Kwantità kbira ta' siringi f'tojlits f'bandli fil-Furjana

Il-problema marbuta ma' rimi ta' siringi użati, qed tkompli tippersisti.  L-aħħar każ li dwaru saru ilmenti seħħ f'bandli fil-Furjana fejn fit-tojlits instabu kwantitajiet kbar ta' siringi. Jidher li minkejja li nbidet sistema ta' tqassim ta' kontenituri, sa issa jidher li din il-problema, li hi ta' riskju għat-tfal, qed tkompli tippersisti.

Is-Sindku tal-Furjana, Davinia Sammut Hili, ikkummentat dwar dan u qalet li "hu tal-mistħija li fit-tojlits tal-bandli ssib kwantità kbira ta' siringi. Jekk għandek problema ta' drogi għallinqas iddisponi mill-affarijiet f'postijiet apposta u mhux fi ġnien pubbliku, speċjalment f'post li jkun hemm ħafna tfal żgħar".

"Lanqas nista' nemmen … inħares lejn ir-ritratti tiegħek u naħseb li hi ħolma"
    •  

 "Għadni lanqas nista' nemmen kuġin. Inħares lejn ir-ritratti tiegħek u naħseb li din hi ħolma.  Kemm ħallejtna żgħir.  Għandi ħafna memorji tiegħek. Kemm konna nilagħbu flimkien  u kemm konna nitkellmu fuq l-aktar ħaġa li kont tħobb int - qiegħ il-baħar. Bla kliem".

Dan kien il-messaġġ li għamel Gilbert Casha, kuġin ta' Ludovick Casha, bugħaddasa u missier ta' sebgħa u għoxrin sena li jumejn ilu tilef ħajtu traġikament waqt li kien qed jipprattika d-delizzju tiegħu fid-Dwejra.

Ludovick kien persuna maħbuba minn ħafna, fosthom il-komunità ta' bugħaddasa li spiss kienu jirrikorru lejh għal xi pariri.


Il-Federazzjoni ta' l-Għaqdiet tas-Sajjieda Dilettanti ukoll ikkummentat dwar il-mewt tiegħu u qalet li "Ludovick ma kienx jiddejaq jagħti pariri anke lill-kompetituri diretti tiegħu u ta’ dan se jibqa mfakkar bħala ambaxxatur li dejjem kien jippromwovi dan l-isport f’Malta filwaqt li żamm l-umiltá tiegħu."

Tgħid li "Ludovick kien ikkunsidrat bħala wieħed mill-aqwa għaddasa fil-kategorija Apnea, fejn l-għaddasa jinżlu fil-qiegħ tal-baħar mingħajr ebda għajnuna respiratorja. Il-kapaċità ta’ dan iż-żagħżugħ waslitu biex anke jirrappreżenta lil Malta fuq livell internazzjonali . Fis-sena 2015 kien l-unika għaddas professjonali Malti li ntgħażel mill-ikbar kumpanija tal-għadds biex jirrapreżentahom.

Il-fdalijiet tal-ħut f'bajjiet Mellieħin se titpoġġa fuq l-aġenda tal-Kunsill

Il-Viċi Sindku Laburista fil-Mellieħa, Clayton Bartolo, talab lis-segretarju eżekuttiv tal-kunsill lokali biex il-kwistjoni ta' fdalijiet ta' ħut li nstabu fl-Għadira u fil-bajja tal-Imġiebaħ f'Selmun titpoġġa fuq l-aġenda tal-Kunsill. 

Fi kliemu stess, "jien mhux lest li naċċetta atti irresponsabbli bħal dawn, itellfu x-xogħol li jkun sar minn dawk involuti fit-tindif tal-ambjent u t-turiżmu".

Wied Blandun ... telqa u ħmieġ

Wied Blandun hu meqjus bħala l-pulmun għaż-żona ta' Raħal il-Ġdid u l-Fgura.
Post li għadu fl-istat naturali tiegħu. Sfortunatament dan il-wied hu kkaratterizzat minn telqa u għadd kbir ta' skart li qed jintefa' fih minn persuni rresponsabbli. Residenti li tkellmu magħna qalulna li "regolarment ninnotaw li l-iskart qed jiżdied fil-post. Nittamaw li d-Direttorat għat-Tindif jiġu jagħtu tindifa lil dan il-post".

''Għall-ewwel darba f'ħajti jien qed nistħi li jien Ewropew!''

Nicholas Papa, volontier fuq bastiment ta' salvataġġ ta' immigranti ta' Medecins Sans Frontieres (MSF), quddiem il-fatt li fl-aħħar sigħat hu maħsub li ntilfu fil-baħar seba' adulti u erbat itfal, qal li għall-ewwel darba f'ħajtu qed iħossu jistħi li hu Ewropew.
MSF fl-aħħar sigħat b'mod partikolari matul il-lejl kienu involuti f'għadd ta' salvataġġi ta' immigranti.

Ras ta’ tonn tiddaħħal fuq ix-xatt

Wara li lbierah irrapportajna kif fl-ibħra ‘l barra sew mix-xatt kien qed ikun hemm għadd ta’ karkassi tal-ħut b’intejjen insapportabbli, dalgħodu fl-inħawi tas-Salina, kien hemm min irrapporta li daħlet ras sħiħa ta’ tonn.
Jidher li wara l-ilmenti li saru, fuq il-post marru xi persuni u ġabruha.

Ħeles mill-madum billi rmiegħ fi triq ... oħrajn jarmu fiż-Żejtun

Persuna jew persuni mhux magħrufin ħelsu mill-iskart li kellhom u li kien jikkonsistif f'madum imkisser, billi rmewh fit-triq li mir-Rabat tagħti lejn l-Imtaħleb.
L-iskart jidher sew għax twaddab fil-parti tat-triq li minnha jgħaddu l-karozzi.
Intant fiż-Żejtun għal dawn l-aħħar ġimgħat persuni irresponsabbli kienu qed jarmu skart fit-triq tas-suq, liema skart kien qed jintefa' hemm wara li jgħaddi s-servizz tal-ġbir tal-iskart.

Diversi migranti mejtin wara li l-Libjani attakkaw salvataġġ

Organizazzjoni li qed tagħmel salvataġġi fil-Mediterran u li għandha bażi f'Malta, Sea Watch, spiċċat attakkata minn dik li ġiet deskritta bħala dgħajsa tal-Gwardji tal-Kosta Libjani.
L-inċident seħħ waqt li kien qed isir salvataġġ fejn allegatament il-Libja attakkaw id-dinghi.
L-organizzazzjoni Sea Watch qalet li kollox seħħ madwar 14-il kilometru bogħod mill-kosta tal-Libja. Membri ta' din l-organizazzjoni kienu qed isalvaw dinghy b'madwar 150 immigrant fuqu.
F'dak il-mument waslet dgħajsa allegatament tal-Gwardji tal-Kosta Libjani u dawn attakkaw lill-immigranti li kien hemm abord.
Dawn bdew isawwtuhom. L-ekwipaġġ ta' Sea Watch ukoll kienu aggrediti u bdew jiġu miżmumin milli jipprovdu ġgieget tas-salvataġġ u għajnuna medika lill-immigranti abbord.
Quddiem l-allegata vjolenza mil-Libjani, inħoloq paniku fuq id-dinghi u ħafna mill-immigranti spiċċaw fil-baħar. Il-membri ta' Sea Watch bdew jippruvaw isalvaw immigranti kemm jistgħu. Erba' immigranti spiċċaw mietu.

Fejn l-aktar li għandek ċans taqla' ċitazzjoni?
    •    ... Ħal Qormi, San Pawl il-Baħar, San Ġwann u l-Mosta


Ċerti postijiet saru magħrufin li fihom ikun hemm xi gwardjan lokali jew pulizija eżatt kif iddur xi kantuniera, li xogħlhom hu biex jinfurzaw il-liġi. Forsi mistoqsija f'moħħ ħafna sewwieqa hi dwar liema huma l-lokalitajiet li fihom għandek l-akbar riskju li taqla' ċitazzjoni. Intefa' dawl dwar dan fil-Parlament, fejn Ħal Qormi, il-Mosta, San Pawl il-Baħar u San Ġwann huma l-aktar lokalitajiet li fihom jingħataw ċitazzjonijiet. 
F'Ħal Qormi bejn Ottubru tas-sena li għaddiet u Settembru ta' din is-sena ingħataw 6,636 ċitazzjoni b'valur ta' kważi €200,000. Wara kien San Pawl il-Baħar b'5,284 ċitazzjoni u b'total ta' kważi €155,000, San Ġwann b'4,915 ċitazzjoni b'valur ta' kważi €145,000.  Issegwi l-Mosta b'4,650 ċitazzjoni b'valur b'€140,000.  
Dan ifisser li f'Ħal Qormi ingħataw medja 553 ċitazzjoni fix-xahar,  fil-Mosta 387 ċitazzjoni fix-xahar u San Pawl il-Baħar u San Ġwann b'440 u 409 ċitazzjoni rispettivament.

San Ġiljan hu l-post li fih jingħataw l-inqas ċitazzjoni fejn f'sena ingħataw biss 522 ċitazzjoni jew 43 ċitazzjoni fix-xahar.
Minn Mistoqsija Parlamentari li saret mid-Deputat Nazzjonalista David Agius, il-Ministru għall-Ġustizzja Owen Bonniċi fir-risposta tiegħu qal li bejn Ottubru tas-sena li għaddiet u Settembru ta' din is-sena ingħataw 109,637 ċitazzjoni b'valur ta' €3.2 miljun. Il-kunsilli lokali jieħdu kummissjoni ta' 10% fuq dawn iċ-ċitazzjonijiet.

Il-Belt titlef lill-''Iskarpan''

    •    Il-ħanut ta' Toni Barbara magħruf bħala l-''Iskarpan'' ma kienx biss ħanut tipiku li fih jissewwew iż-żraben. Ħanut li hu attrazzjoni minnu nfih bil-mod kif kien armat b'għodda antiki fit-tiswija taż-żraben. Il-ħanut imma kien qisu post soċjali fejn beltin jiltaqgħu hemm u jgħidu kelma. Xi drabi kienu jmorru fil-ħanut ħbieb antiki ta' Toni.  Dan il-ħanut tipiku fl-aħħar jiem kien magħluq. Toni ħallina fl-aħħar jiem, fejn għal diversi Beltin il-ħanut tiegħu hu meqjus 'ikona' tal-Belt Valletta.


Ftit aktar minn sena ilu, il-ġurnalist Claudio Coleiro kien żar lil Toni fil-ħanut tiegħu. Dak inhar Toni kien qalilna li kien ilu 53 sena jaħdem fiż-żraben. Beda f’din il-ħidma fl-età ta’ 14-il sena wara li ddeċieda li jieqaf mill-iskola u jintefa' b’ruħu u ġismu biss fuq dan ix-xogħol.

Toni kien qalilna li  “ma ridtx inkompli bl-iskola u ridt li nintefa' b’ruħi u ġismi għax-xogħol. Madankollu jiddispjaċini ħafna li waqaft. Min jipprova jagħmel bħali jkun qed jiżbalja.”

“Tlaqt u lejn Malta aktar ma nersaqx” - Stephen Wyatt, inġinier mill-Istati Uniti


Kellu tamiet kbar għal ħajja f'Malta. Ħaseb li kienet se tkun faċli għalih jgħix hawn, waqt li jkompli bin-negozju tiegħu. Ġie f'pajjiżna f'Jannar tas-sena 2015.  F'inqas minn sentejn wara, kien kostrett jitlaq minn pajjiżna. Spiċċa maqful ġo daru.  Spiċċa jixtri l-ikel bi kwantitajiet biex jevita li jmur b'mod regolari jixtri fil-ħwienet. Spiċċa dejjem f'daru ma joħroġx barra. Ir-raġuni kienet kummenti razzisti minħabba l-kulur tal-ġilda tiegħu. Ironikament dawk li jikkummentawlu jew jgħajruh jaħsbuh Afrikan u jibagħtuh hemm. Fir-realtà hu inġinier mill-Istati Uniti. Ilbieraħ kien l-aħħar jum li Stephen Wyatt ta' 58 sena għamel f'pajjiżna. Illum hu se jkun qed jitlaq minn pajjiżna biex jibda jgħix f'pajjiż ieħor. "Jien se nitlaq u lejn Malta iżjed ma niġix. X'niġi nagħmel biex nesperjenza dawn l-attakki? Se ngħid lil min hu bħali biex 'l hawn ma jiġix", jgħidilna Stephen b'ton irrabjat, wara li mil-lum se jibda jgħix f'pajjiż ieħor Ewropew.
"Dort xejn inqas minn 80 pajjiż madwar id-dinja. Għext ir-Renju Unit, l-Istati Uniti, il-Ġermanja u anke l-Ungerija. Jiddispjaċini ngħid Malta hi l-aktar pajjiż razzist li għext fih" jikkumment Stephen ma' L-ORIZZONT.

