Solberg għamiltha ċara li "s-Suldati ta' Odin m'għandhomx post fuq it-toroq Norveġiżi. Hi qalet li "dawn għandhom valuri perikolużi". Diversi gruppi simili f'pajjiżi Ewropej huma karatterizzati minn persuni li jħaddnu twemmin neo nażista.

minn l-orizzont

Salvati kważi 800 migrant minn MSF...850 oħra interċettati mil-Libjani

Fl-aħħar sigħat, xejn inqas minn 13-il dinghi b'immigranti fuqhom ġew interċettati u salvati. B'kollox abbord kien hemm madwar 1,600 persuna. Il-Gwardji tal-Kosta Libjani interċettaw seba' dinghies li fuqhom kien hemm xejn inqas minn 850 immigrant, waqt li Medecins Sans Frontiers (MSF) salvaw sitt dinghies fi spazju ta' ftit sigħat fejn abbord kien hemm kważi 800 persuna.
L-ewwel salvataġġi seħħew mill-Gwardji tal-Kosta Libjani fejn mit-850 immigrant li salvaw kien hemm 79 nisa. Ħdax minn dawn in-nisa huma tqal.
Id-dinghies ġew salvati qrib Sabratha. Intant il-bastiment Dignity ta' MSF salva xejn inqas minn 371 immigrant waqt li l-bastiment l-ieħor tal-istess organizazzjon salva 417 immigrant.
minn inewsmalta.com

Ritratt: Arkivji Ian Noel Pace

'Maħrubin' 417,123 Libjan….identifikaiti 234,669 migrant

Hekk kif il-Gvern ta' Unità fil-Libja għaddej bil-proċess biex jipprova jgħaqqad il-pajjiż, is-sitwazzjoni umanitarja fil-Libja hi waħda imwiegħra għall-aħħar.  Dan qed joħroġ minn studju dettaljat li qed juri li wieħed minn kull 13-il persuna li hemm jgħixu fil-Libja kellhom jitilqu mill-post fejn kienu jgħixu. Mir-rapport joħroġ li hemm 417,123 persuni Libjani li kellhom jitilqu minn fejn jgħixu waqt li hemm 234,669 immigranti identifikati fil-Libja. Ir-rapport jgħid li b'kollox hu stmat li fil-Libja hemm bejn 700,000 u miljun immigrant, b'ħafna minnhom ilhom jaħdmu hemm. Ġie stabbilit li mill-ammont ta' immigranti identifikati hemm xejn inqas minn 9,000 li huma tfal.

Din is-sitwazzjoni li tinsab fil-pajjiż ġar tagħna fl-aħħar xhur u ġimgħat  wasslet biex għadd imdaqqas ta' Libjani fost żgħażagħ joħorġu mil-Libja u jiġu lejn pajjiżna. Ħafna minn dawn talbu għal ażil u fil-fatt bejn Jannar u Awwissu l-akbar ammont ta' persuni li talbu ażil kienu Libjani. Fl-aħħar jiem inewsmalta.com iltaqa' ma' Mahmoud. Spiċċa arrestat diversi drabi. Ftit ġimgħat ilu ż-żona fejn kien jgħix kienet attakkata. Daru nqerdet kompletament. Hu ntlaqat ħafif. Jista' jgħid li kien fortunat li 'grenade' waqa' ħdejh u ma ħax. Minn hemm iddeċieda li jiġi lejn Malta.

Ir-rapport dettaljat għall-aħħar sar mill-Organizazzjoni Internazzjonali għall-Immigrazzjoni (IOM). Fih jingħad b'mod ċar  li "l-kriżi umanitarja hi gravi u dan hekk kif għadd ta' persuni li kellhom jaħarbu, kemm jekk ċittadini Libjani kif ukoll jekk immigranti, qed jibqgħu jiġu mċaħħdin minn servizzi bażiċi u mill-iżvalutar tad-Dinar Libjan. Il-kunflitt ċivili ikkawża dannu estensiv fuq infrastruttura u fuq djar ta' persuni ċivili. Dan wassal biex ħafna Libjani kellhom jaħarbu mill-post fejn kienu jgħixu."

