Jinżammu 'depożiti' tal-bejjiegħa...il-Pulizija x'azzjoni se tieħu?

Il-kwistjoni tal-faqqaturi u logħob pirotekniku ieħor li qed jispiċċa jinbiegħ lil tfal waqt il-festi, xi ħaġa li wasslet biex fil-festa taż-Żejtun kien hemm tifel li l-faqqaturi ħadulu fil-but u ġarrab ġrieħi f'saqajh, kellha żvilupp fl-aħħar sigħat. Dan hekk kif il-Kunsill Lokali taż-Żejtun ħa azzjoni immedjata  u ddeċieda li ma jagħtix il-€100 depożitu li huma ħallsu għall-permess temporanju biex jarmaw fil-festa. Dan sar bl-għan li jkun individwat il-bejjiegħ. inewsmalta.com għandu informazzjoni li turi biċ-ċar li min biegħ dawk il-faqqaturi kiser il-kundizzjoni li hu stess iffirma għaliha meta applika għall-permess mal-kunsill.

inewsmalta.com hu nfurmat li waħda mill-kundizzjonijiet tgħid li "bejgħ ta' ġugarelli u logħob ieħor ma jistax jinkludi ġugarelli li minnhom jista' jiġi sparat xi likwidu, prodotti li jkun fihom sustanzi li jerħu r-riħa, bħal stink bombs jew li jkollhom xi forma ta' splussiv".

Sorsi qrib il-Kunsill Lokali taż-Żejtun meta tkellmu  ma' inewsmalta.com spjegaw li "l-liġijiet fuq il-karta hemm qegħdin, imma xi ħadd irid jinforza. Dawn it-tip ta' logħob piroteniku ma tarahx mal-logħob l-ieħor imma ġeneralment ikunu x'imkien imwarrbin. It-tfal jistaqsu għalihom u jbiegħulhom. Ġieli bgħatna tfal jixtru biex naraw jekk hux qed isir bejgħ tagħhom. Mhux imbilli jkollna l-liġijiet fuq il-karta, hemm bżonn li l-Pulizija tieħu azzjoni".

L-istess sors qalilna li "l-inċident ta' dan it-tifel ma kienx każ iżolat. Kien hemm każ fejn wieħed weġġa' għajnejh u ieħor ħadulu fuq spalltu u dam ġimgħa ma jċaqlaqx idejh sew. Meta se tittieħed azzjoni?  L-infurzar isir mill-Pulizija u huma dawk li jridu jieħdu azzjoni. Bħala kunsill qed naraw li d-depożitu ta' €100 donnu ma serviex ta' deterrent, u għalhekk sena oħra din se jkollha togħla u togħla sew", qalilna l-istess sors.  L-istess sors qalilna li "aħna mill-informazzjoni li ġieli jtuna dawn lanqas suppost jidħlu Malta aħseb u ara kemm jinbiegħu lit-tfal".

L-ORIZZONT kien għamel kuntatt mal-Awtorità għall-Kompetizzjoni u Konsumaturi (MCCAA). Minkejja li għaddew jumejn mindu talbu nibagħtulhom il-mistoqsijiet, dawn kienu għadhom ma weġbux dwar dawn il-ġugarelli perikolużi li għadhom jinbiegħu lit-tfal fil-festi Maltin.

?Missier it-tifel involut f'dan l-inċident waqt li ppubblika r-ritratti tal-ġrieħi li ġarrab ibnu kiteb li, "Fil-festi u attivitajiet oħra fejn ikun hemm it-tfal qed ikun hemm dawk li suppost ibigħu l-ġugarelli. Minn ftit tas-snin ilu 'l hawn żdiedu wkoll it-trakki trakki li ssabbathom mal-art u jfaqqgħu. Nhar is-Sibt ibni xtara minnhom u żammhom fil-but tal-qalziet. Waqt li kien qiegħed jilgħab ma' sħabu, intlaqat b'daqqa jew inqarsu u ħadu kollha f'daqqa, fejn spiċċa ħaraq il-qalziet u, agħar minn hekk, ħaraq saqajh ukoll. Aċċident li seta' kellu konsegwenzi agħar minn hekk kieku kienu fil-but tal-qmis u ħaraq wiċċu u għajnejh."?"Meta se jkun hemm nies responsabbli jaraw x'qed joffru l-bejjiegħa suppost tal-ġugarelli lit-tfal tagħna?" tenna l-missier.

Inġinier li kien tkellem ma' inewsmalta.com qalilna li dawn il-ġugarelli huma materjal pirotekniku u huma perikolużi.

"Materjal pirotekniku dejjem fih il-periklu"

'Materjal pirotekniku, anke jekk inhi xi ħaġa żgħira ħafna dejjem fiha xi tip ta' periklu. Hawn impressjoni żbaljata li għax tixtriha mingħand tal-ġugarelli dik tkun sigura.  Il-każ li kellna fiż-Żejtun fejn tifel ħadulu fil-but mhux każ uniku. Kien hemm min weġġa' għajnejh u partijiet oħra ta' ġismu b'ċertu logħob pirotekniku. Mhux se ngħid jekk għandux jinbiegħ lit-tfal jew le, imma għandu jkun hemm informazzjoni ta' kif għandhom jintużaw u fuq kollox x'mgħandekx tagħmel. Qatt m'għandek tixtri materjal pirotekniku u tħallih f'but jew mitluq x'imkien. Dak ikun sensittiv u b'ċertu pressjoni ġo fih u ma' daqqa kapaċi jieħu. Għandna każ ieħor ta' tifel li weġġa, każ li jfakkarna fit-tifel li kien weġġa' b'dawk magħrufin bħala 'bombi sofor'. Nistaqsi meta se nitgħallmu?".

Dan sostnieh ma' inewsmlta.com, inġinier midħla sew tal-pirotenika, fejn tlabnieh kummenti dwar l-inċident ta' dan it-tifel li ħadulu trikki trakki fil-but bil-konsegwenza li kkawżawlu grievi sostanzjali f'saqajh.

inewsmalta.com għamel kuntatt ukoll mal-Awtorità għall-Kompetizzjoni u l-Konsumatur (MCCAA), fejn dawn talbuna nibagħtulhom id-domandi bil-miktub. Minn l-ewwel spjegazzjoni li tawna ddeskrivew dak il-materjal bħala li hu 'pirotekniku'. Spjegawna li huma jagħmlu diversi spezzjonijiet fis-suq biex jaraw x'ikun qed jinbiegħ. Mistoqsijin jekk dan hux materjal li għandu jinbiegħ lit-tfal, huma qalulna li l-MCCAA mhux kompitu tagħha tara dan.

Intant wara li ħareġ il-każ ta' dan l-inċident kienu diversi dawk l-ommijiet li esprimew il-fehma tagħha li dawn it-tip ta' logħob m'għandux jitħalla f'idejn it-tfal.  Omm miż-Żejtun li kkuntattjatna qaltilna li, "Meta l-missier ippubblika dawk ir-ritratti ħasduni. Lil ibni xtrajtlu kemm-il darba minnhom u qatt m'għaddieli minn rasi li dawn jistgħu jieħdu fil-but u jiġri dak li ġara. Nittamaw li l-awtoritajiet jieħdu passi dwar dan. Hemm bżonn li min ikun se jixtri jkun infurmat bil-konsegwenzi kollha."

Missier li tkellem magħna qalilna li "kien hemm żmien meta dawn il-faqqaturi li tgħollihom u jfaqqgħu ma kinux permessibbli jinbiegħu. Ġara iżda li reġgħu tfaċċaw. Nistennew li tittieħed azzjoni".?Missier it-tifel involut f'dan l-inċident waqt li ppubblika r-ritratti tal-ġrieħi li ġarrab ibnu kiteb li, "Fil-festi u attivitajiet oħra fejn ikun hemm it-tfal qed ikun hemm dawk li suppost ibigħu l-ġugarelli. Minn ftit tas-snin ilu 'l hawn żdiedu wkoll it-trakki trakki li ssabbathom mal-art u jfaqqgħu. Nhar is-Sibt ibni xtara minnhom u żammhom fil-but tal-qalziet. Waqt li kien qiegħed jilgħab ma' shabu, intlaqat b'daqqa jew inqarsu u ħadu kollha f'daqqa, fejn spiċċa ħaraq il-qalziet u, agħar minn hekk, ħaraq saqajh ukoll. Aċċident li seta' kellu konsegwenzi agħar minn hekk kieku kienu fil-but tal-qmis u ħaraq wiċċu u għajnejh."?"Meta se jkun hemm nies responsabbli jaraw x'qed joffru l-bejjiegħa suppost tal-ġugarelli lit-tfal tagħna?" tenna l-missier.

It-tiġrif ta' ajruplan fix-Xlendi: Rabja fost dawk midħla tal-avjazzjoni

"Suppost li diġà bdiet l-investigazzjoni. Imma saret il-ħatra tal-Bureau għall-Investigazzjonijiet tal-Aċċidenti tal-Ajru? Li nistgħu ngħidu f'dan l-istadju hu li se jkun hemm diskussjonijiet dwar dan."
Din kienet reazzjoni li ħadna wara l-inċident ta' din il-ġimgħa fejn ajruplan żgħir waqa' fix-Xlendi. Meta staqsejna x'inhi r-raġuni li l-Bureau għall-Investigazzjonijiet tal-Aċċidenti tal-Ajru għadu ma nħatarx, espert fl-avjazzjoni qalilna li "dak iwieġeb il-Ministeru".

Stħarriġna dwar l-investigazzjoni li trid issir mil-lat ta' avjazzjoni, fejn dwar dan anke suppost isiru rakkomandazzjonijiet jekk ikun hemm bżonn. Normalment investigazzjonijiet bħal dawn jibdew b'mod immedjat imma jidher li fil-każ tal-waqa' tal-ajruplan tax-Xlendi, jidher li nqalgħu diffikultajiet. Meta stħarriġna dwar il-Bureau għall-Investigazzjonijiet tal-Aċċidenti tal-Ajru, ir-risposta kienet li, "Jeżisti l-Bureau biex jinvestiga?". Meta għamilna aktar mistoqsijiet ġejna mitlubin nikkuntattjaw lill-Ministeru.
Għamilna kuntatt mal-Ministeru għat-Turiżmu peress li l-Bureau jidher li jaqa' taħt dan il-Ministeru, bil-kelliema għar-relazzjonijiet pubbliċi tistaqsina jekk jaqax taħt il-Ministeru. Infurmajnieha li l-istess Bureau qiegħed imniżżel mal-Ministeru għat-Turiżmu u hi qaltilna li se tara u tinfurmana dwar l-ilment jekk dan hux maħtur. S'issa għadna bla tweġiba.

Għamilna kuntatt ukoll mad-Direttur tad-Direttorat għall-Avjazzjoni Ċivili, George Borg Myatt, u meta staqsejnieh dwar l-investigazzjoni irreferiena għall-istqarrija ta' Transport Malta. Meta staqsejnieh speċifikatament jekk il-Burea hux imwaqqaf, qalilna li ma jafx u qalilna nistaqsu lil Transport Malta.
Għamilna kuntatt ma' Transport Malta, biss it-tentattivi biex naqbdu mal-uffiċjali responsabbli mill-kommunikazzjoni irriżultaw fin-negattiv. Għamilna kuntatt mal-Ministeru għat-Trasport u ġejna mitluba nibgħatulhom imejl. Għamilna dan, iżda s'issa għadna bla tweġiba.
Il-Bureau għall-Investigazzjoni ta' Aċċidenti tal-Ajru hu entità indipendenti u jinvestiga aċċidenti tal-ajru li jseħħu fit-territorju Malti. L-għan ikun li jiddetermina ċ-ċirkostanzi  tal-inċident u jekk ikun hemm bżonn isiru rakkomandazzjonijiet ta' sigurtà.  L-investigatur normalment ikun persuna kwalifikata, fejn dan fl-investigazzjoni tiegħu jieħu dikjarazzonijiet mingħand dawk kollha involuti.
Il-każ tal-ajruplan li waqa' fix-Xlendi qed jitqies bħala 'wieħed stramb ħafna'.  Iċ-ċirkostanzi ta' kif kien qed itir l-ajruplan u l-fatt li ħadd ma kien informat bih qed ikomplu jqajmu ħafna mistoqsijiet.
Il-Pulizija qiegħda wkoll tinvestiga dan l-inċident.
 L-ajruplan hu reġistrat l-Italja, fejn fuqu kien hemm miktub l-isem ta' skola tal-avjazzjoni bl-isem ta' Fly Sibari.
Jidher li ħadd ma kien mgħarraf b'din it-titjira li telqet minn Agrigento fi Sqallija. Sa issa għadu mhux magħruf fejn kienet sejra t-titjira. La l-kontrolluri tal-ajru Taljani u lanqas dawk Maltin ma kienu mgħarrfin bit-titjira.  Apparat magħruf bħala Transponder, apparat li hu obbligat li jkun jiffunzjona għax permezz tiegħu l-ajruplan jinqabad mir-radar, ma kienx mixgħul. Dan il-fatt qed iqajjem għadd ta' mistoqsijiet.
Matul il-ġurnata tal-bieraħ, il-Pulizija Maltija interrogat għal diversi ħinijiet liż-żewġ persuni li kienu abbord l-ajruplan,  wieħed ta' 55 sena u ieħor ta' 61 sena. 
 