Jitkellem bla tlaqlieq dwar l-esperjenza tiegħu meta kien joħroġ b'mod regolari fit-toroq Maltin. "Kont nara nies jiskantaw lejja. Qishom qed jaraw xi ħaġa ta' barra minn hawn. Imbagħad ikun hemm min jibagħtni lura lejn l-Afrika. Din ma tagħmilx sens għax jien mill-Istati Uniti.  Anki tmur tixtri l-prodotti tal-ikel jew affarijiet oħra żgħar, tispiċċa tisma' kummenti dispreġjattivi fuq il-kulur tal-ġilda jew ir-razza. Biex nevita bdejt nixtri l-prodotti tal-ikel b'ammonti kbar. B'hekk ma jkollhiex għalfejn noqgħod inmur nixtri ta' spiss", jgħid Stephen Wyatt.
Fi kliemu stess "aktar m'għadda żmien mindu beda jgħix hawn, aktar beda jara li s-sitwazzjoni sejra għall-agħar."  
Isemmilna każ fejn kien sar attakk fuqu f'ristorant f'Malta u spiċċa biex anke kellu jagħmel rapport fl-Għassa tal-Fgura. 
Jiddikjara li minħabba dawn l-inċidenti spiċċa litteralment ma jiċċaqlaqx minn daru.  "Jien ippreferejt nibqa' f'dari flok noħroġ. Il-mara li hi mill-Każakstan, tispiċċa toħroġ fi tmiem il-ġimgħa, mingħajri", jgħid Stephen. 
"Rajt nies li kif jarawn jibdew iħarsu. L-espressjoni ta' wiċċhom tinbidel. Tarahom iżommu anke l-basket, donnu għaddielhom xi ħsieb li se neħodulhom. Ngħid li din issir aktar minn persuni anzjani milli miż-żgħażagħ", jenfasizza Stephen.

Residenti f'razzett imdaqqas u modern fl-inħawi tal-Fgura, kienet xena tal-qsim il-qalb l-aħħar mumenti ta' din il-familja, li flimkien ma' binha ta' sentejn, kellhom jitilqu mill-post li ħasbu li jistgħu jgħixu fih b'mod trankwill.
"Hawn min jaħseb li hu superjuri fuq razza oħra. Hawn wisq preġudizzji f'Malta. Irrid inwassal il-messaġġ li Malta għandha reputazzjoni tajba imma meta tiġi hawn min hu bħali isib realtà oħra.Anki fejn kont naħseb li kont se nkun protett, esperjenzajt ir-razziżmu. Irrappurtajt anke l-Għassa tal-Pulizija, imma ma smajt xejn mingħandhom. Din hi l-esperjenza tiegħi. M'għandix għal x'hiex nistħi", jisħaq Stephen Wyatt.

Rabja għal allegat abbuż mill-eżenzjoni tas-CVA fil-Belt

Jidher li fost il-Beltin hemm rabja minħabba li qed iqumu mistoqsijiet dwar kif ċerti vetturi qed jispiċċaw jingħataw permessi biex jipparkjaw fuq is-sinjali l-ħodor fil-Belt Valletta u li dawn ikunu eżentati mis-sistema tas-CVA. Il-Kunsillier Laburista fil-Belt Valletta, Ray Azzopardi, ftit ilu għamel pubbliċi għadd ta' mistoqsijiet waqt li xandar ritratt ta' karozza u staqsa kif din inħarġilha l-permess li tipparkja l-Belt meta l-indirizz u log book tagħha huma fuq Ħaż-Żebbuġ.

Ray Azzopardi fuq is-sit soċjali tiegħu kiteb li "biex ikollok permess li tkun tista' tipparkja fuq is-sinjali l-ħodor u tkun eżentat mis-sistema tas-CVA irid ikollok karta tal-identita fuq indirizz fil-Belt, log book tal-karozza fuq indirizz il-Belt u li l-karozza tkun tal-inqas raqdet għal 16-il lejl fix-xahar għal tliet xhur sħaħ".
Waqt li xandar ritratt ta' karozza partikolari allega li l-karta tal-identità tas-sid hu fuq Ħaż-Żebbuġ, il-log book hu fuq indirizz f'Ħaż-Żebbuġ u li fil-Belt raqdet inqas minn tliet ġimgħat fi tliet xhur sħaħ. Hu allega wkoll li l-karozza fiha taparsi CCTV camera u qal li din qed tiffoka fuq residenza jew stabbiliment partikolari. Hu staqsa min ħareġ dan il-permess.

Ma riedx li l-Malti jkun rekwiżit għal xogħol fis-servizz pubbliku!

Fost l-ilmenti li waslu quddiem il-Kummissjoni għas-Servizz Pubbliku kien hemm ilment minn persuna li ma titkellimx sew il-lingwa Maltija. Din ilmentat li kienet ġiet dikjarata bħala 'ineleġibbli' li tapplika għal kariga fis-servizz pubbliku u dan minħabba li ma kinitx titkellem u tifhem sew bil-lingwa Maltija. Din il-persuna lmentat li għal dik il-kariga, il-lingwa Maltija kellha titneħħa minn rekwiżit.
Il-Kummissjoni għas-Servizz Pubbliku ma qablitx u ddikjarat li għal dik il-kariga li fiha kien se jkun hemm kuntatt man-nies, kellu jkun obbligatorju li min japplika ikkun jaf jitkellem u jifhem sew bil-Malti. Il-Kummissjoni għas-Servizz Pubbliku fir-rapport annwali għas-sena 2015 qalet li kellha 32 ilment mill-miktub u li dawn kienu jirreferu għal proċess ta' għażla.
Ħafna mill-ilmenti saru qabel inħareġ ir-riżultat tal-proċess tal-għażla u kienu jirrigwardaw ilmenti fejn il-persuni konċernati ġew deskritti 'ineleġibbli' biex japplikaw għal dik kariga partikolari.
Il-Kummissjoni qalet li minn dawn l-ilmenti kien hemm 2 każi fejn instab li dawk li lmentaw filfatt kienu eleġibbli li japplikaw. Intqal li peress li r-riżultati kienu ġew pubblikati, il-Kummissjoni ordnat lil bord tal-għazla biex jintervista lil dawn l-applikanti fl-iqsar żmien possibbli u biex imbagħad jissottomettu riżultat rivedut.
F'wieħed mill-ilmenti, kien minħabba l-fatt li waqt intervista tal-bord tal-għażla, il-bord ra li skont il-GP47 tal-applikant, dan kellu salarju akbar mill-post li kien qed japplika għalih. Intqal li meta ċ-Ċerpersin staqsiet lill-applikant hux lest jaħdem b'inqas paga, l-applikant irtira l-applikazzjoni. Ġara iżda li wara l-pubblikazzjoni tar-riżultat sar magħruf li dan l-uffiċjal kien ingħata GP47 form li kellha informazzjoni skorretta dwar l-iskala tal-paga tiegħu.
Minħabba dan in-nuqqas, il-Kummissjoni għas-Servizz Pubbliku iddeċidiet li dan l-applikant jingħata opportunità oħra. Il-Kummissjoni għas-Servizz Pubbliku qalet li l-ilmenti l-oħra instab li verament kienu persuni ineleġibbli li japplikaw.
Wieħed minn dawn l-ilmenti kien minn persuna li ġiet dikjarata ineleġibbli għax ma kinitx titkellem u tifhem sew bil-Malti kif kienet waħda mir-rekwiżiti. L-applikant kien ilmenta li f'dik is-sejħa għal dik il-kariga ma kellux ikun hemm ir-rekwiżit li wieħed ikun jaf jitkellem u jifhem il-lingwa Maltija.
Il-Kummissjoni għas-Servizz Pubbliku ikkonfermat li dik il-kariga kien se jkollha kuntatt dirett mal-pubbliku u għalhekk kien obbligatorju li dak li jkun ikun jaf jitkellem u jifhem sew bi-Malti. Il-Kummissjoni għas-Servizz Pubbliku qalet li matul is-sena 2015 kien hemm rakkomandazzjoni biex 20 membru tas-servizz pubbliku ikunu sospiżi b'mod temporanju minħabba proċeduri kriminali, żewġ tkeċċijiet u 10 twissijiet ta' tkeċċija.

Il-Maċina se tinbidel f'guest house u restorant

Il-binja storika tal-Maċina fix-xatt tal-Isla, binja li llum hemm partijiet minnha bi ħsarat kbar minħabba li issa ilha mitluqa għal ammont ta' snin, se terġa' tibda titgawda mill-pubbliku inġenerali. Dan hekk kif l-Awtorità għall-Ippjanar approvat l-applikazzjoni biex il-Maċina tinbidel f'guest house ta' 20 kamra tas-sodda. Ma' dawn se jkun hemm ristorant, pixxina u ristorant  ieħor fuq is-saqaf.  Il-pubbiku se jibqa' jkollu aċċess bla restrizzjoni bejn it-8.00 ta' filgħodu u l-11.00 ta' bil-lejl għall-parti ta' fuq nett.
Il-permess approvat hu għal żvilupp tat-tlett sulari li għandha l-Maċina.  Fis-sular t'isfel nett li jiġi mal-livell ta' triq se jkun hemm ristorant, kafeterija, ir-reception tal-guest house u pixxina fil-magħluq.
Fl-ewwel sular se jkun hemm tmien kmamar u żona fejn jirrilassaw dawk li jkunu residenti fil-guest house.
Fit-tieni sular mistenni jkun hemm 12-il kamra tas-sodda għar-residenti u żona fejn jittieħed il-kolazzjon. Fit-tielet sular se jkun hemm ristornat ieħor, b'imwejjed u siġġijiet fil-beraħ. Se jkun hemm ukoll pixxina. B'kollox din l-applikazzjoni se tuża spazju ta' 640 metru kwadru.
Il-Maċina kienet inbniet mill-Ordni ta' San Ġwann, fejn permezz tagħha kienet issir il-manutenzjoni fuq l-arbli tax-xwieni.  L-imħażen li hemm kienu magħrufin bħala l-"Arsenale de Vascelli".  

Dan l-iżvilupp mhux biss mistenni jagħti ħajja ġdida lil din il-binja storika imma mistenni jgħin ukoll jagħti kontribut fir-riġenerazzjoni tax-xatt tal-Isla.
Pannelli solari fuq it-trattament tal-impjant tad-drenaġġ f'Għawdex
Intant l-Awtorità tal-Ippjanar approvat ukoll applikazzjoni biex fuq l-impjant għat-trattament tad-drenaġġ f'Għawdex ikun hemm pannelli solari.  B'kollox se jkun hemm 1,600 metru kwadru.  Il-pannelli se jkunu inklinati b'10 gradi u dan għax l-istudji qed juru li meta jkunu hemm  l-effiċjenza tagħhjom titjieb b'6 fil-mija, waqt li tgħin lill-istess pannelli biex inaqqsu t-trabijiet fuq l-istess pannelli.  Intqal li l-inklinazzjoni ta' 10 fil-mija mhix se tħalli impatt viżiv.