L-istudju kien mifrux f'mitt post fil-Libja. Kienu biss erba' l-postijiet li tqiesu bħala inaċċessibbli u dawn kienu Misrata, Harawa, Sirte u Al Jaghbub. F'95 post instab li kien hemm Libjani maħrubin u l-immigranti instabu fi 23 post."

Mir-rapport joħroġ li t-tieni l-akbar ammont ta' ħarbiet minn Libjani seħħew f'Ġunju tas-sena 2014, fejn ħafna ħarbu minn Benghażi u Tripli.   Ir-rapport jagħti diversi raġunijiet għaliex ħafna Libjani ħarbu minn fejn kienu jgħixu u dawn kienu "tnaqqis fis-sigurtà, aċċess limitat għal servizzi tas-saħħa u edukazzjoni, u ħafna ma sabux refuġju f'kampijiet.  

Dan wassal biex 49 fil-mija marru joqogħdu f'akkomodazzjoni li qed iħallsu huma stess. Prezzijiet għolja ta' ikel u kirjiet qed jaffettwaw b'mod negattiv lil dawn il-persuni." Ir-rapport jgħid li hemm nuqqas ta' mediċini u injezzjonijiet kontra mard li jittieħed.

Mir-rapport joħroġ li l-belt li l-aktar li qed tospita ċittadini li ħarbu fil-Libja stess hi Benghażi b'115,000 persuna, u wara jiġu Ajdabiya b'31,750 persuna, Al Bayda b'21,500 persuna, Abu Salim b'21,475 persuna u Bani Walid b'20,000 persuna. 

Jirriżulta iżda li minn Benghażi kien hemm ammont kbir ta' nies (46.8 fil-mija) li ħarbu lejn post ieħor. Wara jiġu Sirte b'13.2 fil-mija u Tawergha bi 12.2 fil-mija. 

Mir-rapport joħroġ ukoll li minn dawn l-417,123 persuna maħrubin, hemm 203,270 li jgħixu f'akkomodazzjoni li qed jikruha huma, 1,925 persuna qed jgħixu f'akkomodazzjoni li qed iħallashielhom ħaddiehor, 48,464 persuna qed jgħixu ma' qraba, 4,550 qed jgħixu fid-deżert, 14,525 persuna f'kampijiet jew postijiet ta' kenn, 13,855 persuna qed jgħixu f'postijiet li mhux lesti, 29,480 persuna qed jgħixu fi skejjel u 84,430 persuna mhux magħruf fejn qed jgħixu.

Ir-rapport jgħid li l-akbar problemi li qed jiffaċċjaw il-Libjani maħrubin huma nuqqas ta' likwidità u prezzijiet għajljin tal-ikel.

Dwar l-immigranti ir-rapport jgħid li ġew identifikati 234,699 immigrant, fejn 89 fil-mija minn dawn huma irġiel, 6.4 fil-mija huma nisa u 4 fil-mija huma tfal. Dawn instab li qed jgħixu f'postijiet bħal Abu Salim, Ain Zara, Sabha, Tajoura, Al Jufrah, u Alzintan. L-akbar konċentrazzjonijiet kien f'Hun, Abu Salm, Oudan, Ibn al Mandur, Bab bin Ghshir, Al Hadhba al Khadra, Al Awanin, Karkarish u Al Hamidiyah.

Intqal li 46 fil-mija ta' dawn l-immigranti qed jgħixu f'postijiet informali, 35 fil-mija f'bini mikri, 7 filmija fi swieq, 4 fil-mija f'ċentri ta' detenzjoni u 3 fil-mija mhux magħruf fejn qed jgħixu.  Dawn l-immigranti ġejjin  minn Niger, Eġittu, Ghana, Mali, Chad, Sudan, Niġerja, Gambja, Sirja, Bangladex, Tuneżija, Somalja u s-Senegal.

 

Ritratt: Arkivji Ian Noel Pace

minn l-orizzont u inewsmalta.com

'Il-Gvern Malti kien ħoloq mostru li ma jaħdimx' - l-eks Kap Eżekuttv tal-ARRIVA

"Bl-għan li jintroduċi regolamenti fit-trasport pubbliku, il-Gvern ta' Malta ħoloq monstru li ma jaħdimx. Saru ħafna wegħdiet li ma ssarfux. F'Malta kien hemm diżastru totali. Rata ma titwemminx ta' inċidenti bil-karozzi tal-linja".