Ritratt: Joe Grech

L-Air Malta...konsegwenza imminenti tal-Brexit hi r-rata tal-kambju
  

    •    Fost dawk li bdew jitħassbu dwar l-ewwel effetti tad-deċiżjoni li r-Renju Unit joħroġ mill-Unjoni Ewropea kienu aġenti turistiċi f'pajjiżna, fejn kienu diversi dawk li bdew jargumetaw dwar l-effetti li jista' jkun hemm b'din id-deċiżjoni fuq il-linja nazzjonali ta' l-ajru Air Malta.

F'kummenti lil inewsmalta.com, l-Air Malta qaltilna li "konsegwenza imminenti hi r-rata tal-kambju bejn l-iSterlina u l-Ewro. Peress li r-Renju Unit hu l-akbar suq tal-Air Malta b'aktar minn 10 fil-mija tad-dħul kollu marbut mal-iSterlina, dan se jħalli impatt dirett finanzjarju negattiv fuq il-kumpanija jekk ir-rati li kien hemm filgħodu jibqgħu kif inhuma bħalissa."

L-Air Malta qaltilna ukoll li "impatt aktar fit-tul hu fuq kif din id-deċiżjoni se taffettwa l-ftehim bejn ir-Renju Unit u l-Unjoni Ewropea dwar l-avjazzjoni. Għadu kmieni wisq biex wieħed janalizza dan fid-dettal għax jiddependi fuq diversi xenarji li jistgħu jseħħu.  Dawn ċertament se jibdew jiġu diskussi fix-xhur li ġejjin fosthom jekk ir-Renju Unit hux se jibqa' jagħmel parti mis-suq liberalizzat tal-avjazzjoni tal-Unjoni Ewropea.  Deċiżjoni bħal din tista' tfisser li kull pajjiż membru tal-Unjoni Ewropea jkollu jinnegozja ftehim bilaterali individwali  magħruf bħala Air Services Agreement mar-Renju Unit.  Dan it-tip ta' ftehim jirregola l-avjazzjoni għall-pajjiżi li m'humiex membri tal-Unjoni Ewropea. Dan jista' jkun proċess kumplikat ħafna."
 
L-Air Malta qaltilna ukoll li "għażla oħra hi li l-Unjoni Ewropea tinnegozja għan-nom ta' kull stat membru mar-Renju Unit bi ftehim bħal li għandna man-Norveġja, l-Iżlanda u Leichtenstein, magħruf bħala EFA jew dak mal-iSvizzera magħruf bħala EFTA. Jista' jkun ukoll li r-Renju Unit jiftiehem mal-Unjoni Ewropea li jibqa' jagħmel parti mis-suq liberalizzat tal-avjazzjoni tal-Unjoni Ewropea.  Għaldaqstant sakemm ikun aktar ċar x'deċiżjonijiet se jittieħdu f'dan ir-rigward, għadu kmieni wisq biex wieħed jikkummenta fid-dettal dwar dan l-impatt". 

Ritratt (Arkivji): Ian Noel Pace

Il-bidu tat-tmiem ta' l-unjoni politika imsejħa Unjoni Ewropea
       - Sharon Ellul Bonici

L-Ewrorealista Sharon Ellul Bonici fl-ewwel kummenti tagħha qaltilna li "l-ewwelnett din kienet deċiżjoni sovrana tal-poplu Brittaniku. Dawn għandhom kull dritt li jipproteġu l-interessi nazzjonali tagħhom.
"It-tieni nett għandna naraw dan bħal meta aħna ma konniex membri fl-Unjoni Ewropea.  F'dak iż-żmien, Malta bħala pajjiż kellha relazzjoni impekkabbli mar-Renju Unit.  It-turisti Brittaniċi kienu jfittxu lil Malta bħala destinazzjoni turistika u ħafna minn dawk li kienu jżuruna kienu jerġgħu jiġu.
"Aħna pajjiż tal-Commonwealth u storikament ir-rabtiet tagħna mar-Renju Unit imorru lil hinn mill-Unjoni Ewropea. Ir-Renju Unit xorta jrid li jibqa' jbiegħ il-prodotti tiegħu lilna u aħna xorta għad irridu nixtru minn hemm.  Ninsab żgura li l-Unjoni Ewropea se toffri l-istess tip ta' ftehim li għandhom man-Norveġja, l-Isvizzera u l-Iżlanda."

Tenniet li "l-Unjoni Ewropea ma kinitx qed tisma' l-karbiet tal-poplu u kienet qed tinjora ċertu kriżijiet bħal dik tal-immigrazzjoni. Din kienet xi ħaġa li qed tinħass mill-klassi tal-ħaddiema u mhux mill-politiċi. Dawn il-qasmiet issa kissru l-istatus quo. Fi żmien qasir se naraw pajjiżi oħra li se jsegwu l-istess triq tar-Renju Unit.
"Dan hu bidu ġdid u dan hu l-bidu tat-tmiem ta' unjoni politika. Issa hu żmien li jkollna Ewropa bi gvernijiet li jkunu jmexxu huma u jikkoperaw b'mod ħieles. Dawn ikollhom il-liġijiet tagħhom u r-regolamenti skont iż-żmien u l-bżonn. Issa hu ż-żmien fejn il-kapijiet tal-Istati Ewropej jisimgħu il-karbiet tan-nies. Ejjew ma nibqgħux minn dak li riedu n-nies imma naċċettaw li d-demokrazija tkellmet".

It-tluq tal-Renju Unit mill-UE ma narahx l-aħħar tad-dinja - Lino Briguglio

F'kumment li tana dwar id-deċiżjoni tal-poplu tar-Renju Unit li joħroġ mill-Unjoni Ewropea, l-ekonomista Lino Briguglio qalilna li, "Ma nikkunsidrax il-fatt li r-Renju Unit se jitlaq mill-Unjoni Ewropea bħala li hu l-aħħar tad-dinja. Ir-Renju Unit se jkun bħalma huma l-Iżvizzera, in-Norveġja u l-Iżlanda, assoċjati mill-qrib mal-Unjoni Ewropea. Dawn imma se jitilfu l-influwenza tagħhom fid-deċiżjonijiet tal-Unjoni Ewropea. L-Iskozja se tfittex għall-indipendenza u din id-darba teħodha. Naħseb li r-Renju Unit mhux se jkun suċċess bħall-Iżvizzera u n-Norveġja. Ir-Renju Unit se jkompli jitlef l-influwena tiegħu fil-politika dinjija u fl-ekonomija. Ir-rwol ta' Londra bħala ċentru finanzjarju kbir jista' wkoll jiġi mhedded. Malta se tkun affettwata b'dak li ġara b'mod partikolari fit-turiżmu, imma anki hawn mhix se tkun l-aħħar tad-dinja.

”
Vot stupidu…..nibża' li jkun kontaġjuż" -
       L-ekonomista Carm Farrugia


“Vot stupidu. Dak li jbeżżagħni hu li dan il-vot jista' jkun kontaġjuż u jaffettwa pajjżi oħra." Dan sostnieh l-ekonomista Carm Farrugia meta mitlub jikkummenta dwar ir-riżultat tar-referendum. B'mod emozzjonanti għall-aħħar qalilna li, "Dan hu vot stupidu. Ir-Renju Unit inbidel. Reġgħu marru lura għaż-żmiinijiet l-antiki tal-kolonjaliżmu. F'dawk iż-żminijiet kienu jħossuhom speċjali u hekk qed jiġrilhom issa. Dan hu xokk kbir għalija li dejjem ħabbejt ir-Renju Unit." Enfasizza li, "Dawn għażlu li jkunu iżolati. Huma mhux qed iħossu lilhom infushom Ewropej. Aktar għandhom rabtiet mal-Istati Uniti. Imma mbagħad għandek l-Istati Uniti li trid li jkollha aktar rabtiet mill-qrib mal-Unjoni Ewropea. Jien naħseb li din id-deċiżjoni se jkollha effett fuq deċiżjonijiet f'pajjiżi oħra. Hemm ċans li tkun kontaġjuża. Tbeżżagħni li dan forsi hu l-bidu tat-tmiem tal-Unjoni Ewropea, għalkemm ma nemminx li dan jiġri.”


“Dak li kien jgħid Alfred Sant xi jfisser? … Kien qed jaħseb għat-tul?”
      - l-Avukat Franco Debono


Wara r-riżultat fir-Renju Unit, f'Malta kien hawn min reġa' mar lura għad-dibattitu qalil li kien seħħ f'pajjiżna 12-il sena ilu b'rabta mad-dħul ta' Malta fl-Unjoni Ewropea. L-eks Deputat Parlamentari Franco Debono staqsa xi jfisser dak li ġie deċiż fir-Renju Unit, meta tqabblu ma' dak li kien jgħid l-eks Prim Ministru Dr Alfred Sant fuq l-Unjoni Ewropea. Staqsa jekk Dr Sant kienx qed jgħid il-ħmerijiet jew inkella kien qed jaħseb fit-tul. L-avukat Franco Debono, fir-reazzjoni tiegħu għal dak li ġara fir-Renju Unit, ikkummenta li, "Wara l-vot Brexit jiġini f'moħħi Alfred Sant, bniedem akkademikament brillanti li għoxrin sena ilu verament ried inaddaf il-politika u li ried relazzjoni speċjali mal-Unjoni Ewropea iżda mhux sħubija, u persuna li minkejja l-kwalitajiet tiegħu qatt ma ġie apprezzat minn dan l-pajjiż. Wara l-vot Brexit xi jfisser dak li kien jgħid Alfred Sant? Jagħmel aktar jew anqas sens illum? Alfred Sant kien qed jgħid ħmerijiet jew bniedem li jaħseb għat-tul ? Nistaqsi." Hu ddikjara wkoll li, "Dan hu mument ta' riflessjoni u diskussjoni madwar l-Ewropa u madwar d-dinja. Tajjeb nirriflettu u niddiskutu aħna wkoll".


"Mhux petizzjoni, imma nintrabtu fi Gvern ta' koalizzjoni biss ma' partit li jagħmel referendum f'Malta fi żmien sentejn"
    - Ivan Grech Mintoff


Ivan Grech Mintoff, mistoqsi jekk hemmx xi ħsieb li l-Alleanza Bidla tibda tiġbor petizzjoni biex isir referendum f'Malta dwar l-Unjoni Ewropea, qalilna li, "Flok petizzjoni għal referendum biħsiebna nirrappreżentaw lin-nies biex issir bidla ta' veru. Lesti nintrabtu ma' partit fil-Gvern jekk dan jilqa' waħda mit-talbiet tagħna li jsir referendum fi żmien sentejn mindu tkun saret l-elezzjoni." Grech Mintoff sostna li, "Il-Partit Alleanza Bidla ilu jgħid għal dawn l-aħħar snin li l-politikanti mexjin f'direzzjoni differenti minn dak li jixtieq il-poplu. Flok jirrappreżentaw lill-popli, qed jirrappreżentaw lill-bankiera u l-lobbyists, u l-poplu xeba' u jrid lura s-sovranità. Wara l-Ingliżi issa għadhom kemm tkellmu l-Franċiżi, in-Norveġiżi, Żvediżi u l-Olandiżi u lkoll qed juru li jixtiequ referendum ukoll. Jekk hu bħalma qed nisimgħu, il-Prim Ministru Malti u l-Kap tal-Oppożizzjoni issa fehmu li l-Unjoni Ewropea għandha bżonn riforma u allura għandhom jitilqu mill-grupp tal-Partiti Popolari Ewropej u l-Grupp tal-Partiti Soċjalisti Ewropej u jidħlu magħna fi gruppi Ewropew oħrajn li jridu riforma. Inkella kollox kliem fieragħ." Sostna li, "Dan is-sentiment ta' tibdil jinħass fil-poplu Malti u allura nitolbu lill-Prim Ministru Malti biex imur jinnegozja pakkett ġdid u aħjar mal-Unjoni Ewropea u jiġi Malta u jħalli l-poplu Malti jiddeċiedi jekk jibqax fl-Ewropa permezz ta' referendum. Tliet snin ilu meta ħriġna bħala alleanza konna Laburisti u Nazzjonalisti li rajna li l-pakkett mhux tajjeb. Nigel Farage kien laqagħna dakinhar."