“Il-karba taż-żgħir qed tinstema … l-ewwel pass u nħarsu lejh b'kawtela” 

           - Leonid McKay Direttur tal-Caritas

Hekk kif f'dan il-baġit kellu sehem importanti l-istudju li wettqet il-Caritas dwar dawk li jinsabu f'riskju ta' faqar, id-Direttur tal-Caritas, Leonid McKay meta mitlub jagħti r-reazzjoni tiegħu lil Inewsmalta qalilna li "b'mod ġenerali ngħid li l-karba taż-żgħir qed tinstema'.  Dan imma hu l-ewwel pass u qed inħarsu lejh b'kawtela.  Qed ngħidu li qed inħarsu lejh b'kawtela għax l-effetti tiegħu żgur li mhux se jkunu immedjati u wieħed irid jara x'se jiġri fil-prezzijiet tal-ikel u l-kirjiet".  Tenna li "aħna minn naħa tagħna kuntenti ħafna li kien hemm bidla fl-atittudni u kien hemm bidla fil-pożittiv.  Qabel konna qed nisimgħu fuq l-abbużi fil-benefiċċji  u issa qed naraw it-tisħiħ tal-benefiċċji. Apprezzajna ħafna  li l-Ministru semma' l-faqar x'inhu, fejn ġew elenkati erba' kawżi.  It-titlu wera biċ-ċar li l-Gvern jemmen li għandu jintervjeni biex jgħin lil dawk fqar.  Il-Gvern qed jemmen li t-tkabbir ekonomiku waħdu mhux biżżejjed għal dawn in-nies u jrid jintervjeni."

Enfasizza li l-mekkaniżmu li jistabbilixxi iż-żieda għall-għoli tal-ħajja magħrufa bħala COLA, ma jirriflettix il-bżonnijiet ta' llum. Hu qalilna li laqgħu b'sodisfazzjon id-deċiżjoni tal-Gvern li jirrevedi l-fuq l-aġġustament għall-għoli tal-ħajja. 

Leonic Mckay qalilna ukoll li "xi ħaġa li laqtitna kienet ir-riforma tal-pensjoni tal-wens, fejn issa persuni miżżewġin ukoll huma intitolati għall-benefiċċji. Bħala Caritas xtaqna li jkun hemm żieda fil-paga minima imma l-Gvern żied l-allowances.  Bħala Caritas nemmnu li aktar ma jkun hemm flus fil-but għal dawk bi dħul baxx, dawn ikollhom aktar dħul diċenti."

Saħaq ukoll li "jidher li fil-pensjonanti hemm bozza ħamra tixgħel u li dawn għandhom bżonn żieda akbar.  Nibqgħu insostnu li l-anzjani għandhom bżonn basket għalihom."

Leonid McKay saħaq li "nikkritikaw i-fatt li ma smajna xejn fuq l-ikel u din hi spiża sostanzjali għal persuni bi dħul baxx. Naturalment dan hu baġit li fuqu l-gvern irid ikompli jibni". Hu kkritika ukoll il-fatt li se jogħlew it-toiletries.

Kompla jgħid li "jidher li l-karba taż-żgħir qed tinstema'.  Id-dokument tagħna jidher li kellu effett u bħala Caritas sodisfatti imma kawti."

Meta mistoqsi jikkummenta fuq dak li qal il-Kap tal-Oppożizzjoni, Simon Busuttil li dan il-baġit ifalli mit-test tal-faqar, McKay qalilna li "mhux se nidħol f'dak li qal il-Kap tal-Oppożizzjoni. Il-pożizzjoni tagħna hi li dan kien pass 'l quddiem u kemm fil-baġit u anke wara dawk bi dħul baxx kienu fuq l-aġenda."

“Baġit ġeneruż għax kellu minn fejn jagħti” - l-ekonomista Karm Farrugia

"Dan hu baġit ġeneruż. Qassam għax kellu minn fejn jagħti. Wara baġit bħal dan bilfors tħossok tajjeb. Qatt ma bsart din il-kunfidenza li għandu Edward Scicluna. Kien baġit li mar lil hinn ħafna minn dak li kont qed nistenna".

Dan sostnieh ma' Inewsmalta l-ekonomista Karm Farrugia meta kien kuntattjat biex jagħti r-reazzjoni tiegħu għall-baġit li ġie ppreżentat nhar it-Tnejn. Farrugia enfasizza li " kieku kien fadal sena biss għall-elezzjoni, kont ngħid li dan hu baġħit tal-elezzjoni. Imma s-sitwazzjoni mhix hekk għax għall-elezzjoni fadal baġit ieħor. Ngħid bla tlaqlieq li l-Ministru Scicluna jaf x'inhu jagħmel. Dan il-baġit qed iqassam mill-flus li għandu l-Gvern u mhux qed jissellef biex jagħti. Qed iqassam għax għandu minn fejn". 

Karm Farrugia jgħidilna li "jien qatt ma ngħid li ngħata biżżejjed għal dawk vulnerabbli. Inħoss li meta l-ekonomija tikber għandu tqassajm lil dawk fil-bżonn kif sar issa. Edward Scicluna, hu ministru li mhux qed jagħmel l-affarijiet għal issa, imma qed iħares għat-tul. Kieku m'għandux il-problema tal-iżbilanċ finanzjarju, kieku kien jagħti iżjed.   Dan il-baġit għoġobni ħafna għax qed jagħti lil min għandu verament bżonn". 

Karm Farrugia jitkellem dwar il-faqar ujgħid li "l-faqar bħal prostituzzjoni. Dejjem se jibqa' hawn. Illum għandna ħafna faqar relattiv.  Meta jispiċċa l-faqar assolut, ikun hemm il-faqar relattiv u dan xi drabu hu agħar mill-faqar assolut. Naħseb li kieku seta' l-Ministru sparixxa d-deficit li issa se jinżel għal 0.5 fil-mija tal-Prodott Domestiku Gross.  Biss kieku għamel hekk kiek ikun għas-spejjeż ta' investiment. Rajt li l-Ministru kien intelliġenti biżżejjed u għażel li jimxfi ftit ftit. Għażel li jnaqqsu u mhux jeliminah."

B'mod ġenerali sodisfazzjon għall-baġit 2017 ... l-ekonomisti jqisuh bħala pożittiv

L-imsieħba soċjali flimkien ma' għadd ta' ekonomisti esprimew b'mod ġenerali is-sodisfazzjon għall-baġit għas-sena 2017. B'diversi organizazzjonijiet jikkummentaw b'mod favorevoli għall-miżuri li ttieħdu biex jgħinu lil dawk l-aktar vulnerabbli u li jinsabu fil-linja tal-faqar, ma naqsitx kritika fuq setturi oħra li ma ġewx indirizzati. 

L-ekonomisti, li tkellmu ma' Inewsmalta qiesu dan il-baġit bħala wieħed pożittiv b'mod partikolari fejn jidħol il-qasam finanzjarju u r-riżultati li qed jinkisbu. 


“Sinifikanti li d-destin ta' Malta se jkun f'idejha” – l-ekonomista Philip Von Brockdorff
Il-Kap tad-Dipartiment tal-Ekonomija fl-Università ta' Malta, Philip von Brockdorff, meta kuntattjat minn Inewsmalta dwar ir-reazzjoni tiegħu għall-baġit preżentat qal li "fejn jirrigwarda id-deficit u d-deficit, il-Ministru Scicuna għadda kumment li ftit osservawh imma dan kien sinifikanti ħafna.    Il-Ministru qal li d-deficit jekk jinżel taħt  il-1 fil-mija u d-dejn jiġi konformi mal-kriterji tat-Trattat ta' Maastricht, id-destin ta' Malta ikun f'idejha. Jekk ma tosservax ir-regoli taż-Żona Ewro tispiċċa tiffaċċja l-konsegwenzi u t-tmexxija tal-ekonomija u din tibda titmexxa mill-Fond Monteraju Internazzjonali (IMF), mill-Bank Ċentrali Ewropew u mill-Kummissjoni Ewropea". 
Hu qalilna li "l-fatt jibqa' li importanti li nosservaw dawn ir-regoli. Fuq dan il-punt, ngħid li pajjiżi oħra bħall-Greċja u l-Portugal din iħossuha ħafna."
L-ekonomista Philip von Brockdorff qal ukoll li "fuq il-pensjonijiet kienet ovvja li kien se jsir l-aġġustament fiha. Hemm minnhom li jaqgħu taħt il-linja tal-faqar u kien hemm bżonn li s-sistema tiġi indirizzata.  Dan hu pass ieħor għalkemm għadna ma wasalniex". 
Tkellem dwar il-miżura ta' inċentivi fuq innovazzjoni fuq prodotti u qalilna li "din hi miżura li tista' tgħin ħafna.  Jekk se nkomplu ngħinu lil dawn il-kumpaniji fir-riċerka, dawn jistgħu jagħmlu differenza." 
L-ekonomista von Brockdorff tkellem ukoll dwar is-sisa fuq materja prima fil-kostruzzjoni u qal li "naqbel ma' dak li qalet l-Assoċjazzjoni tal-Iżviluppaturi (MDA).  Naħseb li din iż-żieda se tispiċċa tintefa' fuq il-konsumaturi u b'hekk iżżid il-prezz tal-proprjetà".
Dwar iż-żieda għall-għoli tal-ħajja qalilna li sa l-aħħar ta' Awwissu din kellha tkun ta' €1.75. Jgħid iżda li mir-Retail Price Index ta' Settembru, iż-żieda kellha tkun ta' €1.16. Qalilna li l-fatt li l-Gvern xorta ta €1.75, u staqsa jekk dan ifissirx li l-Gvern qed jara li se togħla l-ħajja.  Jgħidilna ukoll li għandu tħassib dwar il-kuntratt mal-Electrogas u dan għax għandu l-ewwel ħames snin b'rata fissa ta ħlas u dan meta waqt li l-prezz taż-żejt qed jogħla dak tal-gass baqa' wieħed kompetittiv.
Jikkummenta dwar il-miżuri intiżi lejn il-kirjiet ta' akkomodazzjoni soċjali. Tenna li "kien inevitabbli li trid issir xi ħaġa. Pero wieħed irid joqgħod attent ma jmurx is-sussidju u l-effett tiegħu jevapora.  Hemm bżonn monitoraġġ serju għax l-effett jintilef".

9,110 persuna mietu b'kanċer f'10 snin u ħames xhur

Bejn is-sena 2006 u Mejju ta' din is-sena kien hemm 9,110 persuna li mietu minħabba l-marda tal-Kanċer. F'kull sena dejjem imutu aktar irġiel milli nisa. Fis-sena 2006 mietu 798 persuna fis-sena 2007 mietu 826, fis-sena 2008 mietu 855, fis-sena 2009 kien hemm 852, fis-sena 2010 mietu 865 persuna, fis-sena 2011 mietu 882, fis-sena 2012 mietu 925, fis-sena 2013 870 persuna, fis-sena 2014 933 persuna u fis-sena 2015 mietu 936 persuna.

Bejn Jannar u Mejju ta' din is-sena mietu 368 persuna. F'dawn l-10 snin u 5 xhur, mietu 16 tfal li kellhom inqas minn 15-il sena u 29 li kellhom bejn 15 u 24 sena. Il-Ministru għas-Saħħa Chris Fearne għal mistoqsija Parlamentari tad-Deputat Laburista Luciano Busuttil qal li l-kanċer tal-pulmun kien l-iktar kanċer li kkawża mwiet fl-irġiel filwaqt li l-kanċer tas-sider kien l-iktar kanċer li kkawża mwiet fin-nisa tul dawn l-aħħar 10 snin.