Dawn huma dikjarazzjonijiet li għamilhom l-eks Kap Eżekuttiv ta' Arriva f'Malta, David Martin f'intervista ma' Route One.  David Martin, kiser is-silenzju fuq dak li ġara f'Malta u ta' spjegazzjoni ta' kif jara li seħħew l-affarijiet.

Fl-intervista intqal li l-ARRIVA topera servizzi f'14-il pajjiż Ewropew. Jingħad li l-kumpanija ħadmet taħt diversi mudelli u hi meqjusa bħala mudell ta' suċċess.  L-istess rapport jgħid li "Malta kien diżastru assolut. Kullimkien fl-Ewropa, is-servizz tal-ARRIVA kien suċċess imma mhux f'Malta".

Ir-rapport jiddeskrivi s-servizz tat-trasport pubbliku f'Malta bħala 'free for all' u li kellu jinbidel għal wieħed regolat simili għal dak ta' pajjiżi oħra.  Jintqal li dan ġie milqugħ minn resżistenza minn sidien ta' karozzi tal-linja u din kienet waħda mir-raġunijiet tal-falliment.

David Martin jgħid li "Malta kienet diżastru totali.  Ix-xufiera f'Malta kienu jħaddmu karozzi tat-tip Leylands. Kuluriti u mżejin imma bla struttura u bla regolamenti.  Kienet flotta ta' karozzi qodma. Karozzi mhux aċċessibbli. Kienu misjuqa b'entużjażmu imma b'servizzi limitati filgħaxija u fi tmiem il-ġimgħa. Kien pass kbir biex ikun regolat dan is-settur. Tfajna t-tender għal skeda speċifikata. Mingħajr ma kien hemm infrastruttura biex tappoġġja dik l-istess skeda u b'diversi nuqqasijiet fosthom it-traffiku lejn l-università, l-isptar u lejn l-iskejjel".

David Martin jgħid li "għamilna diversi żbalji fosthom dak li wegħdna affarijiet li ma stajniex inwettqu. Ma fhimniex l-impatt li kien se jkollha l-konġestjoni tat-traffiku fuq is-servizz.  Ma' fhimniex id-differenza bejn sistemi intiżi għat-turisti, u l-fatt li l-Pulizija ma kinitx se tagħmel kontroll tat-traffiku. Dan flimkien ma' wegħdi mill-awtoritajiet lokali li kien se jkollna l-bus lanes. Imma għall-ammont ta' raġunijiet xejn ma sar minn dan u kollox mar ħażin."

 

Itenni li fl-ewwel sitt xhur inbidlu 90 fil-mija tal-iskeda u tħabbtu biex iżommu l-istandards fis-sewqan. "Ir-rata ta' inċidenti li kellna kienu xi ħaġa li ma titwemminx. Il-kwalità tax-xufiera kienet ħażina ħafna".

Jenfasizza li "t-tagħlima kienet li meta sejjer x'imkien ġdid u li fih se tagħmel kollox f'daqqa b'appoġġ fqir u li m'hux b'saħħtu, ir-riżultat ikun falliment."

Ta' min jgħid li l-ARRIVA kienet bdiet topera f'Lulju tas-sena 2011 b'dikjarazzjoni tal-Ministru Austin Gatt li 'żmien il-bużullotti kien spiċċa'. Sa Diċembru tas-sena 2013, l-ARRIVA kellha telf ta' €50 miljun.  Fl-ewwel ta' Jannar l-ARRIVA waqfet topera f'Malta. 