"Diżappuntat ħafna...se nlaqqa' l-managers"
     
 - il-lukandier Norbert Grixti


"Għamilt lejl insegwi. Diżappuntat u inkwetat ħafna. Dan għax aħna l-akbar ammont ta' turisti li jiġu f'pajjiżna ġej mir-Renju Unit. Issa diġa għandek il-waqgħa fil-valur tal-Isterlina. Dan ifisser li issa se jkun hemm titjiriet aktar għaljin f'dawk li huma prezzijiet. Dan hu l-ewwel riżultat. Dalgħodu stess se nlaqqa' l-managers tal-lukanda biex niddiskutu s-sitwazzjoni u nanalizzaw. Kellna xitwa tajba ħafna u anke s-sajf jidher tajjeb ħafna, għalkemm għad fadal xi xogħol x'jidħol fosthom għal Awwissu".


Dan sostnieh, Norbert Grixti General Manger tal-Lukanda Excelsior, li hi waħda mill-akbar lukandi f'Malta meta kuntattjat minn inewsmalta.com biex jikkummenta dwar il-vot fir-Renju Unit fejn il-poplu ddeċieda li joħroġ mill-Unjoni Ewropea. 

Lukandier ieħor li tkellem ma' inewsmalta.com qalilna li "l-aktar li jħassibna hi l-waqgħa tal-Isterlina. Din irridu naraw kif se taffettwa t-turisti li jiġu lejn pajjiżna. Qabel nikkummentaw irridu naraw x'se jiġri. Imma ovvjament diżappuntati ħafna b'din id-deċiżjoni."

Ix-Xewkin bl-akbar arblu bla ventijiet

Ix-Xewkin li din il-ġimgħa qed jiċċelebraw il-festa ta' San Ġwann Battista, żanżnu l-akbar arblu f'Għawdex. Dan fih 80 pied u hu bla ventijiet.
L-arblu se jitbierek illejla waqt il-marċ magħruf bħala 'Tal-Ħniena'. Ta' min jgħid li għall-ħames sena konsekuttiva, fis-Sede tas-Socjeta’ Filarmonika Prekursur qed tittella’ esebizzjoni oħra fil-ġimgħa tal-festa.
Is-sena 2016 hija waħda speċjali għall-Kumitat Żgħażagħ Brijużi Xewkin, għaliex fiha qed jiċċelebraw l-20 sena mit-twaqqif tal-Kumitat Żgħażagħ Brijjużi Xewkin li llum il-ġurnata huwa sotto kumitat fi ħdan is-Socjeta’ Filarmonika Prekursur.
Sabiex ifakkru dan l-avveniment tellgħu esebizzjoni bl-isem ‘Ħidmietna’ fejn qer juru bosta xogħlijiet li twettqu volontarjament matul is-snin mill-membri fi ħdan il-kumitat kif ukoll minn żgħażagħ oħra li jiġu jagħtu daqqa t’id sabiex il-proġetti jitlestew fil-ħin. Minbarra li qed juru ħidmiethom permezz ta’ din l-esebizzjoni, se jkunu qed jistimulaw żgħażagħ oħra sabiex jagħtu s-sehem tagħhom fil-volontarjat billi jagħmlu użu mill-ħiliet tagħhom kif ukoll jitgħallmu jagħmlu xogħol ieħor, bħall-ħjata, żebgħa, welding, tfassil ta’ drapp u tpenġija fost oħrajn.
Permezz ta’ dan, inkunu qed ibiegħdu aktar iż-żgħażagħ mill-vizzji qerrieda li qed joħonqu s-soċjeta’ tal-lum. L-esebizzjoni infetħet uffiċjalment nhar it-Tnejn 20 ta’ Ġunju 2016 u ddum miftuħa ġimgħa u ġiet inawgurata mill-Onor. Ministru għal Għawdex Dr. Anton Refalo.

Aġġornat: Jum ta' salvataġġi...l-immigranti salvati telgħu għal 4,500 persuna

20:00  Matul il-ġurnata tal-Hamis l-ammont ta’ immigranti salvati mir-rotta taċ-ċentru tal-Mediterran, jiġifieri dik bejn il-Libja u Sqallija, telgħu għal xejn inqas minn 4,500 persuna.
Il-Gwardi tal-Kosta Taljani ħabbru dan ftit ħin ilu, fejn iddikjara li jidher li ħafna persuni telqu mil-Libja hekk kif fl-aħħar jiem it-temp kien wieħed tajjeb biex isiru vjaġġi fuq il-baħar.
Il-kelliem qal li b’kollox matul il-ġurnata ta’ llum saru 40 operazzjoni ta’ salvataġġ. F’dawn is-salvataġġi kien hemm persuna li nstabet mejta fuq dinghi. Il-parti l-kbira tal-immigranti kienu qed jivvjaġġaw fuq dinghies.
Aktar qabel: "Dan hu jum li qatt mhu se ninsieh. Il-bastiment hu mimli persuni salvati". Dan jiddikjarah Sebastian Stein wieħed mill-persuni li jinsab abbord il-bastiment Argos immexxi minn Medecins Sans Frontieres li fl-aħħar sigħat kienu involuti f'għadd kbir ta' salvataġġi.
Filfatt f'temp ta' ftit sigħat il-bastiment Argos ta' Medecins Sans Frontieres salva xejn inqas minn ħdax-il dgħajsa mimlijin bl-immigranti.
B'kollox ġew salvati kważi 1,200 persuna. Voluntieri li qegħdin abbord il-bastiment jiddeskrivu s-sitwazzjoni bħala li 'qed naraw dgħajsa wara dgħajsa".

Miżbla fil-qasam industrijali tal-Mosta

Għal darba oħra, xi persuna jew persuni irresponsabbli għażlu li jiddisponu minn oġġetti u skart li ma kellhomx bżonn billi rmewh fuq bankina fi triq fil-qasam industrijali tal-Mosta.
Immedjatament ħaddiema li jaħdmu fil-qrib irrappurtaw lill-awtoritajiet u d-Direttorat għat-Tindif naddaf il-post.

"Ħriġt il-mowbajl u ma ridtx nitlef dak il-mument ta' fekruna tgħum f'Wied l-Għasri" - Aleksa Ristovic

Qatt m'għaddielu minn rasu li mawra sa Wied l-Għasri f'Għawdex kienet se twasslu biex jara quddiem għajnejh waħda mill-isbaħ kreaturi tal-baħar.
Tista' tgħid li ma setax jemmen lil għajnejh meta ra l-mewġ tal-baħar qed iġorr miegħu xi ħaġa kannella. Baqa' jsegwi u ra li kienet fekruna tal-baħar. Sorpriż għall-aħħar, hu ħareġ il-mowbajl u ma tilifx mument wieħed sakemm il-fekruna reġgħet ħarġet 'il barra u għebet mal-mewġ.
inewsmalta.com għamel kuntatt ma' Aleksa Ristovic, u qalilna li, "Jien personalment inħobb nesplora kull rokna ta' post ġdid li nkun żort. Jien nħobb ħafna n-natura. Xħin rajt dik il-kreatura ma ridtx nitlef mument. Dehret għal xi ħin f'diffikultà minħabba l-mewġ qawwi. Imma rnexxielha toħroġ 'il barra."

Klieb li jivvjaġġaw fuq il-katamaran qed jitħallew fil-garaxx fis-sħana
   
•    Persuni jew familji li jtellgħu klieb magħhom għal vaganza fi Sqallija qed jispiċċaw ikollhom iħallu dawk il-klieb fil-garaxx tal-katamaran, fejn ikun hemm sħana kbira b'mod partikolari f'dawn iż-żminijiet.
Il-kwistjoni tqajmet fil-Parlament illejla, fejn issemma l-punt li dawk il-klieb mhux biss qed ibatu imma għandhom riskju li jmutu b'dik li tissejjaħ 'heat stroke'.
Il-Ministru Josè Herrera ddikjara li dwar dan għaddejja ħidma biex ikun hemm politika ċara biex l-operatur jassigura l-aħjar kundizzjonijiet ta' ħarsien għall-annimali waqt it-traġitt bil-baħar. Il-kwistjoni tqajmet mid-Deputat Nazzjonalista Mario Galea, li ddeskriva dan bħala każ ta' moħqrija ta' annimali.

Iż-żieda qawwija fit-tariffi għat-trasport tal-iskejjel...investigazzjoni mhix mitmuma
   
•    Il-kwistjoni dwar żidiet fit-tariffi tat-trasport għal xi skejjel, fejn hemm ġenituri li għadhom ma jafux jekk hux se jħallsu t-tariffi l-qodma jew il-ġodda, kienet trattata fi-Parlament fejn sar magħruf li l-investigazzjoni mill-Awtorià ta' Malta għall-Kompetizzjoni u għall-Affarijiet tal-Konsumatur (MCCAA) għadha għaddejja.
Sar magħruf ukoll li mhux magħruf kemm hemm familji milqutin minn dawn iż-żidiet.
Fi tweġiba Parlamentari għal mistoqsija tad-Deputat Nazzjonalista Clyde Puli, il-Ministru Evarist Bartolo qal li "l-Uffiċċju għall-Kompetizzjoni għadu għaddej bl-investigazzjoni dwar iż-żieda fit-tariffi tat-transport tat-tfal tal-iskola.
F'dan l-istadju l-Uffiċċju għalkemm ħa inkonsiderazzjoni dak li kellhom xi jgħidu l-ġenituri fl-ilment tagħhom, ħass li kellu jikkuntattja direttament lill-parti investigata u lill-iskejjel. Madakollu, l-Uffiċċju ma jeskludix li jista' jiltaqa’ ma’ xi ġenituri jekk in-neċessità tirrikjedi. L-Uffiċċju m'għandux in-numru ta’ familji li jistgħu jiġu milquta mis-sena skolastika li jmiss", qal il-Ministru.

Villaġġ li baqa' fantażma...nefqu kważi nofs miljun ewro
  
•    Forsi mhux kulħadd għadu jiftakar il-pompa li bih kien tħabbar u tnieda il-proġett ta' Corporate Village fi żmien amministrazzjoni Nazzjonalista. Forsi lanqas għadkom tiftakru id-disinni elaborati li kienu thejjew għal dan il-proġett, li dwaru kien intqal ħafna kliem sabiħ. Proġett li baqa' fantażma.
Imma minkejja dan il-Gvern Nazzjonalista nefaq kważi €500,000 f'konsulenzi u ħidma relatata ma' dan il-proġett li kellu jsir fl-Imrieħel.

Id-Deputat Laburista Anthony Agius Decelis staqsa dwar x'sar minn dan il-proġett, bil-Ministru Chris Cardona jgħid li "x-xogħol preparatorju fuq il-Corporate Village beda fis-sena 2008, meta Alan Camilleri, dak iż-żmien Ċermen tal-Malta Industrial Parks, qabbad lil Deloitte u lill- Architectural Projects Ltd sabiex jibdew iħejju stimi finanzjarji u kunċett ta’ żvilupp għal Corporate Village."

Kompla jgħid li "matul is-sena 2010, ġiet ippublikata espressjoni ta' interess għal iżvilupp tal-Corporate Village, li għaliha kien hemm disa' sottomissjonijiet. Kien f’Mejju tas-sena 2012 li ntbagħtet talba għall-proposti lil kull waħda minn dawn is-sottomissjonijiet. Għalkemm din is-sejħa damet aktar minn tlett xhur miftuħa, kien hemm sottomissjoni waħda biss, li eventwalment ġie deċiż li ma kinitx konformi mat-termini speċifikati".