"Deskritti persuni difettużi u diżgustanti … dan f'Malta ta' 2016" 
         - il-Ministru Helena Dalli

"Qed niftakar fil-persuni li fetħu qalbhom miegħi. Persuna li rrakkontat li meta fittxet għajnuna biex tifhem lilha nfisha, tawha parir biex tmur għand psikologa li tfejjaq l-omosesswalità. Mhux aċċettabbli li f'Malta tas-sena 2016 għad hawn individwi li qed ikunu deskritti bħala 'morda', 'diżgustanti' u 'difettużi'. Ixxukkjajt ruħi diversi drabi nisma' dak li għaddew minnu f'terapiji ta' konverżjoni għal persuni li mhux eterosesswali. Xi wħud ikkunsidraw is-suwiċidju. Qed jiġru u issa se nagħtu soluzzjonijiet għal dawni r-realtajiet. "
Dan sostnietu il-Ministru għad-Djalogu Soċjali, Helena Dalli, hekk kif fil-Parlament beda jiġi diskuss fl-istadju tat-tieni qari l-abbozz ta' liġi dwar l-affermazzjoni tal-orjetantazzjoni sesswali, l-identità tal-ġeneru u l-espressjoni tal-ġeneru. Din il-liġi prattikament titratta prattiċi fejn persuni jippruvaw jagħmlu terapiji ta' konverżjoni fuq persuni li mhumiex eterosesswali.
Qalet li "llum hu jum ieħor importanti għal-libertajiet ċivili. Mhux biżżejjed li nagħmlu l-liġijiet imma rridu nbiddlu l-kultura biex verament inkunu soċjetà miftuħa u inklussiva. Għal din in-naħa tal-Gvern kulħadd hu mwieled indaqs u li nwaqqgħu l-ħitan ta' preġudizzji li inbnew tul iż-żmien. Ħadd ma jagħżel kif jitwieled u ħadd m'għandu jkun penalizzat għall-mod kif twieled. Hawn bosta persuni li jbatu biex jaċċettaw lilhom infushom kif inhuma u dan minħabba id-diskriminazzjoni li jiffaċċjaw jekk jikxfu l-identità tagħhom. Ġenituri f'Malta imbuttaw tfal biex imorru għand psikjatra jew prattiċi ta' konversjoni. Lil dawn il-ġenituri ma ntihomx tort. Min jieħu lil uliedu għal dawn il-prattiċi żgur li għax huma mingħalihom li qed jagħmlu l-aħjar għat-tifel jew tifla. It-tort intih lil min jilludihom u jwegħduhom li se jbiddel lit-tfal tagħhom u se jġibhom eterosesswali. Qed tagħtihom tama falza, tieħu l-flus flok turihom kif għandek timxi mat-tfal biex ikunu assertivi u jgħelbu l-ibbuljar. Nafu b'każijiet fejn saru prattiċi ta' konverzjoni kemm minn professjonisti u anke minn persuni reliġjużi."
Enfasizzat li "l-prattika tal-konverzjoni hi dik li tipprova trażżan jew tibdel l-identità tal-ġeneru. Dawn il-prattiċi m'għandhom ebda bażi xjentifika u hi bbażata fuq il-preġudizzju. Il-Knisja kienet naqset milli tagħraf l-uġiegħ li dawn il-prattiċi ta' konverżjoni jikkawżaw fuq i-ġenituri u l-ulied iżda wara stqarrija li nħarġet minn grupp ta' ġenituri Kattoliċi, l-Arċisqof Scicluna kien qal li ma jaqbilx ma' prattiċi ta' konverżjoni."

Malta l-ewwel pajjiż fl-Ewropa li se jipprojbixxi t-terapiji tal-konverżjoni ... l-Oppożizzjoni se tivvota favur

L-Oppożizzjoni se tivvota favur l-abbozz ta' liġi dwar l-affermazzjoni tal-orjetantazzjoni sesswali, l-identità tal-ġeneru u l-espressjoni tal-ġeneru, liema abbozz beda jiġi diskuss illum. F'intervent li sar mill-Ministru għas-Saħħa, Chris Fearne hu saħaq li għal darba oħra Malta se tkun l-ewwel fl-Ewropa li tipprojbixxi t-terapiji ta' konverżjoni għal persuni li mhumiex eterosesswali.
Id-Deputat Laburista Deo Debattista qal li l-persuni li jagħmlu t-terapiji ta' konverżjoni ukoll għandhom bżonn l-għajnuna biex huma jkunu tolleranti.
Minn naħa tiegħu d-Deputat Nazzjonalista Karl Gouder waqt li faħħar dan l-abbozz u enfasizza it-tbatija li jgħaddu minnha dawk li jagħmlu dawn it-terapiji qal li issa meta jidħol dan l-abbozz dawn it-tip ta' terapiji se jibdew isiru bil-moħbi.

Il-mod kif ħafna appoġġjaw lil Alex juri li l-pajjiż mexa 'l quddiem 
          - il-Ministru Helena Dalli 

"Alex Caruana hu attiv ħafna fis-soċjetà ċivili u minħabba li hu transesswali minflok attakkawh bl-argument attakkawh bil-passat. Dan inkluż permezz tal-pubblikazzjoni ta' ritratti antiki. Ftit snin ilu konna nistennew li dawn l-attakki jiġu injorati, llum il-mentalità nbidlet u kienu ħafna li qabżu għal Alex. Din l-attitudni tagħti sens ta' tama li dan i-pajjiż qed jimxi 'l quddiem."
Dan iddikjaratu l-Ministru Helena Dalli fil-Parlament. Il-każ dwar l-attakk fuq Alex Caruana kellu l-bidu tiegħu meta l-Viċi President tal-Għaqda, Stephen Florian, li hu lekċerer part tajm fl-università xerred ritratti ta' Alex Caruana fuq is-sit soċjali tiegħu u għamel enfasi li jirreferi għalih bħala tfajla li tagħżel li ssejjaħ lilha nnifisha b'isem maskil.
Dan ħeġġeġ għadd ta' membri tal-għaqda biex ikomplu jikkontribwixxu bil-kummenti dispreġġjattivi tagħhom fil-konfront ta' Alex. Fir-reazzjoni tiegħu għal dan l-attakk, Caruana qal li dawn in-nies li jsejħu lilhom infushom patrijotti qed jinsulentawh sempliċiment għax huwa trans u dan juri li m'għandhom ebda argument validu x'jagħmlu. Kien hemm baraxx ta' għaqdiet u persuni li pubblikament urew is-solidarjetà ma' Alex Caruana u l-mod kif spiċċa vittma ta' attakk feroċi fuq il-ħajja privata tiegħu, sempliċiment għax esprima nuqqas ta' qbil mal-opinjoni ta' grupp li ma jridx jaċċetta l-preżenza ta' Musulmani f'Malta.
Alex Caruana sejjaħ lil persuni minn kull settur tas-soċjetà biex jingħaqdu u jibnu pontijiet ta' rispett u paċi f'dan il-pajjiż biex jieqfu lil nies bħal dawn li qed ixerrdu l-mibegħda. Fi stqarrija l-Università ta’ Malta kienet qalet li fid-dawl tal-avvenimenti riċenti fejn issemma student transgender, l-Università ta’ Malta tenfasizza l-impenn tagħha li tappoġġa u tipproteġi d-diversità u d-drittijiet tal-individwi kollha.
L-Università tiddisassoċja ruħha mingħajr riżervi mill-azzjonijiet kollha, kemm verbali jew f’forma ohra, kif ukoll dawk li jinkoraġġixxu d-diskriminazzjoni u / jew il-mibegħda razzjali kontra kwalunkwe grupp ta’ nies. L-Università tikkjarifika li kuntrarju għal xi rapporti fil-media, l-individwu in kwistjoni, is-Sur Stephen Florian, m’huwiex akkademiku full-time, iżda part-time visiting lecturer. L-Università kienet qalet qed tinvestiga minnufih din il-kwistjoni.

Is-sena 2016 l-aktar sena sħuna

Kollox qed jindika li s-sena 2016 tinsab riesqa lejn ir-riskju li tkun l-aktar sena sħuna. Dan hu minħabba diversi indikaturi li seħħew fl-ewwel għaxar xhur ta' din is-sena u li qed juru tibdil serju fil-klima. Climatereality Project qed jgħidu li matul is-sena 2016 kien hemm xejn inqas minn erba' maltempati kbar b'ċans ta' periklu kbir u b'ammont kbir ta' xita f'Mississippi, West Virginia, Maryland u Louisiana.
Skont l-organizazzjoni, maltempati kbar bħal dawn għandhom rabta ma' żieda fit-temperaturi. Indikatur ieħor hu dak li tip ta' ġurdien bl-isem ta' 'Bramble Cay Melomys' għeb minn wiċċ id-dinja minħabba l-bidla fil-klima. Dan it-tip ta' ġurdien kien jgħix fi Bramble Cay fi gżira fl-Awstralja u spiċċa ma kellux fejn jgħix minħabba żieda f'temp estrem u żieda fil-livell tal-ilma.
L-istess organizazzjoni qed issostni li d-dinja qabżet il-limitu previst tad-diossidu tal-karbonju, li hu ta' 400ppm. F'Settembru l-livell tad-Diossidu tal-Karbonju li kellna fl-atmosfera baqa' ta' aktar minn 400ppm u skont għadd ta' xjentisti se jkun diffiċli ħafna li l-livelli jinżlu għal dak li kienu snin ilu. Apparti dan Awwissu kellu rekord ta' temperaturi sħan. L-organizazzjoni tgħid li skont l-Organizazzjoni Meteoroloġika tad-Dinja, qed issostni li kollox qed jindika li s-sena 2016 tista' tkun l-aktar sena b'temperaturi sħan.

Ir-rig taż-żejt li nkalja fl-Iskozja jinsab fi triqtu lejn Malta

Ir-rig għat-tħaffir taż-żejt li xahrejn ilu inkalja qrib gżejjer Skoċċiżi issa jinsab mill-ġdid fi triqtu lejn Malta. Wara li nkalja l-proċess li kien imiss ma kienx wieħed faċli fejn wara tliet ġimgħat, ir-rig tmexxa lejn Broad Bay u wara tpoġġa fuq 'semi submersible heavy-lift vessel'.
Ir-rig Transocean Winner, telaq minn fejn kien nhar il-Ġimgħa filgħaxija, bil-Gwardji tal-Kosta Ingliżi jibqgħu jsegwuh sakemm joħroġ mill-ibħra tar-Renju Unit. Ir-rig mistenni jkun f'Malta fi żmien ġimagħtejn. L-investigazzjonijiet b'rabta mal-inċident sabu li żewġ tankijiet tad-diżil ġarrbu ħsarat.
Dan ir-rig taż-żejt, li f'Lulju li għadda skadielu l-kuntratt ta' $498,000 kuljum ma' Det Norske Oljeselskap, kien jinsab fi triqtu biex fi żmien qasir ikun f'pajjiżna. Dan fuqu kellu jsir xi xogħol u mbagħad wara jittieħed lejn it-Turkija biex ikun skrappjat. Dan ir-rig, iżda, kien involut f'kontroversja sħiħa hekk kif waqt li kien qed jinġibed spiċċa nqabad f'maltempata u inkalja fuq il-gżira ta' Lewis 'il barra mil-Iskozja.
Diversi esperti fl-Iskozja kienu eżaminaw iċ-ċirkostanzi li minħabba fihom ir-rig taż-żejt spiċċa inkalja waqt li kien qed jinġibed. Abbord ir-rig kien hemm 280 tunnellata ta' diżil. L-awtoritajiet Skoċċiżi kienu imblukkaw l-aċċess għal xtajtiet fil-qrib u avżaw lill-għawwiema biex iżommu 'l bogħod.

"Fejn hi t-tarbija? Fejn hi?"

F'moħħ għadd ta' volontieri li qed imexxu ħidma ta' salvataġġ f'nofs il-Mediterran permezz ta' l-organizazzjoni Stichting Bootvluchteling, se tibqa' stampa l-moħħhom l-għajta ta' omm. Omm li kienet salvata ftit sigħat ilu, imma li l-karba tagħha 'fejn hi t-tarbija?', tista' tgħid li nisslet diqa kbira.