 

Ritratt: Ian Noel Pace

Spettaklu minn qatgħa Fjamingi

Qatgħa ta' disa' Fjamingi dalgħodu taw spettaklu sħiħ fl-inħawi ta' Baħar iċ-Ċagħaq. Id-dehra tagħhom ġibdet l-għajn ta' diversi persuni li waqfu jarawhom. Marcus Camilleri, irnexxielu jiġbdilhom ritratti waqt li kienu għaddejjin minn ħdejn wieħed it-Torrijiet ta' De Redin.
Il-Fjamingi jidher li baqgħu sejrin lejn Wied il-Għajn.
ritratt Marcus Camilleri 

'Il-problema mhux it-triq imma minn fejn se jgħaddu s-servizzi' - Nathaniel Cutajar SPK

Waqt li sa issa għad mhux magħruf meta se jintemm il-proċess marbut mal-ħidma u investigazzjonijiet li għaddejjin fir-rigward tas-sebja ta' erba' oqbra Puniċi fit-triq tal-Baħrija, kollox jindika li l-akbar problema hi dik marbuta ma' minn fejn se jgħaddu s-servizzi.  Minkejja li l-oqbra jinsabu f'nofs it-triq, jidher li ttieħdet id-deċiżjoni li triq tgħaddi minn fuqhom għalkemm fejn hu possibbli se jsiru tip ta' xaftijiet biex ikun hemm aċċess.  Ix-xogħol marbut ma' dawn is-sejbiet qiegħed jingħata prijorità biex dan jitlesta fl-iqsar żmien possibbli.

inewsmalta.com kompla jsegwi dan il-każ fejn kollox qed jindika li l-akbar uġiegħ ta' ras hi dik ta' minn fejn se jgħaddu s-servizzi. Jidher li ttieħdet deċiżjoni li ma jsirx qtugħ ta' blat u minħabba dan bħalissa għaddejja ħidma biex tkun iddisinjata mill-ġdid li minnha se jgħaddu s-servizzi fosthom il-katusi għas-sistema tadd-drenaġġ.

Nathaniel Cutajar mis-Sovrantendenza tal-Patrimonju Kulturali meta kuntattjat minn inewsmalta, qalilna li "ma nistgħux ngħidu meta se jitlestew l-investigazzjonijiet li għaddejjin. Fejn se jkun possibbli se nagħmlu xaftijiet. It-triq se tgħaddi minn fuqhom. It-triq mhix daqstant problema għalina, aktar minn fejn se jgħaddu s-servizzi hi problema". 

Ritratt: Roger Azzopardi

Il-knisja tax-Xewkija…qabel iċ-Ċittadella - l-uniku post f'Għawdex ma' l-aktar postijiet prestiġjużi

Ix-Xewkija permezz tar-Rotunda iddedikata lil San Ġwann Battista, ġiet klassifikata bħala wieħed mill-għaxar postijiet ta' prestiġju f'Malta li wieħed għandu jżur fil-gżejjer Maltin. Dan il-fatt, li qed jintlaqa' b'sodisfazzjon mix-Xewkin, ifisser li l-Knisja tax-Xewkija ġiet klassifikata qabel iċ-Ċittadella u s-santwarju f'Ta' Pinu.

Din il-klassifikata inħarġet minn Trip Advisor għas-sena 2016. Fl-ewwel post hemm il-Kon Katidral ta' San Ġwann, wara Forti Rinella, ir-Rotunda tal-Mosta, it-tempji ta' Ħaġar Qim, Casa Rocca Piccola fil-Belt, ix-xelter tal-gwerra fil-Mellieħa, il-Katidral tal-Imdina, il-Batterija tas-Salut fil-Belt, il-knisja tax-Xewkija u l-Ipoġew ta' Ħal Saflieni. 

Ritratt: Arkivji Ian Noel Pace

800,000 immigrant fil-Libja lesti biex jaqsmu lejn l-Ewropa

Rapport li tħejja bejn il-Europol u l-Interpol intitolat 'Report on Migrant Smuggling Networks' jgħid li hu stmat li hemm xejn inqas minn 800,000 immigrant li qed jistennew li mil-Libja jaqsmu lejn l-Ewropa. Ir-rapport jgħid b'mod ċar li m'hemm ebda rabta sistematika bejn traffikar ta' immigranti u t-terroriżmu. Ir-rapport iżda jgħid li hemm żieda fir-riskju li terroristi jistgħu jużaw influss ta' immigranti biex anke huma jidħlu fl-Ewropa.
Ir-rapport qed jagħmilha ċara li l-għeluq ta' xi fruntieri se jwassal biex ikunu żviluppati operazzjonijiet sofistikati ta' traffikar ta' persuni.
minn inewsmalta,com