Qal ukoll li "minħabba n-nuqqas ta’ interess li rriżulta, saħansitra biex jiġi żviluppat dan il-Corporate Village, ma sarx aktar xogħol fuq dan il-proġett. Ta’ min jgħid, li din il-kampanja, bejn konsulenzi varji u kampanja promozzjonali, swiet mhux inqas minn €425,000." Fi tweġiba oħra, l-Ministru Cardona qal li "fis-sena 2010 saret it-tnedija tal-kampanja promozzjonali marbuta mal-Corporate Village, li kienet tinkludi numru ta’ attivitajiet promozzjonali f'Milan u Londra. Minbarra numru ta’ pubblikazzjonijiet, preżentazzjonijiet u saħansitra websajt dedikata għal dan il-proġett, saret ukoll promozzjoni permezz tar-rappreżentanza tal-korporazzjoni f’diversi pajjiżi, li kienu jinkludu l-Ingilterra, Germanja, Libja, l-Emirati Għarab Magħquda u l-Istati Uniti.
Din il-promozzjoni kienet primarjament iffukata sabiex tħajjar operaturi jidħlu għall-iżvilupp tal-Corporate Village iktar milli biex tattira investiment barrani. Għalkemm intefqu mhux inqas minn €84,000 għal din il-kampanja promozzjonali, l-għan tagħha baqa' ma ntlaħaqx. Dan għax la ġew attirati operaturi li konkretament kienu nteressati jiżviluppaw dan il-proġett, wisq inqas biex jibdew joperaw mill-Corporate Village."

Air Malta: 'Nisfidah jippubblika l-pariri tiegħu u aħna mbagħad nippubblikaw tagħna'
        - il-Ministru Edward Zammit Lewis

 Il-Ministru Edward Zammit Lewis qal li dawn kienu tliet snin fejn il-Gvern ma beżgħax jieħu d-deċiżjonijiet. Qal li dan il-Gvern ħa deċiżjonijiet anke iebsin, xi ħaġa li turi l-ġenwinità tiegħu. “Sar ħafna xogħol tajjeb. Ammettajna fejn żbaljajna. Mexxejna l-affarijiet għal benefiċċju tal-poplu Malti” qal il-Ministru Edward Zammit Lewis.

Zammit Lewsi qal li l-Kap tal-Oppożizzjoni Simon Busittil jikkritika biss. Qal li L-Partit Laburista għandu għall-qalbu lil Air Malta, li kien waqqafha biex taqdi skop soċjali.
Il-kelliem qal li l-Air Malta ilha titlef flus sa mill-2003. Qal li għal din is-sitwazzjoni, il-Partit Nazzjonalista ma għamel xejn. Imbagħad il-Partit Nazzjonalista għamel pjan ta' azzjoni bejn l-2010 u l-2011 mal-Unjoni Ewropea.
Qal li l-PN għamel pjan ta' azzjoni għal ħames snin, daħħal ħafna konsulenzi.
 “Issa ġimgħa ilu l-Kap tal-Oppożizzjoni ried isolvi l-problema billi jagħti x-shares lill-ħaddiema. Jien tkellimt mal-Prim Ministru, li min-naħa tiegħu dejjem jgħid fuq l-Air Malta irridu nġibu l-aktar deal tajjeb” qal il-Ministru Edward Zammit Lewis.
Min-naħa tiegħu, il-Ministru Zammit Lewis qal li lbieraħ ħarġet fuq gazzetta bl-Ingliż li l-Gvern għandu żewġ pariri, li dak li qal il-Kap tal-Oppożizzjoni ma jistax isir minħabba l-fatt li l-kumpanija ilha tagħmel telf għal snin twal. Min-naħa tiegħu, il-Ministru Zammit Lewis serraħ moħħ il-ħaddiema li dawn l-affarijiet ma humiex se jsiru.






Aktar qabel: Il-Ministru għat-Turiżmu Edward Zammit Lewis sfida lil-Kap tal-Oppożizzjoni Simon Busuttil biex jippubblika l-pariri li għandu biex ishma tal-Air Malta jinbiegħu lill-pubbliku.

F’kummenti li għadda lit-TORĊA, il-Ministru Zammit Lewis qal li wara l-Kap tal-Oppożizzjoni jagħmel dan, il-Gvern imbagħad jippubblika ż-żewġ pariri li għandu. 
Huwa enfasizza li, “Il-Kap tal-Oppożizjoni tkellem b’mod opportunistiku politikament. Għal lum il-ġurnata dak li qiegħed jgħid hu mhuwiex vijabbli. Għandna Kap tal-Oppożizzjoni maħkum minn opportuniżmu politiku li juża l-ħaddiema tal-Air Malta biex jgħid affarijiet li seta’ jagħmilhom il-Partit Nazzjonalista meta kien fil-Gvern.”
Ta’ min jgħid li l-proposta ta’ Busuttil, wasslet ukoll għal reazzjoni minn diversi kumpaniji involuti fis-servizzi finanzjarji u awdituri. L-istess kumpaniji qegħdin jgħidu li fiċ-ċirkostanzi ma jagħmel ebda sens li toħroġ ishma għall-pubbliku għax m’hemmx dak li huma jsejħulu ‘business case’. Dan minħabba l-istat finanzjarju tal-kumpanija. 
Awditur partikolari qalilna li, "Hu fatt li ma jistgħux jinħarġu ishma għall-pubbliku għax biex dan isir hemm bżonn li jkun hemm profitt reġistrat għal tliet snin infila." Kumpanija oħra ddikjarat li, "Mill-kontijiet tal-Air Malta għas-sena 2015 jirriżulta li hemm toqba ta' €60 miljun. Biex ir-regolatur iħallik toħroġ fis-suq għall-pubbliku trid tgħidlu kif se tagħlaq din it-toqba."
L-istess rappreżentanti ta' kumpaniji meta tkellmu ma' l-ORIZZONT, spjegaw li hemm differenza totali bejn li jinġab sieħeb strateġiku kif jidher li hi l-mira tal-Gvern u l-fatt li jinħarġu ishma għall-pubbliku. Bi sħab strateġiku se ddaħħal tmexxija u ideat ġodda, u b'ishma għall-pubbliku se ddaħħal biss flus u kollox jieqaf hemm. Sid ta' kumpanija ewlenija qalilna li, "Tajjeb li ddaħħal il-pubbliku, imma fil-mument u fiċ-ċirkostanzi tal-Air Malta din tista' ssir? Hemm proċeduri rigorużi u għandi dubji kemm tista' ssir. U liema huma dawk il-kumpaniji u stock brokers li se jidħlu għal dan il-proċess fl-istat li hi l-Air Malta?. Min se jinvesti f'xi ħaġa li fl-immedjat ma jidhirx li se tagħmel qliegħ?"
Intant, il-Ministeru għat-Turiżmu qal li huwa tal-opinjoni li l-aħjar triq li tista’ taqbad l-Air Malta hija dik li twassal għal sħubija strateġika ma’ airline jew familja ta airlines oħra. 
“Din l-isħubija tagħti vantaġġi ta’ network, ta’ aktar saħħa, ta’ negozjar f dak li għandu x'jaqsam ix-xiri kollu li tagħmel il-linja tal-arju u titjib fis-sistemi li tuża l-kumpanija, grażżi għal qsim ta' informazzjoni li jsir bejn il-linji tal-ajru li li  jkunu sħab. Min naħa l-oħra, bejgħ ta ishma lill-pubbliku ma jagħtu xejn ħlief injezzjoni ta flus fil-kumpanija. Ħaġa li minnha nfisha mhux ħazina, pero li ma tagħtikx 'economies of scale', ma tgħinx lill-kumpanija tikber u lanqas tnaqqas l-ispejjeż. Fi kliem ieħor il-flus injettati ma jgħinux biex il-mudell ta' negozju jitjieb.”

Qal ukoll li, “hemm il-problema li dak li qed jipproponi il-Partit Nazzjonalista fil-prattika diffiċli biex ma ngħidx impossibli li jseħħ għax ma nista’ nimmaġina l-ebda stock exchange li ser jillistja l-ishma ta' kumpanija li għandha storja ta’ telf ta miljuni ta’ Ewro għal snin twal. Din il proposta hija waħda irresponsabbli u mhux fattibbli.”
minn inewsmalta.com

'Se nibqa' niġġieled sakemm il-pazjenti jieħdu d-dritt tagħhom lura'
         - Silvio Parnis
  

    Fl-aħħar jiem kienu diversi dawk l-anzjani li għamlu kuntatt ma' inewsmalta.com dwar x'ġara mill-Kartuna r-Roża. Kien hemm min qalilna li mar l-isptar u sab li l-pilloli Metformin inqalbulu fuq il-Kartuna s-Safra. Ovvjament qed iqumu ħafna ilmenti għax qed jingħad li dan ifisser li jekk issa jkollhom bżonn 'hearing aide' iridu jħallsuh huma bi spiża ta' madwar 500, dentaturi l-istess, waqt li jiġu affettwati servizzi ta' telecare u benefiċċji fuq kera tas-servizz tat-telefon.  Dwar il-tneħħija tal-Kartuna r-Roża, inbdiet kampanja mid-Deputat Laburista Silvio Parnis.

F'kummenti lilinewsmalta.com hu qalilna li "bdejt din il-kampanja fuq il-Kartuna r-Roża. Bdejtha fil-Parlament u se nibqa' niġġieled sakemm dan id-dritt tal-pazjent inġibuh lura. Dan hu dritt li qed jinsteraq lill-pazjent. Nemmen li sakemm dan id-dritt hu hemm, dan għandu jgawdi minnu l-pazjent. Qed nitlob xi ħaġa sempliċi. Li  min kellu Kartuna Roża sa qabel is-sena 2012, tintbgħatilhom ċirkolari biex huma jiddeċiedu jekk iridu jinqalbu fuq il-Kartuna s-Safra. Il-fatt li qed imorru l-isptar u jsibu li nqalbu minn fuq il-Kartuna r-Roża għal fuq il-Kartuna s-Safra ifisser li qed jitilfu diversi benefiċċji fosthom fuq it-telefon."

Intant fl-Aġġornament fil-Parlament, id-Deputat Laburista Silvio Parnis qal li "ma rridx inkun numru fil-Parlament.” Qal li dawk il-persuni li kellhom Kartuna Roża sa minn qabel is-sena 2012 kienu dijabetiċi u kellhom dritt li jibqgħu jġeddu l-Kartuna r-Roża. Hu talab lill-Ministru jara li kull min kellu l-Kartuna r-Roża għax huwa dijabetiku jiġi kkuntattjat u terġa’ tinħareġ din il-Kartuna r-Roża.
Talab ukoll lill-Ministru jieħu azzjoni dwar mijiet ta’ nies li qalbulhom il-pilloli minn fuq il-Kartuna r-Roża għal fuq il-Kartuna Safra kontra r-rieda tagħhom u b’hekk tilfu ħafna drittijiet li kellhom. Dan minkejja li fit-tweġiba li kellu mill-Ministru kienet tgħid li permezz ta’ Avviż Legali fl-2012 id-Diabetes Mellitus Type 1 u Type 2, flimkien mat-Tuberkolożi, il-Poljo u l-Lebbra tneħħew minn fuq l-Iskeda II (Il-Kartuna r-Roża) u żdiedu mal-Lista tal-Kundizzjonjiet Kroniċi li jaqgħu taħt l-Iskema V (Il-Kartuna s-Safra).
Fl-2012 il-pazjenti li kienu jbatu mill-kundizzjoni tad-dijabete ngħataw l-għażla jekk jaqilbux għall-Kartuna s-Safra jew jibqgħux fuq il-Kartuna r-Roża. Il-kelliem qal li għaldaqstant, minkejja l-ispjega ċara tal-ministru, mhux hekk qed jiġri.
Hu talab laqgħa urġenti mal-Ministru għas-Saħħa. Dan biex dawk li kellhom il-Kartuna Roża qabel is-sena 2012 għax kienu dijabetiċi u ġiet imneħħija kontra r-rieda tal-pazjenti jiġu avviċinati biex terġa' tingħata lura din il-Kartuna Roża bi dritt permezz tal-Avviż Legali tas-sena 2012.
minn inewsmalta.com