It-tarbija, John ta' tlett snin, kien m'ommu fuq id-dinghi. Dingiy li tista' tgħid kien aktar minn nofsu mgħarraq. Fi dlam ċappa u b'immigranti iżommu ma' xulxin biex ma jintilfux f'dak il-baħar, John u tifla oħra żgħira spiċċaw għebu fil-baħar. Tfittxijiet għalihom irriżultaw fin-negattiv. Stichting Bootvluchteling ippubblikaw ritratt li nġibdu minn Kenny Karpov, f'nofs ta' lejl. Voluntieri abbord il-bastiment jirrakkontaw li "l-baħar kien qed iħabbat sew. Ir-riħ kien qawwi. Kien dlam ċappa. Irċevejna messaġġ li hemm dgħajsa ftit mili 'barra mill-kosta Libjana li kienet f'diffikulta. Bi tlett bastimenti, u drones, bdejna infittxu fiż-żona indikata.
Finalment id-dinghy jinstab. Quddiem u wara tad-dinghi kienu jidhru 'l fuqmill-ilma. Il-persuni fuqu ma bdew jgħidu xejn. Sibnihom m'għannqin ma' xulxin biex ma jispiċċawx fil-baħar. Kienu bla ġgieget ta' salvataġġ. Id-dinghi kien qed jagħmel l-ilma u l-mutur ma kienx qed jaħdem. Is-salvataġġ dam siegħa. Ħsibna li kulħadd ġie salvat iżda niġu infurmati li kien hemm tifel ta' tlett snin u tifla ta' 16-il sena li għebu".

"Baġit soċjali … hekk insejjaħlu l-baġit li se nippreżentaw"

"Il-baġit ta' għada nsejjaħlu kelma waħda biss. Għada se jkollna baġit soċjali. Baġit li se jaħseb f'min hu l-aktar fil-bżonn. Dan hu Gvern li sena wara l-oħra, minflok jieħu se jagħti. Bdejna billi kabbarna l-ekonomija u issa wasal iż-żmien li ż-żgħir nett igawdi. Min qed jabbuża ġlieda se jkollu mingħandna. Din hi parti mir-roadmap. Ma stajniex għamilna bilmaqlub. Li kieku bdejna nżidu l-benefiċċji u wara naħsbu fl-investiment flok 'l quddiem konna nmorru lura għax kien ikun ifisser li qed inqassmu minn dak li m'għandniex".
Dan iddikjarah il-Prim Ministru, Joseph Muscat waqt laqgħa politika fil-Marsa, fejn saħaq li hawn min mhux iħoss il-ġid li ġie ġġenerat. Iddikjara b'mod ċar li issa hu l-waqt li dawn in-nies iħossu ukoll il-ġid fil-but tagħhom. Il-Prim Ministru Joseph Muscat beda l-intervent tiegħu qal li 'l-istess aġenzija li niżżlet lill-Istati Uniti f'livell f'dak li hu kreditu, lilna għollewna 'l fuq u dan għall-ewwel darba f'għoxrin sena." Kompla jgħid li "dan il-Gvern bidel id-direzzjoni tal-pajjiż u qed naraw dan bil-fatti. U forsi tgħiduli li għalina mhux xorta jekk Standard and Poor's ituna A jew B.
Le mhux xorta, Meta r-rating ta' pajjiżna jitla' l-fuq ir-rata ta' self għalina tonqos. Issa bħala pajjiż li għandna inqas sogru u għax il-barranin qed jafdawna aktar, ir-rati ta' imgħax se jkunu inqas u dan ifisser aktar flus biex nagħmlu proġetti fil-pajjiż. Jekk ma jkollokx tkabbir fl-ekonomija, l-affarijiet l-oħra jkunu biss xewqat. Imbuttajna u se nkomplu nimbuttaw in-negozju. Mill-Malta Enterprise is-sena li għaddiet ġew approvati 54 proġett li bejniethom ħolqu 800 post tax-xogħol ġdid. Se nimbuttaw mhux lill-kbar biss fin-negozju imma anki liż-żgħar. Issa biex tiftaħ negozju m'għandekx bżonn 28 ġurnata imma 10 t'ijiem biss."
Saħaq li "n-nies qed iħossu r-riżultati fi bwiethom. Il-mistoqsija kruċjali hi - llum sejjer aġħjar minn tlett snin ilu jew le? It-tweġiba ta' ħafna mill-poplu hi iva. Imma dan hu gvern li qatt ma jikkuntenta ruħu. Għandna lanqas bdejna bil-bidliet li rridu nagħmlu fil-pajjiż għax nafu li l-ġid għadu ma wasalx għand kulħadd u għad hawn min mhux iħoss il-ġid." Il-Prim Ministru qal li "l-bidla kbira li għamilna hi li ftamna għal kollox il-prezz tat-tariffi tal-elettriku mill-prezz internazzjonali taż-żejt. Illum il-prezz taż-żejt għola u ġie fl-ġħola livell fi żmien sena. Jekk nagħmlu kif irid ħaddieħor, kieku nispiċċaw ngħollu l-prezz. Ir-Russi u Sawdi Għarabja ftehmu li mhux se jipproduċu aktar u dan biex jogħla l-prezz. Il-Kap Nazzjonalista jidher li baqa' ma fehem xejn minn sitwazzjoni li se tagħmel ġid kbir ambjentali."
Joseph Muscat qal li "l-problema kbira li għandu l-Kap tal-Oppożizzjoni hi li jgħid xi ħaġa bla ma jaħsibha. Qed jgħidulu li l-vapur tal-gass mhux ta' periklu mela x'qed tipprotesta tagħmel? Ħsibtu se jipprotesta kontra t-tankijiet tal-fjuwil f'nofs ir-residenti f'Birżebbuġa. Jekk minn hawn u 18-il xahar ieħor ikun Prim Ministru se jneħħih dan it-tanker? Qed jgħid li dan hu punt ta' prinċipju u għalhekk ma tinnegozjax. Jekk ineħħiħ se jkun ifisser li se jerġa' jiftaħ ix-xiri taż-żejt, li se jerġa' jiftaħ l-impjant tal-Marsa. ifisser li se nmorru lura għal kontijiet għola. Ifisser li dak kollu li kiseb dan il-pajjiż jintilef." Tenna li "hemm liġi fl-Unjoni Ewropea li tobbliga lil kull port ewlieni f'pajjiż Ewropew biex dan ikollu faċilità tal-gass LNG." Enfasizza li "naħseb aħjar il-Kap tal-Oppożizzjoni jgħidilna x'se jagħmel fuq il-każijiet li għandu fid-dar tiegħu.
Jista' jgħidilna x'se jagħmel dwar dawn? Seħibna Joe Cordina kien direttur f'kumpanija li kienet issemmiet fl-iskandlu taż-żejt. Joe Cordina ma kienx ħareġ għall-elezzjoni." Il-Prim Ministru Joseph Muscat qal li "ninsabu lejlet baġit ieħor u n-nies flok anzjuża x'piżijiet se jintħabbru, dawn huma anzjużi fuq x'se jagħti l-Gvern. Din hi l-bidla. Kif inbidlet l-attitudni tan-nies lejn il-baġit. Il-pjan tagħna ċarissimu u għada hu pass ieħor fi twettiq ta' roadmap biex tinħoloq klassi tan-nofs ġdid u min qed jaqa' lura jibda' jħoss il-ġid. Rajna li xorta għad hawn min ma jistax jaħdem minħabba problemi soċjali jew mard. Hawn min li jirsisti kemm jirsisti qisu ma jistax jimxi 'l quddiem u dawn huma nies li ma tistax tnaqqsilhom taxxa għax diġa ma jħallsux. Hemm ukoll il-pensjonanti. Tajna żieda għall-ewwel darba fil-pensjoni u għedna li din mhix biżżejjed. Prezz tas-suċċess fil-pajjiż hu li għolew l-kirjiet tal-proprjetà."

Ċittadinanzi rrifjutati ''bla raġuni'' jippersistu

F'Malta, meta l-awtoritajiet kompetenti jiddeċiedu li persuna m'għandhiex tingħata ċ-ċittadinanza Maltija m'għandhom ebda obbligu li jipprovdu informazzjoni jew għaliex ħadu dik id-deċiżjoni. Dak milqut minn din id-deċiżjoni ma jistax imur quddiem il-Qorti biex jiġġieled dik id-deċiżjoni.
Apparti dan, fil-liġi Maltija hemm provediment li jgħid li biex tieħu ċ-ċittadinanza trid tkun ''ċittadin xieraq'' u ta' ''karattru tajjeb''. L-applikazzjoni għaċ-ċittadinanza trid tkun appoġġjata minn xi membru tal-Parlament, Imħallef, Maġistrat, avukat, nutar, tabib jew xi uffiċjal pubbliku.  Dawn il-provedimenti qed jitqiesu bħala li jillimitaw bi kbir l-aċċess għaċ-ċittadinanza.  Imma anki jekk tissodisfahom, biex tieħu ċ-ċittadinanza tista' ddum tistenna bejn 15 u 20 sena. Dawn il-provedimenti qed jitqiesu bħala li jħallu bieb għal diskriminazzjoni abbażi ta' razza, kulur, oriġini etnika, jew reliġjon.
Tlett snin ilu, il-Kummissjoni Kontra ir-Razziżmu tal-Kunsill tal-Ewropa (ECRI), kienet irrakkomandat li l-awtoritajiet Maltin jemendaw l-Att dwar iċ-Ċittadinanza. Hu kien u rrakkomandaw  li jiddaħħlu rekwiżiti ċari u oġġettivi fejn jirrigwara l-ksib ta' ċittadinanza.
F'rapport li għadu kif inħareġ mill-ECRI, intqal li ġie innutat li kien hemm emendi dwar l-Att dwar iċ-Ċittadinanza fis-sena 2013, fejn dan introduċa l-ksib ta' ċittadinanza b'investiment.  L-ECRI qalet li minkejja l-bdil li sar, ir-rakkomandazzjonijiet li hi kienet għamlet fis-sena 2013 ma ġewx implimentati.
Mill-banda l-oħra l-ECRI esprimiet is-sodisfazzjon tagħha li intlaqgħu ir-rakkomandazzjonijiet fejn jirrigwardaw alternattivi għad-detenzjoni tal-immigranti.

Tnaddfet il-'miżbla' fil-Marsa

Wara li ppubblikajna ritratti ta' żona mimlija b'kull tip ta' skart li forsi aktar tistħajjlek li qiegħed f'nofs il-Magħtab milli fil-Marsa, issa b'intervent tad-Direttorat għat-Tindif din iż-żona tnaddfet.

Resident li tkellem ma' inewmsalta.com qalilna li "rrid nirringrazzjak lid-direttorat tal-intervent. Nittamaw li tibqa' nadifa kif inhi u ma terġax issir miżbla kif kien hawn".

Esebizzjoni minn artist Malti spiċċat b'parti minnha mqatta' fil-bini tal-Kunsill tal-Ewropa

Esebizzjoni intitolata 'Exiles: The Road not taken' liema esebizzjoni hi xogħol l-artist Malti Norbert Francis Attard, spiċċat f'kontroversja fil-bini tal-Kunsill tal-Ewropa fi Stasbourg. L-esebizzjoni kellha t-tema tad-drittijiet umani  u kienet qed issir biex tfakkar il-50 sena minn meta Malta ffirmat il-Konvenzjoni Ewropea għad-Drittijiet Umani.

L-esebizzjoni tikkonsisti f'collage ta' 1,000 ritratt u fihom kien hemm wieħed marbut ma' karikatura li kienet inħarġet fid-Danimarka dwar il-Profeta Mohammed.  Attard, konxju ta' dak li kien inqala' dak inhar li nħarġet il-karikatura, għatta l-wiċċ u daħħal il-kelma 'ċċensurat'.

Ġara li kien hemm minn dejqu dan il-fatt u qatta' din il-parti tal-esebizzjoni fejn kien hemm il-karikatura. Qed ikun rappurtat li kien membru Parlamentari Tork li allegatament wettaq dan l-att.

Il-Ministeru tal-Affarijiet Barranin fi stqarrija li ħareġ qal li ġie infurmat b'dan l-inċident. Intqal li s-Segretarjat Ġenerali tal-Assemblea Parlamentari iltaqa' mar-rappreżentanza permanenti Maltija fil-Kunsill tal-Ewropa  u dawn għamlu apoloġija kemm mal-artist kif ukoll ma' Malta.