L-iskema taċ-ċittadinanza b'investiment bi €38 miljun f'kiri u xiri ta' proprjetà

"Sat-18 ta Marzu 2016 Identity Malta rċeviet 1,128 applikazzjoni għal residenza, li minnhom kien hemm 610 applikazzjonijiet li komplew għaċ-ċittadinanza. Identity Malta tgħaddi lir-Regolatur informazzjoni dwar dawn l-applikazzjonijiet skont kif trid il-liġi. Ir-Regolatur huwa mbagħad obbligat jippubblika rapport dwar l-operat ta' Identity Malta, għal darb' oħra skont kif trid il-liġi.” Dan sostnieh il-Ministru għall-Ġustizzja, Owen Bonnici, meta fil-Parlament kien mistoqsi mid-Deputat Nazzjonalista Claudio Grech dwar l-iskema ta' ċittadinanza b'investiment.
Fi tweġiba oħra, il-Ministru Bonnici qal li, "Sat-30 t’April 2016 kien hemm 143 applikant li lestew il-proċess kollu b’suċċess. Minn dawn kien hemm 116-il applikant illi krew proprjetà b’investiment totali ta’ €12,245,835.88 fuq perjodu ta’ ħames snin, filwaqt illi kien hemm 27 applikant li xtraw proprjetà b’investiment totali ta’ €25,475,744.41. Dan kollu jawgura tajjeb għal iktar tkabbir tal-ekonomija Maltija,” qal il-Ministru Bonnici.
Hu qal ukoll li, "Minn meta beda l-Programm ta’ Ċittadinanza b’Investiment sat-30 t’April 2016, kien hemm 68 għotja illi ngħatat lil għaqdiet filantropiċi/NGOs jew organizzazzjonijiet simili, b’total globali ta’ €791,900. Dawn huma għotjiet li l-Aġenzija Identity Malta ġiet informata dwarhom. Mhuwiex eskluż li kien hemm għotjiet oħra li saru u l-Aġenzija ma ġietx informata dwarhom."
minn inewsmalta.com

Multi sostanzjali għal abbuż mill-badge il-blu… reat kriminali għal parkeġġ f'post riservat

F'sitwazzjoni fejn f'pajjiżna l-karozzi dejjem qed ikomplu jiżdiedu, tista' tgħid li tmur fejn tmur issib ma' wiċċek il-problema tal-parkeġġ. Persuni b'diżabilità, il-problema tal-parkeġġ hi ferm akbar għalihom. Dan għax spiss isibu li parkeġġi riservati għalihom jittieħdu minn persuni li m'għandhom il-badge il-blu. Mill-banda l-oħra hu fatt magħruf li f'pajjiżna hawn ukoll abbuż milnn din il-badge, b'mod partikolari minn familjari jew qraba ta' persuni b'diżabilità. Quddiem dan, permezz ta' abbozz ta' liġi li qed ikun diskuss fil-Parlament, se jkun hemm multi sostanzjali għal min jabbuża mill-badge il-blu. Mill-banda l-oħra dawk li jipparkjaw f'parkeġġ riservat għal persuni b'diżabilità, jekk jinqabdu se jittieħdu proċeduri kriminali kontrihom.
Il-Ministru Michael Farrugia f'intervent fil-Parlament iddikjara li min jieħu parkeġġ riservat għal persuna b'diżabilita jkun qed jieħu dritt lil dik il-persuna.
L-abbozz ta' liġi qed jiddefinixxi b'mod ċar x'jikkostitwixxi abbuż minn badge blu. Dawn huma kull persuna li tuża badge blu li m’għadhiex aktar valida jew tuża badge blu ta’ detentur li miet. Min ma jagħtix lura l-badge blu lill-uffiċjal awtorizzat mal-mewt tad-detentur jew meta ma tkunx id-detentur u tagħmel użu mhux xieraq tal-badge blu mingħajr l-għarfien jew permess tad-detentur ukoll qed jitqies bħala abbuż. Min bi kwalunkwe mod ibagħbas, jikkopja, jiffalsifika jew jibdel badge blu jew jisraq, jagħti, jixtri jew ibigħ badge blu li hija valida, skaduta jew ikkuppjata ukoll jitqies bħal abbuż.
Kull persuna li twettaq reat simili għandha, meta tinstab ħatja, teħel multa ta’ mhux anqas minn €230 u mhux aktar minn €500. Dan flimkien mal-irmonk tal-vettura.
Meta tinstab ħatja għal reat sussegwenti, il-persuna teħel multa ta’ mhux anqas minn €1000 u mhux aktar minn €1500 flimkien mal-irmonk tal-vettura.
minn inewsmalta.com