Is-Santwarju tal-Madonna tal-Ħniena fil-Qrendi...jibqa' jistenna
   

Skultura fina iżżejjen il-madwar tas-Santwarju tal-Madonna tal-Ħniena fil-Qrendi.  Faċċata Barokka mill-isbaħ.  Meqjus bħala wieħed mill-isbaħ santwarji li għandna imma xejn mhux fi stat tajjeb. Sfortunatament minkejja ftehim li jmur lura għal diversi snin biex is-santwarju jkun restawrat u jitgawda fl-aħjar livell, is-sitwazzjoni hi li dan baqa' qatt ma seħħ. 
inewsmalta.com hu nfurmat li dan ma seħħx minħabba intoppi marbutin ma' fondi, fejn minkejja li hemm bżonn xejn inqas minn €300,000 biex isir ir-restawr. Sa issa għad m'hemm ebda żblokk biex dawn il-problemi jintgħelbu.
inewsmalta.com hu infurmat li dan is-santwarju hu proprjetà tal-Knisja f'Malta u kien hemm ftehim ta' restawr li kien iffirmat xi snin ilu ma' Din l-Art Ħelwa. Dan il-ftehim kien jirrigwarda l-immaniġġjar tas-sit miż-żewġ entitajiet. Ġara iżda li għal xi raġuni jew oħra il-flus biex jinbeda u jitlesta r-restawr qatt ma mmaterjalizzaw.
 L-istess sorsi spjegawlna li Din l-Art Ħelwa kienet qed tagħmel sforzi kontinwi  biex issit ikun  restawrat minkejja l-ostakli kollha li kien hemm.
Ġara li l-Kunsill Lokali tal-Qrendi offra li l-pjazza li hemm quddiem is-santwarju tkun irranġata u pavimentata.  Filfatt saret applikazzjoni mal-Awtorità għall-Ambjent u l-Ippjanar (MEPA).  Biex jitwettaq il-proġett tal-pavimentar il-kunsill kien qed jaħdem biex dan isir minn fondi Ewropej. Ġara li l-kunsill lokali u Din l-Art Ħelwa ingħaqdu bl-għan li jkun hemm il-possibilità li jingħataw fondi Ewropej anke għar-restawr tas-santwarju. 
Ir-restawr għas-santwarju hu stmat li jiswa madwar €300,000.
Biss l-intopp ġdid li inqala' hu dak li biex dan isir hemm bżonn li 20 fil-mija tal-ispiża tinħareġ bejn il-kunsill u Din l-Art Ħelwa. Jidher li waqt li l-Kunsill Lokali hu lesta li jagħmel dan, Din l-Art Ħelwa qed tgħid li m'għandhiex dawn il-fondi disponibbli.
Quddiem dan, inewsmalta.com hu infurmat li qed isiru appelli biex jintervjeni l-Gvern bħal ma ġara fil-każ tal-proġett ta' San Mattew tal-Maqluba.  Intqal lilna li l-fondi għal dak il-proġett kienu inġabu minn "Malta Goes Rural".
Din il-kappella tinsab eżatt fis-sit fejn fi żmien  medjevali kien hemm kappella oħra iddedikata għall-Madonna tal-Ħniena.  Din tinsab fil-post magħruf bħala Ħal Lew. Il-kappella li hemm illum inbniet bejn is-sena 1650 u s-sena 1668.

Ritratt: Anthony Xuereb
minn inewsmalta.com

L-Avultun ma ntbagħatx Sqallija qabel ma reġa' ġie eżaminat minn veterinarju
   

Minkejja l-polemika li nqalgħet dwar il-mewt tal-Avultun Maximus, inewsmalta.com huwa infurmat li l-Avultun ma ntbagħatx Sqallija qabel ma reġa’ ġie eżaminat minn vetrinarju li ċċertifika li l-għasfur seta’ jiġi trasportat. 

Wara li dan miet nhar il-Ġimgħa 10 ta’ Ġunju, jumejn wara l-wasla tiegħu fi Sqallija, l-ORIZZONT talab għar-reazzjoni tas-Segretarjat Parlamentari għall-Biedja, Sajd u Drittijiet tal-Annimali.


Is-Segretarjat Parlamentari qal li l-Awtoritajiet Maltin flimkien ma’ Birdlife Malta għamlu dak kollu possibbli biex l-imsemmi Avultun jingħata l-kura kollha possibbli. Qal ukoll li l-Awtoritajiet u l-Birdlife qed jistennew ir-riżultat tal-awtopsja mill-veterinarji Taljani. 
Ta’ min ifakkar li l-mewt tal-Avultun kien wassal għal battibekk bejn il-kaċċaturi u l-għaqda BirdLife biż-żewġ naħat jagħmlu akkużi fil-konfront ta’ xulxin.


Kien Lino Farrugia, f’isem il-FKNK, li rrimarka kif kull għasfur li jinġabar jew jingħata lill-BirdLife biex iddewwih u jerġa’ jintelaq fis-selvaġġ jew jinqatel mill-istess BirdLife jew imut.

“Il-BirdLife misshom kienu jafu li l-avultun ma kienx f’kundizzjoni ta’ saħħa biżżejjed biex jintbagħat barra biex jinħeles. Imma, milli jidher, l-importanti hu l-fatt li l-BirdLife ħadu l-pubbliċità bil-prominenza neċessarja mill-midja.” 

Farrugia sostna li milli jidher l-avultun miet kaġun tal-istess negligenza tal-BirdLife u appella lill-mezzi tax-xandir biex ma jibqgħux siekta imma għandha tgħid x’ġara.


Huwa qal li fl-opinjoni tal-FKNK dan l-inċident wera biċ-ċar li l-BirdLife mhux vera jimpurtaha mill-protezzjoni tal-għasafar imma moħħha biss biex tapprofitta minn kull okkażjoni sabiex tieħu l-popolarità mill-midja u tkompli takkwista l-fondi b’tali “teatrini”. 

Il-BirdLife irreaġixxiet għall-kumment ta’ Farrugia fejn qalet li hi ntalbet biex tassisti u tieħu f’idejha l-għasfur mill-Gvern wara li dan kien salvat minn diversi entitajiet governattivi fosthom il-Wild Birds Regulation Unit, l-Awtorità tar-Riżorsi u l-Ambjent, it-taqsima tal-Administrative Law Enforcement (ALE) tal-Pulizija, id-Diviżjoni Veterinarja tal-Gvern u ħaddiema tal-Malta Freeport.


BirdLife iddikjarat li hi dejjem ħadmet, kif se tkompli tagħmel, biex tħares in-natura u l-għasafar fl-interess tal-ġid komuni u rrirmakat li wasal iż-żmien li l-federazzjoni tal-kaċċaturi wkoll tibda tfittex li tikkollabora minflok kontinwament taħli l-ħin tipprova twaħħal f’dak u fl-ieħor.
minn inewsmalta.com

"Qatt ma ddiskutejna d-dħul tal-morning after pill f'pajjiżna"
           - NCPE

        Il-kwistjoni dwar il-fatt li sar protest ġudizzjarju biex f'pajjiżna tidħol il-pillola kontraċettiva ta' emerġenza magħrufa bħala 'morning after pill',  qed isir magħruf li l-Kummissjoni Nazzjonali għall-Promozzjoni tal-Ugwaljanza (NCPE) qatt ma ddiskutiet jekk din il-pillola kontraċettiva ta' emerġenza għandhiex tidħol f'pajjiżna.

Wara li fl-aħħar jiem diversi organizazzjonijiet tan-nisa qagħdu lura milli jesprimu ruħhom, l-Kummissjoni Nazzjonali għall-Promozzjoni tal-Ugwaljanza (NCPE)  meta mistoqsijin dwar il-protest ġudizzjarju li sar, qalulna li "hu d-dritt ta' kull ċittadin li  jressaq protest ġudizzjarju u l-NCPE tara b'mod pożittiv l-fatt li nisa Maltin ikunu attivi dwar kwistjonijiet li jikkonċernawhom.
Dwar dan il-protest, wieħed irid jistenna x'se tkun id-deċiżjoni tal-Qorti".  

Mistoqsijin dwar jekk qattx kellhom diskussonijiet biex din il-pillola tidħol f'pajjiżna, qalulna li "sa issa l-Kummissjoni qatt ma kellha okkażjoni li tiddiskuti dan is-suġġett iżda mistenni jkun diskuss fil-ġranet li ġejjin". 

inewsmalta.com irrapporta fl-aħħar jiem li il-Grupp Parlamentari Laburista se jkun qed jiddiskuti din il-kwistjoni.


Intant f'messaġġ li ħarġu, l-Arċisqof Charles J. Scicluna u l-Isqof Mario Grech esprimew tħassib għall-protest ġudizzjarju li tressaq fil-Qrati mill-Fondazzjoni għad-Drittijiet tal-Mara, biex f’pajjiżna tiġi legalizzata l-pillola morning-after.

Huma qalu li japprezzaw li qabilhom diġà esprimew dan it-tħassib għaqdiet u organizzazzjonijiet u tant oħrajn li fostna għadhom jemmnu li d-dinjità tal-ħajja umana għandha tkun imħarsa u rispettata sa mill-konċepiment.

"Nagħmluha ċara li aħna napprezzaw il-ħidma favur id-drittijiet tal-mara fis-soċjetà tagħna biex ikunu rispettati u promossi bla heda r-rwol u d-dinjità tal-mara. Fl-istess waqt, aħna favur id-drittijiet tal-persuna fil-ġuf li għalkemm ma għandhiex qawwa ssemma’ leħinha, id-dritt tagħha għall-ħajja għandu jiġi mħares bil-qawwa kollha. Għalhekk, aħna naffermaw b’saħħa li l-legalizzazzjoni ta’ din il-pillola, li hija f’ħafna każi abortiva, m’għandhiex tkun kwistjoni marbuta mad-drittijiet tal-mara jew sempliċement mas-saħħa riproduttiva tagħha," qalu l-isqfijiet.
Huma saħqu li "fejn hemm bidu ta’ ħajja umana ġdida, hemm kwistjonijiet ferm iktar serji u delikati li jekk ninjorawhom inkunu biss qed nimminaw l-iktar valuri sagri li s-soċjetà u l-konvivenza bejnietna jagħmluhom iktar denji tal-bniedem. Hu s-sens qawwi ta’ umanità u l-fermezza li neħtieġu biex nibqgħu nipproteġu fil-kultura tagħna bħala poplu l-valur u d-dinjità ta’ kull ħajja umana sa mill-konċepiment li għandhom jgħaqqduna flimkien quddiem kwistjoni bħal din. Il-kwistjoni għalina tibqa’ l-fibra morali tas-soċjetà tagħna: mingħajrha nkunu nżarmaw mhux biss dak li rċevejna, imma anke nispiċċaw m’għandna xejn x’ngħaddu lil ta’ warajna, temmew jgħidu l-isqfijiet."


Il-kwistjoni kellha l-bidu tagħha meta l-Fondazzjoni għad-Drittijiet tan-Nisa ippreżentat protest kontra l-Gvern Malti fejn qed titlob li f’Malta titħalla tidħol il-pillola tal-kontraċezzjoni magħrufa bħala 'morning after pill', biex il-mara tkun tista’ twaqqaf milli toħroġ tqila.?Minbarra l-protest, li kien iffirmat minn 102 nisa li għandhom bejn 16 u 62 sena, il-Fondazzjoni waqqfet ukoll profil fuq il-Facebook bl-isem 'Emergency Contraception for Malta', biex tippromovi l-kampanja tagħha favur dik li hija magħrufa aktar bħala l-‘morning after pill’.
minn inewsmalta.com

Jinjora l-isfidi dwar l-Air Malta
  

Fl-aħħar jiem il-ġurnal L-ORIZZONT xandar rapporti li fihom rappreżentanti ta' kumpaniji ewlenin ta' awdituri qalu ċar u tond li l-proposta Nazzjonalista li l-ishma tal-Air Malta għandhom jinbiegħu lill-poplu ma tistax isseħħ fil-mument. Wara li xxandru dawn ir-rapporti il-Ministru għat-Turiżmu Edward Zammit Lewis sfida lill-Kap tal-Oppożizzjoni, Simon Busuttil biex jippubblika l-pariri li għandu biex l-ishma tal-Air Malta jinbiegħu lill-pubbliku.
Minkejja din l-isifda li saret u li ġiet pubblikata f'artiklu fuq il-ġurnal it-Torċa, il-Kap tal-Oppożizzjoni lbieraħ waqt intervista għażel li jinjora għal kollox din l-isfida.