Edukatur ma' kull erbat itfal ... skejjel f'Għawdex battala mill-istudenti

Li fi skola jkun hemm edukatur ma' kull erbat itfal, tinstema' stramba. Li fi skola sħiħa l-ammont totali ta' għalliema u studenti ma jaqbiżx l-40 persuna, tqajjimlek ħafna mistoqsijiet. Dan għax illum nafu li f'Malta l-iskejjel għandhom klassijiet ta' 20 student u aktar. Imma f'Għawdex hemm realtajiet fejn żewġ skejjel partikolari dik ta' Kerċem u dik ta' San Lawrenz jinsabu tista' tgħid battala mill-istudenti.
F'din is-sena skolastika li għadha kif bdiet, fl-Iskola Primarja ta' San Lawrenz, mill-kindergarten sal-klassi tas-sitt sena hemm 31 student. Għat-tieni u t-tielet sena lanqas hemm klassi għax m'hemmx studenti. Ma' dawn il-31 student, fl-iskola hemm seba' edukaturi fejn hemm il-Kap tal-Iskola, erba' għalliema u 2 Kindergarten Assistants.  Dan ifisser edukatur ma' kull erbat 'itfal. Il-problema ta' nuqqas ta' studenti f'din l-iskola jidher li se tippersisti u dan hekk kif għal kinder 1 u kinder 2 hemm biss 5 studenti rispettivament. Għall-klassi tal-ewwel sena hemm biss tliet studenti.
Jekk imbagħad nieħdu l-Iskola ta' Kerċem naraw li b'kollox hemm 74 student, waqt li hemm 10 edukaturi, jiġifieri hemm medja ta' edukatur għal kull 7 t'itfal.
Minn statistica li ngħatat fil-Parlament mill-Ministru Evarist Bartolo għal Mistoqsija Parlamentari tad-Deputat Nazzjonalista Chris Said intqal li fil-Primarja ta' Għajnsielem hemm 137 student, f'dik ta' l-Għarb hemm 102, fil-Primarja tan-Nadur hemm 209 student, fil-Primarja tal-Qala hemm 112 student, fil-Primarja ta' Sannat hemm 148 student, dik tar-Rabat Għawdex hemm 370 student f'tax-Xagħra 237 student waqt li tax-Xewkija u ż-Żebbuġ kellhom 81 u 62 student rispettivament.

41 sena mit-traġedja tal-Vulcan f'Ħaż-Żabbar ... Bir-ritratt ma' faċċata ta' dar biex turihom x'kien ġara f'Ħaż-Żabbar
Wieħed u erbgħin sena ilu, seħħet it-traġedja tal-waqgħa tal-ajruplan tat-tip Vulcan fuq Ħaż-Żabbar. Traġedja li kienet ixxukkjat liż-Żabbarin. Illum, qed jintefa' dawl ġdid fuq kif iż-Żabbarin fl-Istati Uniti irċevew l-ewwel aħbarijiet. Ma kinitx faċli f'dawk iż-żminijiet li wieħed jara x'kien qed jiġri f'Malta. Waħda minn dawk li infurmat lil uliedha b'dak li kien ġara kienet Marija Buhagiar magħrufa bħala 'Tal-Ħawli'. Marija, biex turi lil uliedha x'kien ġara f'Ħaż-Żabbar qabet fotografu jiġbdiha ritratt mal-faċċata.
B'hekk setgħu jkunu ċerti li ommhom kienet qawwija u sħiħa u setgħu jaraw ukoll l-effett tad-dħaħen fuq dik il-faċċata. Marija Buhagiar kellha tlett uliedha msefrin l-Istati Uniti. Michael Buhagiar, wieħed minn neputijiet tagħha meta kuntattjat minn inewsmalta.com qalilna li "kienu semgħu bl-aħbar hemmhekk u missieri li kien hemm ċempel lill-Kamra tal-Aħbarijiet tal-istazzjon tar-radju ta hemm biex isir jaf izjed.
L-aħbar kienet ħarġet li l-ajruplan waqa' fuq il-belt Valletta imma missieri talab li jiċċekkjawlu eżatt u min kellmu kien spellilu l-isem Żabbar. Missieri ħa qata' kbira u immedjatament ċempel liz-ziju li kien joqgħod fl-istess triq u dan aċċertah li n-nanna ma kien gralha xejn." Michael Buhagiar ikompli jgħidilna li "n-nanna dak iż-żmien kellha 70 sena. Wara kienet qaltilhom kif semgħet ħoss ta' bomba u ħarġet tittawwal barra. Ħasbet li sploda xi ċilindru tal-gass.
Fit-triq li taqleb lejn in-naħa tad dar tagħha rat gelgul ilma nieżel. Ċertu pulizija li kien sejjer id-dar lura mis-servizz jismu Alfred Xuereb għalqilha l-bieb malajr u ġibidha n-naħa l-oħra tat-triq. Ftit mumenti wara l-ilma li rat ħa n-nar għax dan kien fjuwil tal-ajruplan." F'dik it-traġedja mietet Vinċenza Zammit ta' 48 sena u ħames membri li kienu jiffurmaw parti minn ekwipaġġ ta' sebgħa fuq ajruplan militari Ingliż tat-tip Vulcan Bomber. L-ajruplan wara li sploda kien ħalla straġi sħiħa fi Triq is-Santwarju f'Ħaż-Żabbar. L-ajruplan kien fuq titjira ta' taħriġ minn Londra għal Malta u kien mistenni jdum Malta tlett ijiem.
Kawża tal-isplużjoni mhux inqas minn għoxrin Malti, fosthom tifel ta' madwar seba' snin, kienu ttieħdu b'urġenza fl-Isptar San Luqa. Wara li ġew imdewwijin tmienja minn dawk feruti intbagħtu lejn id-dar u sebgħa oħra nżammu għal aktar kura. Kien għall-ħabta tas-siegħa ta' waranofsinhar meta l-ajruplan Vulcan deher riesaq lejn l-ajruport. Kif kien xi mitejn jarda bogħod, qabel ma mess mal-mitjar, l-ajruplan beda nieżel b'ħeffa mhux tas-soltu.
Bis-sabta li ħa, il-Vulcan tajjar ir-roti tax-xellug u għal xi tul tkaxkar fuq denbu. Dan l-episodju qasir kien il-bidu ta' traġedja li kexkxet liż-Żabbarin. Jidher li l-bdot kien iddeċieda li ma jkomplix jillandja u reġa' tar. Dan irnexxielu jagħmlu. Dilettant tal-ajvazzjoni li dakinhar kien qed jisma' r-radju fuq il-frekwenza tat-Torri tal-Kontroll, sema' lill-bdot jgħid li "se nagħmel dawra oħra". It-tweġiba mit-Torri tal-Kontroll kienet li "naħseb li l-ajruplan qed jaqbad".
L-ajruplan deher qed idur iżda kif kien fuq Ħaż-Żabbar dan iddisintegra u sploda. Żewġ membri tal-ekwipaġġ irnexxielhom jaqbżu bil-paraxut. Żewġ partijiet kbar mill-ajruplan niżlu fl-iskola primarja u fuq bejt ta' garaxx li hemm fi Triq Santa Tereża viċin l-iskola.
Għalkemm dak il-ħin fl-iskola kien hemm xi tfal u xi għalliema, b'fortuna kbira ħadd ma weġġa'. Partijiet żgħar oħra ġew f'għelieqi fil-qrib, fuq bjut, fi djar u fi pjazza San Ġakbu magħrufa bħala l-Misraħ. Għadd ta' aerials tat-televiżjoni tqaċċtu u d-dawl elettriku nqata' minnufih. Għadd ta' karozzi fil-qrib inħarqu bl-istess petrol li ħalla warajh l-ajruplan sekondi qabel niżel fl-għalqa. Fi Triq is-Santwarju kien hemm konfużjoni sħiħa u fl-għelieqi 'l ġewwa minn Triq Santa Duminka, fejn straħ l-ajruplan, kien hemm storja oħra. In-nies marret bi ħġarha fuq il-post fejn kien hemm xeni deskritti minn dawk preżenti bħala 'tat-tkexkix'. Fil-ġenb ta' din l-għalqa kien hemm l-ajruplan miksi bi dħaħen u nirien. F'ħin minnhom instemgħu żewġ splużjonijiet qawwija. Waqt li kienet qed issir ġlieda kontra n-nirien, ġriet l-aħbar li kien hemm dar li kienet qed taqbad.

Monument tal-egoiżmu għal Brussell … Eku tat-traġedja tal-għarqa ta' 800 immigrant fl-2015


Id-dgħajsa li fuqha kienu mietu madwar 800 immigrant, fejn x'uħud mill-mejtin kienu inġabu Malta u ndifnu hawn f'April tas-sena li għaddiet, issa tinsab f'kontroversja ġdida. Din id-dgħajsa li ttellgħet mill-baħar ftit tal-ġimgħat ilu u bħalissa tinsab fl-Italja issa qed tkun proposta li titieħed fi Brussels u tkun esebita hemm.
Din il-proposta saret mill-Prim Ministru Taljan, Matteo Renzi. Fi kliem Renzi, "l-Ewropa għandha tibdel il-mod kif qed tħares lejn ċerti kwistjonijiet fosthom il-ġlieda kontra l-iskart mill-ikel u l-immigrazzjoni". Renzi qal dan waqt attività konnessa mal-Jum Dinji tal-Ikel, fejn hu iddikjara li din id-dgħajsa għandha titpoġġa fi Brussels barra l-bini ta' istituzzjonijiet Ewropej. Renzi ddeskriva din id-dgħajsa bħala monument ta' l-egoizmu.

"L-applikazzjoni għal moskea se tibqa' għaddejja ... magħna jitolbu hawn anke Maltin"



L-applikazzjoni għal talb f'post f'Buġibba se tibqa' għaddejja u l-komunità musulmana li qed titlob f'dan il-post qed tistenna li jkun hemm rispons pożittiv mill-Awtorità tal-Ippjanar biex jinħareġ permess għal talb minn Musulmani. Waqt li huma konxji li l-post eżistenti mhux adattat, l-istess Musulmani qed jilmentaw li sa issa l-applikazzjonijiet għal postijiet ta' talb dejjem ġew miċħudin.
Meta tkellem ma' Inewsmalta, Bader Zina ikkonferma li mal-komunità Musulmani li titlob f'Buġibba hemm ukoll persuni Maltin. Fi kliemu stess, "magħna hawn Maltin li qatt ma kellhom x'jaqsmu mal-Iżlam. Dawn ikkonvertew u llum qed jiġu jitolbu".
Fi kliem Bader Zina, l-applikazzjoni li hemm bħalissa se tkompli għaddejja, u enfasizzalna li mhux minnu li se jkun hemm problemi b'parkeġġ jew żieda ta' traffiku b'post ta' talb.
Tenna li "ħafna minn dawn li jiġu jitolbu joqogħdu fil-qrib u ma jmorrux bil-karozza". Dwar il-proposta tad-Dumnikani li offrewlhom post biex jitolbu, qalilna li se jkun hemm diskussjonijiet, għalkemm saħaq li xorta hemm bżonn post ta' talb fin-naħa ta' fuq ta' Malta. Ma naqasx li jappella biex ikun hemm linji gwida dwar f'liema postijiet jista' jiġi organizzat it-talb. Hu għamilha ċara li huma jridu jkunu regolarizzati taħt il-kappa tar-regolamenti tal-Istat. Ma' naqasx li jirrimarka li Malta hi l-uniku pajjiż Ewropew li mhux jippermetti postijiet ta' talb. Kuntattjat minn Inewsmalta, Bader Zina mill-Kunsill tal-Musulmani f'Malta, qalilna li "l-applikazzjoni se tkompli għaddejja. Il-biċċa xogħol hi li qegħdin nippruvaw. Kienet laqgħa pożittiva dik li kellna mal-President u qed naraw kif se nsibu soluzzjoni. Din mhix f'idejna waħidna. Irridu nagħmlu l-affarijiet kif suppost. L-applikazzjoni ta' Buġibba ma saritx issa ilha aktar minn sena li saret."