'Nofs verità hi gidba?'... Ministru u Deputat jargumentaw

Tweġiba fil-Parlament mill-Ministru Michael Farrugia dwar l-adozzjonijiet xejn ma niżlet tajjeb mad-Deputat Nazzjonalista Robert Cutajar. Dan fil-fatt għamel aġġornament fil-Parlament fejn qal li meta tkellem ma' ġenituri li se jadottaw u persuni oħra, dawn qalulu ċar u tond li kien hemm nuqqas ta' verità f'dak li qal il-Ministru Farrugia. Il-Ministru Farrugia fis-seduta tal-lejla lmenta dwar dan mal-Ispeaker u qal li l-mistoqsijiet Parlamentari jitwieġbu mill-Ministru fuq informazzjoni li tingħata minn uffiċjali pubbliċi. "Mhux veru li jien gdibt meta weġibt dawk il-mistoqsijiet dwar l-adozzjoni. Ir-risposti tad-domandi huma veritieri."
Wara intervjena d-Deputat Nazzjonalista Robert Cutajar, li ddikjara li hu qatt ma qal li l-Ministru gideb. Min-naħa tiegħu l-Ministru intervjena u qal li d-Deputat Nazzjonalista qal li kien hemm nuqqas ta' verità f'li qal u qal li dan ifisser gideb. Hu appella biex ikun aktar attenzjoni fil-kliem li jintuża. Tenna li r-risposti li jingħataw ikunu qed isiru b'responsabbiltà.
minn inewsmalta.com

Il-bieb li se jgħatti tiċrita fiċ-Ċittadella

x-xogħol fuq il-bieb li se jgħatti t-tiċrita li saret fis-swar taċ-Ċittadella f’nofs is-snin ħamsin miexi b’ħeffa kbira u mistenni li jkun lest fil-ġimgħat li ġejjin.  Dan il-bieb mistenni li jagħti dehra ta’ kif kien is-swar taċ-Ċittadella qabel saret il-mina u min tagħrif li waslilna jidher li se jkun  jinfetaħ meta jkun hemm il-bżonn, naturalment l-aktar b’konnessjoni ma’ funzjonijiet reliġjuzi fil-Knisja tal-Katidral.
Bieb inħadem l-Ingilterra mill-kumpanija UK Loco u hu magħmul minn taħlita ta’ diversi materjal. Il-qafas tiegħu huwa naturalment tal-ħadid, iżda se jinkludi fih il-ġebla Maltija dik tal-franka kif ukoll bronz u ħġieġ. Naturalment dan il-bieb se jkun mekkanizzat u jinfetaħ b’diversi muturi li ser ikunu jħaddmu d-diversi fetħiet tal-bieb. Iżda bħal kull ħaġa oħra dan se jkollu bżonn manutenzjoni regolari.
Il-bieb ser ikun jinfetaħ f’erba partijiet, il-parti t’isfel tinfetaħ fi tlieta, fejn iż-żewġ partijiet tal-ġnub se ikunu għan-nies li jkun jistgħu jgħaddu għal pjazza Kattidral permezz ta’ tmien tarġiet, il-parti tan-nofs se jkun hemm rampa u tkun tista' tinfetaħ biex tidħol vettura jew għal okkażjonijiet u ċerimonji marbuta mal-Knisja tal-Katidral, filwaqt li l-parti ta’ fuq tkun tinfetaħ biss għall-purċissjonijiet li joħorġu mill-Knisja tal-Katidral.
B’hekk dan ix-xogħol ta’ restawr professjonali li sar dan l-aħħar fiċ-Ċittadella ikun jista jitgawda mil-eluf ta’ turisti li izuruha kuljum.