Filfatt hu ma semma' xejn dwar din l-isfida mill-Ministru għat-Turiżmu.  Sa issa għad mhux magħruf jekk il-Kap tal-Oppożizzjoni hux se jilqa' din l-isfida. Il-fatt li Simon Busuttil jidher li se jibqa' lura milli jippubblika l-pariri li għandu, qed iqajjem diversi mistoqsijiet dwar x'wassal biex il-Kap tal-Oppożizzjoni jagħmel dik il-proposta, li qed jingħad b'mod ċar li ma tistax titwettaq.


Ilbieraħ filgħodu l-Ministru għat-Turiżmu Edward Zammit Lewis qal li l-proposti tal-Kap tal-Oppożizzjoni dwar l-Air Malta ma jistgħux jitwettqu għaliex il-kumpanija ilha tagħmel telf għal snin twal. 

Il-Ministru Zammit Lewis qal dan waqt laqgħa politika f'Santa Venera, fejn għamel referenza għar-rapport li deher ilbieraħ fuq il-gazzetta t-Torċa.

Meta ken qed jitkellem dwar l-Air Malta il-Ministru Zammit Lewis qal li l-linja nazzjonali tal-ajru ilha titlef il-flus sa mill-2003. Qal li dwar din is-sitwazzjoni, il-Partit Nazzjonalista ma għamel xejn, apparti pjan ta' azzjoni mal-Unjoni Ewropea. 

“Issa ġimgħa ilu l-Kap tal-Oppożizzjoni qalilna li ried isolvi l-problema fl-Air Malta billi jagħti l-ishma lill-ħaddiema. Imma issa nafu li dan ma jistax isir,” qal il-Prim Ministru Joseph Muscat.


Filwaqt li serraħ moħħ il-ħaddiema, li l-proposti tal-Kap tal-Oppożizzjoni ma humiex se jsiru, il-Ministru Zammit Lewis qal li l-Gvern se jaħdem u jinnegozja l-aqwa ftehim għall-Air Malta.

Ta’ min jgħid li l-proposta ta’ Busuttil, wasslet ukoll għal reazzjoni minn diversi kumpaniji involuti fis-servizzi finanzjarji u awdituri. L-istess kumpaniji qegħdin jgħidu li fiċ-ċirkostanzi ma jagħmel ebda sens li toħroġ ishma għall-pubbliku għax m’hemmx dak li huma jsejħulu ‘business case’. Dan minħabba l-istat finanzjarju tal-kumpanija. 

Awditur partikolari qalilna li, "Hu fatt li ma jistgħux jinħarġu ishma għall-pubbliku għax biex dan isir hemm bżonn li jkun hemm profitt reġistrat għal tliet snin infila."
Kumpanija oħra ddikjarat li, "Mill-kontijiet tal-Air Malta għas-sena 2015 jirriżulta li hemm toqba ta' €60 miljun. Biex ir-regolatur iħallik toħroġ fis-suq għall-pubbliku trid tgħidlu kif se tagħlaq din it-toqba."

L-istess rappreżentanti ta' kumpaniji meta tkellmu ma' l-ORIZZONT, kienu spjegaw li hemm differenza totali bejn li jinġab sieħeb strateġiku kif jidher li hi l-mira tal-Gvern u l-fatt li jinħarġu ishma għall-pubbliku. Bi sħab strateġiku se ddaħħal tmexxija u ideat ġodda, u b'ishma għall-pubbliku se ddaħħal biss flus u kollox jieqaf hemm. Sid ta' kumpanija ewlenija qalilna li, "Tajjeb li ddaħħal il-pubbliku, imma fil-mument u fiċ-ċirkostanzi tal-Air Malta din tista' ssir? Hemm proċeduri rigorużi u għandi dubji kemm tista' ssir. U liema huma dawk il-kumpaniji u stock brokers li se jidħlu għal dan il-proċess fl-istat li hi l-Air Malta?. Min se jinvesti f'xi ħaġa li fl-immedjat ma jidhirx li se tagħmel qligħ?"

minn inewsmalta.com

'Stop it' Prim Ministru - għid li mhux se tinnomina lil Alfred Mifsud
             - Il-Kap Nazzjonalista Simon Busuttil
  
 'Stop it PrimMinistru.  Għid li mhux se tinnomina lil Alfred Mifsud bħala Gvernatur tal-Bank Ċentrali, għallinqas sakemm jitneħħa is-sħab griż li hemm bħalissa".
Dan sostnieh il-Kap Nazzjonalista Simon Busuttil, meta f'intervista dalgħodu irrefera għall-allegazzjonijiet marbutin ma' Alfred Mifsud, li fi żmien inqas minn xahar se jkun Gvernatur tal-Bank Ċentrali.
 Hu qal li "dawn lesti li isem Malta fl-Ewropa jimsħu saqajhom fih u din tweġgħana".
Hu qal li "r-reazzjoni ta' Joseph Muscat messha kienet waħda ta' Prim Ministru. Kull ġimgħa qed jinqala' xi ħaġa. Kważi lanqas qed inlaħħqu mal-iskandli. L-aħħar wieħed hu allegazzjonijiet serjissimi marbutin ma' dak li f'inqas minn xahar se jkun il-Gvernatur ta' Malta (Alfred Mifsud). 
Il-Bank Ċentrali tagħna hu marbut mal-Bank Ċentrali Ewropew.  Allura hi konsegwenza ħażina jekk tagħmel l-għażla żbaljata. L-allegazzjoni hi li Alfred Mifsud ħa flus li mill-inqas jaqbżu it-300,000 Ewro. Kont nistenna li fuq allegazzjonijiet serji u li dawn jidhru li ġejjin minn sorsi li tista' toqgħod fuqu, u dawn tant huma serji li diġa waħedhom messhom wasslu biex jgħid li biex ma nagħmilx ħsara lill-Bank Ċentrali se nissospendi lili nnifsi. Ma ħarisx l-interess tal-Bank Ċentrali u baqa' daqs li kieku xejn mhu xejn."

Tenna li "allura dawn se jibqgħu għaddejjin bil-ħatra ta' Gvernatur tal-Bank Ċentrali u allura ħsara kbira lil pajjiżna. Jiġifieri dawn lesti li isem Malta fl-Ewropa jimsħu saqajhom bih. Din tweġgħani ħafna. Li tara lil xi ħadd ieħor jarmi dak li tkun ħdimt għalih int, tweġgħa ħafna."
Appella lill-Prim Ministru joqgħod attent għax hemm rabtiet bejn Joseph Muscat u Alfred Mifsud u dan għax Muscat kien jaħdem ma' Mifsud.
minn inewsmalta.com

'Nisfida lil Owen Bonniċi biex jekk temmen
fil-ġustizzja jressaq il-private members bill għad-diskussjoni
         - Simon Busuttil


Il-każ ta' Emanuel Camilleri, li allegatament għamel kważi 400 ġurnata l-ħabs għalxejn ukoll kien trattat minn Simon Busuttil. Il-Kap Nazzjonalista iddikjara li "l-Ministru Owen Bonniċi hu l-Ministru tal-Inġustizzja u mhux il-Ministru tal-Ġustizzja. Nisfida lil Owen bonniċi li jekk verament temmen fil-ġustizzja, ressaq il-private members bill li ressqet l-Oppożizzjoni fil-Parlament biex din l-inġustizzja titħassar darba għal dejjem."

Dwar dan il-każ inewsmalta.com u L-ORIZZONT ġabu diversi artikli fosthom kummenti minn rappreċentanti ta' għaqdiet li jaħdmu mill-qrib mal-ħabsin. Għamilna ukoll kuntatt mal-familjari ta' Camilleri fejn irrispettajna x-xewqa tagħhom li fil-mument minħabba proċeduri fil-Qorti jkun aktar opportun li ma jixxandrux kummenti. Minn dak li qalulna stajna naraw il-weġgħat li għaddejja minnhom din il-familja.
inewsmalta.com kienet talbet il-kummenti tal-Ministru Owen Bonniċi fejn dan kien qalilna li "waqt li l-Gvern japprezza d-delikatezza tal-każ u l-interess pubbliku dwaru, jirriżulta illi dwar dan il-każ hemm proċeduri pendenti quddiem il-Prim' Awla tal-Qorti Ċivili (Sede Kostituzzjonali) li qegħdin għas-sentenza. Għalhekk huwa indikat li wieħed juża kawtela sabiex ma jkunx hemm pressjonijiet indebiti fuq il-Qorti. Il-Qrati għandhom jitħallew fil-libertà li jiddeċiedu l-kawżi li jkollhom quddiemhom fil-libertà, fl-għerf tagħhom."

Ta' min jgħid li għadd ta' xhur ilu, l-avukat tar-raġel kien instab ħati li abbuża minn bintu imma nħeles mill-ħabs wara li bintu ammettiet li gidbet fuqu, saħaq li mhux sew li kawżi relatati ma’ abbużi sesswali jinstemgħu quddiem maġistrat wieħed. Dr Tonio Azzopardi kien irrimarka dan quddiem l-Imħallef Joseph R. Micallef meta saru s-sottomissjonijiet finali dwar il-kawża kostituzzjonali li Emanuel Camilleri fetaħ kontra l-Avukat Ġenerali, il-Kummissarju tal-Pulizija u l-Ispettur Louise Calleja li investigat l-allegat abbuż tiegħu fuq bintu.
Emanuel Camilleri f'ittra li kiteb lid-Deputat Nazzjonalista Jason Azzopardi u li hu poġġa fil-Parlamenta qal kif hu kiteb lill-Ministru Owen Bonnici iżda baqa' bla ebda tip ta' risposta mingħandu minkejja li għaddew diversi xhur. Fl-ittra hu jistaqsi meta verament se jieħu ħajtu lura.
Jason Azzopardi qal li, "Din hi inġustizzja. X'sens jagħmel li tiġi kommessa inġustizzja f'isem il-ġustizzja? Din hi l-agħar forma ta' inġustizzja. Dan għamel kważi 400 jum il-ħabs allegatament għalxejn. Fuq il-kondotta tiegħu għadu jinstab ħati b'peofelija. Xtaq ikun voluntier fuq attività tal-Community Chest Fund u dan ma setax jagħmlu. Kif juri l-kondotta u peress li għadu misjub ħati ta' pedofelija jgħidulu ibqa' l-bogħod, tersaqx 'l hawn. Lil dawn ma ttihomx tort għax hemm sentenza li nstab ħati ta' pedofelija u s-sentenza ma ġietx ikkanċellata."

minn inewsmalta.com

Bandli ġodda fis-Siġġiewi... post għeri mis-siġar


 Bandli ġodda fis-Siġġiewi li ġie inawgurat llum, qed joħloq ilmenti u rabja minn diversi persuni li għandhom għal qalbhom is-siġar f'pajjiżna.
Għal darba oħra f'dan il-pajjiż sar proġett ieħor fejn rajna ammont ta' siġar jitqaċċtu u jitneħħew miż-żona. Issa li ġie inawgurat il-bandli wieħed jista' jara li dan il-post li kien imsebbaħ u mdellel minn diversi siġar, issa jinsab għeri għal kollox għajr grupp ta' siġar żgħar fuq wara.
"Kemm se ndumu naraw proġetti li jwarrbu għal kollox is-siġar. Kemm se ndumu naraw proġetti karatterizzati mill-konkrit", qalilna persuna li għandu għal qalbu is-siġar. Dan il-bandli fis-Siġġiewi ftit tal-ġimgħat ilu kien ħoloq kontroversja fil-kunsill lokali u dan għax kienet ġiet ippreżentata mozzjoni dwar l-isem li għandu jingħata dan il-bandli ġdid fis-Siġġiewi. L-isem li kien intgħażel tqies bħala kontorversjali u kien ġie propost li jkunu tfal tal-iskola Primarja tas-Siġġiewi li jagħtu isem lil dan il-bandli.
Din il-mozzjoni xejn ma niżlet tajjeb mas-Sindku Nazzjonalista Carol Aquilina.
Kien fi Frar tas-sena 2015, is-Sindku tas-Siġġiewi Dr Karol Aquilina ippropona li dawn il-bandli ġodda jissemmew 'Nalizpelra' li hi l-kelma li Maurice Tanti Burlo` kien juża bħala firma għal karikaturi tiegħu.
Il-Kunsilliera Laburisti fis-Siġġiewi kienu ppreżentaw mozzjoni fis-seduta tal-Kunsill biex jipproponu li l-isem jinbidel. Dan għall-fatt li dan l-isem ma' intgħoġobx ma' ħafna Siġġiwin, kemm għax hu isem diffiċli u ambigwu, kif ukoll għall-fatt li dan l-isem fih konnotazzjonijiet politiċi minħabba li l-mibki karikaturista Maurice Tanti Burlo`kien ta dan l-isem għall-karikaturi li kien ipinġi kontra Mintoff u l-Gvernijiet tiegħu fis-snin 70 u l-80.