Mistoqsi dwar x'se jiġri minn issa 'l hemm qalilna li "kif se jiġu l-affarijiet lanqas jien ma naf. Qed nistennew soluzzjoni. Kemm biex nimxu mal-komunità u anke biex inkunu konformi mal-liġi. Qed nippruvaw nsibu postijiet li jistgħu jkunu regolarizzati. Aħna infaqna spejjeż fuq postijiet qabel u meta applikajna dawn ġew rifjutati. Irridu nsibu post li jkunu aċċettabbli għat-talb. Irridu l-għajnuna biex dan iseħħ għax inkella hi inġustizzja. Qed nitolbu biex ituna linji gwida ta' x'postijiet jistgħu jintużaw għat-talb."
Bader jenfasizza li "aħna parti minn din is-soċjetà. Għandna id-drittijiet u l-obbligi. Li tiltaqa' biex titlob m'hemm xejn ħażin. Qed nissieltu biex inkunu legali. Jekk bniedem ittieh dinjità m'għandux ikun problema. Id-dinjità ta' bniedem Musulman hi li jitlob f'post xieraq u dan biex tkun iddixplinat u ma tagħmilx atti ħżiena f'ħajtek. Dan hu pajjiż matur. Malta hi fost l-aktar pajjiżi siguri fid-dinja. Ejja nimxu id f'id biex il-pajjiż ikompli miexi 'l quddiem. Qegħdin ġo dgħajsa. Għandna eżempji ċari ta' x'ġara fl-Ewropa. Malta hi l-uniku pajjiż fl-Ewropa li mhux nippermettu dawn il-postijiet ta' talb. Barra hemm postijiet bħal dawn taħt djar u anke ġo garaxxijiet. Fi Sqallija, l-Knisja stess tat post għall-Musulmani biex jitolbu. Irridu nkunu maturi u ejja nkomplu nibżgħu għal dan il-pajjiż biex it-tfal tagħna ma jkollhomx kwistjonijiet bħal pajjiżi oħra."

''Tħossok komdu bit-tanker Ministru?'' ... ''bi proċeduri mhux korretti ninterferixxi''


Fi stqarrija Ministerjali li saret fil-Parlament mill-Ministru għall-Ambjent Josè Herrera dwar it-trattat għall-bidla fil-klima f'Pariġi li Malta hi waħda minn tal-ewwel li rratifikatu, qam battibekk bejn id-Deputata Nazzjonalista Marthese Portelli u l-istess Ministru.
Marthese Portelli għal darba darbtejn staqsiet lill-Ministru jekk iħossux komdu li t-tanker tal-gass daħal fil-bajja ta' Marsaxlokk u dan għad m'għandux l-IPPCC Permit.


Minn naħa tiegħu l-Ministru Herrera waqt li għamilha ċara li għandu fiduċja fil-membri tal-Awtorità għar-Riżorsiu (ERA), qal li jekk din ma timxix mal-proċeduri stabbiliti mil-liġi hu jinterferixxi.
Iddikjara li dan it-tanker mhux qiegħed b'mod perpetwu. Hu ddikjara li "ma jfissirx li la daħal daħal". Dwar it-tanker tal-gass, il-Ministru Herrera qal li "t-tanker mhux se jkun hemm b'mod perpetwu. Idealment la jkollna miżbla, la jkollna tanker u lanqas impjant tal-enerġija. Idealmejnt ikollna kullimkien kampanja. Għalhekk nitkellmu fuq żvilupp sostenibbli. L-awtoritajiet qed jimxu mad-direttivi kollha tal-Unjoni Ewropea u qabel l-IPPCC Permit irid ikun hemm il-proċess ta' konsultazzjoni. Ma tistax tgħid li għax daħal daħal. L-ERA hi awtorità regolatorja u hi mmexxija mill-Professur Victor Axiaq. Niddikjara pubblikament li għandi fiduċja sħiħa fil-membri tal-awtoritajiet. Jekk il-proċedura li se tmexxi l-ERA ma tkunx skont il-liġi jien ninterferixxi."

Tgħid li s-sajf li ġej m'għandux ikun hemm armar tal-festi li joħloq problemi ta' aċċess

Id-Deputata Nazzjonalista Paula Mifsud Bonniċi, f'intervent li għamlet fil-Parlament dwar l-Abbozz ta' Liġi dwar il-Konvenzjoni dwar Drittijiet ta' Persuni b'Diżabilità, qalet li matul is-sajf li għadda rat ħafna armar tal-festi li kien qed joħloq problemi ta' aċċess għall-persuni b'diżabilità.
Qalet li tittama lis-sajf li ġej ma jkunx hemm armar tal-festi li joħloq problemi ta' aċċess. Minn naħa tiegħu, id-Deputat Laburista Etienne Grech fl-intervent tiegħu qal li dan il-gvern hu kommess li jkompli jtejjeb il-ħajja tal-persuni b'diżabilità. Qal li anke l-qgħad fost persuni b'diżabilità naqas b'mod drastiku. Hu qal li "nagħmlu kemm nagħmlu dejjem hemm ħafna aktar x'wieħed jagħmel".

Is-Segretarju Parlamentari, Justyne Caruana: Issa persuni b'diżabilità jistgħu jfittxu lill-Gvern jekk jinkisrulhom id-drittijiet


Fi tmiem id-dibattitu dwar l-Abbozz ta' Liġi dwar il-Konvenzjoni dwar Drittijiet ta Persuni b'Diżabilità, is-Segretarju Parlamentari Justyne Caruana qalet li b'din il-liġi l-Gvern issa qed jagħti għodda lill-persuni b'diżabilità li biha jistgħu jfittxu l-Gvern kemm f'Malta u anke barra jekk jinkisrulhom id-drittijiet.
Hi qalet li issa b'din il-liġi d-drittijiet tal-persuni b'diżabilità huma fl-istess livell ta' dawk Ewropew. Qalet li qabel kien veru li pajjiżna irratifika l-konvenzjoni, iżda din ma ngħatatx il-forza legali. Issa qed nagħtu għodda lill-persuni b'diżabilità li jekk ikun hemm ksur ta' drittijiet jistgħu jfittxu lill-Gvern f'Malta u anke barra minn Malta. Qed nagħtuhom din l-għodda biex jipproteġu d-drittijiet tagħhom.

.

Id-Deputata Nazzjonalista, Claudette Buttigieg: Le, le u le lill-Gvern għal privatizzazzjoni fis-saħħa mentali

"L-Oppożizzjoni se tgħid le, le u le lill-Gvern għall-privatizazzjoni fis-saħħa mentali." Hi qalet li l-Ministru għas-Saħħa diġà tefa' indikazzjoni dwar dan fi programm tar-radju. Hi qalet li mhux aċċettabbli li jiġi privatizzat is-servizz tal-qasam tas-saħħa mentali. Qalet li "m'aħna se naċċettaw qatt li jkun privatizzat is-servizz tas-saħħa mentali" u qalet li jekk sar xi ftehim dwar dan, l-Oppożizzjoni mhix se taċċetta xi ħaġa simili. Hi spjegat li hemm professjonisti li huma mħassbin dwar dan.

It-tfal ma jafux mibegħda … Tfal Maltin jingħaqdu ma’ tfal Sirjani fit-Talba tar-Rużarju għall-Għaqda u l-Paċi

Għal darb’oħra l-Aid to the Church in Need (Malta) qed tistieden lit-tfal Maltin biex jingħaqdu ma’ miljuni oħrajn madwar id-dinja fit-18 t’Ottubru fid-9.00 ta' filgħodu jgħidu t-talba tar-Rużarju għall-għaqda u l-paċi fid-dinja. S’issa aktar minn 5,840 tifel u tifla Maltin se jipparteċipaw. Kull wieħed u waħda minnhom se jirċievu kuruna żgħira bħala tifkira. F’ħafna postijiet madwar id-dinja llum il-vjolenza qed tkompli teskala u t-theddida mifruxa ta’ konflitt armat hija waħda mill-akbar perikli li qed niffaċċjaw bħal issa.
Il-Papa Franġisku enfasizza dan meta qal: “Fid-dinja hemm bosta kunflitti armati li qed iseħħu. Hija tip ta’ Tielet Gwerra Dinjija, li qed titmexxa b’mod frammentat. Din il-battalja hija l-ewwel u qabel kollox waħda spiritwali, u għalhekk fuq kollox għandna bżonn li nitolbu, b’fiduċja kbira - u min jista’ jgħinna aħjar mit-tfal għal dan il-kompitu?” L-għan ta’ dan l-avveniment huwa li jixxerred il-messaġġ biex nitolbu għall-paċi u l-għaqda f’kull bniedem, kif ukoll għall-unità u l-paċi tal-familja, fil-pajjiż u d-dinja kollha. Il-Papa jgħid li r-Rużarju huwa l-“ġabra dwar l-istorja tal-ħniena ta’ Alla,” iżda aktar milli jnaqqas mill-problemi tal-ħajja huwa “jitlob li aħna indaħħlu lilna nfusna fl-istorja ta’ kuljum, sabiex naħtfu s-sinjali tal-preżenza ta’ Kristu fostna.”
L-inizjattiva ta’ din is-sena li se jieħdu sehem fiha miljuni ta’ tfal Sirjani tal-iskola hija marbuta mal-appell biex tirrenja l-paċi u tintemm il-gwerra fis-Sirja. Din kienet ikkordinata mill-Aid to the Church in Need. Dawn l-aħħar ftit ġimgħat, tfal f’aktar minn 2,000 skola madwar is-Sirja pinġew u kitbu messaġġi lill-policy makers fl-Unjoni Ewropea u n-Nazzjonijiet Uniti taħt il-motto “Paċi għat-Tfal”.
Dan l-appell għall-paċi hu kampanja konġunta li qed titwettaq mill-Kattoliċi, Kristjani Ortodossi fis-Sirja.
Il-membri tal-komunitajiet reliġjużi kollha ġew mistiedna biex jieħdu sehem. Barra minn hekk, tfal tal-iskola Sirjani - inklużi ħafna Musulmani - kitbu messaġġi lill-komunità globali fuq bżieżaq bojod: “Aħna rridu l-paċi!”, “Agħtuna t-tfulija tagħna!”, “Aħna ma rridux aktar gwerra!” u “Aħna rridu mmorru l-iskola!”. Filwaqt li se jkunu l-“ambaxxaturi tat-tfal”, il-Patrijarka Gregorios III, il-kap tal-Knisja Melkita Griega Kattolika, kif ukoll il-MetropolitaGeorge Abou Zakhem ta’ Homs, li se jirrappreżenta l-Patrijarkat Ortodoss Grieg t’Antijokja u tal-Lvant kollu, u l-Isqof Selvanos Boutros al Nemeh ta’ Homs tal-Patrijarkat Ortodoss Sirjan qed jivvjaġġaw flimkien fi Brussell u Ġinevra bejn l-10 u t-13 t’Ottubru biex jagħtu l-ittri u tpinġijiet tat-tfal lir-rappreżentanti ta’ grad għoli tal-Unjoni Ewropea u tan-Nazzjonijiet Uniti. Fost oħrajn, ir-rappreżentanti religjużi se jiltaqgħu mal-President tal-Kummissjoni Ewropea, Jean Claude Juncker, u l-President tal-Parlament Ewropew, Martin Schulz.
F’Ġinevra, huma se jagħtu l-messaġġi tat-tfal lill-Kummissarju Għoli għar-Refuġjati, Dr Filippo Grandi, u l-Kummissarju Għoli għad-Drittijiet tal-Bniedem, Prince Al-Huzain.

Ċirkolu San Ġwann Bosco: Il-Kurja twieġeb u tgħid li "l-post magħluq għal kulħadd"


Hekk kif ninsabu resqin lejn iż-żmien tal-Milied u f'diversi rħula diġà bdew il-preparamenti marbutin ma' pageants u attivitajiet oħra, f'Ħal Tarxien, it-Tarxien Pageant Group jinsab f'dilemma kbira. Dan għax din l-għaqda tinsab f'xifer li tisfaxxa hekk kif il-post li kienu joperaw minnu  - iċ-Ċirkolu San Ġwann Bosco ngħalaq. Għal sentejn sħaħ il-pageant ma saritx u hemm riskju li din is-sena ma ssirx. Il-Grupp, li l-għan tiegħu dejjem kien li jxandar l-Evanġelju b'mod differenti, issa qed jistaqsi direttament lill-Kurja jekk għandux l-appoġġ tagħha. F'ittra dettaljata li kitbu lil Mons. Arċisqof Charles Scicluna, huma ġew imwieġba b'ittra xotta li tgħid li ċ-ċirkolu hu magħluq għal kulħadd. 

L-ittra ta' Tarxien Pageant Group tgħid li ''l-grupp qiegħed jitlob raġuni konkreta għaliex ġie imcaħħad milli jibqa' jattendi fiċ-Ċirkolu San Ġwann Bosco, b’konsegwenzi li kellna nħassru l-aħħar żewġ pageants wara w21 sena ta’ attività kontinwa. Attività li tinvolvi ‘l fuq minn 150 volontarju li ta kull sena kienu jagħtu kollox għaliha u li kienet ta’ ġid għal min jsegwiha. Ma' kull min tkellimna s’issa, inklużi membri mill-Kurja, ħadt ma kien jaf għaliex dan il-post ingħalaq u qiegħed jitħalla magħluq".

Dwar ir-restawr l-ittra qalet li ''waqt li nagħmluha ċara li dejjem konna favur li l-post jitranġa u jisbieħ għal min irid jużah, għandna informazzjoni konkreta minn siti uffiċjali tal-MEPA, ladarba ma konniex mistiedna mill-Kappillan biex niddiskutu il-futur u l-ippjanar tal-post, li permess jew applikazzjoni għall-permess għad m’hemmx. Dan ifisser li fadal xhur jekk mhux snin ta’ dewmien biex il-proġett jibda. Il-grupp qiegħed jitlob il-permess li juża l-post biex itella' din il-pageant, li tressaq 'il fuq minn elf spettatur kull sena jisimgħu il-kelma t’Alla, sakemm allinqas jibda l-process."

L-ittra tkompli tgħid li "nixtiquk iżomm f’moħħok ukoll li l-għaqda issa ma tiflaħx aktar stennija. Ma tiflaħx tgħid lill-membri tagħħa li l-pageant mhux se jsir għat-tielet sena konsekuttiva. Il-membri diġà bdew jitbiegħdu mill-għaqda u qegħdin f’riskju serju li nitilfu kulma ħdimna għalih fl-20 sena li għaddew. Dan kollu mingħajr raġuni konkreta għaliex qiegħed iseħħ dan kollu."


Intqal li "l-kumitat ta’ dan il-grupp baqa' jitħabat u jikkumbatti biex jsalva din l-għaqda li ġiet maħluqa biex twassal l-evanġelju b’mod differenti. Ma nistgħux nibqgħu naħdmu weħidna kontra l-kurrent. Ninsabu kemmxejn iddispjaċuti li din is-sitwazzjoni issa waslet s’hawn. Il-grupp qiegħed jistaqsi jekk għandux appoġġ totali mill-Knisja biex ikompli bil-ħidma tiegħu fil-futur. Qegħdin nistaqsu din il-mistoqsija għax s'issa risposta pożittiva kellna, pero azzjoni ma rajniex. Laqgħat u diskussjonijiet li ma wasslu għal xejn. Li tweġgħalna qalbna hi, li nħallu din l-għaqda tisfaxxalna fix-xejn."

F'ittra li ntbagħatitilhom mill-Kurja intqal li "għaddewli l-ittra li inti ktibt lil Monsinjur Arċisqof.  Iċ-Ċirkolu San Ġwann Bosco tal-Parroċċa ta' Ħal Tarxien bħalissa mhux qiegħed fi stat li jintuża u kif taf inti hu magħluq għal kulħadd".  L-ittra ġġib il-firma ta' Mons. Frans Abdilla, Vigarju Episkopali għall-Kleru u l-Parroċċi.

L-Oppożizzjoni toħroġ 'il barra mill-Parlament għax tkellem Konrad Mizzi


PN: Konrad Mizzi mistoqsija waħda għandu xi jwieġeb: Minn fejn kien se jġib il-miljuni biex jitfa’ fil-kumpanija sigrieta tal-Panama
Joseph Muscat qed jiprova jgħatti l-iskandlu tal-Panama billi jibgħat lill-Konrad Mizzi - suppost Ministru bla portafoll, iżda għadu Ministru tal-Enerġija - biex jitkellem fil-Parlament qisu xejn mhu xejn. Muscat sejjer żball, għax il-poplu Malti u Għawdxi għadu rrabjat għalih għall-fatt li flok keċċa lil Konrad Mizzi u lil Keith Schembri, iddefendihom u lil wieħed tah promotion.
Jekk iħoss li għandu jitkellem, Konrad Mizzi għandu jwieġeb mistoqsija waħda: Minn fejn kien se jġib il-miljuni biex jitfagħhom fil-kumpanija sigrieta fil-Panama. Konrad Mizzi hu responsabbli mid-deals kollha li dan il-Gvern qed iżomm moħbija: Id-deal mas-SOCAR dwar ix-xiri taż-żejt, il-privatizzazzjoni tal-Enemalta, il-bejgħ tal-Power Station tal-BWSC, il-privatizzazzjoni tal-Isptar San Luqa, l-Isptar Karen Grech u l-Isptar Ġenerali ta’ Għawdex, id-deal tal-Power Station il-ġdida, kif ukoll id-deal tat-tanker tal-gass li daħal ilbieraħ fil-bajja ta’ Marsaxlokk.
 


PL: Simon Busuttil bitter, arroganti u politikament iddisprat
L-arroganza ta’ Simon Busuttil u l-Oppożizzjoni tiegħu kompliet toħroġ fil-beraħ aktar illum meta l-Kap tal-Oppożizzjoni ma riedx iħalli lil Ministru Konrad Mizzi jitkellem biex iwieġeb lill-Oppożizzjoni fuq mistoqsijiet li għamlet hi stess dwar il-qalba għall-gass.
Biex ma jismax il-fatti, Simon Busuttil reġa’ għal darba oħra sabbat saqajh u għażel li jitlaq ‘il barra mill-ogħla istituzzjoni tal-pajjiż.
Din hija l-arroganza ta' min huwa bitter u politikament iddisprat.
 
Aktar kmieni:
Hekk kif wara stqarrija Ministerjali fil-Parlament mill-Ministru għall-Ambjent Josè Herrera, dan talab lil Ministru Konrad Mizzi biex jispjega dettalji tekniċi marbutin mat-tanker tal-gass li hemm f'Marsaxlokk, qamet kwistjoni mill-Oppożizzjoni.
Il-Kap tal-Oppożizzjoni oġġezzjona li l-Ministru Mizzi jagħti spjegazzjoni. Minn naħa tiegħu intervjena l-Ispiker Anġlu Farrugia u qal li jista' Ministru jagħti l-kelma lil Ministru ieħor biex jagħti spjegazzjoni.
Minn naħa tiegħu, l-Kap tal-Oppożizzjoni qal li l-Oppożizzjoni ma tirrikonoxxix il-leġittimità tal-Minsitri Mizzi u ddikjara li l-Oppożizzjoni se toħroġ 'il barra mill-Kamra.

Rapport dwar is-siringi fuq inewsmalta.com diskuss fil-Parlament

Il-kwistjoni marbuta ma' siringi użati mormijin f'post pubbliku f'Raħal il-Ġdid, liema każ tqajjem minn inewsmalta.com spiċċat parti mid-diskussjoni fil-ħin tal-mistoqsijiet tal-Parlament.
Kien id-Deputat Nazzjonalista Claudio Grech li semma' r-rapport ta' inewsmalta.com dwar is-siringi użati mormijin.
Hu qal li l-Oppożizzjoni taqbel li s-siringi jingħataw b'xejn. Hu staqsa jekk il-Gvern jikkunsidrax idaħħal sistema biex tintraċċa s-siringi użati.
Il-Ministru għas-Saħħa, Dr Chris Fearne talbu jpoġġi r-rapport ta' inewsmalta.com fuq il-Mejda tal-Parlament. Minn naħa tiegħu l-Ministru qal li minn xahar ilu 'l hawn dawk il-persuni li jiġbru s-siringi qed jingħataw kontejner isfar biex jiddisponu mis-siringi u dan imbagħad jinġabar.

Mhux il-Magħtab ... imma l-Marsa

Ma nagħtukomx tort jekk forsi ma' l-ewwel daqqa t'għajn għal dawn ir-ritratti taħsbu li hemmhekk hu l-Magħtab, il-post fejn jintrema' kull tip ta' skart. Xejn minn dan. Il-post hu l-Marsa fi triq prinċipali. Id-Direttorat għat-Tindif waqt li bdew ħidma biex inaddfu s-sit iddeskrivew ix-xena bħala 'tal-mistħija'.

Franklin Calleja: "Domna siegħa nitħabtu miegħu u kien beżgħan ... imma salvajnihom"


Fl-aħħar sigħat il-kantant simpatiku Franklin Calleja, qatt m'għaddielu minn moħħu li wara ġurnata xogħol kien se jagħmel ħin konsiderevoli aktar minn siegħa jħabbat il-bibien ta' residenti fi triq u battikata oħra wara biex ħareġ żewġ frieħ ta' qtates li nqabdu f'magni tal-karozzi. Finalment Franklin u l-ħabiba tiegħu, mhux biss salvawhom imma rnexxielhom isibu mara li aċċettat li trabbihom.


Ikkuntattjat minn inewsmalta.com, Franklin qalilna li "ilbieraħ wara li rritornajt id-dar mix-xogħol bdejt nisma' ħafna għajjat minn ġo karozza. Ċempilt lill-ħabiba tiegħi Denelza u spiċċajna nħabbtu l-bibien ta' triq tagħna kollha. Bqajna sakemm sibna s-sid tal-karozza għax naturalment ġo magna ta' karozza tistenna li hemm ċans kbir li jitqattgħu kif appena tistartja. L-ewwel ferħ ta' qattus ġie salvat u konna diġa sodisfatti ħafna. Bdejna nċemplu ħafna nies biex forsi nsibu xi ħadd li jżomm u jrabbih. Irnexxilna wkoll! Lanqas ridna nemmnu għax llum kulħadd jaf li biex trabbi pet bħall-qattus jew kelb hawn min jkun jrid jaħsibha mhux mil-llum għall-llum! Kif appena ħriġna u konna sejrin għall-karozza biex nmorru nagħtu il-qattus lill- din il-mara li kienet interresata taddotah fil-pront nisimgħu ħafna għajjat. Kien hemm ferħ ieħor ġo karozza oħra. Tana ferħ ta' ġenn u fll-pront bdejna nfittxu bil-ferħ l-ieħor f'idejna biex naraw minn fejn ġej l-għajjat!".


Ikompli jgħid li "irnexxilna nsibu t-tieni ferħ ġo karozza oħra pero ma kinitx daqsekk faċli biex qlajna t-tieni wieħed għalkemm diveri nies ħarġu jgħinuna anke billi ġabu d-dawl. Il-ferħ ta' qattus kien maqbud ma' xi affarjiet fll-magna allura kienet ftit aktar diffiċli għalina. Domna siegħa b'kollox biex qlajna t-tieni wieħed imma b'sodisfazzjon kbir minkejja wkoll illi qattawna xi ftit bil-biża li kellhom fuqhom rnexxilna nsalvahom t-tnejn! Fll- pront ċempilna lil din il-mara ngħidulha illi hemm ċans kbir illi sibna t-tieni ferħ u jaf huwa hu ta' l-ewwel ferħ li sibna. L-mara aċċetat li trabbihom t-tnejn f'daqqa hi u mingħajr tlaqliq ta' xejn qaltilna ġibuhom. Minn qalbna f'ismi u f'isem Denelza nixtiequ nirringrazzjaw lil Rita Buhagiar minn Birkirkara talli aċċetat illi trabbihom t-tnejn f'daqqa u xi nies mill-Ħamrun stess ta l-għajnuna illi tawna!."