Aktar minn hekk nemmnu li hemm personaġġi oħra li storikament u kulturalment huma aktar assoċjati mar-raħal tas-Siġġiewi. Dan qed ngħiduh bl-ebda disprezz lejn il-personalità ta' Maurice Tanti Burlo", kien qalilna wieħed mill-kunsilliera. Kien ġie propost li ssir kompetizzjoni għall-istudenti ta' l-Iskola Primarja tas-Siġġiewi fejn ikunu l-istess tfal li jippropnu isem għal dawn il-bandli ġodda, minflok inkunu aħna bħala kunsill li nippersistu fuq dan l-istess isem. Din il-mozzjoni m'għaddietx.
minn inewsmalta.com

Il-ħruq ta' żona bil-ħarrub fil-Baħrija... jitlesta rapport u jingħata lid-Dipartiment tal-Ambjent

Hekk kif dalgħodu fil-post magħruf bħala 'Tan-Namura' fil-Baħrija marru żewġ uffiċjali mid-Dipartiment tal-Iżvilupp Rurali biex jinvestigaw il-ħruq li seħħ ftit jiem ilu, tlesta r-rapport dwar dan l-inċident u dan ingħata lid-Direttorat għall-Ambjent.
Bir-rapport jindika li n-nirien bdew minn żona partikolari, issa kollox hu f'idejn id-Direttorat għall-Ambjent biex isiru aktar investigazzjonijiet. Mhux eskluż li tista' tintalab l-għajnuna tal-Pulizija. Ir-rapport qed jgħid li n-nar kien inkontrollabbli u li dan wassal biex infirex sew fiż-żona li fiha hemm diversi siġar.


minn inewsmalta.com

Spezzjonijiet fuq bastimenti fil-Mediterran għal armi illegali lejn il-Libja

Il-bastimenti navali tal-pajjiżi membri tal-Unjoni Ewropea li jinsabu barra ibħra Libjani f'missjonijiet ta' salvataġġ ta' immigranti, issa se jkunu jistgħu jibdew jagħmlu spezzjonijiet fuq bastimenti. Dan se jsir b'rabta ma' ġarr u trasport ta' armi illegali lejn u mil-Libja.

Dan ġie deċiż fil-Kunsill tas-Sigurtà tal-Ġnus Magħquda. Waqt li kkundannaw it-trasport ta' armi lejn il-Libja, liema armi qed jispiċċaw anki f'idejn gruppi terroristiċi, ġie awtorizzat li jsiru spezzjonijiet abbord bastimenti. Dan se jsir għal perjodu ta' xejn inqas minn 12-il xahar.

Il-Kunsill qal li l-ispezzjonijiet se jkunu awtorizzati wara li jkun ingħata permess mill-Istat li l-bastiment ikun reġistrat miegħu. Saret sejħa lill-pajjiżi li jirreġistraw il-bastimenti magħhom biex jikkoperaw dwar dawn l-ispezzjonijiet.

Il-kunsill esprima it-tħassib tiegħu lis-sitwazzjoni fil-Libja hu karatterizzata minn kuntrabandu ta' armi illegali. Ġie espress tħassib li dawn l-istess armi qed jispiċċaw f'idejn gruppi terroristiċi inkluż dawk tal-Istat Iżlamiku.

inewsmalta.com talbet reazzjoni mingħand Transport Malta dwar dan il-pass, bir-risposta tagħhom tkun li "minħabba li din hija kwistjoni ta’ sigurtà nazzjonali, jekk jogħġbok irreferi l-mistoqsijiet tiegħek lill-Ministeru tal-Affarijiet Barranin."
minn inewsmalta.com

Miżbliet f'għelieqi u plots f'kontroversja sħiħa fil-Parlament... 'Aqbdu l-barri minn qrunu'
 

Fost l-irħula u bliet tagħna nsibu diversi żoni, għelieqi u plots li jispiċċaw miżbla b'kull tip ta' skart goff u skart ieħor. Xi snin ilu kienet iddaħħlet il-miżura li s-siti jitnaddfu, jinbena ħajt u l-MEPA tħallas lill-kunsill biex imbagħad meta ssir applikazzjoni fuq dak is-sit, is-sid iħallas tal-ispejjeż kollha bl-imgħax.
Fil-Parlament illejla qamet kontroversja sħiħa dwar dan u dan hekk kif membri tal-Oppożizzjoni bdew jistaqsu jekk waqfitx l-iskema li kienet saret mill-Gvern preċedenti, waqt li għan-naħa tal-Gvern, il-Ministru Owen Bonnici qal li hemm diversi artijiet li mhux faċli tkun taf ta' min huma. Qal li se jivverifika jekk waqfitx is-sistema li kien hemm qabel. Hu ddikjara li biex din tissolva hemm bżonn li r-reġistru tal-artijiet u r-reġistru pubbliku isiru reġistru wieħed.
Id-Deputat Nazzjonalista Mario Galea saħaq li l-Gvern għandu jaqbad il-barri minn qrunu u joffri soluzzjonijiet għal dawn il-plots u artijiet. Id-Deputat Nazzjonalista Ċensu Galea staqsa jekk il-Gvern jistax isabbat saqajh u jibni l-ħitan hu. I
l-Ministru Owen Bonnici qal li, "Id-diffikultà tal-proċedura biex tagħmel ħajt hi li jekk is-sid ma tafx min hu, il-kunsill se jkun nefaq il-flus biex inaddafha u flusu ma jiġborhomx. Jekk tonfoq flus biex issebbaħ proprjetà privata ma trid xejn biex iqum xi ħadd u jgħid li ntefqu flus pubbliċi biex issebħet proprjetà privata. Kollox idur mal-fatt li xi darba f'Malta ir-reġistru pubbliku u tal-artijiet ikun reġistru wieħed u tkun taf fi żmien qasir. Jekk is-sid ma jnaddafx jiskatta l-mekkaniżmu li kien daħħal il-gvern preċedenti.”


Id-Deputat Nazzjonalista Mario Galea qal li jippretendi li xi ħadd jaqbad il-barra minn qrunu u tinstab soluzzjoni. Il-Ministru Bonnici wieġeb li, "Jekk hi proprjetà tal-privat b'xi mod u bi tbatija tista' ssib min hu sid il-proprjetà. Fejn proprjetà tkun individwata tidħol fis-seħħ is-sistema li għamel il-Gvern preċedenti. Fejn proprjetà mhix indikata ta' min hi hemm żewġ kwistjonijiet fosthom dik li qed tuża flus il-poplu fi proprjetà privata u li se tonfoq flus li mhux se tiġborhom. L-appell dejjem għandu jkun li s-sidien jieħdu ħsieb il-proprjetajiet. Mhux sew li tmur timxi u ssib skart u ġrieden ħerġin minn kullimkien." I
d-Deputat Nazzjonalista George Pullicino qal li, "Illum kunsill lokali m'għandux il-possibilità biex dawk il-flus li jkun ħareġ biex inaddaf għalqa jew plot u jittella' l-ħajt. Dan il-Gvern intenzjonat li juża din is-sistema?"
Il-Ministru Owen Bonnici qal li se jivverfiika jekk waqfitx il-politika li kien hemm.

minn inewsmalta.com

Kristy Debono titlob li jiġu investigati l-allegazzjonijiet dwar Alfred Mifsud

Id-Deputata Nazzjonalista Kristy Debono, fid-dibattitu parlamentari dwar l-abbozz ta' liġi għal kontabilità u trasparenza fil-professjoni ta' awdituri, appellat biex issir investigazzjonijiet dwar l-allegazzjonijiet li saru fil-konfront ta' Alfred Mifsud.
Mifsud se jkun il-Gvernatur tal-Bank Ċentrali mill-1 ta' Lulju li ġej. Kristy Debono qalet li din l-investigazzjoni għandha ssir għax Mifsud mhux biss se jkun appuntat fil-pożizzjoni ta' Gvernatur imma dan anke se jirrappreżenta lil Malta fuq livell internazzjonali.

Il-proġett ta' grawnd ġdid għal Valletta FC... għadhom għaddejjin id-diskussjonijiet

Il-kwistjoni ta' grawnd ġdid għall-klabb tal-futbol ta' Valletta, li hi xewqa ta' ħafna partitarji ta' dan it-tim, għadha mhix solvuta u dan hekk kif għadhom għaddejjin negozjati biex jinstab sit adattat fejn dan ikun jista' jsir.
Dwar dan il-proġett saret mistoqsija Parlamentari mid-Deputat Nazzjonalista Claudio Grech li staqsa fiex wasal dan il-proġett. Il-Ministru Evarist Bartolo wieġeb li, "Għadhom għaddejjin in-negozjati ma' Valletta FC biex tinstab art adekwata fejn dawn jistgħu jiżviluppaw il-faċilitajiet sportivi tagħhom.”
Ritratt: Ian Noel Pace

'Ma rridx inkun numru fil-Parlament... nitlob li min kellu l-kartuna r-roża terġa' tinħariġlu'
         - Silvio Parnis

"Ma rridx inkun numru fil-Parlament.” Dan iddikjarah id-Deputat Laburista Silvio Parnis fl-aġġornament fil-Parlament fejn talab li min kellu l-Kartuna r-Roża għax hu dijabetiku terġa' tinħariġlu.
Hu tkellem dwar dak li qed jiġri fuq il-Kartuna r-Roża għal dawk li kellhom il-Kartuna Roċa qabel is-sena 2012. Dawn il-persuni li kienu dijabetiċi qabel is-sena 2012 u kellhom il-Kartuna Roża kellhom dritt li jibqgħu jġeddu l-Kartuna r-Roża. Hu talab lill-Ministru jara li kull min kellu l-Kartuna r-Roża għax huwa dijabetiku jiġi kkuntattjat u terġa’ tinħareġ din il-Kartuna r-Roża.
Talab ukoll lill-Ministru jieħu azzjoni dwar mijiet ta’ nies li qalbulhom il-pilloli minn fuq il-Kartuna r-Roża għal fuq il-Kartuna Safra kontra r-rieda tagħhom u b’ hekk tilfu ħafna drittijiet li kellhom. Dan minkejja li fit-tweġiba li kellu mill-Ministru kienet tgħid li permezz ta’ Avviż Legali fl-2012 id-Diabetes Mellitus Type 1 u Type 2, flimkien mat-Tuberkolożi, il-Poljo u l-Lebbra tneħħew minn fuq l-Iskeda II (Il-Kartuna r-Roża) u żdiedu mal-Lista tal-Kundizzjonjiet Kroniċi li jaqgħu taħt l-Iskema V (Il-Kartuna s-Safra).
Fl-2012 il-pazjenti li kienu jbatu mill-kundizzjoni tad-dijabete ngħataw l-għażla jekk jaqilbux għall-Kartuna s-Safra jew jibqgħux fuq il-Kartuna r-Roza. Il-kelliem qal li għaldaqstant, minkejja l-ispjega ċara tal-ministru, mhux hekk qed jiġri. Hu talab laqgħa urġenti mal-Ministru għas-Saħħa. Dan biex dawk li kellhom il-Kartuna Roża qabel 2012 għax kienu dijabetiċi u ġiet imneħħija kontra r-rieda tal-pazjenti jiġu avviċinati biex terġa' tingħata lura din il-Kartuna Roża bi dritt permezz tal-Avviż Legali tas-sena 2012.
minn inewsmalta.com

Tagħmir ġdid minn operaturi tal-irziezet tal-ħut biex jinġabar iż-żejt

Id-Deputat Nazzjonalista Carmelo Mifsud Bonnici talab fil-Parlament jekk hux possibbli li ssir evalwazzjoni u investigazzjoni ta’ ġbir ta’ dak li qiegħed jissejjaħ mir-residenti ta’ Wied il-Ghajn bħala “xaħam“ li qiegħed jiġi allegat li joħroġ mill-irziezet tal-ħut u li għal numru ta’ drabi qed jinġabar mal-mollijiet tal-istess post.
Il-Ministru Josè Herrera wieġeb li, "Ninsab infurmat li minbarra prattiċi ġodda ta’ kif titma' l-ħut, sabiex jitnaqqas il-ħruġ ta’ żejt mill-ikel tal-ħut fl-ibħra tal-madwar, iż-żewġ operaturi fl-inħawi ta’ Wied il-Għajn, minn dan l-istaġun, se jibdew jużaw tagħmir sabiex iż-żejt li joħroġ fl-ilma ta’ madwar il-gaġeġ, jinġabar. Dan l-iskart jiġi pproċessat skont ir-regolamenti viġenti. Barra minn hekk il-Ministeru m’għandux provi konkreti li dan l-hekk imsejjaħ xaħam huwa verament ġej mill-gaġeg tal-ħut u jista’ jkun possibbli wkoll li jiġi minn proċessi naturali."

Ritratt: Ian Noel Pace
minn inewsmalta.com

Il-Fortizza ta' Delimara... il-Gvern miftuħ għal kull suġġeriment

Waħda mill-fortizzi kbar ta' żmien l-Ingliżi hi bla dubju ta' xejn il-fortizza ta' Delimara. Fortizza li minn żmien għal żmien saru dikjarazzjonijiet dwar il-bżonn li ma tibqax mitluqa.
Staqsa dwar dan id-Deputat Nazzjonalista Karl Gouder, bil-Ministru Owen Bonnici jgħid li, "Il-fortizza ta’ Delimara hija post ta’ valur imprezzabbli u hija verament ħasra li tinsab fl-istat li tinsab. Il-verità hi li pajjizna għandu ġawhar storiċi mferrxin ma’ kull rokna tal-gżira u sa ftit ilu kien għad kellna l-iktar forti imponenti – Sant’Anġlu u Sant’Iermu – fi stat mitluq u abbandunat. Jaqbel miegħi l-interpellant li fl-aħħar snin ġbidna ħabel wieħed biex iktar siti jiġu restawrati. Intant il-Gvern jinsab miftuħ għal kull idea u suġġeriment dwar din il-fortizza."

Ritratt: Ian Noel Pace
minn inewsmalta.com

Mhux se jsiru mirakli u mhux se neliminaw l-għargħar, imma nikkontrollawh' 
            - il-Ministru Joe Mizzi

 

    Dwar il-proġett tal-għargħar li sar madwar Malta, il-Ministru għat-Trasport Joe Mizzi iddikjara li dan il-proġett mhux se jelimina l-għargħar f'diversi partijiet madwar Malta iżda sar biex jikkontrolla l-għargħar.

    Meta mistoqsi fil-Parlament, il-Ministru Mizzi qal li, "Il-proġett tal-għargħar, li jikkonsisti f'mini, kien inbeda minn gvern preċedenti. Dan iżda kien waqa' lura u kien hemm riskju li jintilfu xi fondi. Impenjajna ruħna mal-kuntratturi biex ix-xogħlijiet jitħaffu. F'dan il-proġett kien hemm ħafna intoppi speċjalment minħabba li xi drabi beda jiskula d-drenaġġ. Issa dan il-proġett hu komplut u qed jaħdem. Mit-testijiet li saru jidher li l-għargħar se jonqos drastikament. Għamilna tim biex kontinwament jitnaddfu l-mini. Għandna inġenji ukoll biex dan isir. Mhux se jsiru l-mirakli u mhux se jeliminaw l-għargħar imma jikkontrollaw l-għargħar."

    Legali jew le li ilma tax-xita jintefa' fid-drenaġġ?

    Bid-Deputat Nazzjonalista Toni Bezzina jistaqsi għal darba darbtejn jekk hux legali jew le li ilma tax-xita jintefa' fis-sistema tad-drenaġġ, il-Ministru għat-Trasport Joe Mizzi qal li, "Mhux se kun prużuntuż u ninterpreta xi liġi.” Huwa enfasizza li, "Jien nifhimha li l-ilma ma titfgħux fid-drenaġġ u trid issalvah. Jien nemmen li l-ilma hu riżors importanti u għandu jkun preservat."

    Toni Bezzina staqsa dan wara li l-Ministru Mizzi, waqt li kien qed iwieġeb mistoqsijiet Parlamentari, qal li kien hemm problemi b'xogħlijiet fuq ċerti proġetti għax instab li kien hemm ilma tax-xita li kien qed imur fid-drenaġġ. Dwar proġett biex jitnaqqas l-ilma tax-xita f'Ħal Lija, il-Ministru Mizzi qal li, "Jien naf x'jiġifieri f'dik it-triq. Jien kont spiċċajt ġo sprall u din mhux tad-daħk. Meta bdew jitħaffru l-mini f'Ħal Lija, id-drenaġġ beda jinfiltra fil-mini u kellna naraw kif se nsolvuha. Tkellimna mal-Korporazzjoni tal-Ilma (WSC) u dawk jgħidulek iva iva. Fl-aħħar il-WSC aċċettat li tagħmel ix-xogħlijiet tad-drenaġġ. Waqt li bdew jinqalgħu l-katusi tad-drenaġġ instab li kien hemm servizzi oħra fosthom cables tat-telefon. Kellhom jibdew jagħmlu biċċa biċċa tat-triq biex isalvaw il-cables. Wara li lestejna dik il-parti, id-drenaġġ li kien joħroġ meta tagħmel ix-xita, naqas."

minn inewsmalta.com

Is-serq mill-Kunsill Lokali tal-Belt….installati
CCTV u persuna se titressaq l-Qorti

Wara rapporti ta' serq mill-kunsill lokali tal-Belt Valletta, sar magħruf li ġew installati CCTV's fl-uffiċini kollha tal-istess kunsill.  L-investigazzjonijiet tal-Pulizija għadhom għaddejjin u fil-jiem li ġejjin il-Pulizija se tressaq persuna l-Qorti.
Staqsa dwar dan id-Deputat Laburista Ettienne Grech, bil-Ministru Owen Bonniċi jwieġeb li "Kunsill Lokali tal-Belt Valletta informa lid-Direttur tal-Gvern Lokali bis-serqa li saret f'Diċembru li għadda. Il-Kunsill installa sistema ta’ CCTV fl-uffiċini kollha. L-investigazzjoni tal-Pulizija għadha għaddejja. Intant kien hemm ukoll persuna impjegata mal-Kunsill li kienet ukoll suspettata dwar serq wara li din il-persuna kienet irrappurtata minn kuntrattur. Il-Pulizija ser tressaq lil din il-persuna l-Qorti. Il- Kunsill informa mill-ewwel lid-Dipartiment għall-Gvern Lokali bil-każ peress li ttermina l-impjieg tal-persuna. L-investigazzjoni tal-Pulizija, għadha għaddejja."
minn l-orizzont

Il-Pjazza tat-Tritoni se tkun pedonali,
bil-kiosks u bis-siġar

F'informazzjoni li ngħatat fil-Parlament għall-mistoqsija tad-Deputat Nazzjonalista Claudio Grech, intqal li l-pjazza tat-Tritoni  barra Bieb il-Belt se tkun pedonali, bil-kiosks u bis-siġar.
Fi tweġiba Parlamentari l-Ministru għat-Trasport Joe Mizzi qal li  "ninsab infurmat li bħalissa il-Korporazzjoni għar-Riġenerazzjoni tal-Port il-Kbir għaddejja bil-laqgħat mal-imsieħba kollha biex tiffinalizza l-pjanti u l-applikazzjoni għal permess tal-Pjazza ta’ Tritoni bil-ħsieb li parti kbira tkun żona pedonali, isir pavimentar ġdid, tiġi organizzata lokazzjoni ta’ taxis u karozzini flimkien mal-kiosks u jinżergħu numru ta’ siġar."
minn l-orizzont

Salvati 2,500 immigrant fi tmiem il-ġimgħa

Fi tmiem il-ġimgħa il-Gwardi tal-Kosta Taljani salvaw xejn inqas minn 2,500 immigrant. B'kollox saru xejn inqas minn 20 operazzjoni ta' salvataġġ.

Medecins Sans Frontieres kellhom abbord il-bastiment Dignity madwar 250 immigrant u jinsabu fi triqithom lejn Sqallija.
Is-Sibt ġew salvati 1,348 immigrant u l-Ħadd ġew salvati 1,230 immigrant.
minn inewsmalta.com

'Nippretendi li jorħsu l-prodotti tal-ikel bla glutina' - Chris Fearne

Hekk kif illum il-persuni li jbatu mill-kundizzjoni tas-Coeliac, li jfisser li ma jistgħux jieħdu prodotti tal-qamħ, qed jixtru l-ikel li jkun bla gluten minn ħwienet madwar il-pajjiż, il-Ministru għas-Saħħa, Chris Fearne iddikjara li hu jippretendi li issa għandhom jorħsu l-prodotti tal-ikel bla gluten. Hu qal li bħalissa dawn il-prodotti għadhom għaljin.

Il-Ministru Fearne fil-Parlament qal li "s-Coeliac hi kundizzjoni li minħabba proteina li jkun hemm fil-qamħ taffettwalu l-musrana. Gvernijiet differenti kienu qed jaraw li dawk li jkollhom din il-kundizzjoni jieħdu ikel li ma jkunx fih 'gluten'. Dawn kienu jinġabru minn post f'Birkirkara u ċerti prodotti kienu limitati. Per eżempju kienu jieħdu ħobż għal xahar, meta dan iżomm frisk ftit ġranet biss.
Wara diskussjonijiet iddeċidejna li ndaħħlu vawċers fejn issa hemm madwar 60 ħanut f'Malta u Għawdex. Il-gvern joħroġ vawċers darba fix-xahar u jissarrfu minn dawn il-ħwienet. Dawn il-vawċers iservu biex itaffu ftit mill-piż fuq dawn il-persuni peress li l-ikel li ma fih gluten mhux irħis.
Fil-baġit li għadda konna żidna l-ammont għal €45 u għal dawk bil-karta r-roża għal €50. Jekk hemm bżonn naraw is-suq kif qed jirrispondi u jekk hemm bżonn inżidu s-somma." Minn naħa l-oħra d-Deputata Nazzjonalista Claudette Buttiġieġ qalet li dan l-ikel iqum il-flus u sitt panini jiswew €5. Hi saħqet li hemm bżonn li l-valur tal-vawċer jiżdied. Il-Ministru Fearne wieġeb li "hemm żewġ metodi fosthom dak li jiżdied l-ammont tal-vawċer. Jista' jiġri li la kiber is-suq għax illum qed jixtru mill-ħwienet, jien nippretendi li jorħos il-prezz. Nistenna li jorħsu l-prezzijiet."

minn inewsmalta.com

Qed issir reviżjoni sħiħa fis-sistema tal-kondotta - Il-Prim Ministru

Il-Prim Ministru Joseph Muscat, f'intervent fil-Parlament illejla, ħabbar li qed issir reviżjoni sħiħa tas-sistema tal-kondotta, fejn qal li waqt li din se tagħti lil min iħaddem id-dritt li jkun jaf lil min se jħaddem miegħu, din is-sistema mhix se tikkundanna lil xi ħadd li jkun għamel żball żgħir u titfgħu fi żvantaġġ biex isib xogħol.

Il-Prim Ministru Joseph Muscat qal li, “Hu intollerabbli li għandna l-ogħla tkabbir ekonomiku fl-Ewropa, imma fejn jidħlu permessi għal negozju Malta qiegħda lura ħafna. Minn 28 ġurnata li hi llum irridu naslu għal tlett ijiem,” qal il-Prim Ministru.
Il-Ministru għall-Ġustizzja, Owen Bonnici, qal li jaqbel ma' dak li qal id-Deputat Nazzjonalista Beppe Fenech Adami fejn dan enfasizza li hemm bżonn bidla fil-kultura fejn jirrigwarda persuna li jkollhom kondotta mċappsa b'xi reat li jkunu wettqu imma jkunu rriabilitaw ruħhom.
minn inewsmalta.com